أنت قلبي الجزء الثالث

الحلقة ٤٢

#انت_قلبي٣
__________
الحلقة ٤٢

في قاعة الفرح.
ياسمين : هشام هو باباك ومامتك زعلانين مني
في حاجه؟
هشام : لا يا حبيبتي ليه بتقولي كده؟
ياسمين : محدش جه لا باباك ولا مامتك ولا حتى مراد طب كانوا بعتوا زينة أو روحت جيبتها
دي ليلى رغم إن الدكتورة محذراها من الحركة كتير جات علشان تجبر بخاطري ومزعلش مع إني مكونتش هزعل لإني عارفه ظروفها.
هشام : معلش يا ياسمين محدش يعرف ظروفهم.
ياسمين : ليه هو في حاجه ولا ايه؟
هشام : هاه لا مفيش يا حبيبتي.
ياسمين : هروح أطمن على ملك أصل شايفه لمه كده حواليها شكلها تعبانه.
هشام : أوك روحي.
_________

في شقة أكرم.
ميرفت : خلاص يا ندى كأنك مسمعتيش حاجه.
ندى : أنا عارفه فريدة متقصدش حاجه ويمكن زودتها معاها هي فاهمه إنها كده بتعمل خير فيه
بس البني آدم دا اذاني قوي يا ماما مبقتش عاوزه أسمع اسمه حتى.
ميرفت : خلاص يا حبيبتي حاولي تهدي اشربي بؤ مياه ومتتعصبيش تاني أنتي عارفه العصبيه وحشه علشانك.
ندى : حاضر يا ماما.
________
في العربية.
كريم : ايه يا فريدة مالك؟
فريدة بتنهيدة : مفيش.
كريم : لأ فيه بقى ولازم أعرف مالك؟
فريدة : مفيش يا كريم قولتلك ركز بس في الطريق.
كريم : مركز في الطريق وهركز معاكي قوليلي بس مالك؟
فريدة : دا أنت مصمم بقى.
كريم : ايوه.
فريدة : حازم كلمني وقالي اروح اتكلم مع ندى وأجس نبضها لو ينفع يعني تسامحه ويرجعوا لبعض.
كريم : روحتي قولتلها؟
فريدة : وياريتني ما قولتلها قعدت تصوت وتزعق وتقولي متفتحيش الموضوع دا معايا تاني.
كريم : خلاص متعمليش كده تاني ولو جالك طلب منك تعملي ده قوليله ممكن تروح تكلم عمي وخرجني من الحوار ده خلينا أخوات وبس.
فريدة : هو دا اللي هيحصل بس هو أصلا هيفهم من نفسه إنها رفضت لإنه قالي لو في خبر حلو كلميني قوليلي وطبعاً الخبر الحلو اللي مستنيه هو موافقة ندى.
كريم : خرجي نفسك من الحوار عنده عمي يروح يكلمه.
فريدة : مش عارفه بقيت أصداع كتير قوي اليومين دول.
كريم : إرهاق ومبتناميش كويس.
فريدة : فعلا.
كريم : يا خبر نسيت.
فريدة : نسيت إيه؟
كريم : كان مفروض اكلم سيف.
فريدة : سيف مين؟
كريم : سيف ابن الأستاذ كمال.
فريدة : ليه ماله؟
كريم : عنده أجهزة في المعمل بتاعه عاوز يبعها وقولتله هروح أشوف مفروض كنت روحت امبارح بس نسيت.
فريدة : خلاص كلمه بكرة وروح في أي وقت شوفهم.
كريم : دلوقت يفكر إني طنشت علشان مش عاوزهم وأنا بصراحه مش محتاجهم بس حاسس إنه محتاج يبعهم ضروري.
فريدة : هو المعمل دا مش شغال؟
كريم : تقريبا كده وإلا ايه اللي يخليه يبيع الأجهزة.
فريدة : عندك حق بس أنا أعرف إنه مكلف كتير قوي على المعمل ده.
كريم : كل حاجه محتاجه صبر مينفعش أكلف وأتعب وعلشان لسه متعرفتش أقفل وخلاص كده أضيع حلمي هو محتاج يعمل إعلان بس طبعاً دا هيكلفه كتير بس احسن ما يقفل المعمل.
فريدة : طب ما توجه يا كريم يمكن محتاج نصيحه منك سيف شاب طموح وبيسعى يحقق هدفه بس زي ما قولت محتاج يصبر شويه وكمان حد جانبه يوجهه للصح باباه ميفهمش في مجال الشغل بتاعه ده يمكن أنت عندك خلفيه شويه فساعده لو تقدر.
كريم : أكيد بس هو موضحش ليه الصورة ومش فاهم هل هيقفل المعمل ولا لأ لإنه مكانش بياخد رأيي علشان انصحه واوجه يعمل إيه هو كل اللي قاله عاوز يبيع الأجهزة وشاف إن ممكن أكون محتاجهم في المستشفى.
فريدة : خلاص لما تروح المعمل تشوفهم ابقى كلمه وافهم إيه اللي بيحصل هناك بالظبط.
كريم : أكيد هعمل كده.
___________
في قاعة الفرح.
مليكة واقفه لوحدها بتبكي.
ياسمين : متقلقيش يا مليكة هتقوم بالسلامة امال فين سيف؟
مليكة : مش عارفه أنا واقفه مستنياه علشان نسبقهم على هناك.
ياسمين : طب اقعدي استريحي.
مليكة : مش قادرة يا ياسمين.
ياسمين : أهو سيف جه.
سيف : إزيك يا ياسمين؟
ياسمين : أنا كويسة.
مليكة : يلا يا سيف نسبقهم على المستشفى ملك تعبت وكلهم راحوا معاها على المستشفى.
سيف : إيه طيب يلا.
مليكة : معلش يا ياسمين
اعتذري لخالو عمار وطنط وفاء.
ياسمين : لا يا حبيبتي مفيش حاجه ما هما أكيد عارفين.