أنت قلبي الجزء الثالث

الحلقة ٢

#انت_قلبي٣
#بوسي_مصطفى
______________

الحلقة ٢

بعد كام يوم من الأحداث.
في فيلا مراد..
أمل تخبط على باب غرفة مراد(ابنها).
يقوم بسرعة و يفتح شباك الغرفة علشان تتهوا.
مراد : مين؟
يطفي السيجارة اللي نسيها في ايده و يخبي الطفايه داخل درج المكتب.
أمل : أنا يا مراد أنت قافل الباب بالمفتاح ليه؟
مراد : معلش يا مامي أصل كنت نايم.
و يفتح الباب.
أمل : طب و فيها ايه لما تنام و تسيب الباب مقفول من غير المفتاح؟
مراد : حضرتك عارفه رباب بقى اوقات بتيجي و معاها بنتها.
أمل : يا سلام و دي فيها ايه
اصلا رباب قبل ما تطلع تنضف اوضكو بتقولي الأول سيبك من كل دا نتيجتك ظهرت.
مراد و ابتلع ريقه : ظهرت !.. امتى؟
أمل : لسه رؤى بنت طنط فريال مكلماني ونجحت وجابت اتنين و تسعين في الميه.
مراد : طب ألف مبروك عايزين مني ايه بقى؟
أمل : نعم!
مراد : اقصد يعني هجيبها حاضر يا مامي على ايه بس الاستعجال ده هي هتطير؟!
أمل : لا مش هتطير يا حبيبي بس ليه متجبهاش دلوقت و تفرحنا؟!
مراد : افرحكم اه.. حاضر.
أمل : مش مرتحالك يا مراد
أنا بقول لبابي برضو ابنك بيلعب طول السنه و مبيذاكرش متستناش منه مجموع.
مراد بفرحه : بجد يا مامي قولتي لبابي الكلام ده؟
طمنتيني.
أمل : اخلص يلا هات النتيجة.
مراد : حاضر بس اظبط اللاب الأول.
أمل : ما هو متظبط قدامي اهوه اخلص بقى.
مراد : شوفتي بقى الاستعجال اديني دخلت الرقم غلط
ثواني بقى اخرج من الموقع.
أمل : هتخرج ليه بس يا ابني؟ متتعبش اعصابي اخلص بقى.
مراد : أنا اللي اعصابي تعبت.
أمل : أنت!
دا أنت بارد و لا في دماغك.
مراد : الموقع فتح اهوه علشان خاطري يا مامي ثواني بقى اعصابي مش مستحمله.
أمل نظرت للشاشه : كام؟
مراد بفرحه : نجحت.. نجحت يا مامي.
و يحتضن والدته و يُقبل خدها.
أمل : بتاكل لبان!
ما علينا كام بقى؟
مراد ينظر للشاشه مرة تانية : المهم النجاح يا ست الكل.
أمل : تسعه و سبعين! و دول هيدخلوك ايه؟!
مراد : أي جامعة خاصة يا مامي دا أنا ابن دكتور هشام مراد هو بابي شويه و لا ايه؟!
أمل : جامعة خاصة!
لاااا يا حبيبي انسى أنا قولت لبابي مفيش غير حكومي و بس.
مراد : ليه مصاريف الجامعات الخاصة غاليه مثلا مش هنقدر عليها!
أمل : شادي دخل صيدلة جامعة حكومي مش خاص.
مراد : و هشام دخل جامعة أمريكية.
أمل : بمجهوده و لا لأ؟
مراد : بس مصاريفها قد كده.
أمل : الحكاية مش فلوس يا حبيبي بس متدخلش جامعة خاصة علشان مجموعك مجابش حكومي فهمت؟
مراد : مش فاهم حاجه و مش عايز افهم المهم ايدك بقى
يا ست الكل.
أمل : مالها ايدي؟!
مراد : ايدك ابوسها و تشخللي كده علشان اسهر سهرايه حلوة مع صحابي.
أمل : مكفكش لعب طول السنه و بعدين هو أنت جيبت مجموع اصلا علشان تسهر و تحتفل؟!
مراد : حلو يا مامي هشد حيلي في الجامعة بقى.
أمل : لما بابي يجي ابقى أطلب منه اللي أنت عايزة بس الأول يشوف مجموعك دا يدخلك ايه؟
مراد : أنا مالي و مال المجموع دلوقت المهم نجحت خلاص ايدك بقى علشان خاطري يرضيكي العيال كلها تخرج تحتفل و أنا اقعد كده مكتئب في البيت؟!
أمل : هتخرج تروح فين؟
مراد : هو على حسب بقى ما نتفق احنا و الشله.
أمل : أنا مبستريحش لصحابك دول.
مراد : حد منهم قل أدبه على حضرتك؟!
أمل : نعم!
و دا حد فيهم يستجري بس يبصلي.
مراد : اه بحسب اصلا بابي كان ممكن يقطعهم.
