السكه شمال بقلم / لولو_محمد ( كامله )

الحلقه ٤٤

((((((((((السكة شمال ))))))
#لولو_محمد
الحلقه الرابعه و الاربعون
سعد / اقولك انزل المنشيه و لا الابراهيميه شوف حاجه حلوه لمرام تهاديها بيها لما ترجع و انت هتنسى كل الهبل ده
محمود / كدا كدا كنت ناوى بس وانا مروح اكون قبضت و اجيب حاجه عليها القيمه
سعد / ماشى بس فكك مالهبل اللى فدماغك ده متخليش شطانك يلعب بيك و يوديك و ترفص النعمه برجليك الواحد مصدق دانا كل يوم قبل محط راسى عالمخده بقول اللهم ديمها نعمه و احفظها مالزوال و انت بتتبتر عليها ياخى اتقى الله اتقى الله و نام بقى نام و سبنى انام ساعتين عشان الشفت بتاع بالليل اعرف اسهر فيه براحتى مش كل يوم افضل اسقط عالكومبيوتر نام بقى
محمود / متنام ياعم هو انا حوشتك اقولك و ادى النور يا سيدى اللى مدايقك اتخمد
محمود يطفى النور سعد ينام و محمود يفضل صاحى يفكر
.................................
فى المطعم
مرام / اتاخرت عليك 
احمد / يعنى مش اوى اتفضلى اقعدى
احمد يقوم يعدل الكرسى لمرام
مرام / كان عندى كام فكره للافتتاح و قولت اخد رايك
احمد / ااااااه ... شوف و انا اللى كنت فاكرك عزمانى لله
مرام / هههههههههههههههه لا والله مقصدش بس يعنى قولت فرصه نتكلم و لا انت مبتحبش تتكلم و انت بتاكل
احمد / لا بحب جدا بس مبحبش اتكلم فى الشغل
مرام / اممم اوك تمام بس امال هتتكلم فى ايه
احمد / ايه ده هو انتى مبتتكلميش غير فالشغل و بس
مرام / لا.. بس ..معرفش ..يعنى
احمد / من ايدك اقدر اقول انك مش مخطوبه بس بنات اليومين دول مش محتاجين دبله عشان يقولوا انهم مرتبطين
مرام / مش كلهم
احمد / بجد ؟؟ سعيد ان لسه فى بنات زيك
مرام / شكرا بس انا القاعده هما اللى شذوا عنها احنا كتير اوى يا مستر احمد
احمد / ممكن يكون ده سر نجاحك على فكره تعرفى ده ؟؟؟
مرام / هو ايه
احمد / انك سنجل
مرام / هههههههههههههههههههههههههههه سورى سورى
احمد / على ايه بالعكس دحكتك حلوه اوى
مرام / شكرا
احمد /  انا كمان سنجل على فكره و بعتبر ده سر نجاحى
مرام / بس بيقولوا وراء كل راجل عظيم امراءه
احمد / مش يمكن كانوا يقصدوا مامته
مرام / ههههههههههههه ممكن برده
احمد / انا دخلت فى علاقه قبل كدا و فشلت و محاولتش اكررها
مرام / الفشل مش انك تفشل الفشل هو انك تستسلم للفشل و متحاولش تانى
احمد / فى فشل كتير اوى فى الجمله دى اربعه فشل
مرام / ههههههههههههههههه
احمد / على العموم انا مبحبش الفشل بس سيبك منى خلينا فيكى انتى ليه مرتبطيش لحد دلوقت ايه هى الرجاله عميت و لا ايه
مرام / انت ليه محسسنى انى فاواخر التلاتينات مثلا انا يادوب لسه مكملتش العشرين اصلا يعنى بيتهيالى لسه صغيره
احمد / لا والله مش قصدى بس غالبا البنات الحلوه بيتخطفوا بسرعه مبيقعدوش
مرام / مع ان تيته بتقول ان الحلوه بختها مايل
احمد / تيته غلطانه
مرام / بدات اعتقد كدا الفتره اللى فاتت يعنى مستحيل يحصلى كل الحاجات الحلوه دى و انا بختى مايل يعنى
احمد / على فكره انا عاملك مفاجاه بس مش هقولك عليها دلوقت
مرام / مبحبش الاسلوب ده على فكره
احمد / و لا انا بس ده اسمه اسلوب تشويق ايه دا مهم جدا فى الماركتينج
مرام / هههههههههه و انت هتسوقلى ايه
احمد / الجنه
مرام / الجنه ؟؟
احمد / اه لو عاوزه
مرام / امممم و انت تقدر تضمنلى الجنه
احمد / و ليه لا صعبه
مرام / مستحيله
احمد / ليه
مرام / يعنى انت مش ربنا عشان تضمن لحد الجنه
احمد / بتاعه ربنا ممكن اساعد توصليلها لكن اللى فالارض انا اقدر احطها تحت رجليكى باشاره واحده زى برده مقدر اسحبها كداهو
احمد يطرقع بصوابعه
مرام/ و ياترى جبت الثقه دى كلها منين 
احمد يبتسم
مرام / ماشى بلاش السؤال ده انت هتستفيد ايه هتعمل كدا ليه سواء تحط الجنه تحت رجليا او تسحبها
احمد / مازن هنا
مرام / مازن !!!
