السكه شمال بقلم / لولو_محمد ( كامله )

الحلقه ١٩٢

((((((السكة شمال )))))))))))
#لولو_محمد
الحلقه 192
مرام / الحمد لله و الحمد لله انى اطمنت عليكوا لحسن انا دمى نشف اصلا و قاعده مستنيه مازن يكلمنى ابدا معبرنيش قلقت اكتر
صافى / انا هقفل بقى عشان شيماء بتشاورلى شكلها مفيش نوم و هنقضيها رغى للصبح
مرام / صبح ايه بقى مخلاص كلها ساعه و الفجر ياذن
صافى / على رايك
مرام / يلا روحى و انا هكلم مازن اطمنه
صافى / تمام يلا سلام
صافى تقفل و تنط فى السرير جنب البنات و يقعدوا يدحكوا على اللى حصل
.......................................
فى المخزن
سعيد مربوط فى الكرسى و نايم شريف يدخل و يشاور للراجل يجيب جردل مايه و يكبه فوش سعيد يصحى و هو بيصرخ
سعيد / ايييييييه
شريف / صباح الخير يا حبيبى ازيك وحشتك صح عامل ايه
سعيد / انت مش خدت اللى انت عاوزه عاوز منى ايه بقى يا اخى
شريف/ اخص عليك يا سعيد لا والله كدا ازعل هى الاقامه عندنا مش عجباك و لا ايه اكل و اكلناك شرب و احلى مايه ساقعه و بالجردل مش بالكوبايه عشان تعرف اننا اهل كرم و مبنستخسرش فى ضيوفنا حاجه .. صحيح اخص عليا بتكلم معاك كدا منغير متفطر ايه يا دودو مش تفطر حبيبى
الراجل يضربه بوكس فوشه
سعيد / هقتلك يابن الكلب والله لاقتلك
شريف / ايه يا دودو الفطار معجبش حبيبى ليه
الراجل ينزل فى سعيد ضرب لحد ميقع بالكرسى فى الارض الراجل يعدله
شريف / انا كنت ناوى اخليك تطلع بس العمر مش بعزقه فخليك معانا
سعيد / عاوز ايه قولى عاوز فلوس عاوز كام
شريف / بقى انا مقعدك فى فندق خمس نجوم و تقولى فلوس دا افخم مالزريبه اللى اتربيت فيها يا حيوان
سعيد / حقك حقك تعمل اكتر من كدا امال عاوز ايه
شريف / لما جيت قولتلك ان انا اللى بربى الكلاب اللى زيك
سعيد / و قولتلى كمان انى قربت من واحده تخصك شكلها نورا مش كدا انت بقى الواد اللى كانت مصحباه
شريف / انت حظك حلو ان انا مش هو عشان انت لو وقعت فى ايده كان زمانك منفوخ نفخه الخرفان قبل العيد 
سعيد / ماشى خليها عليا المرادى سبتهالك مش هقرب منها تانى
شريف يروح يمسكه من وشه و يضغط على خدوده جامد
شريف / نورا او غيرها من النهرده تعيش محترم انا عارف بيتك و زى مجبتك المرادى هعرف اجيبك تانى
سعيد / ماشى
شريف / فكه يا بنى
شريف يمشى و الراجل يروح يفك سعيد
........................
