#أنت_قلبي٤
__________
الحلقة ١٣
في شقة مازن(لندن).
سهر داخله لمازن المكتب.
اتنهد وترك القلم من ايده.
سهر : ايه مالك؟
مازن : عاوزه ايه؟
سهر : أنت بتعمل ايه؟
مازن : انتي شايفه ايه؟
سهر : شايفاك بتذاكر.
مازن : طب كويس سيبيني بقى علشان مفيش وقت شويه ونازل.
سهر : مش هتاكل؟
مازن : لأ.
سهر : معقول مجوعتش لحد دلوقت؟!
مازن : مش جعان يا سهر وسيبيني بقى دلوقت.
سهر : كل دا ليه يا مازن علشان بس كلمتك وأنت بتتكلم مع مامتك في التليفون هو ممنوع يعني ولا ايه عاوزه أفهم؟
مازن : كانت هتفرق كتير لو داخله بالصدفه ولاقتيني بتكلم في التليفون وفرق بين إنك عارفه وداخله ومتأكدة إن بتكلم مع أمي فهمتي حاجه؟
سهر : ما هو أنت طولت قوي والأكل برد.
مازن : طولت فين دي المكالمة مكملتش خمس دقايق وحتى لو طولت مستكتره مكالمة تليفون لـ أمي ومش بعملها كل يوم كمان ايه ده انتي ازاي كده؟!
سهر قربت منه وحاوطته بدراعاتها : خلاص بقى متزعلش.
مازن : شيلي ايدك يا سهر.
سهر : يبقى زعلان.
مازن : سهر لو سمحتي ياريت تبقى فاهمه حساسية العلاقة بيني وبين أمي أنا لو فديتها بحياتي مش هوفيها أي حاجه من اللي عملتها معانا دي ست كرثت حياتها كلها لينا نقوم لما نكبر ننساها ولا تيجي مراتي تضايق علشان بتصل بس بـ أمي امال لو في مصر وقولتك كل يوم جُمعة نقضيه مع أمي هتعملي ايه؟!
سهر : مازن أنا بحبك وبغير عليك.
مازن : لأ يبقى مش طبيعية بتغيري عليه من مين من أمي؟!
سهر : من أي حد.
مازن : اسمعي لو عاوزه نعيش ونكمل مع بعض لازم تغيري طريقتك دي مش هتتغيري يا سهر يبقى براحتك.
سهر : يعني ايه براحتي دي؟!
مازن : افهميها زي ما تفهميها بقى وسعي كده عندي شغل.
وقام مازن يغير هدومه علشان ينزل الشغل.
_________
في شقة طارق.
مراد : كلمت مين واتفقت مع مين إننا نتقابل انتي بتقولي ايه يا مريم؟!
مريم : اللي شوفته ولا المرة دي هكدب عيني زي ما خلتني اكدب ودني يوم سبوع بنت أختك؟!
مراد : ايوه قابلتها في الباركن زي ما قولتي بس أنا لا كلمتها ولا كان في ميعاد ما بينا أنا خارج لاقيتها في وشي.
مريم : عاوزني أصدق إن دا اللي حصل مش كده؟!
لا يا حبيبي أنا خلاص مبقتش أصدق ولا الكلام ده بقى بياكل معايا خلاص.
مراد : لايميها يا مريم وقومي غيري هدومك دي ويلا خلينا نروح بيتنا.
مريم : مش خارجه معاك
ولا رايحه في أي حته أنا قعدة في بيتنا.
مراد : مريم بلاش تنرفزيني انتي عارفه مبحبش الأسلوب ده.
مريم : تحب ولا متحبش براحتك بس أنا مش ماشيه معاك.
مراد : بقى كده.. طيب.
وقام مراد خرج من الغرفة.
هنادي : ايه يا ابني عملت معاها ايه؟
مراد : بنت حضرتك يا طنط مش عاوزه تيجي معايا.
هنادي : طب اقعد وهدي نفسك وفهمني بس ايه الحكاية اعرف مين فيكم اللي غلطان في حق التاني.
مراد : اللي حصل إنها بتشك فيه.
مريم واقفه عند باب الغرفة وبتبكي : لا دا مش شك اللي عيني شافته دا حقيقة يا ماما بتكلمه في التليفون بيخرج يقابلها في المطعم اللي شغاله فيه وبتجيله على الشركة كمان كل دا وعاوزني أشك بس فيك طب امال الحقيقة ايه هستنى لما تتقابلوا في شقتي؟!
مراد بانفعال : مريم ياريت تاخدي بالك من كلامك أنا مش بتاع الحاجات دي.
مريم : وأنا ايه اللي عرفني بقى ما خلاص اتوقع منك أي حاجه.
هنادي : خلاص يا مريم اسكتي بقى.
مريم : أنا مش هروح معاه يا ماما مبقتش عاوزه اعيش معاه خلاص بعد ما كسر قلبي.
ودخلت جوه وقفلت الباب.
مراد : عاجبك كده يا طنط؟
هنادي : معلش سيبها يوم ولا حاجه وأنا هتكلم معاها.
مراد : عقليها يا طنط أنا مش بتاع الكلام ده خليها تفكر إن عندها ولاد مينفعش اللي بتعمله ده.
