السكه شمال بقلم / لولو_محمد ( كامله )

الحلقه ١٠٢

((((((السكه شمال )))))))))))
#لولو_محمد
الحلقه مئه و اثتنين
مازن / صحيح يا تيته بالنسبه للعمره
سميحه / يا مازن بعد كل اللى حصل ده اخاف اسيب مرام لوحدها
مازن / يا تيته متقلقيش مانا هكون معاها و خالو و محمود مش هتكون لوحدها يعنى هو انتى هتخافى عليها و هى معايا
سميحه / عمرى انا والله يابنى صليت استخاره و اديك شايف الوضع
مازن / بصى يا تيته من بكره نبدا فى الاجراءات هو فى احلى من انك تزورى بيت ربنا
سميحه / خلاص يا مازن مدام انت شايف كدا امشى فى الموضوع
.....................................
مرام تطلع من جوه شايله الكتب
مرام / يا بركاتك يا ميزو انا قولت محدش هيقنعها غيرك يلا يا سيدى ادى الكتب اتفضل ورينى بقى هتاكلها ازاى
مازن / اتفضلى يا هانم اقعدى دانتى هتتفحتى مزاكره
مرام / ههههههههههههههههههه ماشى
.........................
عند الاهرامات
نهى / بابا هو انا ممكن اركب جمل
ابوها / انتى كبرتى عالحاجات دى بطلى دلع
ابو طلال / والله لتركب جمل يا اخى حرام عليك كبرت ايه و لو كبرت يعنى خليها تركب و تنبسط احنا جايين نفرح و ننبسط
ابوها / و انا مش هكسر كلمتك يا ابو طلال يلا يا ست نهى اتفضلى قدامى
الراجل ياخد نهى و يروحوا ناحيه الجمال
ابو طلال / و ست العرايس مش هتركبى جمل
نيفين / لا شكرا بخاف
ابو طلال / تخافى ؟؟
نيفين / يعنى معلش انا كدا مرتاحه اكتر
ابو طلال / الحمد لله تعرفى يام نيفين انا جيت مصر كتير بس اقسم بالله اول مره اشوفها بالجمال هذا
ابو طلال يبص على نيفين
الست / مصر نورت بوجودكم حضرتك متعرفش سامح بيشكر فحضرتك قد ايه دا ملوش سيره غير حضرتك
ابو طلال / القلوب عند بعضها و باذن الله المره الجايه تيجو مع الاستاذ سامح و هناك اوعدك افسحكوا فسحه العمر
الست / ان شاء الله
ابو طلال / ياربى على مصر و جمال مصر والله بتطير العقل
ابو طلال باصص على نيفين و يتنهد
............................
فى شقه محمود
مروه / انا تعبت كفايا بقى
محمود / طب اخر مساله و قومى روحى
مروه / انت وحش اوى فالمزاكره على فكره دا مرام كانت حنينه عنك
محمود / والله طب خلى ست مرام تنفعك
مروه / لا انت هتزعل و لا ايه خلاص متزعلش
محمود / انا مش عاوز حد يتكلم و يقول خابت عشان محمود خطبها
مروه / طب والله بزاكر و اديك شايف مفيش مساله ادتهانى الا لما حلتها صح و لا لا
محمود / حصل
مروه / اعمل ايه تانى بقى
محمود / متعمليش يا ستى نحل المساله دى و خلاص روحى ارتاحى
مروه / تعرف صحبتى ادتنى حته فيلم تركى عالفلاشه بتقول جامد اوى ايه رايك نحل المساله دى و ناخد ريست و نتفرج عليه سوا
محمود / ممكن ناجلها للاجازه و يا ستى ساعتها مش هنتفرج عالفلاشه دانا هعزمك عالسينما كمان ايه رايك
مروه / دا فيلم واحد بس عشان خاطرى
محمود / ماشى بس الاول تحلى المساله دى لوحدك على ماجى من عند تيته
مروه / ماشى هات
محمود يقوم يروح يخبط على مرام مازن يفتحله
مازن / اهلا حوده ازيك تعال
محمود / بتعملوا ايه
مرام / بنزاكر
مازن / انجدنى زنقانى مالصبح و مش عارف اخلع اتخنقت من ام المزاكره و اللى اخترعوها
مرام / هههههههههههههههههه ايه لحقت تشبع مش كنت بتقول هتاكل الكتب اكل
مازن / انت هتفضل واقف عالباب متدخل يابنى
محمود / مروه جايبه فيلم تركى عالفلاشه لو تحبوا تاخدوا ريست و نتفرج عليه سوا عندنا و كدا
مازن / ياريت والله تصدق يا محمود انا بحبك
محمود / هستناكوا هناك يلا سلام
محمود يمشى
مرام / يعنى هنقفل على كدا
مازن / لا هناخد ريست و بعدين نكمل بقولك انا هنزل اجيب حاجه كدا فالسريع و هاجى تمام
مرام / تمام
مازن ينزل ويقفل الباب و مرام تقفل الكتب و تقوم تدخل المطبخ
..........................