أمل : ايواا ثبتني أنت بكلمتين.
مراد : مامي علشان خاطري بقى أنا بتحايل على حضرتك كأني لسه عيل صغير.
أمل : ما أنت لسه صغير امال فاكر نفسك كبرت و لا ايه؟
اتفضل.
مراد : ميرسي قوي يا مامي.
أمل : مبروك يا حبيبي و لو اني زعلانه قوي من مجموعك ده.
مراد : كل واحد بياخد نصيبه بقى.
أمل : لو ذاكرت كويس كنت هتجيب أكتر من كده.
مراد : لو بقى خلاص عديت المهم تحاولي تهدي بابي كده لما يرجع هو بس هيسمع كلمتين حلوين منك هينسى على طول.
أمل : مش عارفه أنت طالع لمين بتكلمني كأني واحد صاحبك.
مراد : عاوز اغير هدومي.
أمل : حاضر بس قبل ما تخرج تقولي.
مراد : حاضر.
______________
في شقة هشام.
ياسمين : يعني ايه مش عارفه رايحه فين هو فيه حد يلبس و يخرج و ميعرفش هو رايح فين يا ليلى؟
ليلى : بجد هو دا اللي حصل
بس أنا لما  الدنيا هتضيق بيه كنت هروح عند خالتو.
ياسمين : اخزي الشيطان يا ليلى البيوت كلها فيها مشاكل لازم نعدي طب تعرفي أنا في أول جوازي شديت أنا و هشام شويه و اخدت على خاطري خليته نزل من هنا و دخلت لبست و كنت مقرره خلاص همشي على بيت بابا لسه بس بقفل الباب بصيت للشقه لاقيتني بدخل و بقعد على الكرسي اللي جنبك دا جيبنا معانا و احنا بننقل العقش ههههههههههههه
و فضلت اعيط ما هو همشي و اسيب بيتي و بعدين ايه اللي هيحصل؟ ما دا بيتي برضو و هروح عند بابا مش هستريح و أنا بعيده عنه و قعدت لحد ما رجع و اعتذرلي و نمنا و لا كأن في أي حاجه.
ليلى : عارفه أنا فكرت ننفصل و شوفت إن دا اسلم حل بس خوفت من رد فعل خالو هشام مش عايزة اضايقه و اوقات بقول يمكن شادي مضايق علشان عايز بيبي يملا حياتنا مع إنه عمره ما قال الكلام دا و لا حتى لمح بالعكس هو مش في دماغه اصلا مش عارفه فين المشكلة مفيش يوم بيعدي علينا غير ما نتخانق مع بعض و الشيطان بيكون حاضر ما بينا و يوسوسلي إني اصمم على الطلاق علشان استريح بس أنا عارفه إني مش هكون مرتاحه شادي طيب بس عصبي و مبيتفاهمش.
ياسمين : ليلى حبيبتي مفيش حد كامل كلنا فينا عيوب كتير نستحمل بعض علشان الحياة تمشي يمكن علشان كل واحد مركز مع التاني بتتخانقوا بكره يجيلك اللي ينسيكي اسمك.
ليلى : ما هو لو كانت دي المشكلة كنت قولت بكره شادي يتغير لكن مش دي المشكلة خالص.
ياسمين : حتى لو مش دي المشكلة انتي وقتها فعلا هتلاقي نفسك بتفوتي كتير و هو هيرجع من الشغل جري علشان ياخد البيبي في حضنه مش قصدي اضايقك بس أنا عارفه
إن معندكيش مشاكل تمنع يعني.
ليلى : ممكن مش عارفه.
ياسمين : اقولك هعلمك تعملي حتة اكله هياكل صوابعه وراها
هتنسيه خناقة الصبح بس تلبسي كده و تتشيكي اوعي جوزك ميكونش بيحبها أصل هشام بيحبها قوي.
ليلى : ايه هي الأكله دي؟
ياسمين : اقولك أنا هاخدك ونعملها عندك فوق بالمرة تغيري الهدوم اللي لابساها دي.
ليلى : اوك.. يلا بينا.
ياسمين : بس تاخدي بالك من يمان و احنا في المطبخ.
ليلى ببتسامة : حاضر.
ياسمين : بس دا ميمنعش إنك تاخدي بالك من الأكل و أنا بعمله المرادي هعمله بـ ايدي المرة الجايه عايزة أكله من ايدك.
ليلى ببتسامة : حاضر يا احن و أطيب اخت في الدنيا.
ياسمين : بس خلاص مش عايزة أكتر من كده
ههههههههههههه
بتتخانقوا على ايه انتي و هو
الحياة اللي فيها أكل مفيهاش خناق دا مبدأي مع هشام.
ليلى : هههههههههههه
______