أنت قلبي الجزء الثالث

الحلقة ٢٠

#انت_قلبي٣
__________
الحلقة ٢٠

بيجري كريم على السلم يتبعه علاء.

أمام باب الشقة و مازال صريخ فريدة مستمر و كريم بيدور على المفتاح.
علاء : ايه مش لاقيه؟
كريم بارتباك و توتر بيحاول يدور على المفتاح و يخبط على الباب.
علاء : اهدى بس يا كريم هتلاقيه.
يحاول كريم يكسر الباب.
علاء : حاسب.. حصلك حاجه؟
بيدور تاني يلاقي المفتاح يفتح بسرعه و يدخلوا.
كريم يبعد  حازم عن فريدة اللي كان بيضربها
و يطمن عليها و بعدها و يقوم يضرب حازم.
علاء يبعد كريم عن حازم.
علاء : بس يا كريم هيموت في إيدك.
كريم : ما يموت و لا يغور في داهيه.
علاء: انزل يا حازم.
كريم : داخل هنا تعمل ايه يا حازم و بتمد إيدك على فريدة ليه انطق خرست دلوقت!
فريدة بتبكي.
كريم : انتي كويسه؟
فريدة ' خليه ينزل مش طايقه اشوفه.

اخد علاء حازم و نزلوا.
بيقعد كريم ياخد نفسه.
كريم : أنا قولت ايه اللي حصل فوق.. الكهربا و لا الغاز و لا الشقة بتولع و لا في ايه!
فريدة : في جرح في إيدك.
كريم : كنت بحاول اكسر الباب..ايه اللي حصل يا فريدة؟
فريدة : اللي شوفته يا كريم.
كريم : لا انا مش بسألك على اللي شوفته أنا بسأل على اللي قبل كده.
فريدة : مفيش أنا كنت بكلم شهد يدوب نزلت من هنا و بعدها لمحت حازم طالع السطوح قفلت الباب من هنا لاقيته بيخبط بفتح الباب دخل و قفله و قعد يضربني.
كريم : ليه مجنون؟!
فريدة : أنت عاوز ايه بالظبط يا كريم يعني كمان انا غلطانه دلوقت.
كريم : ما هو أنا مش فاهم هو واخد منك موقف ليه ايه اللي حصل لكل ده؟
فريدة : مفكرني إننا اللي حرضت ندى عليه مع إنها يا حبيبتي كانت عايشه معاه و ساكته بس احساسه إن هو السبب في اللي حصلها مخليه زي المجنون مش عارف هو بيعمل ايه.
كريم : و هنفضل كده لحد ما اجي في يوم الاقيه مموتك.
فريدة : معقول هتوصل إنه يقتلني كمان؟!
كريم : كل شيء جايز يعني انا عمري ما توقعت إني ادخل بيتي الاقي المنظر ده.
فريدة : طب ادخل اغسل ايدك و اربط حاجه على الجرح ده.
كريم يقوم بتنهيده.
فريدة بتمسح دموعها و بتقوم تدخل جوه.
____________

في فيلا آسر.
سهر : هتاخد دي معاك؟
آسر مشغول في مراجعة الأوراق اللي قدامه.
سهر : آسر انا بكلمك.
آسر :"نعم يا حبيبتي بتقولي حاجه؟
سهر ' بقولك احط دا في الشنطة؟
آسر : لأ أنا مش هاخد كل الهدوم دي يا سهر هبقى اشتري من هناك.
سهر : ليه ناوي تقعد كتير؟!
آسر : مالك بس يا حبيبتي؟
سهر : مش عاوز تاخدني معاك ليه يا آسر؟
آسر : تاني يا سهر؟!
سهر : ما هو أنا هتجنن اشمعنه المرادي مش عاوز تاخدني معاك؟!
آسر : يا حبيبتي أنا مسافر اعمل شوية فحوصات و راجع على طول متقلقيش.
سهر : طب ابقى معاك علشان اكون مطمنه.
آسر : و أنا مش هبقى مطمن والولاد هنا لوحدهم علشان خاطري قفلي على الموضوع ده.
سهر : اوك يا آسر براحتك.
_________

