أنت قلبي الجزء الثالث

الحلقة ٧٢

#انت_قلبي٣
___________
الحلقة ٧٢

ياسمينا : شوفي الفراخ كده استوت يا فيروز.
فيروز : خرجتها من بدري وحطيت الحمام مبياخدش وقت.
ياسمينا : لسه يا هدى مخلصتيش دي حله صغيرة.
هدى : على فكرة ورق العنب الفريش مفيش احلي منه.
ياسمينا : نجيبه منين دلوقت انتي عارفه إن مش موسمه.
فيروز : ابنك خلص امتحانات يا هدى ؟
هدى : اخر يوم النهاردا.
فيروز : طب كويس علشان يبقى رايق.
هدى : أنا عارفه فرح ايه اللي في الشتا ده الأفراح تكون في الصيف كده والناس رايقه.
ياسمينا : معلش يا هدى لما تيجي تجوزي ابنك اشترطي عليه يتجوز في الصيف.. جرا ايه يا اختي
اعمل ايه يعني وبعدين هو احنا لسه هنأجل تاني دا احنا مأجلين الفرح دا مرتين قبل كده.
فيروز : كله خير يا ياسمين امال فين نادين؟
نادين خارجه من جوه.
هدى : ما تيجي تمدي ايدك معانا يا نادين خلينا نخلص.
نادين : مش قادرة يا خالتو دايخه وريحة الأكل عامله قلبان في معدتي.
هدى بابتسامة : كده طيب.. ألف مبروك.
فيروز : هههههههههههه
مقولتيش يعني على العموم ألف مبروك.
ياسمينا : خُدي بالك بس من بنتك وابعديها عن المطبخ.
نادين : حاضر.. هي مليكة مش جايه؟
ياسمينا : كلمتني من ساعة كده قالت إنها جايه.
هدى : عقبال ما تقوم براحتها بقى.
ياسمينا : صاحيه من بدري دا يوسف مخلي عينها وسط راسها.
هدى : يوسف ايه دا طول الوقت مع بابا وبينام معاه.
فيروز : هههههههههههه طب وانتي ايه اللي مزعلك يا هدى يكونش عاوزه تنامي جنب باباكي وغيرانه؟!
ياسمينا : يمكن ههههههه
افتحي الباب فريدة.
فريدة : أنا مش فاضيه.
ياسمينا : ولا حد ايده فاضيه يفتح افتحي الباب
مش هيفوتك الديوان ما انتي قاعدة جوه مستنيه من الصبح.
فيروز : مستنيه ايه؟
ياسمينا : الميكب ارتيست اللي جايه تبيض وشها.
فريدة خارجه من الغرفة وزعلانه.
هدى : ملكيش حق تزعليها يوم فرحها كده يا ياسمين.
ياسمينا : كل اما اقولها حاجه تقولي العروسة مبيتعملش حاجه.
فيروز : هههههه طب ما هي معاها حق يا ياسمين انتي بس اللي أعصابك تعبانه اكمنها هتمشي وتسيبك.
ياسمينا : متجيبي سكينة و تقتليني بيها احسن يا فيروز.
هدى : هههههههههههه يا عيني هو دا اللي مزعلك
يااختي خلي الجو يروق بقى.
فيروز : هههههههههههه
ياسمينا : بتألسي عليه انتي وهيه ماشي ليكم يوم.
هدى : هههههههههههه
مليكة : سلام عليكم.
يرددوا : وعليكم السلام.
ياسمينا : معلش يا مليكة مش هينفع نسلم انتي شايفه.
فيروز : اهلااااا بحيب قلب عمتو بس مش وقت بوس واحضان دلوقت شايف ايدي؟
يوسف : ايه ده؟
فيروز : دي كفته.
يوسف : حلوة؟
فيروز بابتسامة : اه حلوة بس لما تستوي.
هدى : أنت جعان يا يوسف؟ هاتيله ياكل يا فريدة.
مليكة : لسه مأكلاه قبل ما ننزل على طول.
ياسمينا : سيف اللي وصلكم؟
مليكة : لا سيف في الشغل.
فيروز : يا حبيبي معرفش ياخد اجازة ولا ايه؟
مليكة : لأ هو قال هيروح ساعتين كده الصبح وبعدين يستأذن زمانه جاي.
