أنت قلبي الجزء الثالث

الحلقة ١٤٥

#انت_قلبي٣
_________
الحلقة ١٤٥

تاني يوم الصبح.. في فيلا آسر.
سهر : ومسافرين امتى يا مليكة؟
مليكة : بعد بكرة خمس أيام بالعافية.
سهر : كويسين يا حبيبتي المهم تتبسطوا هتاخدوا الولاد معاكم؟
مليكة : طبعاً دا يوسف من ساعة ما عرف وهو رايح جاي في الشقة مامي هنسافر امتى مامي حطي اللبس ده في الشنطة نسيتي اللعبة دي كمان هاتي مايوه زي حلا.
سهر : هههههههههههه حلا جالها مايوه؟
مليكة : طبعاً ودي حاجه تفوتني.
سهر بتلعب مع حلا : انتي يا جميلة انتي هتلبسي مايوه طب مجبتيش واحد لـ انه علشان تنزل بيه المياه؟ هههههههه
مليكة : ياريت يا مامي تيجي معانا الشقة كبيرة وعاملين حسابنا على كل حاجه.
سهر : اروح فين بس يا مليكة لما بابي يفضى كده نبقى نسافر أي مكان قبل الصيف ما يخلص.
مليكة : امال فين مجدي؟
سهر : مجدي من ساعة ما بدأ في تشطيب الشقة وهو رايح جاي عليها كل كبيرة وصغيرة لازم يتابعها.
مليكة : هههههههههههه فرحان يا حبيبي دي هتبقى شقة العمر لازم تتعمل صح.
سهر : ما هو صح من وجهة نظره هي زينة مش عاوزه تروح هناك وأمل بتقول دي شقته يعملها زي ما يعجبه.
مليكة : هههههههههههه أحسن حاجه علشان ميتخانقوش مع بعض.
سهر : سيف عامل معاكي ايه يا مليكة؟
مليكة : كويس يا مامي سيف طيب وحنين هو بس اوقات بيبقى عصبي شويه أنا لما بلاقيه كده باخد حلا وأدخل علشان منتخانقش مع بعض وبسيبه خالص لحد ما بيهدا.
سهر : معلش يا حبيبتي المهم تعدي علشان المركب تمشي.
مليكة : ملك مبتجيش ولا ايه؟
سهر : بقالها فترة كده مجاتش مش عارفه يمكن هما كمان يسافروا كانت عمتك بتقول لي امبارح.
مليكة : هي عمتو كانت هنا؟
________
في شقة مجدي.
مجدي : في ايه يا داليا أنا هعملها ايه يعني اروح اقول لها معلش خليني امسكلك أنا القضية؟!
ما هي حره تعمل اللي تعمله.
داليا : أنا بس بقول علشان المصاريف وكده أنت لما تمسك لها القضية مش هتاخد أتعاب لكن المحامي التاني ده هيفضل هياخد منها فلوس كل شويه.
مجدي : برضه مليش فيه هي مجاتش قالت لي امسك لي القضية وأنا رفضت اروح اتحشر أنا ليه في قضية مسكها محامي زميلي انتي عارفه دا اسمه ايه؟!
داليا : يا حبيبي دا لما يكون غرضك تاخد أتعاب لكن أنت بتعمل ده إنسانيًا منك كده بدون مقابل.
مجدي : يا روح قلبي افهميني صاحبة الشأن موكلتنيش اروح أنا بالعافية كده امسك لها القضية انتي فاهمه بتقولي ايه؟!
داليا : ما هي أصلها واخده على خاطرها.
مجدي : من مين.. مني أنا؟!
داليا : لأ مني أنا.
مجدي : وأنا ايه علاقتي يا داليا؟ وسعي يا حبيبتي علشان انزل اشوف شغلي اتأخرت.
داليا : ماشي اتفضل.. مجدي أنا هبقى اروح اقعد مع البنات شويه.
مجدي : طيب بس متتأخريش.
داليا : حاضر مع السلامة.
_________
في شركة مراد.
هشام : ادخل.
سيرين : سلام عليكم.
هشام يرفع راسه وهو بيراجع ورق خاص بالشغل : وعليكم السلام.
سيرين : أنا آسفة يا دكتور بس دكتور مازن مش موجود بره فـ اضطريت ادخل كده على طول لإن الموضوع اللي جايه فيه لحضرتك مهم قوي وضروري.
هشام : اتفضلي بس عرفيني بنفسك الأول علشان مش واخد بالي.
سيرين : أنا سيرين صفوت شغاله مع دكتور شادي.
