(((((((((السكة شمال )))))))
#لولو_محمد
الحلقه 143
فى شركه تانيه
جميله قاعده عالمكتب تليفون يرن
جميله / ايوه ... خليه يتفضل طبعا
الباب يتفتح و صفوت يدخل و جميله تقوم عشان تسلم عليه
جميله / اهلا و سهلا يا صفوت بيه انا سعيده جدا ان حضرتك قبلت دعوتى
صفوت / و انا اقدر ارفض
جميله / اتفضل حضرتك .. تشرب ايه
جميله و صفوت يقعدوا
......................................
صفوت / اهو مظبوط لو ينفع
جميله / حضرتك تؤمر
جميله تدوس زرار يدخل اوفيس بوى
جميله / اتنين قهوه مظبوط .. نورتى يا صفوت بيه الحقيقه انا بحكم انى عشت عمرى كله بره فانا للاسف عمليه جدا فمش هضيع وقت حضرتك ووقتى و هدخل فى الموضوع علاطول
صفوت / يستحسن طبعا
جميله / حضرتك عارف انى بقالى فتره بسيطه جدا هنا فمصر و بس للاسف الفتره دى كلها قضيتها فى تجهيز الشركه و الاجراءات مش عاوزه اوصف لحضرتك الروتين فى مصر قتلنى قد ايه
صفوت / ازاى بس حضرتك لو كنتى قولتيلى كنت ساعدتك
جميله /ميرسى كتير كلك زوق الحقيقه انا كنت طامعانه فى حضرتك انك تخلصلى حوار شحن المكن للمصانع بتاعتى شركات الشحن هناك عاوزه تاخد منى نسبه كبيره جدا دا غير الجمارك هنا كدا المكن اللى هنزله السوق هيبقى سعره عالى جدا و مش هقدر اسوقه بسهوله خصوصا ان حضرتك عارف انى اسم جديد و الناس مش بتثق بسهوله فى الجديد
صفوت / طب مدا موضوع سهل جدا انا الحقيقه كنت متخيل ان حضرتك عوزه تقابلينى عشان حاجه اكبر من كدا بكتير
جميله / بجد يعنى حضرتك هتساعدنى فى الموضوع ده
صفوت / اكيد انا هبعت حد من عندى يشرف بنفسه عالموضوع ده و اوعد حضرتك ان باذن الله النتيجه هتكون مرضيه جدا بالنسبالك
جميله / انا سعيده جدا انى اتعرفت على حضرتك
صفوت / الشرف ليا جميله هانم
جميله / طب و بالمناسبه دى ياريت حضرتك تقبل عزومتى النهرده على العشا و اهو زى مبتقولوا هنا فى مصر يبقى بنا عيش و ملح
صفوت / الحقيقه النهرده مينفعش لانى للاسف مرتبط بمواعيد بس لو خليناها بكره انا متاكد انى هكون سعيد جدا
جميله / خلاص اتفقنا
صفوت يقوم و جميله تقوم
صفوت / و انا باذن الله النهرده هبعت لحضرتك الموظف عشان يتفق معاكوا و بالمره بكره تبلغينى باى حاجه حضرتك تحبى تضيفيها او تغيريها
جميله / لا اكيد مش هنختلف
صفوت / باذن الله استاذن انا
صفوت يمشى و جميله توصله لحد الباب
.........................
فى العربيه عند مازن
مازن / شاطر اوى سامح ده مش كدا الحقيقه عملوا شغل ممتاز فى فتره قليله اوى انا هصرفلهم كلهم شهر مكافاه عشان يكملوا باقى المشروع بنفس انتى ايه رايك
مرام / فكره كويسه واضح انهم تعبوا فعلا
مازن / امال مالك ساكته ليه زعلانه عشان اتاخرنا
مرام / ابدا هو الشركه دى بتاعتك من زمان
مازن / ايوه دى واحده من شركات المقاولات التابعه للمجموعه بتاعتنا
مرام / خدت بالى بس مش شركات منتصر دى تبع والدك و لا انا اتلخبطت
مازن / انتى ناسيه ان ماما الله يرحمها كان ليها نسبه كبيره فالشركه و كتبتها كلها باسمى المجموعه دى بقى واحده مالشركات اللى باسمى هى اه تبع مجموعه بابا بس ادارتها ليا و طبعا خالو كان ماسك الموضوع ده و كنت بروح امضى عالورق بس عشان بابا يعنى
مرام / اه
مازن / على فكره الشركه دى تقريبا اكبر و انجح شركه مقاولات فى المجموعه كلها ليها فروع على مستوى الجمهوريه و عملت مشروعات كبيره جدا
مرام / سمعت عنها كتير بس مكنتش اعرف انها بتاعتك
مازن / قال يعنى هتفرق معاكى ههههههههههههههههههه
مرام تبصله و تبتسم و تبص مالشباك
.................................