فى شقه محمود
محمود يحط الفلاشه فى الريسيفر و يظبط الفيلم
مروه / انا اتصلت بماما و استاذنتها ووافقت
محمود / كويس .... يا ماما الفيلم هيبدا
صوت مديحه من جوه / اتفرجوا انتوا ايدى مش فاضيه
جرس الباب مروه تروح تفتح تلاقى مازن و مرام
مرام / انا جبت الفشار
مازن / و انا جبت شويه تسالى و شيبس كدا لزوم القاعده
محمود / جيتو فوقتكوا كنت لسه هشغله
مرام / خاينين كنتوا هتتفرجوا من غيرنا
مروه / يلا يلا شغل يا محمود
مرام و مروه يقعدوا عالكنبه و مازن و محمود يقعدوا عالكراسى مازن يعدل كرسيه بحيث يبقى شبه لازم فى الكنبه محمود يبصله
مازن / عشان رقبتى متوجعنيش و انا بتفرج
محمود / خد راحتك
محمود يشغل الفيلم و الكل يقعد يتفرج
...........................
فى الفيلا
زياد / سمعتى اللى حصل
لبنى / فى ايه خير
زياد / احمد بيصفى شغله فى مصر
لبنى / بتهزر
زياد / كل حاجه اتعرضت للبيع
لبنى / و احمد هيعمل كدا ليه
زياد / اقل واجب انتى فاكره ان مازن هيسيبه فحاله اكيد ظبطه
لبنى / يستاهل اياكش الطياره تولع بيه
زياد / الله بعتيه كدا فثانيه
لبنى / احنا ملناش فى الدم يا زياد عاوز يوسخ ايده بعيد عننا
زياد / معاكى حق
لبنى / المهم هتعمل ايه
زياد / كلمت اونكل ابراهيم و قالى اشترى طبعا و ده اللى هيحصل
لبنى / خلاص عالبركه
زياد / المشكله ان صفوت باشا هو كمان بيشترى
لبنى / طب ميشترى مدايق نفسك ليه مهى برده فجيبنا فالاخر
زياد / عاوزك تتصلى بمرام تطمنى عليها بعد اللى حصل امبارح
لبنى / انت بتضغط عليا جامد اوى يا زياد
زياد / انتى كنتى هايله امبارح كملى جميلك بقى
لبنى / ماشى اما اشوف اخرتها
زياد / كل خير يا قلبى كل خير
.............................