هشام : اه اتفضلي يا أستاذة سيرين تشربي ايه؟
سيرين : متشكره لحضرتك يا دكتور بس كنت جايه أطلب خدمة اتمنى يعني إن حضرتك ميكونش عندك مانع.
هشام : اتفضلي.
سيرين : كنت طالبه سلفه أصل أمي تعبانه وعاوزه تعمل عملية وأنا يعني كل اللي معايا ميكملش فاتورة ليله واحدة في المستشفى أصل العملية خطيرة فـ اضطريت احجزلها في مستشفى خاصة.
هشام : مفيش مشكلة شوفي ايه المبلغ المطلوب وهكلم مدير الحسابات يقسطلك نص المبلغ والباقي احنا هندفعه.
سيرين بفرحه : متشكره قوي يا دكتور.
هشام : وفي حل كمان.
سيرين : ايه هو؟
هشام : مامتك تعمل العملية عندنا في المستشفى تكاليفها بسيطة جدًا وهنشيلك المبلغ كله كمان.
سيرين : متشكره قوي يا دكتور أنا مش عارفه أقول لحضرتك ايه بجد أنت إنسان حقيقي أنا...
يقاطعها هشام : معلش بس علشان معطلكيش عن شغلك شوفي انتي عاوزه ايه وتابعي الموضوع مع دكتور مازن.
سيرين : كده طيب أنا آسفة إني عطلت حضرتك.
هشام : لا أبدًا مفيش حاجه اتفضلي.
وخرجت سيرين من عند هشام صحيح أُحرجت لإنه لمح لها إنه عاوز يشوف شغله لكن في نفس الوقت فرحت إنها قدرت تفتح معاه كلام ودي كانت أول خطوة من الخطة اللي رسمتها في دماغه إنها تخليه فاكرها وفاكر اسمها.
________
في فيلا هارون.
كانت فريدة قاعدة منتظرة مروة والدة ميرا بعد ما الشغاله اللي عندهم طلعت ادتها خبر إن فريدة قاعدة تحت.
الخادمة : مدام مروة جايه.
فريدة : معلش بس ممكن كوباية مياه.
الخادمة : حاضر.. حضرتك تشربي ايه يا مدام؟
فريدة : ولا حاجه.
الخادمة : لا مينفعش كده المدام تزعل.
فريدة : خلاص لو مصممه يبقى شاي بس نص معلقة سكر أو خلي السكر بره.
الخادمة : حاضر.
نزلت مروة تحت سلمت على فريدة وقعدت.
فريدة : ألف مبروك لـ ابنك أنا عرفت امبارح من الزيطه اللي كانت هنا.
مروة : متشكره قوي عقبال بنوتك الصغيرة مجبتهاش معاكي ليه؟
فريدة : نايمه اجازة بقى وبتصحى متأخر.
مروة : اه يا حبيبتي وانتي اخبارك ايه؟
فريدة : تمام بخير.
ميرا نازله من فوق تسلم على فريدة.
مروة : انتي خارجه يا ميرا؟
ميرا : اه يا مامي خارجه مع صحابي.
مروة : طيب يا حبيبتي متتأخريش هتتغدي بره؟
ميرا : مش عارفه لو اتأخرنا شويه ممكن نتغدا مع بعض.
مروة : طيب يا حبيبتي مع السلامة خُدي بالك من نفسك.
ميرا : حاضر يا مامي سلام يا طنط.
فريدة : مع السلامة يا حبيبتي.
مروة : ميرا أخدت على الجو هنا أكتر مني أنا
وباباها.
فريدة : اه طبعاً مش بقالها هنا تلات سنين؟
مروة : اه تقريباً كده من بعد ما خلصت ثانوي نزلتها قعدت مع ماما هي حبت تكمل دراستها هنا وجه فارس نزل بعدها كمل دراسته هنا لإن باباه كان بينهي كل حاجه لينا هناك قولنا نستقر هنا بقى بس معرفناش ننزل قبل ما الفيلا تخلص.
فريدة : تعرفي إننا من أول ما سكنا هنا والفيلا دي كانت بتتشطب.
مروة : اه اصلنا اخدنا وقت كبير لحد ما خلصت كل شويه كنا بنعمل فيها حاجه لإننا مكناش مستعجلين بس خلاص بقى لما قررنا ننزل بدأنا نشتغل فيها بجد.
فريدة نظرت للقطة اللي جايه من الجنينة.
مروة : كنتي فين يا كيتي
اهي ميرا مشيت وسابتك لوحدك.
واخدت مروة القطة وبدأت تلاعبها وفريدة بتحاول تبعد شويه لإنها مبتحبش القطط.
جات الشغاله بالشاي والكيك.