فى الاسبا
مونى / بتهزرى
مرام / المشكله انى اتلجمت مش عارفه اقوله ولا اعمل ايه طب لو قولتله هيفرق فى ايه طب لو مقولتلوش برده هيفرق فى ايه
صافى / رايي تقوليله
شيماء / بدل ميغير و يرفده
مونى / مازن مش هيعمل كدا
انجى / انا رايي تقوليله
مرام / ايوه اقوله ايه يعنى سامح ده يبقى اللى كنت مخطوباله قبلك
صافى / مهو هيعرف هيعرف و ساعتها هيسالك انتى ليه مقولتليش هتقولى ايه بقى
شيماء / و هو ايه اللى هيفتح الموضوع تانى اصلا سامح ده لو كان عاوز يقول مكان قال فساعتها
انجى / هيقول للمدير بتاعه انا كنت خاطب مراتك هههههههههههههههههههه لا نكته حلوه والله
تقى / انتوا بتتكلموا فتفاهات و سايبين النقطه المهمه
شيماء / مش احنا اتفقنا انك تنقطينا بسكاتك
مرام / يا ستى سبيها يمكن تجيب التايهه يوضع سره فى اضعف خلقه قولى يا ست تقى
تقى / يا ترى سى سامح ده احساسه ايه لما يعرف ان اللى هو سابها اتجوزت المدير بتاعه دا زمانه بياكل فى نفسه دلوقت
مرام / شوفى احنا بنتكلم فى ايه و انتى بتتكلمى فى ايه
صافى /بس للاسف هى ليها وجهه نظر
تقى / اخيرا حد قدر الموهبه
مرام / ههههههههههههههه و اللى انتوا عالم فايقه و رايقه
...............................
فى الشركه
شريف / انا قولتلك هتفتح على نفسك فاتوحه انت فغنى عنها بس بكلم مين انا ؟ انا لو بنفخ فى قربه مقطوعه كانت اتنفخت يا اخى
مازن قاعد حاطت ايده على خده و بيهز رجليه و بيقرقض فضوافره
مازن / طب مهى اكيد اتفاجات برده اكيد هتقولى
شريف / طب و انا محير نفسى معاك ليه هو انا يعنى فاهم انت عملت كدا ليه لما هيفرق معايا الفرق بين انها تقولك او متقولكش اصلا
مازن يبصله
شريف / نعم بتبصلى ليه نعم اؤمر
مازن / يا حبيبى يا قلبى يا عنيا مانت لو تركز فى اى حاجه غير بطنك هتفهم
شريف / معلش خدنى على قد قدراتى كان نفسى اكون عبقري زيك بس تنسيقى مجبش معلش استحمل قدرك معلش
مازن / هو انا لما سالت عنه كنت اعرف انه بيشتغل عندى ؟
شريف / لا
مازن / طب لما عرفت اذيته فحاجه رفدته ؟
شريف / لا
مازن / طيب لما لقيته شاطر مش كافئته
شريف / حصل
مازن / تمام انا بس كل اللى كنت عاوزه انه يشوف مرام معايا
شريف / ليه بقى ايوه هى دى مربط الفرس ليه هيفرق فى ايه طب هو ندم انه سابها هيرجعلها يعنى طب بلاش دى هو شافها معاك المفروض هيعمل ايه هينتحر يعنى و لا يعنى هى لو كانت ارتبطت بيه كان هيبقى هو مكانك يعنى هيفرق فى ايه
مازن / ميفرقش يا شريف ميفرقش مفيش حاجه هتتغير
شريف / تمام يبقى عملنا كدا ليه بقى
مازن / حاجه فنفس يعقوب قضاها خلاص
شريف / رجعنا بقى لنقطه الصفر انتى عاوز تقولها ان اللى اتبتر عليكى زمان و سابك ربنا كرمك بسيد سيده و بقيتى مرات مديره صح
