السكه شمال بقلم / لولو_محمد ( كامله )

الحلقه ١٥٣

(((((((((السكة شمال )))))))
#لولو_محمد
الحلقه 153
كامل / مش عارف انا اديتهم اقوالى و بيقولوا تقرير معمل جنائى و كدا بس طبعا مفيش اى شهود على اى حاجه و دلوقت بيفرغوا كاميرات المراقبه اللى فى الشارع كلها عشان يعرفوا اى تفاصيل و اكيد هيبلغونا
زياد / انا هكلم محمود اشوف لو فى اخبار عندهم
زياد ياخد جنب
مونى / انا مش قادره اصدق اللى بيحصل ده انا فعلا مش قادره اصدق
كامل / الحمد لله ان العربيه انفجرت و مازن بعيد لو كان قرب شويه ربنا وحده اللى يعلم هيحصل ايه
مونى / الحمد لله الحمد لله
لبنى تبص ناحيه فريده و ابراهيم ابراهيم بيتكلم فى التليفون و عصبى تروح ناحيتهم و تمسك ايد فريده تبصلها
.............................................
فريده / لقوا عربيه صفوت بس هو مش جواها
لبنى / عرفت كامل قالنا
فريده / هو فين
لبنى تشاورلها هناك واقف بيتكلم مع مونى تلاقى زياد رايحلهم تجرى عليهم هى و فريده
زياد / اللى حصل عند مرام ان فى حد وقف فوق سطح واحد مالبيوت اللى قدامهم و ضرب الشبابيك بشوت جن خرطوش بلي 80 بليه و طبعا عشان المسافه مش قليله محدش اتعور كل الاضرار فى الواجهه و الازاز
فريده / الحمد لله طب مسكوه
زياد / لا للاسف هرب
مونى / يعنى ايه هرب يعنى ايه بالبساطه دى حد يضرب نار عالناس فى بيتوها و يهرب بالبساطه دى
زياد / عادى جدا اولا كل الناس اتجمعت على صوت ضرب النار و على مخدوا بالهم من مكانه كان التانى هرب
لبنى / و متنسيش ان دى عشوائيات سهل اوى اى حد يدخل و يخرج مالمنطقه لا فى كاميرات مراقبه و لا نيله و اصلا المنطقه كلها بلطجيه و اكيد السلاح عادى وسطيهم انتى فكراهم فى بافيرلى هيلز و لا ايه
مونى / طب مجريوش وراه محدش شافه
زياد / بيقولوا ملحقوهوش على مطلعوا السطح لقوا السلاح محطوط عالسور و مفيش حد موجود
فريده / و اكيد السلاح راح المعمل الجنائى و اكيد هيرفعوا من عليه البصمات و يعرفوا مين عمل كدا صح
كامل / بصراحه مفتكرش ان ده هيحصل اكيد اللى نظم كل الحاجات دى فوقت واحد مش هيكون اهبل انه يسيب بصمات على السلاح اكيد اللى عملوا كل ده محترفين
لبنى / و هو فى واحد محترف يسيب السلاح بتاعه برضه
زياد / و هو هيحتاج السلاح فى ايه ان كان دخله بسهوله عشان الناس مش واخده بالها فاكيد مش هيعرف يخرج بيه بسهوله يرمى السلاح و يندمج وسط الناس كانه بيدور على اللى عمل كدا او بيجرى وراه و يخلع
مونى / هو فى ايه هو احنا فى شيكاغو هنا انتوا بتقولوا ايه
كامل /يا حبيبتى كل دى فرضيات احنا بس بنحاول نجمع الاحداث و نربطها مع بعض يمكن نفهم اى حاجه يعنى على الاقل يمكن نرتاح
ابراهيم يدخل
ابراهيم / ملوش اثر موصلش لاى مستشفى لا خاص و لا حكومى
فريده / صفوت ؟؟
ابراهيم / ايوه و الاغرب طبعا ان مفيش مخلوق اصلا بلغ الاسعاف
كامل / الله مش الناس قالوا ان الاسعاف خدته
زياد / ثوانى يا كامل انت بقالك كتير اوى بره ... طبعا .... حتى لو حد بلغ مستحيل تكون الاسعاف وصلت بالسرعه دى