فى حمام الكليه
اريج و صحبتها فى الحمام
البنت / شوفتى الصوره دى
اريج تاخد الموبايل من صاحبتها
اريج / صافى وهدان احلى مفاجاه دى و لا ايه شريف احلى علقه دى و لا ايه
البنت / مهو طلع رومانسى اهو امال سبتيه ليه بقى
اريج / يا بنتى قعد يدعيلى الفقر و انا غلبان و امى عيانه و اخواتى عاوزين يتجهزوا و حاجه اخر قرف
البنت / و راح اشترالها خاتم سولتير بالشئ الفلانى
اريج / يلا اياكش يولعوا ببعض
البنت / بس البنت صاروخ يا اريج بصى صورها دى موديل بجد
اريج / بت شمال زى كل شله مازن
البنت / بصى البايو بتاعها دى اطول منى عملت كل الحاجات دى امتى
اريج / هو حد هيعد وراها انتى كمان
مرام و بنت تانيه يدخلوا الحمام و هما بيدحكوا البنت تدخل الحمام و مرام تقف مع اريج و صحبتها
البنت 1/ ازيك يا مرام
مرام / اهلا يا اميره ازيك وحشانى يا بنتى فينك
اميره / هكون فين يعنى انتى اللى معدتيش فاضيه خالص حتى صفحه الاكل معدتيش بتفتحيها و سبتينا نحتاس
اريج / و هى هتحتاج للصفحه فى ايه بقى مخلاص
مرام / مش هرد عليكى على فكره انا مش عارفه ايه مشكلتك كل متشوفينى لازم ترمى نفس التعليق هو انا المطلوب منى ايه بالظبط عشان انا مش فهماكى
اميره / هى متقصدش
اريج / لا اقصد بصي يا مرام بطلى حركات المثاليه بتاعتك دى مبناكلش منها
مرام / و ايه كمان
اريج / تقعدوا تتمسكنوا و تعيشوا فدور الفقر لحد متصعبوا علينا و فى الاخر
مرام / انتى ايه مشكلتك بالظبط لا حقيقى ايه مشكلتك
البنت تطلع من الحمام
اميره / كفايا يا اريج
اريج / و كفايا ليه ... لتكونى فاكره نفسك حاجه فوقى مازن بتاعك ده مش هينفعك انتى مجرد صيده جديده لكن بكره يزهق منك و يرميكى و ترجعى للفقر تانى و ساعتها الف من يشمت فيكى
البنت / ايه قله الادب دى على فكره انتى غلاويه اوى يا اريج بس تعرفى انتى كدا عشان شريف سابك و ارتبط بالمودل انتى عماله تفركى من ساعه ماحرجتك
اريج / شريف مين ده انا ارتبطت بيه اصلا لما قعد يعيطلى و رسم عليا الفقر و الغلب و امى عيانه و اخواتى يتامى و بصرف عليهم و طلع مدكن تحت البلاطه و لا تلاقى السنيوره هى اللى جابت الخاتم
مرام / لا هو اللى دفع كل مليم فيه
اريج / والله و ماله مهو عارف انه هيلم فلوسه بعد الجواز اصلا شريف لما كلمنى كان فاكر ان تحت القبه شيخ و لما عرف ظروفى خلع عشان تعرفوا قد ايه هو وصولى
مرام / دا شريف مش كدا ؟؟ باماره ايه بقى ان شاء الله باماره انك انتى اللى كنتى بتدورى على حجج عشان تكلميه و لا بامارك انك سبتيه لما جالك عريس احسن و اتحايل عليك و انتى اللى قولتى مفيش نصيب و لا محاولاتك انك تكلميه بعد مفسختى دلوقت هو اللى كان بيجرى وراكى
