السكه شمال بقلم / لولو_محمد ( كامله )

الحلقه ١٣٣

(((((((السكة شمال )))))))
#لولو_محمد
الحلقه 133
مرام / انت عاوز ايه بالظبط
مازن يبتسم
مرام / متتلم يا مازن
مازن / انتى هتتلككى هو انا عملت حاجه و لا حتى فتحت بقى مانا متنيل على عينى متكتف اهو
مرام / طب استاخر شويه و نام
مازن / لا انا هنام كدا انا بحب احضن حاجه طريه و انا نايم
مرام تبص الناحيه التانيه و تهز راسها ماشى و تغمض عينها مازن يبوسها من خدها تحاول تتقلب يمنعها و يتحكم فيها اكتر و بايده يحرك وشها ناحيته تبص فى عنيه
مرام / مازن
مازن / حلينى مالوعد ده يا مرام
مرام / مازن
مازن / عشان خاطرى عشان خاطرى
مازن يقرب منها اكتر و تبقى فحضنه و يتكلم بهمس فودانها
مرام / فاضل اسبوعين بس و يمكن اقل.. مازن ارجوك
...................................
مازن / مش قادر والله مقادر خلاص
مرام / متخلينيش اعمل حاجه نندم عليها بعدين
مازن / انتى مراتى يا مرام احنا مش هنعمل حاجه غلط و لا حرام عشان خاطرى لو بتحبينى
مرام تغمض عنيها و تهز راسها موافقه مازن يقوم يقلع التيشيرت الباب يخبط مرام تقوم تقعد و عنيها عالباب مازن يلبس التيشيرت تانى مرام تجرى عالحمام مازن يفتح الباب بالراحه يلاقى شريف ياخده بالحضن
شريف / فى ايه مالك
مازن / مفيش مفيش خير فى ايه
شريف / صافى كلمتنى مش لاقيه مرام
مازن / متقلقش انا و مرام اتصالحنا
شريف / هى عندك اووووف طمنتنى افتكرتها اتهبلت و ركبت اى حاجه و روحت لوحدها فساعه زى دى
مازن يهز راسه بابتسامه مرام تطلع من جوه تروح ناحيه الباب
مرام / ازيك يا شريف عن اذنكوا
مرام تروح ناحيه الاسانسير و تركبه فثوانى و شريف و مازن عينهم عليها
شريف / انت متاكد انكوا اتصالحتوا
مازن / تحب تدخل
شريف / لا انا هروح اكمل نوم انا قمت مفزوع اصلا
مازن / كانت كلمتنى انا كنت طمنتها
شريف / قدر الله و ما شاء فعل
مازن / فدى معاك حق قدر الله و ما شاء فعل فعلا الحمد لله
شريف / مالك مش مظبوط
مازن يبتسم و يدخل و يشاور لشريف شريف يمشى مازن يقفل الباب و يروح يقعد عالسرير و يبص على مرام مكان مكانت نايمه و ينفخ و يقوم يدخل الحمام يلاقى البجامه و الكاش متعلقين عالشماعه يمسك الكاش و يشمه و يبتسم بكسره و يشغل الدش عشان ياخد شاور
.......................................
فى اوضه صافى
صافى بتتكلم فى التليفون
صافى / طب الحمد لله طمنتنى
الباب يتفتح و مرام تدخل و تقعد على اقرب حاجه و تحط راسها بين ايديها و تنكمش فروحها 
صافى / جت خلاص .... سلام دلوقت
صافى تقفل و تروح تقعد قدام مرام و تبص عليها
صافى / انتى كويسه يا مرام
مرام تبصلها و عنيها كلها دموع و تهز راسها لا و الدموع تبدا تنزل منها
مرام / انا مش كويسه انا مش ..انا اصلا ..انا..