مونى / يعنى ايه
ابراهيم / متقلقيش يا مونى شريف متابع الموضوع و فى معاه ناس كتير جدا فكل حته اوصافه بقت فى كل المستشفيات
مونى / يا بابا بيقولك دول مش اسعاف بجد يعنى ممكن يكونوا خطفوه
زياد / مونى اهدى مش هيحصله حاجه لا مازن و لا مرام جرالهم حاجه و لا حتى خربوش اللى بيعمل كدا مش بيموت هو قاصد محدش يموت هو بس
لبنى / بيرعبنا
الكل يبص للبنى
كامل / حد مش عاوز الفرح يتم مثلا
مونى تبص لابوها
ابراهيم / انتوا مجانين صح بتبصولى ليه انا اكيد مش هحاول ائذى ابنى مهما كان و لا حتى صفوت صفوت مهما كانت الخلافات اللى بنا مستحيل ائذيه السبب الوحيد اللى مخلينى مطمن على مازن وجود صفوت فى حياته انه هيحميه و يوجهه انتوا متخيلين انى ممكن ائذيه ائذى ابنى بايدى
زياد / لا طبعا اللى عمل كدا مش واحد مننا و هيبان اكيد هيبان هيروح فين يعنى
ابراهيم / فريده خدى مونى و روحوا اطمنوا على مرام
الكل يبصله باستغراب
ابراهيم / وصلهم يا كامل لو سمحت و خليك معاهم انتوا معاكوا حق ناس كتير اوى هيشكوا فينا لازم نحاول منلفتش الانظار و انت يا زياد اعمل اتصالاتك و بلغ الناس و الكل باللى حصل الفرح هيتاجل طبعا او يتلغى لحد ما نطمن عليهم
زياد يهز راسه و الكل يمشى و تفضل لبنى واقفه مع ابراهيم
ابراهيم / ايه يا لبنى فى ايه مروحتيش معاهم ليه
لبنى / و اسيب مازن
ابراهيم / انا هنا جنبه متقلقيش مازن قوى انا عارف ابنى كويس انا عارف انه هيقوم منها و لا كان حصله حاجه
لبنى / و انا كمان عارفه بس برده مش هقدر اتحرك من هنا
ابراهيم يحط ايده عليها تعيط فى حضنه
لبنى / انا مش قادره اتخيل ان كان ممكن يجراله حاجه مش قادره اصدق ان كان ممكن ... اونكل بليز كلم حد خلينى ادخل اشوفه خلينى اطمن عليه حتى لو من بعيد ارجوك
ابراهيم يهز راسه حاضر
...............................
فى العنايه
مازن نايم عالسرير الباب يتفتح لبنى تدخل مازن على وشه علامات استفهام
لبنى / الف حمد الله على سلامتك قلقتنى عليك
مازن / الله يسلمك هو فى ايه انا محجوز هنا ليه
لبنى / مفيش حاجه الحمد لله انت كويس هما بس حطينك تحت الملاحظه لحد ميطمنوا عليك
مازن / هو خالو بره اخر حاجه فاكرها انه كان عاوزنى فى حاجه ضرورى جدا متعرفيش كان عاوزنى فى ايه
لبنى / لا معرفش
مازن / هو انا موبايلى فين عاوز اكلمه عاوز افهم
لبنى / تقريبا مع كامل لقاه فى الارض بعد منقلوك المستشفى
مازن / طب حد كلم مرام هى بره طيب و لا ايه مهو متزعليش منى يعنى انتى اخر واحده كنت مستنيها تعدى مالباب ده
لبنى / للدرجادى على العموم انت عارف انى مبزعلش منك بس للاسف مفيش بره غيرى انا و اونكل ابراهيم
مازن / كنت مستنى منه ايه يعنى حتى مكلفش نفسه يدخل يطمن عليا
لبنى / متظلموش على فكره حالته صعبه اوى بره بس هو قالى ادخل انا عشان هو مبيستحملش المواقف دى
مازن / حد قال لمرام
لبنى / مازن ... النهرده كان يوم صعب اوى
مازن / فى ايه يا لبنى ايه اللى حصل لا خالو و لا مرام بره طب شريف زياد مونى الناس دى فين
