#انت_قلبي٣
___________
الحلقة ٢٦
فريدة : خلاص مبقاش في حد تحت علشان انزل
خلاص مفيش....
كريم : فريدة.. فريدة.
تقوم فريدة من النوم بفزع وتنظر حولها و هي خايفه.
كريم : مالك يا حبيبتي انتي سخنه و بتهلوسي وانتي نايمه ولا ايه؟
بس مفيش حرارة.
فريدة تقوم من السرير و تخرج بره الغرفة.
كريم : فريدة.. فريدة انتي رايحه فين؟
عينها بتدور في الشقة و تقرب من الباب وبتحاول تستوعب إن دا كان حلم.
كريم : في ايه يا حبيبتي مالك عرقانه كده دا الجو برد جدا الليلة اقعدي بس طمنيني عليكي.
فريدة : كريم هو ايه اللي حصل؟
كريم : ايه اللي حصل مش فاهم؟
فريدة : احنا كان عندنا ناس كتير دلوقت وخرجوا وبعدها انت قفلت الباب.
كريم : أنا لسه جاي من بره ومكانش في حد غيرنا في الشقة فريدة مالك في ايه طمنيني عليكي انتي كويسه؟
فريدة و هي بتبتلع ريقها بخوف و توتر : هي ندى لسه في المستشفى صح؟
كريم : ايوه عاوزه تشوفيها؟
قعدت بتنهيدة واسندت رأسها على الكرسي.
كريم : فريدة انتي كويسه؟
فريدة : يعني ندى كويسه؟
كريم : حبيبتي ما انتي كنتي معانا لما نقلناها المستشفى ايه لازمة الأسئلة دي دلوقت؟!
فريدة : بتأكد.
كريم : بتتأكدي من ايه مش اخدتك وروحنا المستشفى في ايه قوليلي؟
فريدة : عاوزه انام انت صحتني ليه؟
كريم : صحيتك علشان كنتي بتهلوسي و انتي نايمه.
فريدة : اه دا بس من التعب.
كريم قعد بتنهيده.
فريدة : مالك يا كريم؟
كريم : زعلان من نفسي قوي.
فريدة : ليه بس يا حبيبي؟
كريم : فاكرة الست اللي كانت شغاله معايا في المستشفى زمان؟
فريدة : ست مين؟
كريم : عايدة اللي كنا روحنا لها ايام ما كنا متجوزين جديد.
فريدة : بحاول افتكر يا كريم بس مالها يعني؟
كريم : توفيت من اسبوع.
فريدة : اه افتكرتها لما اتخانقت معاك يومها كان أول خروجه لوحدنا واخدتني على هناك.
كريم : كان في دكتور شغال معانا في المستشفى يعرفها ودايما كان على تواصل بيها انقطعت اخباره بعد ما ساب المستشفى و مبقتش اعرف حاجه عنها حتى عنوانها غيرته اخدت عنوانه من دكتور معتز وروحت سألته عنها قالي دي توفيت من اسبوع الغريبة بقى إنها افتكرتني لما راح زارها و هي تعبانه وقالتله أمانه سلملي على دكتور كريم يمكن مش مكتوبلي اشوفه قبل ما اموت.
فريدة : ياااه هي لسه كانت فكراك؟!
كريم : ايوه رغم السنين اللي مرت دي كلها كانت لسه فكراني عرفت بقى إن بنتها اتجوزت بس الولد لسه كان في دماغي اني افضل متولي مسؤوليتهم لحد ما يتحوزوا بس الشغل اخدني ونسيتهم و لما افتكرتها كانت ماتت.
فريدة : متضايقش نفسك يا كريم أنت مكانش قصدك.
كريم : روحت البيت لاقيت ستات كتير هناك بيعزوا ابنها اخدني وخرجنا قعدنا بره ياااه رجعني عشرين سنه لورا.
فريدة : كويس الحلم اتفسر.
كريم : حلم ايه؟
فريدة : كويس انه كان حلم.
فريدة : حلم ايه فهميني.
فريدة : أنا تعبانه وعاوزه أنام و مش هحكي ايه حاجه علشان ميتفسرش.
كريم : كده طيب تصبحي على خير.
فريدة : خد بإيدي مش قادرة أقوم لوحدي.
كريم بابتسامة : خلاص العضمه كبرت؟!
فريدة : الظاهر كده.
_____________
في شقة طارق.
مازن : في ايه بس يا ماما قلقانه من ايه؟
هنادي : مفيش يا حبيبي ادخل علشان تلحق تنام الكام ساعة دول.
مازن : هو في حاجه حصلت انتو كويسين؟
هنادي : ايوه ادخل استريح بقى.
مازن : طب هي مريم نايمه ليه دلوقت؟
هنادي : قالت تعبانه فدخلت نامت.
مازن : غريبة يعني دي كل ليلة بتسهر للفجر.
هنادي : خليها تنظم وقتها و تنام بدري علشان تصحى فايقه للمدرسة.
كانت هنادي بتتكلم بس من جواها قلقانه على مريم و عايزة النهار يطلع علشان تعرف تتكلم معاها بعيد عن مازن.
مازن : تمام تصبحي على خير.
هنادي : و انت من أهل الخير مازن أنا بيعت البيت يا ابني.
مازن : ليه بس كده يا ماما؟!
هنادي : مش أنا قولت الكلام دا من زمان اطمن خالك اللي اشترى البيت مش حد غريب.
مازن : وخالي اشتري البيت يعمل بيه ايه؟!
هنادي : قال لازمه انت علشان هيهده ويبني بداله بيت جديد ليه ولطارق.
مازن : اه طيب مبروك عليه.
هنادي : تشتري بقى حتة عربية محندقه كده علشان تروح بيها الجامعة.
مازن : مش حابب أنا الحوار ده مالها المواصلات يعني؟
هنادي : بهدله يا ابني وبتضيع وقتك.
مازن : هشوف ياماما.
هنادي : مفيش حاجه اسمها هشوف هنشتري عربية أنا قولت.
مازن ببتسامة : حاضر.
هنادي : هدخل انام بقى اطمن إن باب الشقة مقفول كويس.
________
أنت تقرأ
أنت قلبي الجزء الثالث
Hombres Lobo(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