مرام تحط ايديها الاتنين على بقها و تبص لصافى و عنيها تفضل تروح يمين و شمال كانها بتحاول تستوعب حاجه مرعبه
صافى / شريف قالى انك اتصالحتى مع مازن
مرام تاخد ايديها فحضنها و تعيط و هى باصه فى الارض صافى تقوم تحضنها
صافى / مالك يا مرام فى ايه مازن قالك حاجه دايقتك قوليلى بس فى ايه
مرام / تعرفى انا هقوم اتوضى و اصلى انا محتاجه ده اوى
صافى تهز راسها تمام و مرام لسه بتعيط
مرام / انا محتاجه اتكلم مع ربنا اوى هو الوحيد اللى عارف انا ايه جوايا هو اللى فاهمنى
صافى / و نعم بالله فكره كويسه قومى اغسلى وشك و اتوضى و صلى مدام ده هيريحك اعمليه
مرام تهز راسها و تقوم خطوه و رجليها تخونها و تنزل فى الارض صافى تتفزع
صافى / مرام مالك فى ايه انا هكلم مازن
مرام / لا لا لا لا انا كويسه رجلى اتلوت بس انا كويسه عارفه انا صاحيه من بدرى و كدا مش مركزه بس انا كويسه متكلميهوش عن اذنك
مرام تقوم تدخل الحمام و تقفل على نفسها و تروح تقعد فى البانيو بهدومها و تفتح الحنفيه و المايه تفضل تنزل عليها
مرام / ازاى تعملى كدا ازاى يوصل بيكى الحال للدرجه دى هتبصى فعينه ازاى بعد كدا ازاى تسمحى لنفسك بكدا
مرام تتنهد جامد اوى
...........................
فى اوضه مازن
مازن يطلع مالحمام يروح يقعد عالسرير لابس البجامه اللى مرام كانت لبساها و الكاش فى ايده يروح يقعد عالسرير و يتنهد
////////////////////////
مازن / ايه اللى جرالك يا مازن عمرك مكنت ضعيف كدا ... مراتى ... كنت هتقدر تبص فعينها بعد متهد الحلم الوحيد اللى حلمت بيه ... قدر الله و ما شاء فعل ... ياترى بتقول عنى ايه دلوقت ... اكيد مدايقه طبعا اذا كنت انت مدايق ... قلبى واكلنى اوى عليها 
مازن يحط ايده على قلبه و يمسكه بوجع
مازن / كلمها ... بانهى وش ... انت جوزها ... مكنش المفروض احطها فى الموقف ده مكنش المفروض اكسر الثقه اللى بنا ... انت بتحبها ... اوى بحبها اوى ... راضيها متسبهاش
مازن يقوم يجيب الموبايل و يقعد يقلبه فى ايده
مازن / كلمها ... هقولها ايه ... اللى فقلبك
مازن يقوم و يفضل يروح و يجى فى المكان و بعدين يكتب رساله طويله و يحط الموبايل عالكومدينو و يبعد و يروح يقعد عالسرير يقرقض فى ضوافره و هو فمنتهى التوتر و عينه عالموبايل
....................................