اريج تحاول تضرب مرام بالقلم مرام تمسك ايدها
مرام / انا هتخيل ان الحوار ده محصلش عشان ممسحش بالباقى من كرامتك الحمامات يلا يا منه
مرام و البنت اللى معاها يمشوا و اميره تبص لاريج من فوق لتحت و تطلع وراهم مرام تقابل مازن بره
مازن / طولتوا اوى فى الحمام بارتى المرادى
مرام / هو احنا لازم نحضر السيكشن ده و لا ينفع نروح انا بجد تعبانه اوى
اريج تطلع مالحمام تبصلهم من فوق لتحت مازن ياخد باله
مازن / هو فى حاجه حصلت و لا ايه
مازن يبص لمنى تبص لمرام و تبص فى الارض
مرام / الحمام خنقه و دخت ممكن نروح
مازن / اكيد يلا تعالى
مازن و مرام يمشوا من الناحيه التانيه نورا تدخل الكوريدور و تروح مكتب شؤن الطلبه
نورا / هى مدام احسان جت النهرده
موظف / لا والله دى واخده اجازه الاسبوع ده
نورا / يعنى مصالح الطلبه تقف اسبوع بحاله عشان مدام احسان واخده مفتاح الدرفه معاها
الموظف يسيبها و يمشى
نورا / دا ايه القرف ده اوووف
نيفين تدخل لابسه عبايه خليجى و طرحه منفوخه
نيفين / ايه ده نورا عاش من شافك يا بنتى ازيك
نورا / ايه ده نيفين ازيك
نيفين / دى احلى مفاجاه شوفتها فى حياتى انتى مش متخيله انتى وحشانى قد ايه
نورا / و انتى كمان بس ايه الحلاوه دى اتغيرتى خالص انا معرفتكيش
نيفين/الجواز بقى بقولك ايه انتى وحشانى اوى تعالى نروح الكافتريا نشرب حاجه و نقعد نحكى سوا
نورا / امممم بصى انا مش عاوزه احتك باى حد من الجروب القديم
نيفين / يا ستى بسيطه انا عربيتى بره تعالى نروح نقعد فى اى حته بره
نورا / ماشى يلا
.............................
فى شارع على
عربيه تقف و ترمى سعيد عريان قدام باب العماره و تطير و الناس تتلم و تسنده يزقهم و يجرى على شقته يقابل ام سعيد
ام سعيد / يا حزنى ايه اللى عمل فيك كدا يا ولا
سعيد يجرى على اوضته و يرزع الباب
ام سعيد / والله لاتصل بابوك يشوف فى ايه
ام سعيد تجيب التليفون و تتصل
ام سعيد / اللحقنى يابو سعيد ... لا ياخويا رجع لسه داخل حالا ... دا راجعلى عريان ... اقسم بالله بالغيار الداخلى بس ... مردش عليا و سابنى و دخل اوضته ... الواد شكله مضروب علقه موت ... ابوس ايدك متتاخرش ... بالسلامه ياخويا
ام سعيد تقفل السكه و تروح ناحيه اوضه سعيد تحاول تفتح الباب مبيفتحش
ام سعيد / يا سعيد رد عليا يا حبيبى مين عمل فيك كدا يا سعيد رد عليا يابنى
سعيد من جوه / عاوز انام
ام سعيد / طب افتح طمنى و بعدين نام يا حبيبى قوم يا ضنايا طب افتح و دخلنى و كمل نوم متفتح بقى الله يووووووه
سعيد من جوه / يووووه عليكى انتى مش فاتح سبينى انام و لما اصحى هبقى احكيلكوا كل حاجه ارحمونى
ام سعيد / خلاص خلاص جيب العواقب سليمه يارب
..........................