مرام تبص تلاقى مازن و شريف داخلين مالباب و يجولهم
احمد / اهلا اهلا حمد الله عالسلامه ايه المفاجاه الحلوه دى
مازن / مفاجاه!! غريبه مع انك المفروض عزمنى
مازن يحرك موبايله
احمد / اه طبعا عزمتك قولتلك لما تقوم مكنتش اعرف انك قومت
مازن / و انا كان ايه اللى هيرقدنى ازيك يا مرام
مرام / الحمد لله حمد الله على سلامتك
مازن / ايه مش هنقعد
احمد / ازاى اتفضلوا
احمد يشاور للمتر كرسيين يتحطوا بسرعه و مرام و احمد و مازن و شريف يقعدوا و مرام مش مرتاحه
مازن / مبروك المطعم حلو
احمد / الله يبارك فيك بس متحكمش الا لما تدوق اكل الشيف
مازن / دوقته قبلك
مرام تبص لمازن
مازن / بس اكيد معنديش مانع ادوقه تانى
احمد / انتى عارفه يا مرام انا عزمت مازن هنا ليه
مرام / و ايه المشكله انتوا صحاب يعنى
احمد / اه بس فى مناسبه مازن هيخطب
مرام / مبروك
مازن / عقبالك
احمد / انتى شوفتيها ماهى كانت فى المستشفى لما روحنا نزوره سوا
مرام / اه شوفتها مهى جات فى الكليه فى الامتحانات و اتعرفت عليها لطيفه و حلوه مبروك
مازن يدحك و يكتمها
مازن / ميرسى يا مرام ايه مش هناكل و لا ايه انا اصلى للاسف مسافر بكره بس مقدرتش ارفض عزومه احمد دى حاجه مبتحصلش كتير
احمد / اخص عليك يا مازن دلوقت مرام تقول عنى بخيل
مازن / طب متقول و انت هيفرق معاك يعنى
احمد / لا معلش يفرق
احمد يشاور للمتر تانى يدخل بالمنيوهات
احمد / ملوش لزوم اتنين طبق اليوم كمان بسرعه لو سمحت .... مرام عشان جديده و المنيوهات لسه متعدلتش بتختار صنف كل يوم تجهزه عالسوا و النهرده زى مانتوا شايفين عامله نجرسكوا و لسان عصفور باللحمه و لا تحبوا تطلبوا حاجه تانيه
مازن / لا خلينا ندخل عالحلو علاطول انا اتغديت عند مرام فالبيت
مرام / عندى
مازن / اه لسه جاى من عندكم تيته عامله محشى بتنجان و فلفل انما ايه رهيب بس خدى بالك عشان فى فلفلايه طلعت حراقه خلت الفلفل مولع
مرام / و انت كنت بتعمل ايه عندنا
مازن / بسلم على تيته قبل مسافر قولت اروح و محدش فيكوا موجود بما انك بتدايقى من وجودى
مرام / و انا ايه اللى هيدايقنى من وجودك يعنى
مازن / يعنى مبتدايقيش من وجودى
مرام / لا انا ايه اللى هيدايقنى يعنى
مازن / بطمن بس المهم ايه الحلو اللى هنا بليز قولى انك عامله التارت المتين بتاعك
مرام / اه عملاه
مازن / خلاص تمام هناخد اربعه تارت هيعجبك اوى يا احمد