فى اوضه مرام
صافى نايمه عالسرير مرام قاعده فى الارض لابسه الاسدال و بتصلى و تعيط فى الصلاه و بعدين تسلم و تفضل عالسجاده و تناجى ربنا بكسره و ضعف و دموع
مرام / يارب مليش غيرك انت اللى خلقتنى و انت اكتر واحد عارفنى عارفنى اكتر منى و مالكل قوينى و ثبتنى .. يارب انا تايهه و تعبانه كل حاجه حوليا غلط كل حاجه ملخبطه .. يارب انا عمرى مكنت ضعيفه كدا ادينى القوه يارب .. اجبر بخاطرى انت الكريم يارب ادتنى اكتر متمنيت تم عليا نعمك يارب و استرنى .. انا معدتش عارفه الصح مالغلط قلبى بيوجعنى يارب .. مليش غيرك يارب ارجوك ساعدنى .. سامحنى لو كنت بعمل حاجه غلط و اهدينى بس متعاقبنيش اصبر عليا مفيش احن و لا اكرم منك انت اللى خلقتنى اهدينى و اهديه هو كمان يارب غلبان والله و بيحبك انت ادرى بيه منى ...يارب انت اللى عالم باللى جوايا انت اللى عارف الخير فين .. قلبى بيوجعنى اوى يارب و عينى مكسوره .. اجبر بخاطرى يارب .. قوينى عالدنيا الوحشه دى يارب قوينى على نفسى .. دانا مرام حبيبتك متكسرنيش على الاقل مش قدام نفسي كمل كرمك عليا يارب بالستر انا مش عاوزه اكتر من كدا .. انا عارفه ان طلباتى كترت بس ليا مين غيرك و انت مين اكرم منك
صوت رساله توصل لمرام مرام تمسح دموعها و تقوم تقراها
////////////////////
مازن / انا اسف سامحينى مكنش المفروض اعمل كدا انتى عارفه انى بحبك ارجوكى متناميش زعلانه منى ارجوكى متفقديش الثقه فيا مش هعمل كدا تانى و دا وعد مهما حصل مش هيكون الا اللى حلمتى بيه ارجوكى تسامحينى
////////////////////
مرام تبتسم بكسره و تبص لفوق و تحضن الموبايل و تحطه مكانه و تنزل عالارض تانى و تفضل ساجده
..................................
تانى يوم الصبح فى اوضه مازن
شريف يخبط عالباب مازن يفتح و يدخل يقعد عالسرير
شريف / انت ملبستش
مازن / هنروح فين يعنى
شريف / معرفش ننزل نفطر اى حاجه الجروب كلو مشى مش هناكل
مازن / انا عاوز انام
شريف / انت كمان طب واحده وشها وارم و مش عاوزه حد يشوفها كدا و التانيه كانت صاحيه طول الليل تصلى و تعيط انت بقى وضعك ايه انت كمان
مازن يبصله و يبان على وشه الزعل
شريف / هو فى ايه مالكوا انتوا مش اتصالحتوا فى ايه
مازن / مفيش
شريف / يعنى هو ينفع كدا هى دى الفسحه اليتيمه اللى هنتفسحها يعنى انا عارف دى عين الكلبه تقى هى اللى نبرتلى فيها قيله بس عينها راشقه ما شاء الله نكدت علينا كلنا
مازن يبتسم
شريف / هنروح اسكندريه و يروح هو السخنه اهى من كتر السخونه ولعت فينا
مازن / بقولك ايه متبعتلهم فطار عالاوضه
شريف / ياعم فطروا من بدرى و فالبحر دلوقت انت فاكرهم زينا
مازن / يا متخلف بتكلم عن مرام و صافى
شريف / اه صح معلش ابقى نبهنى بس و انت بتنقل عشان المواضيع متخشش فبعضها
مازن / بص خليهم يحطوا كرت فى طبق مرام و اكتب فيه بحبك
شريف / لا يا شيخ
مازن / اووووف عليك بقى دانت غتت
شريف / هو انتوا اتصالحتوا امبارح زى مقولتلى و لا الموضوع كبر منكوا
مازن / اه و شوف اتنين مالامن بتاع الفندق يبقوا على باب الاوضه محدش ضامن هيحصل ايه
شريف / هو احنا هنتحبس فى الاوض فعلا و لا ايه لزمتهم ايه ماحنا هنبقى معاهم
مازن / ممكن تسمع للاخر
شريف / اتفضل اسف المايك معاك
مازن / هوووووف بص احجزلهم فوول بروجرام فى الاسبا و بعدين احجزلنا برايفت بول عشان ننزل فيه لوحدنا تمام
شريف / كل ده سهل اعتبره حصل
مازن / طب تمام يلا سبنى انام بقى
شريف / هو ايه اللى اسيبك تنام و احنا مش هنفطر
مازن / مش جعان تقدر انت تروح تاكل براحتك
شريف / مكنت طلعت معاهم اليخت بقى مدام هقعد لوحدى يعنى
مازن / مقولتلكش تقعد يا شريف مقولتلكش تقعد الله
شريف / اهدى يا مازن فى ايه انت عارف انى بهزر مالك
مازن / بص مش طايق نفسى
شريف / تمام مفيش مشكله هبعتلك فطار فاوضتك انت كمان اكتبلها حاجه مع بحبك اسف مثلا
مازن يبصله شريف يروح يقف عند الباب
شريف / عن اذنك
شريف يقفل الباب و يمشى و مازن ينفخ و يروح ينام عالسرير و يطلع الكاش من تحت المخده و يحضنه
............................