فى كافيه
نيفين / بس يا ستى و سافرت معاه و قضيت معاه اجمل ايام حياتى راجل اهبل وواحده واحده سحبت ابويا و امى و اختى و عشنا هناك معاه و جابلى فيلا لوحدى و قسمنا الاسبوع بينى و بين مراته
نورا / بالبساطه دى
نيفين / مش بقولك راجل اهبل تاخدى عنيه بشويه دلع حبه مياصه
نورا / مكنتش متخيله ابدا ان كل ده يطلع منك
نيفين / اللى شوفته مكنش شويه و بصراحه انا تعبت من كتر ماتلعب بيا جه دورى بقي
نورا / بس نفذ وعده و سابك تنزلى
نيفين / هو بمزاجه و لا ايه لما لقيت الدلع مش واكل صدرتله البوز المصري و الاعزار كترت نزل معايا و جابلى حته فيلا يرمح فيها الخيل و اهو رايح جاى عليا
نورا / اتغيرتي خالص يا نيفين
نيفين / للاحسن صدقيني المهم سيبك منى انتى ايه اللى نزلك مصر مش كنتى ارتاحتى
نورا / و لا ارتحت و لا نيله هناك كنت بفضل واقفه على رجلي طول اليوم امسح فترابيزات و انضف مطرح الناس و تستحملى رزاله ده و قنعره دى مكنتش مرتاحه يعني
نيفين / بس خطيبك شكله جدع
نورا / اه جدع ابن حلال
نيفين / ربنا يتملك على خير
نورا / و انتى كمان ربنا يصلحلك الحال
نيفين / تعرفي يا نورا انا فرحانه اوى انى قابلتك انتى كنتى من اول يوم ليا في الكليه اعز اصحابي عشتي معايا اجمل و اسوء ايامي
نورا / و انا كمان فرحانه انى اطمنت عليكي
نيفين / قابلتى حد مالشله
نورا / لا و مش عاوزه اقابل و ياريت ميعرفوش انى نزلت مصر من اساسه و يا سلام لو ينسوا ان انا عايشه
نيفين / هههههههههههه طول عمرك دمك خفيف يا بنتي اللى متحتاجيش النهرده لوشه بكره تحتاجى لقفاه طب تصدقي الحيوان اللى ما يتسمي انس طلع مصورني و كان عاوز يبتزنى منجانيش من ايده غير مازن
نورا تبتسم و ساكته
نيفين / و انتى كمان شكلك شوفتى كتير الفتره اللى فاتت لو تحبي تحكى انا سمعاكي
نورا / مفيش حاجه تتحكى عادى
نيفين / بصي هديكي رقمي الجديد و فى اى وقت كلميني و اهو نبقي ضهر و سند لبعض و لا ايه
نورا / تمام ماشي
........................
فى كافيه تاني
شريف / انسي العمر مش بعزقه ياختى
صافى / ههههههههههههههههههه مكنتش اعرف انك جبان اوى كدا
شريف / والله جسمى لسه بيوجعنى
صافى بدلع / سلامه جسمك يا شيكو
شريف / هاه
صافى بدلع اكتر  / بقولك سلامتك
شريف / استغفر الله العظيم استغفر الله العظيم استغفر الله العظيم
صافى / فى ايه يا شريف مالك
شريف / خايف اضعف من دلعك ده انا برده غلبان و يتيم
صافى بدلع / يا حرررااااام
شريف / انا بقول نقوم نكتب الكتاب و ارجع معاكى لندن نقضي شهر العسل هناك
صافى /ههههههههههههههههههه
شريف / يارب كتير عليا والله
صافى / مفيش حاجه كتير عليك يا شيكو
شريف / طبعا انتوا منمتوش تانى امبارح و فضلتوا طول الليل تقطعوا ففروتى
صافى / ههههههههههههههههههه بالمناسبه انت عاوزنى اتحجب
شريف يبتسم و يسكت
صافى / تمام عاوزنى اتحجب بس مش عاوز انت اللى تقول عشان القرار يجى منى صح
شريف / صح
صافى / انا والله ناويه بس قولت لما اكبر شويه
شريف يبتسم تانى
صافى / و كمان لندن و الدراسه هحس انى اوود كدا هناك
شريف / لا مش هتحسي انك غريبه و لا حاجه دا شيطانك
صافى / خايفه يجى عليا يوم و احس انى اتسرعت
شريف / على فكره انتى اللى فتحتى الموضوع مش انا
صافى / ايوه بس اصل انا اتكلمت كتير بالموضوع ده مع اخواتك امبارح
شريف / انا عاوزك تتحجبى مش هنكر و بالنسبالى الحجاب فرض مفيش حاجه اسمها اقتناع و مقتنعش مش بمزاجك بس فنفس الوقت مش هجبرك عليه
صافى / ليه هو انت مش بتغير عليا
شريف / جدا بغير موت لما بشوف حد بيبصلك ببقي هتجنن و دا مش من النهرده دا من زمان
صافى / فى الفرح فى الحاره
شريف / انتى كنتى مستفزه جدا يوميها ايه اللى انتى كنتى لبساه ده يوميها بجد حرقتي دمى لا و كمان بتبجحى و تتخانقي معايا
صافى مبتسمه
شريف / نعم
صافى / انا بحبك على فكره
شريف / اوعى ليثبتوك
صافى / اخص عليك يا شريف
شريف / عيون شريف
صافى / بص هو مبدئيا انا قايله مالاول انا مش معترضه بس ادينى شويه وقت اظبط نفسى عشان ابدء صح
شريف / ماشى
صافى / حبيبى انت
شريف / يا معزبنى انت
صافى بدلع / اخص عليا طب والله الف اخص
شريف / لا احنا نقوم نروح لحسن هنفرج علينا الناس
صافى / هههههههههههههههههههههههه
..............................