احمد / اكيد تمام اربعه تارت ... شكرا
المتر يمشى و احمد و مازن بيبصوا لبعض و مازن مبتسم
………………………
فى الفيلا
لبنى نازله و خارجه ماهى تقابلها
ماهى/ الله انتى خارجه
لبنى / اه رايحه الكوافير هقابل واحده صحبتى هناك
ماهى / اعرفها صحبتك دى
لبنى / اه نيفين فكراها
ماهى / اكيد طبعا العسوله اللى عنيها واسعه دى دانا بحبها موت مش دى الجيرل فرند بتاعه انس
لبنى / هههههههههههههههههه دانتى قديمه اوى دى حاليا بقت الاكس بتاعه مازن
ماهى وشها يقلب
ماهى / نيفين و مازن ازاى يعنى
لبنى / حوار كدا بس مطولش
ماهى / اكيد طبعا دى فلاحه جدا
لبنى / الله بالسرعه دى
ماهى / هو ايه اللى بسرعه
لبنى / يعنى كانت عسوله و بتحبيها موت من ثوانى
ماهى / اه بس دا ميمنعش انها فلاحه انا بتكلم يعنى يو نو دى مش مناسبه لمازن خالص و بعدين يعنى انا مش فاهمه زوق مازن ياخد الاكس بتاعه صاحبه بجد اى كانت بيليف ايت
لبنى / و لا احنا والله بس اهو على العموم انا مش عاوزه اعطلك اكيد مازن كان طالب منك حاجه
ماهى / مازن بره من الصبح و لسه مجاش
لبنى / معقول ليه راح فين و ازاى دى رجله لسه بتوجعه
ماهى / مهو اخد شريف معاه و قالى مشوار ميتاجلش اصلا هو فضل مع شريف فالاوضه امبارح وقت طويل جدا و انتى عارفه مازن بقى
لبنى / متقوليش انه طلعك بره ايه مش واثق فيكى و لا ايه
ماهى / بصى انا على اخرى فمتسخنينيش بقى
لبنى / طب خلاص مدام مازن مش هنا متيجى معايا
ماهى / اوك اهو اشوف نيفين
لبنى / اوك تعالى
...............................
فى المطعم
احمد / بزمتك مش جامده احلى تارت دوقته فى حياتى حقيقى تسلم ايدك
مرام / انا مبسوطه انه عجبك
مازن / احم كان نفسى اقعد معاكوا اكتر من كدا بس للاسف هسافر بكره و لسه محضرتش شنطتى هشوفك فى الخطوبه اوعى متجيش الدعوه وصلتك صح
احمد / وصلت تمام
مازن / اوك هتعوزى حاجه يا مرام لو خلصتى ممكن اوصلك
احمد / انا هوصلها متقلقش و بعدين هى مش سكتك اصلا و انت متاخر ووراك سفر بكره و لسه محضرتش شنطتك ملوش لازم تعطل نفسك انا هوصلها
مازن يبص لمرام
مازن / اوك سعيد انى شوفتكوا ابقى ابعتلى دعوه للافتتاح بقى او متبعتبش انا كدا كدا هاجى اكيد يلا سلام
احمد / مع السلامه
مرام / سلام
مازن و شريف يمشوا و مازن بيبرطم
مازن / مبسوطه انه عجبك
شريف / ههههههههههههههههههههه
مازن / ادحك ادحك مانت بلوه زيها
.........................