لبنى / لا كويسين كلنا كويسين صدقنى مونى و زياد و شريف و كامل و محمود كلهم كويسين حتى مرام كويسه
مازن / كويسين ازاى و سايبنى فى المستشفى لوحدى مهو متقنعنيش ان شريف ممكن يسبنى او ان مثلا محدش بلغه لانه كان موجود فالشقه فوق و اكيد محمود مش هيخبى عن مرام هما فين ازاى يسيبونى لوحدى
لبنى / ظروف
مازن / ظروف ايه دى انتى عاوزه تفهمينى انى اغلى عندك منهم عاوزه تفهمينى ان فى حاجه فى الدنيا ممكن تخلى مرام مش جنبى و انا فى المستشفى الا اذا كانت مصيبه سوده متتكلمى عدل يا لبنى فى ايه ايه اللى حصل
لبنى / بص بلاش تعرف منى انا انا اطمنت عليك و خلاص
مازن يقوم من السرير لبنى تحاول تمنعه
لبنى / مازن ارجوك ارتاح انت عندك ارتجاج الدكتور حاطك هنا عشان يطمن عليك الحادثه مكنتش عاديه دا انفجار
مازن / مانا برده لازم افهم العربيه ازاى انفجرت انا محتاج حد يفهمنى ايه اللى بيحصل و فين خالو و مرام و شريف مستحيل يسيبونى لوحدى مستحيل فى مصيبه حصلت و لازم اعرفها انطقى فى ايه ايه اللى حصل
الدكتور يدخل
مازن / انا همشى من هنا حالا
الدكتور / ارجوك تهدى لو سمحت العصبيه دى غلط جدا دلوقت فمن فضلك
مازن / انا عاوز موبايل
ابراهيم يدخل مازن يبصله
مازن / فى ايه يا بابا ايه اللى حصل يا جماعه حد يفهمنى انتوا ساكتين ليه ايه اللى حصل ايه اللى بيحصل متنطقوا
لبنى / منعرفش محدش يعرف فى ايه كل حاجه مش مفهومه انت عربيتك انفجرت و خالو عمل حادثه عربيه و مرام انضرب عليهم خرطوش فى البيت كل ده حصل فى نفس الوقت احنا كل واحد فينا مع حد فمستشفى شكل او فحته بيعمل المحضر محدش فاهم حاجه
مازن واقف مصدوم و فجاه يتحرك ناحيه الباب الممرضيين يمسكوه و يمنعوه
مازن / انا لازم امشى انتوا فاهمين لازم اطمن على مرام و خالو انتوا فاهمين و لا لا سبونى
الممرضين يسحبوا مازن للسرير و يدوله حقنه مهدئه لبنى تمسك ايده قبل ميغمض عنيه
لبنى / هى بخير متخافش
مازن عنيه تقفل و لبنى بتعيط جنبه
لبنى / هو هيبقى كويس صح
الدكتور / باذن الله اكيد
لبنى تروح لابراهيم تلاقيه واقف ساكت
لبنى / هنعمل ايه
ابراهيم / مش عارف انا بجد مش عارف 
................................
فى المستشفى عند مرام
محمود / مفيش اخبار
شريف / لحد دلوقت لا
محمود / و مازن
شريف / كويس الحمد لله احسن كتير بس طبعا لما عرف اللى حصل بقى ممكن اوى تتخيل اللى حصل
محمود / الله يعينه هو مينفعش ننقل مرام عنده هناك فى المستشفى او هو هنا بيتهيالى هيبقى احسن الاتنين مع بعض هيعدوا اللى حصل
شريف / والله فكرت فى الموضوع فعلا بس انا مش عارف ايه اللى مستنينا بره انا مش عارف فى ايه
محمود / قصدك ان الموضوع مخلصش على كدا و ممكن يحاولوا يقتلوهم تانى
زياد يدخل
زياد / مفتكرش انها كانت محاوله قتل اصلا
زياد يسلم عليهم
زياد / امال مونى و ماما فين
محمود / جوه مع تيته بيحاولوا يهدوها الله يعينها وضعها صعب جدا الواحد خايف قلبها يتعب تانى
زياد / لا ان شاء الله خير