فى اوضه مرام
الباب يخبط صافى تفتح تلاقى هاوس كيبينج معاه ترولى عليه طبقين كبار متغطيين و فى حاجات تانيه اكل و عصير تدى للشاب فلوس و يمشى و تبص تلاقى اتنين جتت عالباب
صافى / فى حاجه
راجل / احنا من امن الفندق يا فندم موجودين هنا فخدمه جنابك
صافى / والله طب تمام عن اذنكوا
صافى تبص عليهم و تدخل جوه تصحى مرام
صافى / مرام .. مرام اصحى
مرام تقوم تقعد و هى نايمه خالص
صافى / الفطار
مرام / مش جعانه يا صافى سبينى انام شويه
صافى / انتى رزله كدا ليه هو انا هاكل لوحدى و بعدين مالك فى ايه انا اللى انضربت على فكره و انا اللى المفروض اكتئب كدا مش انتى متحسسنيش انى تنحه بقى
مرام تدحك و تبص الناحيه التانيه
صافى / اه والله اى واحده مكانى شافت اللى شوفته فالطبيعى بتتعرض على سكايتريست لكن الحقيقه انا بارده جدا بالعكس لولا وشى واجعنى شويه كنت نزلت و كملت يومى عادى انتى بقى العكس ربنا نجاكى من بلوه سوده و مع كدا مكتئبه
مرام / انا مش مكتئبه
صافى / امال نايمه لحد دلوقت ليه و سهرانه طول الليل بتعيطى ليه
مرام / مكنتش بعيط
صافى / عنيكى حامره دم
مرام / من قله النوم
صافى / يا شيخه بقى الصلاه دى كلها و متعرفيش ان الكداب بيروح النار عالعموم براحتك نامى يا مرام انا هفطر لوحدى كانى جايه هنا اتعاقب مش اتفسح عشان تنبسطى
صافى تروح تقعد على طرف السرير و تفتح اول طبق تلاقى فيه كارت بحبك
صافى / اكيد مش ليا يعنى اتفضلى يا ستى الفطار اللى على حق
مرام تاخد الكارت و تبصله و تبتسم صافى تفتح الطبق التانى مفيش حاجه تبص فجنب تلاقى الجرنان و بروشور للاسبا تمسكه
صافى / لا دانا هاخد على كدا
مرام / فى ايه
صافى / محجوزلنا فول بروجرام فى الاسبا يلا افطرى عشان ننزل
مرام / مليش مزاج
صافى / انتى عبيطه مهو ده اللى هيعدل مزاجك يا بنتى
صافى تمسك الجرنان صفحه اولى القبض على تشكيل عصابى روسى مكون من امراءه و رجلان لتهريب المخدرات فى مصر
صافى / بيتهيالى تقرى الخبر ده
مرام تمسك الجرنان بتافف و تبصله و تقوم تتعدل فى قعدتها و تكمل التفاصيل
مرام / كما انه تم القبض عليهم فى كمين بعد مقاومه عنيفه مع رجال الشرطه ادت لاصابه ظابط و اتنين عساكر و جارى التحقيق معهم للكشف عن باقى افراد التنظيم
مرام تبص لصافى
مرام / ياولاد الكلب هو فى كدا يا بنتى
صافى / يلا بلا قرف
مرام / احسن تستاهل اياكش يعدموها عشان تتربى
صافى / ايوه يلا تعالى كلى
مرام تروح تقعد جنب صافى
صافى / تعرفى فى التنميه البشريه بيقولك تصحى الصبح كدا تقولى النهرده هيبقى يوم حلو و تبقى واثقه فنفسك هتلاقى الدنيا كلها بتتحرك معاكى بيقولك ابتسم ترا الوجود جميلا
مرام / اسمها حسن الظن بالله
صافى / ماشى يا شيخه مرام اتفضلى نفطر بسرعه بقى عشان ننزل ناخد اليوم من اوله
مرام توصلها رساله تسيب الاكل و تقوم تبص فى الموبايل
////////////////////////
مازن / وحشتينى اوى .. لسه زعلانه منى ؟؟ .. انا بحبك يا مرام
///////////////////
مرام تحط الموبايل جنبها و تقعد تكمل فطار صافى تزغدها و تهز راسها مين مرام تشاورلها كبرى مخك
...............................