فى شقه محمود
الكل بيتفرج عالفيلم البطل بيشيل البطله و يلف بيها و هى عماله تدحك مازن يزغد مرام بكوعه بالراحه تبصله بطرف عينها و تبتسم و ترجع تركز فى الفيلم يحط ايده على ايد الكرسى و يفتح كفه و يزغد مرام تانى بكوعه تبص على ايده بالراحه تحط ايدها عليها و تدخل صوابعها بين صوابعه و يمسك على ايدها و محمود متابعهم اكتر ممتابع الفيلم
مروه / ايه ده الترجمه راحت فين بيقولوا ايه مش فاهمه
مازن / بحبك و عاوز اكمل باقى حياتى معاكى ... تتجوزينى ... ايوه .... هكلم باباكى بكره ياريت يديكى ليا
محمود / لما تخلص فتى صحينى
مازن / هاير تركشى كونشيابليوروم
الكل يبص لمازن و محمود يوقف الفيلم
مازن / انا بتكلم عربى و انجليزى و فرنساوى و روسى و تركى
مروه / بتهزر
مازن / لا مفيش بلد عشت فيها الا لما اتعلمت لغتها و انا لفتهم
مروه / انت روحت تركيا طب عاملين ازاى فيها هناك زى مبنشوفهم فى التليفزيون كدا
مازن / مش كلهم طبعا يعنى فى كدا و فى كدا
مروه / الله نفسى اروح تركيا اوى
محمود / نسيب الفيلم بقى و نقعد تحكيلنا عن سفرياتك حول العالم
مازن / انت اللى وقفت الفيلم مش انا
محمود يبصله و يشغل الفيلم
مروه / كمل يا مازن بيقولوا ايه
مازن / متبصش لحبيبتى عشان هاذيك .... ليه خايف مالمنافسه
محمود / الحمد لله الترجمه اشتغلت اهى نركز فى الفيلم بقى
مازن / ماشى اريح برده
محمود ينفخ و يبص عالتليفزيون و بعدين يرجع يبص على ايد مرام و مازن
محمود / متناولينى يا مرام شويه فشار بدل شغل المحن ده
مرام تفك ايدها من ايد مازن و تناول محمود بوله الفشار
محمود / شكرا اتفرجى عالفيلم اما نشوف اخرتها ايه مالتركى ده
مرام تهز راسها
.............................
فى الكليه تانى يوم
مرام / معلش والله يا مازن انت مشيت من هنا و انا نمت من هنا محستش بنفسى الا الصبح
مازن / و لا يهمك يا قلبى انا لما مرديتش اول مره قولت اكيد نامت
مرام / انا انبسطت اوى امبارح
لبنى و زياد يدخلوا
لبنى / اهلا لوف بيردز
مرام / ازيك يا لبنى عامله ايه
زياد / كلمناكى امبارح نطمن عليكى
مرام / نمت زى القتيله
لبنى / هههههههههههههه و لا يهمك بقولك ايه هخرج انا و البنات نعمل شوبينج متيجى معانا
مرام / فرصه تانيه ورايا مزاكره معلش
لبنى / ليه يا بنتى هو كلو مزاكره كدا
مرام / اهو اللى بعرف اعمله
لبنى / يا خساره اكيد صافى هتزعل
مازن / انتى خارجه انتى و صافى
لبنى / اه قولتلها ان مرام جايه فهتيجى
مازن / و دلوقت بتقولى لمرام ان صافى جايه عشان توافق واو
لبنى / ايه هو لا كدا عاجب و لا كدا عاجب
مازن / لا ازاى
لبنى / ها يا مرام هتيجى
مرام / مفيش مشكله اجى
لبنى / هعدى عليكى بالعربيه بلليل على سبعه كدا
مرام / تمام ... المحاضره يا مازن
مازن / هتحضروا
لبنى / لا دا دكتور ممل
مازن يبتسم و يروح هو و مرام ناحيه المدرج
مازن / اوعى تفتكرى ان حوار ما ممحبه الا من بعد عداوه ده هيخيل عليا ديل الكلب عمره ميتعدل
مرام / متخافش عليا و بعدين صافى هتبقى موجوده
مازن / ماشى بس لو حصل اى حاجه
مرام / متخفش كدا وراك رجاله
مازن / عاش يا وحش يلا عشان منتاخرش
..............................