فى الكوافير
بنت قاعده قدام ماهى و ماسكه ايدها بتعملها باديكير و ماهى و لبنى لافين شعرهم ببونيهات
البنت/ ايديكى ناعمه ما شاء الله مش محتاجه اى شغل
ماهى تبص للبنى و تبتسم
ماهى / ميرسى .... امال نيفين مش هتيجي و لا ايه
لبنى / سبيك فور ذا ديفيل اهى شرفت ... اهلا اهلا نوفى حبيبتى اتاخرتى كدا ليه
نيفين / معلش كان عندنا ضيوف ازيك عامله ايه ... ازيك ماهينور صح
ماهى / كويس انك فكرانى عامله ايه
نيفين / الحمد لله تمام
لبنى / اقعدى اقعدى
البنت / انا خلصت و بيتهيالى كدا ممكن نغسل شعرك بقى ماهى تقوم معاها
ماهى / عن اذنكوا
لبنى / انا عارفه انك قولتى عاوزه تقابلينى ضرورى بس والله وانا خارجه قابلتنى و صممت تيجى معايا اصلها قافشه مع مازن و مش فالمود خالص
نيفين / لا مفيش مشكله بس هى هتقفش مع مازن ليه
لبنى / واضح انه موافقش انهم يعيشوا فى الفيلا بعد الجواز
نيفين / جواز
لبنى / ايه ده انتى متعرفيش ان مازن هيخطب ماهى
نيفين / و انا اعرف منين
لبنى / معرفش قولت يمكن انس قالك و لا حاجه
نيفين / و انا ايه علاقتى بانس انا اصلا مش عاوزه اسمع اسمه تانى و لا هو و لا مازن
لبنى / بجد للدرجادى معقول
نيفين / انتى نسيتى عملوا فيا ايه يا لبنى
لبنى / اه عشان موضوع الحمل يعنى معلش يا نيفين مينفعش تلومى حد على غلطتك لا حد منهم اغتصبك و لا حد سقطك كلو كان بمزاجك
نيفين تبص للبنى بديق
لبنى / هى الحقيقه بتزعل بس للاسف هى دى الحقيقه انتى اللى لخبطتى الحبوب انتى الغلطانه
نيفين / غلطت و اتعاقبت و كل واحد فيهم كمل حياته عادى و لا كان فى حاجه حصلت
لبنى / قصدك عشان مازن خطب يعنى طب و فيها ايه برده انتى الغلطانه موقفه حياتك ليه متشوفى غيرهم و تكملى حياتك انتى كمان
نيفين / ازاى يعنى
لبنى / عادى زى الناس مالرجاله ماليين البلد ايه معقول مفيهمش واحد مناسب ...... هههههههههه اوعى تكونى بالعقليه الرجعيه المتخلفه دى ... معقول بتفكرى كدا يابنتى بصى لو فعلا الموضوع ده فارق معاكى اوى كدا نفس الدكتور اللى روحناله روحيله هيظبطك
نيفين / انتى بتقولى ايه يا لبنى
لبنى / الله طب اعملك ايه مانا بحاول اساعدك انتى اللى قافشه
ماهى ترجع لافه شعرها بفوطه
ماهى / الخلطه اللى بقولك عليها دى جربتها فى سبا فى ماليزيا بس مقولكيش عالنتيجه بقى
لبنى / هنشوف بس يارب جوده الخامات هنا متبوظش الدنيا
ماهى / دى كلها ناتشورال انجريديانت مفيش حاجه هتحصل متقلقيش
بنت تيجى لنيفين
نيفين / عاوزه اشقر الجزور
البنت / اتفضلى معايا
نيفين تقوم معاها
ماهى / كنتوا بتتكلموا فى ايه بقى
لبنى / و لا حاجه
بنت تدخل تفك الفوطه من على شعر ماهى و تبدا تنشفه بالسشوار
........................................
فى العربيه
مازن قاعد هادى و شريف سايق و كل شويه يبص عليه و مازن مبيتحركش
شريف / احم احم
مازن يبصله
شريف / خايف من سكوتك ده
مازن / بفكر
شريف / مهو ده اللى مخوفنى ناوى على ايه
مازن / لا لا انا بفكر فى الكلام اللى انت قولته امبارح احمد قدملى خدمه العمر انا دورى هنا خلص و مش هدخل تانى
شريف / ههههههههههههههه كل ده عشان انبسطت ان التارت عجبه متكبرش الموضوع دى مجامله يعنى 
مازن يبصله
شريف /  اتكتمت
مازن/ انا هسافر بكره و من هنا لحد مرجع مش هشغل نفسى باى حاجه متخصنيش
شريف / صح
مازن / عارف انه صح
.............................