فى الشركه فى مصر
محمود قاعد مع تلت شباب
محمود / ممتاز عاوزكوا تخلصوا الموضوع ده فاسرع وقت
شاب / تمام حضرتك
محمود يسيب المكان و يمشى يقابل سعد
سعد / محمود باشا ايه الاخبار
محمود / لقينا الارض مجموعه من البيوت القديمه و الخرابه و كام حته ارض فاضيه هنشتريهم و المهندسين هيبدئو الشغل علاطول
سعد / طب متيجى ناخد بريك و نروح نفطر مدام كل حاجه تمام كدا
محمود / لا مش فاضى الف هنا انت انا يادوب اروح الفيلا عشان احاسب العمال و اشوف وصلوا لفين
سعد / والله انا طبعا فرحان بالتغير بتاعك ده مع انه جه على دماغى
محمود / ههههههههههههه سلام يا سعد
سعد / سلام يا حوده
.................................
فى اوضه مرام
صافى / انا جهزت كل حاجه هتيجى و لا لسه متقوقعه فنفسك
تليفون مرام يرن
مرام / ثوانى تليفون ... ازيك يا محمود عامل ايه
محمود / الحمد لله اخبارك
مرام / تمام
محمود / مال صوتك فى ايه
مرام / لا مفيش بس مطبقه من امبارح بس فلسه صاحيه و كدا
محمود / اه معلش صحيتك
مرام / لا صحيت احنا حتى كنا هنلبس اهو و ننزل انت عامل ايه و اخبار الشركه ايه
محمود / كلو تمام بصراحه مش المفروض اقولك بس انتى عارفه انا اصلا سرى كله معاكى و انا فرحان اوى و مش قادر اخبى عليكى
مرام / هههههههههههههههه لا متخبيش قول فى ايه ربنا يسعدك كمان و كمان
محمود / احنا لقينا ارض حلوه فى المنطقه هيتبنى عليها مسجد حلو كدا و كبير كذا دور كلو رخام و تكييفات و حاجه فخمه بصحيح
مرام / بجد مبروك
محمود / و مش بس كدا هيبقى فى مدرسه بنات جنبه كمان و هيجددوا المستشفى و يفرشوها من الالف للياء و اشتريت محل لعم فاروق و بيوضبوه هتيجى تلاقى اكبر فرن فى الحاره
مرام تبدا تبتسم و تستوعب
محمود / و الحاره دلوقت بتتجهز عشان تترصف و البيوت كلها هتتدهن و هتزرع زرع و شجر و هتيجى تلاقى كل احلامك اتحققت و اه الدار كمان هيتدهن و كل طلبات البنات خلصت كلو تمام
مرام/ انت عملت كل ده
محمود / مش انا مازن انا بس ساعدته
مرام / انا فرحانه اوى يا محمود
محمود / و بالنسبه للفيلا بقى انا واقف مع العمال و مهندسه الديكور على متخلص هتبقى احلى شقه لاحلى عروسه و العفش مطلوب من بره ورتنى الصور بصراحه حاجه فخمه اوى يجى خمسين واحد شغالين هنا
مرام ساكته و مبتسمه
محمود / سمحتينى بقى
مرام / على ايه
محمود / انى حاولت افرق بينكوا والله كانت نيتى خير
مرام / انت اخويا يا غبى ايه اللى بتقوله ده و بعدين متفصلنيش بقى انا فرحانه جدا بجد
محمود / بصى لما تيجى ابقى مثلى انك اتفاجئتى ماشى
مرام / هههههههههههههه و انت عارفنى استاذه فالتمثيل مش كدا
محمود / روحنا فى داهيه
مرام / هههههههههههههههههه
محمود / اسيبك بقى تنبسطى ... مرام استمتعى انتى تستاهلى تفرحى
مرام / شكرا
محمود / سلام
مرام تقفل و ترجع لصافى
صافى / يا تليفوناته يا تليفوناته مازن ؟؟
مرام / مش بالظبط بس تقريبا
صافى / ازاى يعنى
مرام / هحكيلك بس اللبس الاول عشان نلحق الاسبا
صافى / ايوه بقى هو ده الكلام يلا
.................................
