أنت قلبي الجزء الثالث

الحلقة ٤١

#انت_قلبي٣
__________
الحلقة ٤١

في شقة شادي.
أمل : الرز بلبن بيتعمل يوم السبوع فاكرة إني كنت باكله في سبوع ولاد صحابي.
ياسمين : مش هتفرق يا طنط ناكله النهاردا ويوم السبوع.
ليلى : حاسه بالمسؤولية وخايفة قوي.
ياسمين : هههههههههههه
متخافيش هو أول حمل بيكون كده بس هتتعودي.
ليلى : بس المرادي تعدي على خير وبعد كده نبقى نشوف في مرات جايه ولا لأ.
ياسمين : اتفائلي خير بس لو بنت تسميها ياسمين
ماشي؟
ليلى بابتسامة : ماشي.
أمل : شادي شكله هيتأخر همشي أنا بقى.
ليلى : اقعدي يا طنط زمانه جاي.
ياسمين : لا تعالي عندنا ريتاج هنزل اصحيها هتفرح قوي لما تعرف إن حضرتك هنا.
أمل : معلش يا ياسمين مش هينفع سبيها نايمه أنا عارفه إنها صاحيه بدري
وكمان زينة زمانها راجعه من المدرسة.
ياسمين : أتصل بيها تيجي على هنا.
أمل : مش هينفع بترجع تعبانه ولازم تنام ساعة ولا حاجه علشان تقوم تذاكر أنتي عارفه بقى ثانوية عامة والوقت بيبقى ضيق.
ياسمين : خلاص ماشي مش هقدر أقول لحضرتك حاجه.
ليلى : ياسمين اصلا كانت نازله رايحه بيت باباها.
أمل : ايوه صح مش فرح إياد اخوكي بعد بكرة؟
ياسمين : ايوه بس لما عرفت الخبر السعيد دا قولت أطلع أقعد مع ليلى شويه هبقى اروح بالليل هشام هيبقى يوصلني.
أمل : اوك يا حبيبتي سلميلي عليهم كتير.
ياسمين : يوصل يا طنط.
_______

في شقة عمار.
سهر : امال فين ماما يا منى؟
منى : ماما نزلت تجيب حاجه من تحت زمانها جايه تشربي ايه يا طنط؟
سهر : لا يا حبيبتي اما ماما تيجي.
تخرج سلمى من جوه.
سلمى : مامتك لسه مجاتش يا منى؟
منى : لا لسه يا عمتو.
سلمى : سهر!
ازيك اخبارك ايه؟
سهر : تمام أنتي اخبارك ايه؟
سلمى تقعد : كويسه اعملي لطنط سهر حاجه تشربها يا منى.
منى : حاضر.
سلمى : ايه الولاد عاملين ايه؟
سهر : كويسين.
سلمى : وجوزك صحته أخبارها ايه؟
سهر : بخير.
سلمى : محدش بقى يشوفك يعني؟!
سهر : معلش الدنيا مشاغل زي ما أنتي عارفه.
سلمى : آه عارفه افتحي الباب يا منى تلاقيها ياسمين اللي جايه.
منى : لا ياسمين لسه مكلماني قالت هتتأخر شويه مستنيه أبيه هشام لما يرجع من الشغل.
سلمى : آه طيب.
وفاء جايبه حاجات كتير في ايدها تساعدها منى وتاخد منها الحاجه.
وفاء بابتسامة : سهر عندنا يا اهلا وسهلا.
سهر تقوم تسلم : اهلا بيكي يا وفاء مبروك لـ إياد.
وفاء : عقبال الولاد يا سهر.
سهر : في حياتك يا حبيبتي ايه يا منى معملتيش حاجه لطنط سهر تشربها ولا ايه؟
سهر : أنا لسه داخله من شويه وبعدين هي قالتلي قولتلها لما ماما تيجي بقى.