فى كافيه بالليل
مرام / هههههههههههههههههههه لا طبعا
لبنى / ليه يعنى تيته هتسافر هتقعدى لوحدك
مرام / و فيها ايه هو انا صغيره
صافى / تعرفى احنا ممكن نبقى نيجى معاكى نعمل سليب اوفر
لبنى / فكره ممتازه تصدقى و نرقص للصبح و نخربها بقى
صافى / صحيح كنت هنسى الجامعه بعتتلى ايميل النهرده
مرام / بجد قالو ايه
صافى / اتحطيت عالوايتنج ليست
مرام / يعنى ايه اه و لا لا
لبنى / لا لحد ممكان يفضى
صافى / بس مترفضتش فى امل
لبنى / انا متاكده انهم هيقبلوا
مرام / بس انتى مستعده تسيبى المحل و شغلك هنا عشان تروحى تدرسى بره
صافى / دراستى مش هتعطلنى كل حاجه هنا هتكمل زى مهى الفكره انى هكتسب خبره اكتر و ممكن اتعرف على مصممين مشهورين و اشتغل معاهم
لبنى / طبعا يا بنتى دى فرصه العمر
مرام / طب و هو انتى مينفعش تدرسى على حسابك
لبنى / مكلف جدا الا لو حد قدملها منحه بقى هنا الوضع مختلف
صافى / انا متفائله قلبى بيقولى انى هتقبل
مرام / ان شاء الله طبعا هما هيلاقوا احسن منك
تليفون مرام يرن
لبنى / هو فى ايه دى رابع مكالمه فى الخروجه دى
صافى / بطلى حقد بقى
لبنى / مكلو بيبقى كدا فى الاول هو انا اللى هقولك
مرام / كنسلت بطلو بقى
لبنى / انا بقول كفايا كدا انا هطلب الشيك
مرام / انا عزماكوا
لبنى تشاور للمتر و مرام تطلع المحفظه
لبنى / لا المرادى عليا
مرام تطلع الكريدت كارد
مرام / خلاص انا سبقت و طلعت
المتر يدخل و معاه الشيك مرام تديله الكريدت كارد يديها المكنه تحط الرقم السري متقبلش تجرب تانى متقبلش
لبنى / هو مقالكيش الرقم و لا ايه تمنتاشر تلاتين
الراجل يجرب يقبل و يدى لمرام الكارد تانى تبص فيه
مرام / دى مش بتاعتى
لبنى / ههههههههههههههههه ايوه دى بطاقه مازن ايه المشكله
صافى / يمكن اتبدلت منكوا يوم مكنتوا عندى فى الاتيليه
مرام تبصلها و تفتكر و تهز راسها اه بس واضح عليها الضيق
لبنى / مالك
مرام / مفيش
لبنى / لا على فكره فى وواضح اوى
مرام / لا بس انا مش عارفه ازاى ده حصل انا شيلاها طول الوقت ده على انها بتاعتى افرضى جربت استخدمها و انا معرفش الرقم
لبنى / كل الكاردز بتاعه مازن بنفس الكود على فكره عشان ميتلخبطش فعشان كدا كلنا عارفينه اصلا ازاى مقالكيش حاجه زى دى و هو بيعملك بتاعتك
مرام / عشان هو معمليش بتاعتى
لبنى / معقول
مرام / و ليه لا انا بشتغل و بحوش
لبنى / هو بيع الاكل البيتى ده بتسميه شغل يا بنتى دا اخره يبقى هوايه فالمطبخ
مرام / مفيش مانع ان الواحد يستفيد من هواياته مصافى اهى كانت هوايه دلوقت ما شاء الله
لبنى / طبعا فاهمه بس انتى دلوقت بقيتى حاجه تانيه انتى هتبقى مرات مازن ابراهيم منتصر يعنى مش هتحتاجى للشغل اصلا
مرام / مفتكرش هيغير حاجه
لبنى / مرام بى رياليستيك لما تحضرى معاه فى مناسبه و يعرفهم عليكى يقولهم ايه طباخه ههه لا حلوه طب خليها معيده او دكتوره فى الجامعه ارحم
مرام / يقول اللى يقوله مفتكرش ان اى كان تعريفه ليا هيقلل من قيمتى و بعدين انا متاكده ان الموضوع ده ميفرقش مع مازن
لبنى / اتكلمتوا فى الموضوع ده
مرام / كل حاجه فوقتها
صافى / ايه مش نمشى بقى و لا ايه
مرام / مفيش مشكله هكلم مازن
مرام تطلع الموبليل و ترن
لبنى / انا هوصلك يا مرام
مرام / لا مازن هيعدى عليا يروحنى مش عاوزه اتعبكوا انا متفقه معاه لما ارنله يجى
لبنى / براحتك
لبنى تشرب العصير ثوانى مازن و زياد يدخلوا
لبنى / ايه ده ايه المفاجاه دى
زياد / احنا كنا فى الكافيه اللى على اول الشارع مازن كان عاوز نبقى قريبين لحسن لا قدر الله حاجه تحصل
زياد يقعد و مازن عينه على مرام هى مش بصاله
مازن / مرام
مرام تبصله
مازن / نروح
مرام تهز راسها و تقوم تسلم على صافى و لبنى
مازن / اوصلك يا صافى
لبنى / سيبها هنوصلها احنا الليل لسه فى اوله
مازن يبص لصافى تبتسمله ياخد مرام و يمشوا فى صمت
………………..