شريف / ايه اللى خلاك تقول ان دى مش محاوله قتل
زياد / العربيه انفجرت و مازن بعيد كان ممكن تنفجر و هو راكبها او و هو جنبها
شريف / لسه تقرير المعمل الجنائى مقالش اصلا سبب الانفجار ايه
زياد / اى يكن انفجرت و مازن بعيد بالظبط زى مرام الخرطوش انضرب من مسافه بعيده كسر الازاز و بهدل الدنيا بس مفيش شخص واحد اتعور كلو فالوجهه
محمود / ايوه بس
زياد / حتى خالو الناس قالو ان عربيه الاسعاف خدته فى ثوانى من الحادثه من قبل حتى ميطلبوها يعنى كان معروفه انه هيعدى مالمنطقه دى و الاسعاف كانت مستنياه عشان تلحقه
شريف / طب هو فين
زياد / معرفش بس اكيد فمستشفى انا قولتلك اللى عمل كدا مش عاوز يقتل هو بس بياجل الفرح او يلغيه
محمود / الباشا طبعا
شريف / مستحيل ابراهيم بيه ميعملش كدا هو و صفوت بيه اصدقاء بالرغم من كل الخلافات اللى بنهم بس عمرهم مياذو بعض و لا ياذى مازن
زياد / و لا حتى ياذى مرام حتى لو بيكرهها عمره و على فكره منهار جدا هناك حتى لو مش باين عليه بس تحسه تايهه و مش عارف يروح فين و لا يجى منين واقف متسمر كدا
محمود / امال مين ... ماهينور البت اللى كان مازن خاطبها
شريف / معرفش ... معرفش ... هما سمحوا الزياره هناك
زياد / لا اخر حاجه الدكتور قال ان مفيهوش اى حاجه بس هيحطوه تحت الملاحظه
شريف / انا هكلم ابراهيم بيه هخليهم ينقلوه هنا و هكلمهم اشوف وصلوا لحاجه بخصوص صفوت بيه و لا لا
زياد / تمام ... انا كنسلت الفرح لغيت كل حاجه
محمود / فرح ايه بس نطمن عليهم الاول
زياد / متقلقش هيقوموا ان شاء الله لمصحله اللى عمل كدا لازم يقوموا بالسلامه اصلا اللى عمله ده مش هيعدى بالساهل
محمود / احط ايدى عليه ابن الكلب قسما بالله مسيبه
زياد يهز راسه اه و يخبط على باب الاوضه و يدخل
...............................
قدام اوضه فى مستشفى
سميحه / يعنى مفيش اخبار خالص يابنى
شريف / الاخبار متطمنش خالص يا تيته قدرنا نجيب رقم عربيه الاسعاف اللى خدت صفوت بيه مالحادثه من تفريغ الكاميرات فى الشارع بس للاسف لما جينا نسال عنها طلعت مسروقه اصلا و مش بس كدا لقوها فاضيه عالطريق و دلوقت زمانهم بيرفعوا البصمات بس مفتكرش هيلاقوا حاجه
مديحه / لا اله الا الله ايه شغل العصابات ده احنا فين هنا دى غابه مش بلد
سميحه / ان شاء الله خير  متقلقوش باذن الله هتبقى دى كمان تهويشه كدا زى كل اللى حصل
محمود / بس مين الواحد يعرف عدوه مين فاجر اوى كدا انه يقدر يعمل و يخطط الحاجات دى كلها
شريف / للاسف يا محمود انا مع مازن من سنين و لو حبيت احطلك قايمه الناس اللى نعرفهم ممكن يعملوا اللى حصل ده و اكتر القايمه طويله جدا
محمود / يعنى ايه يعنى هنسكت و نستنى المره الجايه ينجح
مديحه / بعد الشر الف مليون بعد الشر تف من بقك دانا لسه قاعده بفكر هنصلح اللى حصل ده ازاى الست ام مروه ماشيه من عندنا و هى بتغلى هنقولها ايه هتطمن على بنتها وسطينا ازاى بعد كدا
سميحه / انا هقوم اطمن عليهم يمكن فاقوا
شريف / فكره كويسه برده
...........................