فى اوضه شريف
شريف قاعد بياكل الباب يخبط يقوم يفتح يلاقى مازن يدخل يكمل اكل مازن يقفل الباب و يدخل يبص على الاكل
مازن / الف هنا بس اموت و اعرف بيروح فين
شريف / قل اعوذ برب الفلق
مازن / حقك عليا انا كنت مخنوق شويه
شريف / لا متاخدش فبالك هو انا لسه هعرفك النهرده ... صالحتها
مازن يبصله
شريف / مهو انا مش تلميذ عشان مفهمش البت خارجه من اوضتك امبارح كانها خارجه من اوضه الاعدام وشها احمر و تطلع الاوضه تنهار مالعياط و تقع فى الارض و تقعد طول الليل تصلى و تعيط و انت قافل على نفسك و مش طايق روحك يبقى ايه بقى هاه دا غير حركات المحلسه بتاعتك الفطار و بحبك و حجز الاسبا متكلمها و تقولها حقك عليا متزعليش ساعه شيطان و خلاص و لا هى اللى عكت .. مكنتش جايه تراضيك كانت جايه تزود الطين بله صح
مازن / تصدق يا شريف انا فعلا فهمت انت ليه بتاكل كتير
شريف / ليه
مازن / عشان انت لو مشغلتش بقك فى الاكل هتصدع اللى جابونى هو فى ايه يا اخى مبتفصلش لكلك لكلك افصل
شريف / فصلت
مازن / اه عكيت امبارح و مفتكرش انها ممكن تبص فوشى تانى و لا انا حتى ليا عين لا اكلمها و لا ابص فوشها
شريف / لا ليك حق تتعصب طبعا بس ليه يابنى كل ده
مازن / اللى حصل
مازن ينفخ
شريف / بقولك ايه
مازن يبصله
شريف / ياما بيحصل و مدام انتوا الاتنين بتحبوا بعض هتتراضو و مدام انت غلطان تبقى غبى لامؤاخذه لما تقعد تهرى و تنكت فى نفسك كدا و تسيبها تتشحتف فروحها انا لو منك اروح اراضيها هاتلها هديه حلوه انا عارف انها مبيفرقش معاها حاجه هاتلها ورد
مازن / فكره
شريف / متسبهاش مع شيطانها تقول زعلنى و مش هاين عليه يراضينى دول امخاخهم فسافيسرى هتقلب بغم و الموضوع يكبر
مازن / بعتلها كذا رساله مبتردش عليا
شريف / هما فى الاسبا دلوقت جتلها مكالمه تليفون خلتها طايره مالفرح
مازن / من مين
شريف / معرفش انا كنت فاكرها منك بس لما قولت مبتردش عليا فغالبا ممكن تكون تيته انا اصلا بطمن عليها من صافى
مازن يهز راسه
مازن / فبالى حاجه كدا ممكن يعنى تحنن قلبها عليا
شريف / استر يارب خير
مازن / هقولك
................................