هدى : امال جايه ازاي؟
فيروز : ما عندها العربية يا هدى.
مليكة : لأ عمو كمال وصلني.
ياسمينا : طب مطلعش معاكم ليه؟
مليكة : قال رايح مشوار وزمانه جاي هدخل اغسل ايدي علشان اساعدكم.
فيروز : معلش ابقي شوفي اللي على النار يا مليكة.
مليكة : حاضر.
نادين : تعالى أنت هنا رايح فين؟
مليكة : ازيك يا نادين.. مالك، كده تعبانه ولا ايه؟
فيروز بابتسامة : عقبالك يا ملوكه لما تعمليها تاني.
مليكة : هههههههه ألف مبروك يا نادين.
نادين : متشكره يا مليكة
بس أنا خلاص روحي بتروح مني.
مليكة : معلش كله بيعدي.
ودخلت مليكة المطبخ.
هدى : تعملها تاني ليه ما عملتها قبل كده تلات مرات.
ياسمينا : امسكي ابن خالك يا نادين عاوز يدخل جوه لمامته.
نادين : تعالى هنا أنا مش قادرة اجري ورا حد تعالي
يا كوكو ألعبي مع يوسف.
كنده : لأ مش عاوزه ألعب معاه.
يوسف يضربها.
كنده بتصرخ : يا ماما ماماااااا.
نادين : مليكة تعالي خُدي ابنك أنا هشوف اللي على النار.
مليكة خارجه من المطبخ : حصل ايه؟
كنده : يوسف ضربني يا طنط.
مليكة : احنا مش قولنا منتشقاش اعتذر لـ اختك يلا.
كنده : لأ كوكي مش أخته.
نادين بحده : كوكي وبعدين.
كنده : ماما هتجيب نونو وأنت لأ.
نادين : اه يا أختي انتي خاسس عليكي حاجة انتي وحماتي
احملي يا نادين عاوزه عيال كتير!
فاكرة العيال دي بتيجي بالساهل كده.
ياسمينا : اللي يسمعك كده يفكر إنك كنتي بتربي بنتك لوحدك دي الست شايله عنك كتير انتي اللي مش عاجبك حاجه.
فيروز تغمز لياسمينا.
ياسمينا : اسكتي أنا هطق.
هدى : هههههههههههه هدي أعصابك يا أم العروسة.
يوسف يشد مليكة من هدومها : مامي... مامي.
مليكة : عاوز ايه وسيب هدومي بقى.
ياسمينا : أنت يا ابني عاوز تخلع أمك هدومها!
نادين : هههههههههههه شوفيه يا مليكة عاوز ايه؟
مليكة : ما أنا بسأله اهوه مبيردش.
يوسف : عاوز نونو زي كوكي.
مليكة : عاوز ايه؟!
فيروز : هههههههههههه
متزعلهوش بقى يا مليكة وهاتيله نونو.
نادين : تعالى يا يوسف اما اقولك.
مليكة تمسك ايد نادين اللي ماسكه ايد يوسف: سبيه.
نادين : هههههههههههه مالك بس يا ملوكه هقوله حاجه صغننه بص يا حبيبي مش أنت عاوز نونو؟
يهز الصغير رأسه.
نادين : خلاص لما بابا يجي ابقى قوله.
فيروز : هههههههههههه
ياسمينا : ما تخفي شويه يا نادين وروحي شوفي اللي على النار.
مليكة : أنا شوفته يا طنط لسه مستواش.
نادين : احنا لينا في الحمام ده ولا كله رايح عند فريدة؟
فريدة خارجه من الغرفة : فريدة مش عاوزه حاجه خالص ابقي كُليه كُله.
هدى : هههههههههههه مالك بس يا عروسة؟
كانت فريدة بتفتح الباب للبنت اللي جايه تظبطها في البيت.
بتقفل الموبايل لإنها كانت على تواصل بيها علشان تتأكد من العنوان.
البنت : سلام عليكم.
بيرددوا : وعليكم السلام.
ياسمينا : اتفضلي يا حبيبتي ادخلي.
نادين تهمس لفريدة : فريدة كلميها قولي لها اختي عاوزه تكوي شعرها.
فريدة : طب ما تقولي لها وبعدين محدش هيعمل حاجه قبل ما اخلص أنا.
نادين : يا سلام!