مازن يهز راسه يعنى
شريف / و دلوقت انت متوتر ليه مقالتلكش انه كان الاكس بتاعها لان طبيعى انه ميقولش عشان اكيد خاف من رده فعلك ترفده او تغير منه
مازن / امممم لا مش بالظبط
شريف / بس تقريبا يعنى
مازن / تقريبا
شريف / فانت دلوقت مستنى تشوف مرام هتقولك و لا لا
مازن / ايوه
شريف / طب السؤال بقى ركز معايا فى الحته دى ماشى السؤال هيفرق تقولك و لا لا
مازن / لا
شريف ينفعل / امال موتر امى معاك ليه مالصبح
مازن / ههههههههههههههههههه اعصابك طيب اهدى
شريف / دا ايه دا يا اخى و بعدين واحد غيرك ينزل يبص على البدله يظبط القاعه يرتب الفرح و لسته المعازيم مش يقعد يفكر فالاكس بتاع مراته انت غريب اوى
مازن / اقسم بالله مكان فدماغى و لا حتى سالتها عنه و لا كان فارق معايا بس لما هى حكتلى حسيت بغل يا اخى
شريف / و ارتحت انت كدا
مازن / مهو ده اللى مجننى لا متنيلتش مفرقش معايا
شريف / لا اله الا انت سبحانك انى كنت من الظالمين
شريف يسيب المكان و يمشى
مازن / شريف انت رايح فين ..شيكو
شريف / يا عم بقى انا ناقص جنانكوا عالصبح
شريف يطلع بره و يقفل الباب وراه و مازن قاعد بيدحك
...........................
فى الفيلا بالليل
صفوت / ههههههههههههههههه يعنى انبسطتوا
صافى / جدا بصراحه انا عمرى مشوفت بنات عسل بالشكل ده ربنا يخليهم لمامتهم يارب
صفوت / امين
مازن / عملت ايه فى الاجتماع بتاعك رجعتلك لقيتك مشيت
صفوت / حوار اهبل الحقيقه ضيعت وقتى عالفاضى
مازن / ليه ايه اللى حصل
صفوت / زى مقولت شركه مفتوحه جديده صاحبتها شابه صغيره و واضح انها اول مره تستثمر فى مصر فمحتاسه يعنى
مازن / طب مدام طالبه مساعده مش كان الاولى هى اللى تيجى لحضرتك يعنى
صفوت / يا سيدى مش مشكله اصلا العيب مش عليها العيب على رافت اللى وصلى المعلومات غلط بس اهو لعله خير
مرام / ميمكن دى فرصه يا خالو يعنى مدام حضرتك بتقول انها معندهاش خبره حضرتك تساعدها و تكسب ثواب يعنى محدش بياخد رزق حد يعنى
صفوت / اكيد طبعا و ده بالظبط اللى عملته انا بعتلها حد من العلاقات العامه عندى هيظبطلها كل حاجه و هشرف علىه بنفسى لحد متثبت قدمها فى السوق
مرام تبتسم
صفوت / تيته خلاص جايه بعد بكره باذن الله
مرام / اه باذن الله
صفوت / تيجى بالسلامه مع انك هتوحشينا قوى الفتره الصغيره دى
مازن / هتوحشنا ليه
صفوت / مهى اكيد هترجع بيتها لحد الفرح يا مازن
مازن يبص لمرام و بعدين يبص لصفوت
صافى / يا حراااااام صعب عليا اوى
صفوت / احسن خليه يتربى
مازن / ليه يعنى عادى كام يوم و هترجع تانى مفيش مشكله
مازن عينه تيجى فعين مرام بصاله و مبتسمه يبتسم و يبص فى طبقه و يكمل اكل
...............................
