أنت قلبي الجزء الثالث

الحلقة ١٢٤

#انت_قلبي٣
__________
الحلقة ١٢٤

في فيلا آسر.
سهر : أنا عمري ما أذيت حد لا مامتك ولا باباكي
ولا وليد اخوكي ليه كل الكره والحقد ده ليه
أنا تعبان عايش وسطكم يا منه؟!
منه : أنا آسفة يا سهر حقك عليه مش عارفه أقولك ايه.
سهر وهي بتبكي : أنا كان نفسي أعيش في هدوء أعيش مع ناس أحبهم ويحبوني معش مع عيله كلها بتكرهني.
منه تقرب منها : أخص عليكي بقى كلنا بنكرهك أنا بعتبرك أختي وآسر يعني كمان بيكرهك؟
سهر : آسر مبقاش حمل حب ولا كره يا منه.
منه : ليه بتقولي كده يا سهر؟ آسر بيحبك ولو زعلانه منه في حاجة دا ملوش دعوة بحبه ليكي
ياما بيحصل بين أي اتنين متجوزين مش من موقف ولا كلمة ننسى كل الحلو اللي بينا.
سهر : مفهمتنيش يا منه.
منه : طب وضحي أكتر ولو سر يعني بلاش تقوليه.
سهر : مش سر ولا حاجة لكن آسر بقى كل همه ازاي يحافظ على الشركة علشان يأمنا ماديًا وكأنه بيستعد إنه يفارقنا ودا إحساس وجعني قوي ومخليني خايفه من اللي جاي خايفه ابقى لوحدي.
منه ودموعها سالت على خدها : ليه بس كده يا سهر ليه بتقولي الكلام ده
مش مفروض جايين  والدكاترة هناك طمنوكم إن حالته الصحيه كويسه ؟
سهر : هو بيقول كده لكن من اللي الواقع اللي عايشاه معاه بدأت احس إنه بيكدب عليه.
منه وبتبكي : انتي هتقلقيني ليه بس يا سهر.

في العربية وهو جاي.
مجدي : فكر في اللي قولته ليك يا آسر مرة تانية.
آسر : أنا خلاص أخدت قراري يا مجدي ومقتنع بيه.
مجدي : كتابة أملاكك لولادك مش هيمنع المشاكل بالعكس أنا مشوفتش حد كتب كل ما يملك لولاده وارتاح بعدها
سيبها زي ما هي وبعدين ليه كل ده أنت عايش على وش الدنيا العمر ليك واولادك حواليك بلاش تدخل الطمع في نفوسهم
القلوب بتتغير مهما كنت واثق فيهم متضمنش ايه اللي ممكن يحصل وأقرب مثال ومش عاوزك تزعل يعني أنت لما حكيت ليه ان والدك كتب كل املاكه وقتها ليك ولـ أخوك ايه اللي حصل ومش عايز اذكرلك أمثلة كتير حواليه
بيعانوا دلوقت وعاوزين يرجعوا كل حاجة زي ما هي لكن للأسف الطمع ملا قلوب أولادهم ورافضين دا يحصل وهما واخواتهم
في المحاكم دلوقت فكر يا آسر في اللي قولتهولك وراجع نفسك مش عيب إننا نتراجع في قرار كنا فاكرينه صح.. انا هنزل بقى محتاج مني حاجة؟
آسر : لا سلامتك.
مجدي : تصبح على خير.
ونزل من عربية آسر ركب عربيته ومشى
وآسر لسه واقف بالعربية بيفكر لحد ما داس بنزين وبعد عن المكان.

في فيلا مراد.
نورهان : مكدبش عليكي يا أمل أنا وعُمر لما رجعنا لبعض مقدرناش نرجع زي الأول في حاجات كتير قوي اتكسرت ما بينا.
أمل : معلش يا نور كل حاجة مع الوقت بتهدا وتتنسى.
نورهان : إلا معايا أنا مفيش حاجة هديت ولا اتنست.
أمل : انتي بس حاولي
تعيشي معاه بشكل طبيعي وهتلاقي نفسك بتنسي كل حاجة مع الوقت عُمر مش وحش قوي كده يا نور.
نورهان : مقولتش إنه وحش أكيد كل إنسان فيه مميزات وعيوب وأنا مليانه عيوب يا أمل بس الفرق إني مأذتوش لكن هو اذاني نفسيًا.
أمل قاعدة بتسمع لنورهان وبتخفف عنها وهي في اللحظة دي كانت محتاجة تتكلم وتفضفض باللي جواها لكن عارفه إن الشكوى للناس مفيهاش راحة ففضلت تسكت واكتفت بنصحها وبعدها قامت.
أمل تخبط على باب المكتب : هشام الأكل جاهز على السفرة.
قام هشام وهو بيدعي عُمر وهاني يقوموا ياكلوا معاه.