هنادي : ماشي بس اقعد رايح فين؟
مراد : همشي بقى طالما مش عاوزه تيجي معايا. حضن ولاده وخرج.
هنادي بتخبط على الباب.
مريم : مش مروحه معاه يا ماما.
هنادي : ماشي بس افتحي هو اصلا مشي.
مريم : مشي!
____________
في شقة سيف.
مليكة : ثواني يا حبيبي والعشا يكون جاهز.
سيف : على مهلك أنا مش مستعجل.
قعد سيف واخد الريموت وبيقلب : هو مفيش غير الكرتون اللي شغال ده؟!
يوسف : بابي سيب الكرتون ده أنا بحبه.
سيف : يوسف خلص الهوم ورك بتاعك علشان تنام يلا.
يوسف : قربت اخلص أنا قاعد ومستني أما يبدأ.
سيف : ابقى شوفه في الإعادة كل دا بيتعاد تاني ركز بس في مذاكرتك.
بيخبط يوسف ايده على الدفتر : حاضر.
سيف : ايه مالك مش عاجبك؟!
يوسف : لأ عاجبني.
مليكة : يلا يا يوسف اغسل ايدك علشان تاكل وتنام.
يوسف : حاضر.
سيف : هو ماأكلش من بدري ليه؟
مليكة : مرضيش مستنيك لما تيجي علشان ياكل معاك.
سيف : طيب ماتعملهاش تاني.
يوسف : يعني كنت اكل من غيرك؟!
سيف : اه كُل بعد كده من غيري علشان أنت عندك مدرسة الصبح وأنا برجع متأخر.
يوسف : طب ليه يا بابي بترجع متأخر مش حضرتك بتخرج معانا الصبح؟
سيف : اه.
يوسف : طيب مبتخرجش ليه بقى من الشغل وقت ما بنخرج من المدرسة؟
سيف : علشان عندي مدرستين قصدي بشتغل الصبح وبعد الضهر.
مليكة : هههههههههههه حلوة مدرستين دي يلا علشان تلحق تاكل وتنام يا أستاذ.
يوسف : حاضر.
مليكة : يلا يا سيف لسه قاعد؟
سيف : تصدقي مكسل أقوم ما تقوميني؟
مليكة : قوم بقى بطل كسل هتاكل وتنام.
سيف : أنام واسيب القمر ده؟!
مليكة : هههههههههههه طب بس علشان يوسف بيغير.
سيف : هو ماله أصلا محدش شريكي.
مليكة : هههههههههههه طب يلا بقى أنا قولت يلا دي كام مرة من وقت ما دخلت؟!
سيف : ثواني علشان فريدة بتتصل.
مليكة : طب يلا يا يوسف.
في التليفون.. 📞
سيف بابتسامة : ايوه.. يا فريدة ازيك يا حبيبتي أخبارك ايه؟
فريدة : خالو إلحقنا ماما تعبانه قوي.
سيف : ايه.. طيب هي فين عندك ولا ايه؟
فريدة : لأ في البيت لاقتها بتكلمني ومنهارة وبتعيط وبتقولي تعالي إلحقيني قلبي هيوقف بس ياسين مش هنا للأسف جيت لوحدي لاقيتها منهارة برضو وعماله وبتعيط ومش عاوزه تقولي فيها ايه.
سيف : طيب طيب أنا جاي.
مليكة : سيف أنت رايح فين؟
سيف : ياسمين تعبانه رايح اشوفها.
مليكة : ألف سلامة عليها ألبس واجي معاك؟
سيف : لأ خليكي مع الولاد اقفلي الباب بالمفتاح علشان احتمال اتأخر.
مليكة : طيب يا حبيبي مع السلامة ابقى طمنا
اقعد بقى يا يوسف.
يوسف : بابي راح فين؟
مليكة : نزل يا حبيبي يشوف عمتو علشان تعبانه.
يوسف : عمتو مين؟ نروحلها.
مليكة : عمتو ياسمين وكُل بقى غلبتني حلا تنام تقعد أنت طول الليل تعذبني بالشكل ده.
يوسف : هو أنا عملت حاجه؟!
مليكة : طب كُل يلا علشان تنام.
كانت مليكة قاعدة قلقانه على ياسمينا.
__________
في شقة طارق.
هنادي : مش عارفه اقولك ايه ولا عارفه البنت دي طلعت لنا منين؟
مريم وهي بتمسح دموعها : كانت خطيبته يا ماما على طول بيروح المطعم هناك اللي شغاله فيه كنت بكدب نفسي وأقول لأ هو بيحبني أنا هو كان بيقولي كده مفيش في قلبي غيرك يا مريم بس كنت عبيطه علشان صدقته.
هنادي بتاخد ها في حضنها : طب بس يا بنتي علشان خاطري اهدي يا مريم..
افتكرت هنادي إنها مأخدتش الدوا فقامت.
هنادي : دقيقة وجايه حاولي تهدي أعصابك كده وخُدي ابنك في حضنك شكله جعان أنا عارفه مبياكلش حاجه علشان كده مرضتش اعمله حاجه ياكلها.
بتاخد مريم ابنها وتخرج هنادي تاخد الدوا.
أنت تقرأ
أنت قلبي الجزء الثالث
Werewolf(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