قرب الفجر فى اوضه مرام
مرام تقلق تقوم تشرب شويه مايه و تبص فى الموبايل و بعدين تقوم تروح اوضه مازن متلاقيهوش تنزل الجيم تلاقيه بيتمرن بنش بالدامبل
مرام / كنت عارفه انى هلاقيك هنا
مازن يرمى الدامبل فى الارض و يقوم يقعد تروح تقعد قدامه
مرام / مالك ؟؟
مازن / مالى ؟؟
مرام / مدايق عشان انا مروحه ؟؟
مازن / جدا
مرام / ههههههههههههه فاكر لما قولتلك هاخد على كدا فاكر لما قولتلك اكيد هيجى يوم و اروح
مازن / جه بسرعه اوى
مرام / عشنا فيهم يومين حلوين و بكره ياما هنعيش
مازن / وعد ؟؟
مرام / وعد لسه العمر كلو قدامنا
مازن / امين
مرام / قوم يلا خد دوش سريع كدا و اتوضى عشان تصلى بيا الفجر خلي ربنا يباركلنا
مازن / حاضر
مرام و مازن يطلعوا بره و يطلعوا عالسلم
مرام / هو انت عادى تتمرن كدا منغير كابتن
مازن / هههههههههههههه اه عادى مانا بقالى سنين بتمرن و فاهم كويس انا بعمل ايه
مرام / يعنى ليجيلك مزق و لا حاجه الصليبى منتشر اوى اليومين دول
مازن / ههههههههههههههههههه لا متقلقيش انتى خالص هبقى اخد بالى خصوصا مالصليبى ده حاضر
مرام / انت بتتريق عليا ؟؟
مازن / انا !! لا يمكن ابدا يا نهار ابيض مستحيل
مرام تعوج راسها و تحط ايدها فوسطها و بعدين تسبقه على اوضته يدخل وراها و يقفل الباب
مرام / متتاخرش جوه
مازن / حاضر
مازن يرمى موبايله عالسرير و ياخد غيار و يدخل الحمام و مرام تروح تقعد عالسرير و تفضل تتهز بتنطيت على المرتبه و هى قاعده زهقانه و بتبص حواليها تقوم تفتح البلكونه و تدخل تتفرج عالجنينه و بعدين تدخل تانى و هى زهقانه عينها تقع على الموبايل تقوم تفتحه و تنام على بطنها رجليها ناحيه باب الحمام و تقعد تلعب فى الموبايل و هى بتهز فى رجليها مازن يطلع مالحمام يروح ينام على بطنه جمبها
مازن / بتعملى ايه
مرام / بعمل حمله تفتيش
مازن / ههههههههههههههه و لقيتى حاجه
مرام / لا ملقتش
مازن / و تفتكرى ملقتيش عشان انا نضيف و فالسليم و مبعملش حاجه غلط و لا عشان انا ناصح و بنضف ورايا اول باول
مرام / عشان انت عاوز تعيش سليم
مازن / دى اجابه منطقيه جدا و احييكى عليها
مرام / ههههههههههههههههههه و انت فى الحمام جاتلى فكره خزعبليه لولبيه فزه
مازن / استر يارب
مرام / تعرف انى عمرى مروحت جيم
مازن / عوزانى امرنك
مرام / لا اللعب شويه يعنى
مازن / بس كدا نصلى الفجر و ننزل
مرام / بس خليك حنين عليا انا اول مره
الاذان ..مازن و مرام يبصوا لبعض و يقوموا يصلوا و ينزلوا تحت مازن يقفل الباب اللى برا للجيم بالمفتاح و يدخلوا جوه مرام تقلع الاسدال لابسه بجامه حمالات على برموده
مرام / ينفع اتمرن كدا و لا ايه
مازن / ينفع بس لازم كوتش استنى
مازن يفتح دولاب و يجيب كوتش و يديه لمرام
مرام / بتاع مين ده
مازن / مونى كانت سيباه هنا مره قيسيه كدا
مرام تقيسه تلاقيه مظبوط
مرام / شغال حلو
مازن / تمام تعالى سخنى شويه
مازن يوقف مرام عالتريدميل و يشغل على سرعه بسيطه
مرام / حلو اوى ده خلينا كدا
مازن يروح يقعد عالبنش
مرام / انت بتتمرن بس لما بتكون زعلان
مازن / فالعادى اى وقت فاضى و ليا مزاج بتمرن
مرام / اه بس انت شقتك مفيهاش غير البتاعه دى بتيجى هنا بقى تتمرن عالحاجات التانيه
مازن / هنا او فى اى جيم تانى مع صحابى عادى يعنى
مرام / و الجيمات التانيه دى رجاله بس و لا خلطبيته
مازن / لا خلطبيته
مرام / يا حلاااااوه و ايه اللى جابرك يا خويا هو يعنى مفيش جيمات رجاله بس
مازن / لا فى بس وقتها كان على هوايا يعنى اقولك سر بس متقوليش لمراتى اصلها تغير عليا اوى