وفاء : ودا اسمه كلام هاتي حاجه ساقعة يا منى عندك في التلاجة عامله ايه يا سهر؟
سهر : بخير يا وفاء قولت أجي ابارك بقى علشان مش عارفه ظروف ملك ايه.
وفاء : آه يا حبيبتي ما دا الشهر بتاعها.
سلمى : عمار كلمته الصبح قالي الدكتورة ادتنا ميعاد تاني بكرة.
سهر : مكلمتش ملك أصل رايحه لها هي الدكتورة ادتها ميعاد بكرة ليه؟
سلمى : أنا بسأله مش عارف.
سهر : طيب بعد اذنكم هروح اطمن على ملك.
وفاء : لسه مقعدناش مع بعض يا سهر طب حتى اشربي حاجه متقلقيش هتقوم بالسلامة تلاقي بس الدكتورة عاوزه تكشف تاني.
سهر : معلش يا وفاء هبقى اجيلك مرة تانية سلميلي على عمار وإياد لما يرجعوا.
وفاء : حاضر يا حبيبتي يوصل كنت عاوزاكي بس تقعدي معانا شويه بس خلاص بقى روحي اطمني على ملك.
سهر : عاوزه حاجه يا سلمى؟
سلمى : لا يا سهر متشكره.
سهر : اوك.. سلام.
وتخرج سهر.
وفاء : ايه يا سلمى مالك؟
سلمى : شايفه بتكلمني ازاي؟!
وفاء : مش فاهمه بتكلمك ازاي يعني ايه؟
أنا شايفه إنها بتكلمك عادي يعني.
سلمى : يبقى متعرفيش سهر بنت خالتي زي ما أنا أعرفها دي لسه شايله في قلبها ومش قادرة تنسى.
وفاء : سهر قلبها طيب وكفاية خضتها على ملك أنتى مش شايفه عملت ايه لما عرفت إن ملك رايحه تاني بكرة للدكتورة.
سلمى : عارفه وطيبة قلبها دي اللي مضيعاها.
وفاء : مسمهاش كده عمر اللي بنعمله للي بنحبهم ما كان ضياع.
سلمى : فيلسوفه وفاء دخلي الحاجه اللي جيبتيها علشان متتبهدلش.
وفاء : منى تعالي شيلي معايا.
سلمى : أنا هشيل معاكي وسعي كده.
___________
بعد شويه.
ترن سهر جرس الباب.
مليكة في المطبخ : حاضر جايه.
بتظبط نار الفرن وخارجه بسرعة.
باب الشقة يتفتح.
سهر بابتسامة : ايه دا أنت اللي بتفتحلي الباب يا يوسف؟!
مليكة بغضب : مية مرة أقولك متحركش الكرسي دا من مكانه مبتسمعش الكلام اتفضلي يا مامي.
سهر : متزعقيش ليه تعالى يا يوسف.
مليكة : يا مامي كل اما الباب يتفتح ياخد الكرسي يطلع عليه ويفتح الباب مبقتش عارفه أعمل معاه ايه حتى المفتاح مضيعه واخدت النسخة اللي مع سيف خبتها منه ومش فاكرة حطتها فين.
سهر : هههههههههههه معلش استحملي.
مليكة : جايه منين كده؟
سهر : ايه دا هو أنا شكلي جايه من عند حد؟
مليكة : مش جايه من البيت أكيد.
سهر : كنت عند طنط وفاء أنتي عارفه بقى فرح إياد بعد بكرة وقولت اروح اقعد معاها شويه.
مليكة : وأنا كمان عاوزه اروحلهم بس أعمل إيه في الأستاذ ده مخليني مش عارفه أخرج في أي مكان خايفه يتشقى هناك.
سهر : كل العيال بتتشقى يا مليكة اخرجي فُكي عن نفسك شويه.
مليكة : اطمنتي على ملك؟
سهر : كنت رايحه لها بس كلمتها لاقيتها عند عمتك معزومة على الغدا.
مليكة : أنا كلمتها الصبح هتروح تاني بكرة.
سهر : آه ما هي سلمى قالتلي أخبارك ايه يا حبيبتي؟
مليكة : تمام..