فى الشركه عند محمود
محمود بيتكلم فى التليفون
محمود / والله عارف اعمل ايه بس
مرام / طب انا هكلم مستر احمد
محمود / مرام ... هو فى ايه دا حتى على راى المثل ان كان حبيبك عسل متلحسوش كله و دا مش حبيبك دا مديرك
مرام / طب اعمل ايه مهو مينفعش يوم زى ده متبقاش موجود و بعدين هيحصل ايه لو ادوك حتى نص يوم
محمود / هو اصلا انا هشتغل كام نص يوم دول حياله اسبوعين احنا حتى الجمعه مبناخدوش اجازه يادوب وقت الصلاه و بنرجع نكمل
مرام / للدرجادى
محمود / على عينى والله معلش متزعليش هتتعوض اول منزل
مرام / خلاص مفيش مشكله
محمود / زعلانه
مرام / لا بس ابقى هاتلى حاجه حلوه و انت جاى فاكر محل الطرح اللى جبت منه السنه اللى فاتت لو عديت عليه عاوزه طرحه رصاصى
محمود / متنفعش ابيض
مرام / اشمعن ابيض
محمود / اصل انا جبت طرحه بيضه ينفع
مرام / انت بتتكلم جد
محمود / هصورها و ابعتهالك بس لو عديت تانى هجيبلك رصاصى عاوزه حاجه تانى
مرام / لا خلاص متتعبش نفسك بقى هى البيضا هتفى بالغرض برضه
محمود / والله قولت كدا حتى الابيض بينور وشك عقبال منجيب الفستان
مرام / هههههههههههههههههههههههههه ياعم ياترى مين يعيش
محمود / ليه يا فقر
مرام / بقولك ايه انا اسفه اوى بس لازم اقفل شكل فى شغل
محمود / روحى يلا مع السلامه خدى بالك من نفسك
مرام / لا اله الا الله
محمود / محمد رسول الله
محمود يقفل التليفون و يروح يقعد عالكومبيوتر
سعد / شايفك منشكح ايه هننزل نجيب الدبل امتى
محمود / بنبرك ده و لا بعد مليون سنه
سعد / ياعم قولتلك اقطع عرق و سيح دمه و انجز يا عم والله سهله اقولك ابعتهالها فى مسج
محمود / انت عبيط اقولها بحبك فمسج عالموبايل
سعد / طب اعملك ايه يا صاحبى مانت اللى كاشش فروحك كدا زى الفرخه المببلوله فشهر اتناشر
محمود / فرخه ؟؟ دانت اللى فرخه و قارفنى بيض اشتغل ...اشتغل
.............................
فى دبى
مازن / طب والله خساره فامه
مونى / حلوه بجد
مازن / زى القمر بجد مش مصدق انك كبرتى بالسرعه دى
مونى / عليك ليا ميه جنيه على فكره
مازن / عنيا طبعا مليون بس بتوع ايه
مونى / انت نسيت و لا ايه مش كنا متراهنين انى هتخطب قبلك
مازن / ههههههههههههههههههههه تكسبى
مونى / بس سمعت انك ناوى تغير الموضوع ده
مازن / اغير ايه فال الله و لا فالك بلا قرف
مونى / لا متقولش مازن انت ناوى على ايه
مازن / ابوكى اتصل بيا و مسح بيا الارض و حلف لا يعرفنى و لا يتعامل معايا لو بوظتله حوار الدمج مع الزفت اللى اسمه ممدوح الشربتلى ده دا حتى اسمه يقرف شراباتلى يعنى بتاع شرابات
مونى / ههههههههههههههههههههههه يا مازن شربتلى يعنى بتاع شربات شربات
مازن / و دول يعرفوا يعملوا شربات دول دول اخرهم يعملوا مخلل بلا قرف على دمهم السم اوف
مونى / مكانت حلوه زمان و لا ايه
مازن / متخلطيش الاوراق يا مونى كانت سكه زيها زى غيرها لكن جواز دى هتربى عيال ازاى دى ... بزمتك دا منظر امك لاولادى دى
مونى / ههههههههههههههههههه و هو انت يعنى منظر اب متخلينى ساكته بقى
مازن يبصلها
مونى / سورى متزعلش كنت بهزر معاك والله مقصدش هو انت فى زيك و لا زى حنيتك انت بس لو تبطل الحاجات اللى بتعملها دى و تركز فى مستقبلك والله يا ابيه والله والله مهيبقى فى منك
مازن / طب انا وحش و منفعش اب العيال الغلابه دول هيبقوا لا اب و لا ام مهو لازم حد عدل يا مونى
مونى / طب وهتعمل ايه
مازن / هعمل ايه يعنى هعومها شويه لحد ميمضوا العقود او ربنا يفرجها من عنده و هما اللى يرفضونى ادى اخره المزاكره و اللى بناخده من وراها عاجبك كدا
مونى / ههههههههههههههههههههههههههه معلش معلش انشف كدا امال اسد يا مازن فى ايه
مازن يبصلها و يدحك و ياخدها فى حضنه
..................................