مرام / فبير
مازن / الجيم ده احسن مكان تصطادى منه مزز
مرام / لا يا راجل
مازن / اه والله و بدون اى مجهود كل اللى تعمليه انك تتمرنى بزمه شويه و هى هتيجى لحد عندك تتعرف عليك
مرام / نسوان واقعه بعيد عنك
مازن / هههههههههههههههههه اهو حاجه زى كدا انتى وعدتينى متقوليش لمراتى
مرام / لا ازاى عيب سرك فبير
مازن / دا العشم برده ... انزلى بقى نشتغل جد
مرام تنزل مازن يوقفها قدامه و يبدا يعمل الاسترتشات مرام تقلده
مرام / ايه التمارين الهبله دى
مازن / اهو التمارين دى عشان ميجلكيش تمزق
مرام / دى بتاعه الصليبى
مازن / اه
مرام / تمام و بعدين
مازن / تحبى تجربى انهى جهاز الاول
مرام / هو ده بتعمل فيه ايه
مرام تشاور على العقله مازن يخدها و يرفعها من وسطها تمسك فيها و يفضل شايلها من وسطها و هى متعلقه
مازن / اسحبى لفوق
مرام / اسحب ايه
مازن / ههههههههه اسحبى نفسك
مرام / ازاى مش عارفه
مازن ينزلها و يطلع يعمل تلت عدات بايديه الاتنين و بعدين تلاته بايد اليمين و تلاته بالايد الشمال و ينزل
مرام / طب متقول كدا مالصبح وسع وسع
مازن / عاش يا وحش ورينى
مرام تقف و تمد ايدها متطولش مازن يساعدها تطلع و يفضل ماسكها لتقع و تحاول تشد تطلع و تنزل و هو بيعد لحد مايدها تسيب مره
مرام / دى بتوجع الايد اوى لا شوفلى حاجه تانيه ايدى وجعتنى و بعدين اصلا الجيم بتاعك ده وحش تلتربعه حديد
مازن / مهو فى دامبلز مقاسك و لا انتى من بتوع انك لو لمستى الحديد هتدخلى بطوله كمال الاجسام تانى يوم و كدا
مرام تبصله بطرف عينها
مرام / دمك خفيف اوى بس انا ايدى وجعتنى هشيل ازاى
مازن / خلاص انزلى عشرين بطن
مرام تنزل و تعمل و مازن متابعها بترفع ركبها ينزل يسند على ركبها تكمل عد و فكل عده يعدل نفسه اقرب ليها لحد فعده تقوم يبوسها تتصدم و تسند بايديها على الارض ورا ضهرها و هى نص قاعده و مازن قاعد على ركبه قدامها
مازن / متمشيش يا مرام
مرام ساكته و باصه فى عنيه يقرب منها اكتر
مازن / خلى تيته تيجى على هنا
مرام / مينفعش
مازن / مش هقدر تبعدى عنى تانى انا مصدقت خليكى جنبى
مازن يقرب اكتر و يحاول يبوسها تانى تزقه و تقوم و هى متوتره تحاول تفتح الباب مبيفتحش و تبدا تتعصب و مازن متابعها يروح يديها الاسدال تبصله
مازن/ هتطلعى كدا ؟؟افرضى حد بره
مرام تلبس الاسدال مازن يفتحلها المفتاح تطلع تجرى و هو واقف مبتسم ثوانى و تجيله رساله عالموبايل
مرام / على فكره انت جزمه
يبتسم و يطلع يخبط على باب الاوضه تفتح حته صغيره اوى تلاقيه ساند عالباب
مازن / انا مش اسف
مرام / عاوز ايه
مازن / انا مكنتش ناوى اكمل عن كدا
مرام / حصل خير
مازن / بحبك
مرام / طب مانا كمان بحبك
مازن / متمشيش
مرام / لا همشى لازم امشى
مازن / والله مكنت هعمل اكتر من كدا و انتى عارفه انا وعدتك
مرام / غصب عنى تيته مش هترضى تيجى مالسفر على هنا
مازن / و لو اقنعتها
مرام / مش هتقدر فى ناس هيجوا يباركولها مش هينفع يجوا هنا
مازن / و لو اقنعتها
مرام / الناس هتقول عنى ايه
مازن / ملعون ابو الناس شيليهم من دماغك
مرام / مقدرش مش عايشين فى الدنيا لوحدينا
مازن / انا و لا الناس يا مرام
مرام / انت بتقول ايه يا مازن
مازن / انا و لا الناس
......................................
أنت تقرأ
السكه شمال بقلم / لولو_محمد ( كامله )
عاطفيةشاب ثرى متعدد العلاقات يقع فى حب فتاه ملتزمه فقيره و يرفض محيطه هذه العلاقه و يحاولون التفريق بينهما