سهر : ايه مالك؟
مليكة : ريحة حاجه بتتحرق.
وتجري على المطبخ وتلحقها سهر تطمن عليها.
سهر : حصل حاجه؟
مليكة : لأ لحقت صنية البطاطس قبل ما تتحرق.
سهر : طب تعالي اقعدي.
مليكة : هعمل حاجه نشربها الأول.
سهر : مش عاوزه أشرب حاجه أنا جايه أقعد معاكي.
مليكة : يوسف بيعيط.
سهر : طب على مهلك.
مليكة : شايفه بيعمل ايه
بيلعب في الكهربا.
سهر تشيله وتقعده جنبها.
مليكة : مجنني يا مامي اجيبه من المطبخ امبارح كان بيلعب في زراير البوتاجاز شويه ودخل على التواليت غرق نفسه وعملي حمام سباحه جوه
قعدت امسح واتهد حيلي
شايفه الموبايل بتاعي متكسر ازاي.
سهر : هقولك ايه بس اخده معايا؟
مليكة : واقعد أنا كده من غيره؟!
سهر : هههههههههههه مش تاعبك يا بنتي؟
مليكة : ايوه بس أنا عاوزه حل أعمل إيه في شقاوته مش اسربه من البيت واقعد لوحدي.
سهر : هههههههههههه
كل دا يطلع منك أنت اللي يشوفك يقول هادي ومبيعملش حاجه.
مليكة : خالص دا نسمه كده.
سهر تنظر ليوسف وتضحك.
يوسف : ملوكه كل شويه تصوت في وشي تقولي أعلم إيه أعلم إيه.
سهر : أعلم هههههههه ولا أعمل؟
يوسف : اللي قولتيها دي
وبعدين بابي يجي يبوسها ويقولها..
تقاطعه مليكة : ولد.
سهر : هههههههههههه
يوسف : يقولها هاخده معايا الشغل هي بقى تقول لأ.
سهر : وأنت هتروح الشغل مع بابي تعمل إيه هناك؟
يوسف : علشان بتزعق ودماغها فيها صداع.
سهر : وأنت بقى عاوز تريح مامي؟
يهز رأسه.
سهر : خلاص تسمع كلام مامي ومتعملش حاجه غلط.
يوسف يشاور لسهر تقرب منه يهمس في ودنها.
مليكة : بتقول ايه أنت؟
سهر : سبيه يتكلم هو أنا سامعه حاجه.
مليكة : ها قولت ايه؟
سهر : ولا سمعت حاجه
سيب اللي في ايدك ده
واتفضل ألعب بالألعاب اللي جيبتها.
مليكة : لعب تاني يا مامي
دي اوضته مبعرفش أتحرك فيها ولما بيلعب بيسيبها على الأرض أفضل طول الليل أشيل من هنا أحط هنا وحضرته يصحى من النوم يكركب الدنيا تاني.
سهر : هههههههههههه معلش ما أنتي وأخواتك كنتو كده يا مليكة أمشي أنا بقى.
مليكة : رايحه فين يا مامي هتقعدي تتغدي معانا سيف زمانه جاي.
سهر : لا غدا ايه عاوزه أروح لـ أخواتك.
مليكة : هما صغيرين يعني وبعدين ما حضرتك كنتي هتعدي مع ملك اعتبري إنك عندها.
سهر : ما كنت هروح أقعد خمس دقايق برضو أطمن عليها واروح.
مليكة : يعني حضرتك مصممه تنزلي سامع يا يوسف؟
سهر : ابقي هاتي يوسف وتعالي يوم الجُمعة.
مليكة : دا لو ملك معملتهاش قبلها صحيح هي هتقعد عندنا في البيت ولا في شقتها؟
سهر : معرفش بس أنا هقولها لو ينفع يعني تيجي عندي مش هعرف اسيب بابي لوحده وأخواتك كمان.
مليكة : معرفش يمكن عمار ميوافقش.
____________