مروة : كام معلقة سكر؟
فريدة : معلش أنا هحط لنفسي.
مروة : اتفضلي.
فريدة كانت مش متقبله فكرة إن الست كانت بتلاعب القطة وبعدها هتمسك كوباية فريدة لإنها مبتتعاملش مع الحيوانات.
مروة : السكر مش قليل كده؟
فريدة : لا أنا بشربه كده.
مروة : طيب..بعد اذنك.
ودخلت مروة المطبخ والقطة بدأت تقرب من فريدة اللي تحاول تبعد والقطة تقرب منها وضعت كوباية الشاي ومكملتهاش.
فريدة : ابعدي بقى دا ايه الحوسه اللي أنا فيها دي
يا ست ابعدي أنا جسمي بيقشعر.
كانت القطة رايحه جايه على الكرسي بتحتك بالفرو بتاعها وفريدة شافت كده قامت وقعدت على كرسي تاني والقطة بتنضف نفسها.
خرجت مروة من جوه ومعاها طبق بسكويت.
مروة : دا بسكويت مملح على فكرة واضح إن ملكيش في الحلو.
فريدة : لأ بس علشان السكر.
مروة : انتي عندك سكر؟
فريدة بتهزر : بس سكر خفيف زي الدم كده.
مروة : هههههههههههه طبعاً
اتفضلي ايه يا كيتي عاوزه تاكلي؟
تنادي مروة على الخادمة اللي عندها تحط لكيتي أكل.
وفريدة قاعدة بتفكر تستأذن بس بتحاول تلاقي وقت مناسب لإن مروة بتفتح معاها مواضيع لحد ما جات اللحظة المناسبة اللي استأذنت فيها فريدة بعد ما اتفقت مع مروة إنها تعزمها في وقت يكون مناسب ليها علشان يتعرفوا على بعض أكتر وقالت لها لازم تجيب الولاد معاها وخرجت بسرعة بشكل لفت نظر مروة.
فريدة وهي خارجه من بوابة الفيلا ورايحه بيتها : ياااه اخيرًا أنا كنت حاسه نفسي في سجن الخوف تيجي وتجيب القطة دي معاها أنا شكلي هقفل من العيله دي بسبب القطة اللي عندهم.
_________
أمام منزل والد معتز.
علاء : ايه يا كريم ما تيجي يلا.
كريم : حاضر بس بقفل العربية.
قفل كريم العربية وقرب من علاء.
كريم : هتخلص على طول ولا لسه هتقعد وتتكلم؟
علاء : أنت شايف ايه؟
كريم : اللي يريحك يا علاء.
علاء : أنت مستعجل؟
كريم : مش حكاية مستعجل بس أنا...
علاء : أنا عارف إنك مكونتش حابب تيجي
بس معلش علشان خاطري استحمل هما نص ساعة وكل واحد هيروح لحاله.
كريم : ماشي يا علاء رن الجرس.
بيرن علاء الجرس بيفتح معتز.
معتز : اتفضل يا علاء.
علاء : تعالى يا كريم.
معتز : اهلا وسهلا يا دكتور اتفضل.
كريم : سلام عليكم.
يرددوا : وعليكم السلام.
معتز : اتفضلوا استريحوا ثواني وجاي.
تليفون كريم يرن.
علاء : ايه المستشفى؟
كريم : لأ دي جميلة.
علاء : رد عليها تلاقيها عاوزه شيكولاته.
كريم بابتسامة : لا كبرت بقى دي عاوزه قطة دلوقت.
علاء : يعني مش عريس هههههه
كريم : ايوه يا حبيبتي
أنا فين؟
جميلة : هتتأخر زي كل يوم؟
كريم : لا مش هتأخر هنخلص حاجه كده مع عمو علاء واجي.
جميلة : هات عمو علاء وتعالى.
كريم : سامع؟
علاء : حاضر يا جيجي بس بلاش النهاردا بقى.
كريم : مع السلامة بقى علشان أنا عند ناس ومينفعش اسيبهم وأكلمك.
جميلة : طب أنا مش هنام قبل ما تيجي.
كريم : حاضر يا حبيبتي مع السلامة.
معتز جاي بالعصير : اتفضلوا.
علاء : شكرًا.
معتز : العفو.
كريم : في ايه مالكم أنتم أصحاب في الأول والأخر ولا ايه يا دكتور معتز؟
معتز بتنهيدة : اه طبعاً.
علاء كان المأذون بيرن عليه : ثواني وجاي.
خرج علاء للمأذون اللي كان منتظر على أول الشارع اخده علاء ودخل عند بيت والد معتز.