فى اوضه دابل فى المستشفى
مرام نايمه عالسرير و مازن نايم عالسرير اللى جنبها تفوق و تقوم تقعد تبص حواليها تشوف مازن تجرى تنام فى حضنه و تحاول تصحيه
مرام / مازن ... قوم يا حبيبى .. قوم طمنى عليك انت كويس ... مازن رد عليا ... مازن اصحى عشان خاطرى ... مازن قوم انت نومك خفيف انت مبتردش ليه
سميحه تفتح الباب و تدخل تلاقى مرام جنب مازن بتعيط تروحلها و عنين مرام عليها
مرام / هو مبيردش عليا ليه هو ساكت ليه يا تيته خليه يكلمنى خليه يقوم يا تيته
سميحه / نايم يا قلب تيته
مرام / لا مازن نومه خفيف مازن لو لمستيه و هو نايم هيصحى انا بهز فيه مبيتحركش قوليلى الحقيقه مازن جراله ايه قولى الحقيقه
سميحه / والله نايم الدكتور مانعه مالحركه بس و هو لما عرف اللى حصلنا و حصل لخاله اتجنن فدوله حقنه مهدئه منيماه و شويه و يفوق متخافيش
مرام / مفيش اخبار عن خالو صفوت مفيش جديد
سميحه / ابدا يا بنتى اديهم بيدوروا فى المستشفيات
مرام / ان شاء الله خير
مرام تبص على مازن و تعدى ايدها بحنيه على شعره و هو نايم
سميحه / هو كويس مفيهوش حاجه هو بس وقع على دماغه لما اتنطر مالانفجار لكن مفيهوش اى حاجه تانيه
مرام تهز راسها ايوه
مرام / هو ليه الناس بيعملوا معانا كدا انا عمرى ماذيت حد ليه مستكترين عليا افرح ليه بياذونى بالشكل ده
سميحه / اقولك ايه بس يا بنتى النصيب هنعمل ايه
مرام / بس انا تعبت مبقتش بشوف غير شر فكل مكان بقيت علاطول خايفه حاسه انى فدنيا غير اللى اتربيت عليها دنيا وحشه و مرعبه تيته انا مش قادره اعيش انا تعبت
سميحه تتنهد و مرام تبص على مازن تانى
مرام / مدام انت بخير خلاص مفيش حاجه تانيه تهمنى المهم تقوملى بالسلامه انت هتقوملى بالسلامه صح لو بتحبنى قوم قوم بقى عشان خاطرى
مرام تعيط سميحه تقوم تاخدها فى حضنها
.............................
فى مستشفى حكومى
ابراهيم بيدخل المشرحه و يفتحو تلاجه و يطلعوا منها صفوت الدموع تنزل من ابراهيم و يهز راسه ايوه و يطلع بره يقابل زياد و شريف و كامل
زياد / خير
ابراهيم / هوه ايوه
شريف / حضرتك متاكد يمكن حد تانى يمكن شبهه يمكن الحادثه
ابراهيم / هو يا شريف الله يرحمه كان راجل عظيم رجل اعمال ناجح و انسان ناجح و صديق ناجح حتى كان اب ناجح الله يرحمه الله يرحمه
زياد / مازن هيعمل ايه لما يعرف
كامل / الله يعينه الموقف مش سهل ابدا كان راجل محبوب جدا ناس كتير اوى هتزعل عليه
زياد / لازم يتعمله عزا يليق بيه و لازم الاول نعرف مين قتله و نجيبله حقه
ابراهيم / اى كان اللى عمل كدا مش هرحمه مش هسيبه الا و روحه فى ايدى شريف هو كان فى مشاكل فى الشغل مع اى حد الفتره اللى فاتت خالص ... شريف ... شريف
شريف واقف مصدوم و مسهم زياد يهزه يبصله و الدموع ماليه عنيه
زياد / انت كويس
شريف / فى حد ابوه مات بيبقى كويس يا زياد عن اذنكوا
شريف يمشى و هو بيعيط
كامل / انا صحيح مقعدتش معاها كتير بس انا نفسى حبيته و اتعلقت بيه جدا و زعلت عليه ما بالنا بقى باللى معاه طول الوقت الله يرحمه كان دمه خفيف و عشرى
ابراهيم / كان جدع راجل بمعنى الكلمه الله يرحمه الله يرحمه
ابراهيم يمشى و يسيبهم
كامل / خليك هنا معلش يا زياد شوف الاجراءات ايه و كدا و انا هروح المستشفى لازم يبقى فى حد جنبهم هناك لما يعرفوا الخبر و انا مبفهمش فى الاجراءات هنا انت عارف معلش
زياد / مفيش مشكله معاك حق لازم حد مننا يفضل هنا
كامل يمشى و زياد واقف مكانه
زياد / مين الفاجر اللى عمل كدا
...............................