فريدة : ايوه وخفي بقى علشان انتي ذلتيني يوم فرحك وأنا بصراحه عاوزه اخد حقي النهاردا.
نادين : ماشي يا فريدة هنشوف مين فينا هياخد حقه النهاردا.
تدخل فريدة ومعاها الميكب ارتيست.
الموبايل يرن 📞
مليكة : ايوه يا سيف
أنت فين؟
يا خبر وبعدين؟
سيف : اوعي تقولي لي إن مفتاح الشقة نستيه جوه انتي كمان.
مليكة : لأ معايا تعالى بقى خُده.
سيف : انتي عند ياسمين؟
مليكة : ايوه.
سيف : اوك.. مسافة السكة.
تقفل مليكة مع سيف.
ياسمينا : هو سيف رجع من الشغل يا مليكة؟
مليكة : اه جه بس نسي المفتاح وجاي ياخده.
فيروز : ايه اللي نساه بس؟
مليكة : مش عارفه مع إنه بياخده معاه كل يوم على الرغم إني بكون في البيت.
ياسمينا : هيجي مش طايق نفسه.
نادين : واحنا ما لنا حد قال له ينسى المفتاح؟!
___________
في التليفون📞
آسر : خلاص يا سهر روحي وأنا على بالليل كده هروح على العنوان اللي اتدهولي.
سهر : هتتأخر في الشغل؟
آسر : لا هحاول اجي بدري.
سهر : اوك يا حبيبي مع السلامة.
وتقفل سهر مع آسر.
مجدي : مامي أنا خارج.
سهر : رايح فين؟
وقف مجدي مندهش.
سهر : ايه غلطت لما سألتك؟!
مجدي : لا أبدًا أنا رايح لزينة الجامعة.
سهر : ليه؟
مجدي : يعني هشوفها هناك ونشرب حاجة اظن دا مكان عام.
سهر : الجامعة مش للمقابلات يا حبيبي عاوز تشوفها وتقعد معاها يبقى تستأذن باباها وتروح البيت تقعد معاها هناك في وجود أهلها.
مجدي : وهتفرق ايه الجامعة من البيت دي حتى الجامعة أكبر وفيها ناس كتير.
سهر : مجدي أنت فهمتني ولا بتقاوح وبس؟!
مجدي : بصراحة عاوز اقعد معاها بعيد عن البيت.
سهر : قول كده بقى مش تقولي الجامعة أكبر وأوسع ومعرفش ايه
لا يا حبيبي مينفعش ولو مصمم كلم باباها قول له وأنت حر.
مجدي : مامي حضرتك عارفه لو قولت الكلام دا لحد من صحابي هيقول عليه ايه؟
سهر : عارفه علشان الصح مبقاش ماشي اليومين دول وبقى شيء غريب.
مجدي : يعني اخرج ولا لأ؟
سهر : أنت حر بس كلم انكل هشام الأول.
سكت مجدي.
سهر : ايه مش هيوافق صح؟
مجدي : ايوه.
سهر : طب وأنت عاوز تروح تقابل بنته وتقعد معاها من وراه؟!
يبقى عارف إن اللي بتعمله غلظ كلمه واستأذنه تروحلهم بكرة علشان هتوصلني يلا.
مجدي : هو حضرتك رايحه فين؟
سهر : رايحه لطنط ياسمين.
مجدي : اه فرح بنتها النهاردا.
سهر : ايوه.
مجدي : واحنا اتعزمنا؟
سهر : ايوه.
مجدي : هي طنط أمل رايحه الفرح؟
سهر : ايوه.
مجدي : اوك هروح معاكي.
سهر : احتمال زينة تيجي مع مامتها.
مجدي يبتسم.
سهر : هههههههههههه يلا قدامي.
_________
في فيلا كريم.
ندى : خلاص يا فريدة كل حاجه خلصت وغلفتها كمان.
فريدة : طب تمام... ألو
ايوه يا كريم أنت فين و اتأخرت ليه؟
ايه مش سامعة مين اللي جنبك؟
كريم : حاضر يا فريدة جايه.
فريدة : أنت فين وايه اللي اخرك بالشكل ده هي دي الساعة بتاعتك؟!
كريم : لما اجي هقولك يا فريدة.
فريدة : وليه متقوليش دلوقت هو سر؟!
ندى تخبط ها على كتفها وتهمس لها : اهدي شويه.