فى شقه على
ماجده / انا عارفه الناس دى جرالهم ايه اتسرعوا
ام سعيد / دول قلبوه فكل حاجه حتى هدومه
ماجده / كان سبهالهم كان سبلهم كل حاجه بلا نيله
ام سعيد / والله قولتله كدا قولتله استفدت ايه بقى مهم ضربوك اهم كنت ارميلهم الفلوس و اطلع اجرى يقولى مبقاش راجل و شوفى خلقهم عامله ازاى شوفت دخلتك عليا بال ...
ام سعيد تسكت لما تشوف نورا تدخل تحط الشاى
ام سعيد / تسلم ايدك يا حبيبتى
نورا / الف هنا عن اذنكوا
نورا تدخل الاوضه تلاقى اسراء بتتسنط عالباب
اسراء / شوفتى ولاد الحرام عملوا ايه فى سعيد
نورا / ميخصنيش
اسراء / والله مع انى شامه ريحتك فى الموضوع
نورا / ليه ان شاء الله و انا مالى اصلا
اسراء / انتى بتكرهيه
نورا / و هو بصراحه يتحب اوى بلا قرف
اسراء / انتى مصره تعصبينى
نورا / يعنى اعملك ايه عشان تصدقى انه واد زباله
اسراء / انا عارفه ايه البلاوى اللى بتتحدف علينا دى اوووف
اسراء تطلع بره و تروح اوضه كريم تلاقيه بيلعب بلايستاشن كوره تروح تقعد جنبه و تاخد مخده فى حضنها
كريم / شديتى مع نورا تانى
اسراء / كبر مخك
كريم / مكبره
اسراء / سمعت ان سعيد اخد علقه موت
كريم / مش هتبطلى ترمى ودنك بقى
اسراء / هو مش صاحبك مش هتنزل تسال عليه
كريم يسيب الدرع و يبص لاخته
كريم / و يفرق معاكى فى ايه بقى ان شاء الله اسال عليه و لا مسالش
اسراء / ميفرقش انا سمعت مامته بتتكلم مع ماما قولت اقولك تقوم بالواجب
كريم / و نرفزتك على نورا عشانه و محاميتك ليه كانت واجب برضه
اسراء / يعنى هو سعيد ده اول مره نعرفه لكن البت دى احنا منعرفهاش احنا مشوفناش من سعيد حاجه وحشه
كريم / انا بقى شوفت و لما واحده تقول ان سعيد دايقها يبقى سعيد دايقها
اسراء / و مدام هو وحش كدا بتدخله بتنا ليه بقى ان شاء الله
كريم / مبدخلوش هو اللى بيفرض نفسه و عشان كدا لما بيجى بحرج عليكى تخرجى مالاوضه لحد ما يمشى
اسراء / والله
كريم / اسراء اتمسى و قولى يا مسا
اسراء / يعنى امشى فى الشوارع و لا احبس نفسى فى الحمام يعنى اوضتى و بنت الكلب دى محتلياها و انت و مش عارفه اقعد معاك و ماما و منعانى اقعد معاهم و بتقول كلام كبار اروح فين يعنى
كريم / روحى اوضه امك و نامى وراكى كليه الصبح
اسراء / عيشه تقصر العمر بيت يخنق
اسراء تقوم و كريم متابعها يسيب الدراع و ينزل و يرزع الباب وراه
ام سعيد / هو فى ايه
ماجده / والله معرف انا والله تعبت فى البيت ده المشاكل مبتخلصش ابدا
ام سعيد / قال و انا اللى جايه اشكيلك همى
ماجده / ههههههههههههههه على رايك اتلم المتعوس على خايب الرجا
ام سعيد / هههههههههههههه على رايك ياختى
...........................