فى الفندق عند احمد
باب الاوضه يخبط جميله تروح تفتح تلاقى لبنى
لبنى / سيدك جوه
جميله / افندم
لبنى / روحى يا شاطره نادى اللى مشغلك
جميله تبصلها و تبتسم بسخريه
جميله / واضح انك غلطانه فى الاوضه او شاربه حاجه بس شكلك بنت ناس فهسيبك تمشى و بليز بلاش تستفزينى اطلبلك السيكيوريتي يرموكى بره
لبنى تقرب منها اوى
لبنى / انتى يا كلبه السكك ترمينى انا بره
لبنى تشد جميله من شعرها توقعها فى الارض و تدخل و تقفل الباب وراها و جميله بره بتخبط
جميله / افتحى يا بنت الكلب
احمد يطلع من جوه يلاقى لبنى تفتح شنطتها و تطلع منه مسدس احمد يبتسم
احمد / وحشتينى
لبنى / قولتلك لو قربت من مازن هقتلك قولتلك لو لمست منه شعره واحده هقتلك
احمد / و انا ماذيتهوش مازن سليم لو كنت عاوز اقتله كان زمانه متفحم مع العربيه الرصاصه منضربتش فى تنك البنزين الا لما مازن كان بعد خالص حظه بقى انه رجع تانى بس عالعموم انا اطمنت على حالته سليم و زى الفل متقلقيش خالص ... ها تحبى تشربي ايه
صوت الخبط عالباب مستمر احمد يروح ناحيه الباب و لبنى واقفه فى النص ماسكه المسدس ناحيه احمد
لبنى / اوعى تتحرك بدل مفرغ فيك الرصاص كله
احمد / هخليها تمشى عشان نقعد فى هدوء
لبنى / طول عمرك زوقك يقرف ايه دى
احمد يبصلها و يبتسم و يروح ناحيه الباب و يفتحه
احمد / امشى انتى دلوقت انا عندى ضيوف مهمين و مش عاوز ازعاج
جميله / بس دى
احمد / انا قولت مره و انتى عارفه انى مبحبش اكرر كلامى لما هعوزك هكلمك
جميله تبصله و تمشى احمد يقفل الباب و لبنى لسه منشنه عليه بالمسدس
احمد / ايديكى هتوجعك كدا
لبنى / ليه عملت كدا ليه بتكرهه اوى كدا عملك ايه
احمد / تشربى حاجه
لبنى / عاوزه اشرب من دمك
احمد / و ايه مانعك المسدس فى ايدك
احمد يقرب من لبنى
لبنى / ارجع هموتك بالمسدس
احمد / مش محتاجه مسدس عشان تقتلينى عنيكى دى قتلتنى من زمان اوى
احمد يحاوط لبنى بايديه و ياخد منها المسدس و يرميه عالكرسى و هى بصاله باستغراب و عنيها كلها دموع ياخدها فى حضنه تعيط
لبنى / قولتلك ابعد عنه
احمد / خلاص اهدى خلاص الموضوع خلص
لبنى / انت فاكر انه لما هيخرج هيسكتلك صفوت مات خال مازن اتقتل و انت اللى قتلته هيوصلك زى موصلتلك هيقتلك و يدخل السجن او تقتله انت و فى الحالتين انا اللى هموت انت ليه مش قادر تفهم
احمد / ليه بتحبيه اوى كدا فيه ايه زياده عنى
لبنى / اوعى ابعد عنى
لبنى تحاول تبعده يشدها و يضمنها اكتر و هى منهاره
احمد / انتى عارفه انى بحبك انتى عارفه ده من زمان فضلتى عليا مازن و لما رفضك روحتى رميتى نفسك فى حضن عيل خرع زي زياد بس عشان تبقى جنب مازن فيهم ايه زياده عنى مين فيهم حبك قدى
لبنى / اخرس
احمد / ليه انا بحبك انا سايبه عايش بس عشانك و سايب الكلبه اللى اسمها مرام عايشه بس عشانك عشان توطى تبوس رجلك عشان اكسرها قدامك كل اللى بعمله عشانك و برده مش قادره تحسى
لبنى / سافر يا احمد ارجع مطرح ما جيت
احمد / تعالى معايا انا رجعت عشان وحشتينى رجعت عشان مقدرتش ابعد عنك انتى عارفه انى بحبك
لبنى / مازن يا هيقتلك يا هتقتله مازن مش هيعدى اللى حصل على خير انت مش قده
احمد / تحبى اقتلهولك دلوقت عشان تتاكدى انى قده و نص
لبنى / سافر و سيبنا فى حالنا عاوز ايه عاوز كام
احمد / عاوزك
لبنى تبص لاحمد بصدمه
احمد / عاوزك و مش عاوز اى حاجه تانيه لا فلوس و لا شركات و لا اى حاجه تفرق معايا انا مش عاوز غيرك
.....................................