فى العربيه مع مازن
مازن / مانا مش هقدر اعرف ايه اللى مدايقك طول مانتى ساكته و باصه الناحيه التانيه كدا ... افتكرى انى قولتلك بلاش و هتدايقك و انتى اللى قولتى مش مشكله
مرام تفتح الشنطه و تطلع الكريدت كارد بتاع مازن و تحطها عالتابلوه
مازن / كنتى كلمتينى تمنتاشر تلاتين
مفيش اى رد فعل من مرام يركن
مرام / هتروحنى و لا انزل اخد تاكس
مازن / هروحك بس الاول بصيلى
مرام تيجى تفتح الباب مازن يشده يقفله و يقفل اللوك من جنبه
مرام / افتح الباب بدل والله اطلع جنانى كلو عليك
مازن / ايوه بالظبط كدا طلعى جنانك يمكن افهم
مرام / انت اتلخبطت و لا ادتنى دى قاصد ها
مازن / ادتهالك قاصد
مرام / ليه
مازن / عشان انتى مراتى و ملزمه منى
مرام / انت متخيل الموقف اللى كنت فيه
مازن / انا متاكد ان اى كان اللى حصل ميستاهلش زعلك دا كلو
مرام / والله يعنى انا نكديه مثلا
مازن / لا انتى بس حساسه زياده شويه
مرام تبص الناحيه التانيه
مازن / دا مش حسنه منى و لا حتى واجب عليا دا فرض
مرام / الكلام ده لما ابقى فبيتك انا مش محتاجه فلوسك
مازن / انتى ليه مصره تحطى الفرق ده بنا ليه كل شويه تحسسينى انك دحكتى عليا
مرام / انا ؟؟
مازن / ايوه قولتيلى لما تحفظ هتجوزك و حفظت و كتبنا الكتاب و فجاه لا يا مازن انا كدا مش مراتك مع انك شرعا و قانونا مراتى هو انا لو مت دلوقت يعنى مش هتورثى
مرام / بعد الشر عنك انت عبيط فلوسك دى كلها تبلها و تشرب ميتها هعمل بيها ايه منغيرك يا متخلف انت
مازن يبتسم اوى و يسند عالكرسى و مرام تقعد و تنفخ
مازن / انتى مراتى و ملزمه منى فلوسك بتاعتك انا ازودهالك و طول مانا معايا و ربنا كارمنى من فضلك اسمحيلى
مرام / انا بجد مخنوقه اوى و اللى خانقنى اكتر انى مش قادره اشرحلك انا بحس نفسى صغيره اوى هو احنا لما نتجوز هتسبنى اطبخ
مازن / طبعا كل يوم تلت وجبات امال هفضل طول عمرى منغير كرش يعنى
مرام تبص الناحيه التانيه و تبتسم
مرام / اقصد هتخلينى اشتغل فالاكل البيتى
مازن / لا
مرام / شوفت مستعر منى مشرفكش
............................