فى شقه مرام
مازن / برده مش ناويه تحكى ايه اللى حصل
مرام / انت زنان كدا ليه مقولتلك مليون مره محصلش حاجه اغنيهالك عشان تصدقنى
مازن / مهو انا مصدقتكيش من اول مره فلو قولتيها تشيليون مره برده مش هصدق
مرام / اشمعن انا بقى مبزنش كدا و بعدين واحد غيرك شافنى مش فالمود يفك عنى يدلعنى مش يفضل يزن يزن يزن يزن فى ايه
مازن / خلاص خلاص متتعصبيش
مرام / انا جعانه و عندى كبده بلدى جوه تيجى نقوم نعمل سندوتشات و نتعشى و نخربها
مازن / ماشى انا هنزل اجيب ساقع و شبسى بقى عشان نخربها بصحيح
مرام / استنى مدام هتنزل بقى هات عيش فينو و لا تحب تاكل بلدى عادى انا عندى عيش بلدى جوه شوف بتحب ايه
مازن / بحبك انتى يا قمر
مرام تدحك و مازن يقوم و ينزل و مرام تروح تخبط على مديحه تفتح
مرام / اتعشيتو
مديحه / لسه هناكل اهو
سميحه / تعالى يا مرام حماتك بتحبك
مرام تدخل تلاقى صينيه عليها شاى بلبن و بقسماط
مرام / لا سيبك مالكلام ده انا هعمل كبده
مديحه / دلوقت
مرام / جعانه و نفسى هفانى عليها و مازن نزل يجيب ساقع و شيبسى قولت اقولكوا متاكلوش كويس انى لحقتكوا هو محمود لسه مجاش
مديحه / زمانه جاى لسه مكلمينه و قال جاى فى السكه
مرام / تمام هروح انا اعمل الكبده بقى و لما اخلص هقولكوا
مرام تمشى و مديحه تروح تقعد جنب سميحه و تسقى البقسماط
سميحه / هى مش قالتلك متاكليش
مديحه / يعنى اللبن ده يترمى
سميحه / هههههههههههههه يلاهوى عليكى يا مديحه ههههههههههههههههه
مديحه / ادحكى يا حجه حقك تدحكى
..........................
على ناصيه الحاره
محمود بيركن عربيته جنب عربيه مازن و ينزل يدخل الحاره يقابل سلامه محمود يعديه
سلامه / محمود يا استاذ محمود
محمود / نعم يا سلامه
سلامه / جرا ايه يا حوده بقى ده اسمه كلام برده
محمود / عاوز ايه يا سلامه انا راجع تعبان و مش شايف قدامى
سلامه / انا حلفتلك مليون مره ان الكلام طلع من بقى زى محصل و لا قولت ست مرام نازله لوحديها و لا اى حاجه من اللى اتقال
محمود / حوار و اتقفل
سلامه / امال انت و مازن باشا زعلانين مننا ليه بس و لا سلام و لا كلام طب دا المعلم فى الرايحه و الجايه يكدرنى و انا و ربنا معملت حاجه
..................................