تشاور لها فريدة وهي متعصبه : طيب يا كريم
لما ترجع بقى سلام.
وتقفل فريدة مع كريم.
ندى : ايه يا بنتي فيه ايه؟!
عماله تقرري في الراجل زي المباحث كده ليه؟!
ايه يعني اتأخر شويه.
فريدة : الساعة تلاتة ونص يا ندى ومفروض أكون في القاعه الساعة خمسة عارفه يعني ايه ولو مش أنا خالته يعني مامته أكون أول الناس اللي موجودين مين يا ندى مفروض يكون هناك؟
ندى : يا حبيبتي أنا عارفه بس تلاقي في ظروف عطلته استني لما يجي أو خليها بعد الفرح اخر الليل كده ابقوا اتعاتبوا.
فريدة : طب اقعدي أنا هطلع ألبس عقبال ما كريم يجي هنوصلك في سكتنا.
ندى : ليه يا اختي أنا هروح ألبس براحتي علشان الوقت انتي بس متنسيش الحاجة هنا
وديها على الشقة وحطيها في التلاجة هما بقى يبقوا يطلعوا يسخنوا في الميكرويف ولا براحتهم بقى.
فريدة : ماشي... جميلة تعالي يلا علشان تلبسي.
ندى : هما الولاد اتأخروا ولا دي مواعيدهم؟
فريدة : لا زمانهم على وصول عندهم امتحانات وطالع عينهم اليومين دول
هو مش اليومين دول وبس اهم كده طول السنة.
ندى : يااختي عقبال ما تفرحي بيهم خليهم يشوفوا مستقبلهم بطلي قلبك الرهيف ده.
فريدة : هتعملي زي كريم.
ندى : الراجل عاوز ولاده يبقوا زيه هو مغلطش طالما الولاد ماشي حالهم سيبيهم بقى.
فريدة : يا ستي أنا اتكلمت اديني ساكته كاتمه في قلبي وساكته.
ندى : هههههههههههه اللي يسمعك يقول الست دي مظلومه يا ولداه مش واخده حقها تالت ومتلت.
فريدة : فين حقي اللي وخداه ده إذا كان اليوم اللي مفروض جوزي يبقى معايا فيه وواقف جنبي بصفته جوز خالة العريس
اللي هو لا له أب ولا أم حضرته مشغول وعنده ظروف.
ندى : واحنا روحنا فين بس يا فريدة وبعدين ولاد رحمة هما ولادنا وآدم قايم بالواجب وبايت معاه هناك في شقتكم وبيجهزوا كل حاجه مع بعض بقالهم اسبوع.
فريدة : دول اخوات يا ندى يعني دا طبيعي ليه محسساني إنه بيعمل دا لحد غريب.
ندى : دا انتي اللي غريبة قوي النهاردا أنا ماشيه علشان منمسكش في خناق بعض كفاية جوزك لما يرجع.
فريدة : جميلة.
تيجي جميلة من بره كانت بتلعب في الجنينة.
فريدة : أنا مش عماله انادي عليكي مبتجيش ليه ؟!
جميلة : ما أنا جيت اهوه.
فريدة : لا تعالي خُديني قلمين احسن.
ندى : اهدي على البنت هتخليها تعيط تعالي معايا يا جميلة وسيبك من مامتك دي.
فريدة : تعالي هنا رايحه فين انتي ما صدقتي؟!
ندى : هههههههههههه
البنت عاوزه تطفش منك
تعالي يا حبيبتي.
فريدة : ندى شوفي طريقك وسيبي جميلة.
ندى : كده طيب سلام.
فريدة : تعالي يلا علشان تغيري هدومك.
جميلة بفرحه : وهنروح فرح عمو ياسين وطنط فريدة؟
فريدة : ايوه.
جميلة : بس بابي لسه مجاش.
فريدة بتنهيدة : زمانه جاي يلا بقى.
________
رغد راجعة من الجامعة وبتفتح باب الشقة بعدها تلاقي ماهر قاعد مع والدها.
ماهر بابتسامة : ايه يا حبيبتي اللي اخرك كده دا أنا قاعد هنا من بدري مستني رجوعك بالسلامة.
رغد تحط الكتب على الطربيزة وتخلع الشنطة وتقعد وتنظر لوالدها : خير الراجل دا هنا بيعمل ايه وجاي ليه؟
ماهر : الراجل ده!