في شقة والد دينا.
والدة دينا : يا حبيبتي انتي تشرفي في أي وقت تصدقي بقى قلبي اتفتحلك من أول ما شوفتك.
وفاء : القلوب عند بعضها امال فين دينا؟
والدة دينا : وصلت مشوار كده و زمانها جايه.
وفاء : اه طيب لما تيجي بقى ابقي سلميلي عليها.
والدة دينا : رايحه فين بس هو احنا لسه قعدنا مع بعض اهي دينا جات اهيه
تعالي يا حبيبتي سلمي.
دخلت دينا من بره تسلم على وفاء.
وفاء : ازيك يا حبيبتي اخبارك ايه؟
دينا : تمام يا طنط حضرتك عامله ايه؟
وفاء : بخير يا حبيبتي.
دينا : هعمل لحضرتك حاجه تشربيها.
وفاء : ماما عملت الواجب اقعدي استريحي.
والدة دينا : طب بعد اذنكم.
و دخلت والدة دينا جوه.
وفاء : أنا قولت اجي اطمن عليكم اصلكوا يعني جيتوا و مشيتوا على طول و ملحقناش نقعد مع بعض.
دينا : معلش أصل مهند اخويا اتصل وقتها و كان راجع من الدروس و نسي المفتاح.
وفاء : عادي يا حبيبتي و لا يهمك ها مسافره امتى؟
دينا : لسه يا طنط مش عارفه.
جايه والدة دينا ب الحاجه الساقعه.
وفاء : يا اختي تاعبه نفسك ليه ما أنا لسه شاربه عصير هههههههه هودي فين بس؟
والدة دينا : يا اختي اشربي دي كلها مياه
دينا لسه مش عارفه هتسافر و لا لأ.
وفاء : ليه خير يا ام دينا فيه حاجه يا حبيبتي؟
نظرت والدة دينا لها و سكتت.
وفاء : فيه ايه يا جماعه قلقتوني؟
والدة دينا : أصل دينا جايلها عريس من طرف أهل باباها و لسه مش عارفين نوافق و لا نعمل ايه.
وفاء : لو كويس وافقوا ايه المشكلة لكن لو مش مستريحه بلاش.
والدة دينا : احنا لسه مشوفنهوش علشان نوافق و لا نرفض المشكلة إن أهل باباها حاكمين عليها تتجوز الشاب ده و لو رفضت نروح نعيش معاهم في بيت العيله و انا مصدقت خرجت من هناك.
وفاء : مفيش حاجه بالعافيه اقعدي في بيتك محدش له حاجه عندك.
والدة دينا : أصلك متعرفيش أهل جوزي دول عالم ظلمه و لو رفضنا مش هيسبونا في حالنا.
وفاء : و لو وافقتي و جوزتي بنتك لواحد هي مش حباه هتندمي ندم عمرك لا بنتك هتستريح و لا انتي هتشوفي طعم الراحه.
دينا : و أنا مستحيل اتجوز واحد مبحبوش و يعملوا اللي يعملوا بقى.
والدة دينا سكتت.
وفاء : متخافيش يا حبيبتي مفيش حاجه بالعافية.
_____________
تحت في الصيدلية.
كريم : ما هو لو مش ابن عمي و اخو مراتي كنت قتلته و مكونتش هاخد فيه ساعة واحدة حبس بس هعمل ايه اكتفيت بضربه.
أكرم : معلش يا ابني هنعمل ايه شكله اتجنن.
علاء : أنا اعصابي سابت
بجد الصوت فوق كان صعب قوي أنا قولت حد جراله حاجه بس كويس محدش من الولاد كان فوق ياريت بقى ميعرفوش باللي حصل.
كريم : بفكر اخد فريدة و الولاد و نرجع البيت بس فريدة مش عاوزه تسيب هنا خصوصا في الظروف دي.
أكرم :"انت ادرى بمصلحتك يا ابني المهم ندى هتخرج بكره مش عاوز حازم يقعد في البيت.
علاء : ايوه يا عمي بس هنقوله ايه؟
أكرم : معرفش اتصرف يا علاء علشان أنا لو لمحته معرفش ممكن اعمل فيه ايه و مش ناقص بنتي تشوفه تتعب تاني انا مصدقت إنها فاقت و بدأت تتكلم.
كريم :" الدكتور طمني و قالي إن لو تابعت مع دكتور العلاج الطبيعي هتبقى كويسه.
أكرم قام بتنهيده : هقوم اريح فوق شويه علشان ساعة كده و علي و مرات عمك هيجو و انا هروح المستشفى ابات هناك.
كريم : ملوش لزوم يا عمي تبات في المستشفى أنا بروح هناك و بطمن و الدكاترة واخدين بالهم كويس و الممرضات اللي هناك كمان مش سايبنها لوحدها.
أكرم : كتر خيرك يا كريم يا ابني انا عارف إنك موصي عليها هناك جامد و مراعينها وواخدين بالهم منها علشانك.
كريم : لا يا عمي الحكاية مش كده انا مليش دعوة خالص بالاهتمام ده
دا نظام المستشفى كده و مع الكل مش مع ندى بس. و بعدين حتى لو ليه دور في الموضوع ده فدي بنت عمي يعني في مقام اختي بالظبط مينفعش نسيبها لوحدها.
أكرم : عارف انك انت و علاء وقفتوا جامد مع ندى
بس لو ليه خاطر عندكم حازم يسيب البيت الصبح يعني آخر ليله ينامها هنا.
علاء : حاضر يا عمي انا هتكلم معاه بلاش كريم خالص يحتك بيه الحكاية مش ناقصه.
كريم : أنا أصلا مش طايق اشوفه علشان اكلمه كمان!
أكرم : تصبحو على خير.
يرددوا : و حضرتك من أهل الخير.
___________