ايه خلاص مبقاش ليه اسم للدرجة دي نسيتي بابي يا رغد؟
رغد : ما ترسيلكم على حل وتقولولي مين فيكم بابا بالظبط؟!
نجيب : أنا ابوكي يا بنتي بس الأستاذ ماهر هو ابوكي اللي رباكي.
رغد : الأستاذ ماهر!
قولت لي بقى حضرتك هو دفع كويس ولا ايه؟
ماهر : ميصحش كده يا رغود بابا يا حبيبتي مزنوق في قرشين مفيهاش حاجه لما اساعده.
رغد : أنا بشتغل ومش محتاجين مساعدة من حد.
ماهر : ما هو دا اللي جاي اكلمك فيه معقول بنتي أنا تشتغل جرسون في مطعم وكل دا ليه علشان شوية جنيهات ميقوض بنزين العربية.
رغد : سيبتهالك زي ما سيبت كل حاجه لإنها مش بتاعتي ويعدين ايه حوار بنتك ده ما هو لسه قايل لك إننا بنته.
ماهر : بس الناس عارفه إنك بنتي واسمك اللي موجود في البطاقة موجود جنبه اسمي واسم ابويا يعني بنتي على الاقل في الورق.
رغد : هحرقها هولع فيها
أي حاجه تفكرني بيك هحاول اتخلص منها.
ماهر : للدرجة دي بتكرهيني طب عملت ايه؟!
إذا ابوكي اللي قاعد ده هو اللي وافق إنك تتكتبي بـ اسمي أنا يعني مضربش حد على ايده وبالرغم من كده قاعدة معاه وسيباني أنا..
أنا اللي ربيت وعملت واكلت ولبست لحد ما بقيتي مدمزيل اهو زي القمر واقفة قدامي.
رغد : اوعي نزل ايدك
ولا مفكرني ست من الستات اللي بتتحرش بيهم؟!
ماهر : يعني مفيش فايدة هتفضلي مستمرة في الشغلانه دي؟
رغد : ملكش إنك تسألني اصلا انت مين علشان تسأل؟
ماهر : خلاص يا رغد براحتك.
وفتح باب الشقة وخرج.
نظرت رغد لوالدها : ايه اللي حضرتك بتشربه ده ولا هو جه علشان يديك فلوس تشتري السم ده!
نجيب : السم ده معرفش اعيش من غيره ولو بطلته اموت.
رغد : متقلقش هو هيكون سبب في موتك برضه.
ودخلت الأوضة وقفلت على نفسها.
بتغير هدومها علشان نازله الشغل اللي بعد الجامعة.
قعدت بعد ما غيرت هدومها وبتفكر في مراد اللي جه على بالها فجأة.
_______
في فيلا مراد.
وأمل لسه راجعة من الدار وطالعة تغير هدومها تتفاجئ بمراد اللي كان جاهز علشان يوصل مامته الفرح.
أمل : غريبة من امتى يعني بتتطوع توصلني أي مكان؟!
مراد : من هنا ورايح.
أمل : وراك ايه يا مراد فهمني؟
مراد : كل خير يا أمي.
أمل : مش مطمنالك.
مراد : ليه بس أنا عاوز اثبتلك حسن نيتي.
أمل : اثبت.
مراد : طب اتفضلي حضرتك اطلعي البسي وهوصلك لحد هناك وهدخل معاكي كمان.
أمل : اه كده فهمت.
مراد : طب يلا بقى علشان منتأخرش.
أمل طالعة فوق..
مراد : بابي بيتصل.
أمل : طب هاتلي التليفون بسرعة.
مراد يطلع السلم ويسلم أمل التليفون : هروح اشغل العربية بقى.
📞
أمل : ايوه يا هشام..
لأ لسه راجعه اهوه من بره هطلع اغير هدومي علشان اروح لياسمين مش هتيجي بالليل تحضر الفرح؟
هشام : هاجي بس شويه كده.
أمل : ما أنا بقولك بالليل هو أنا قولت دلوقت؟!
هشام : تمام عاوزه حاجه؟
أمل : مراد هيوصلني.
هشام : ليه خير فيه حاجه؟!
أمل : شوفت اهو أنا عملت كده زيك بالظبط.
هشام : خلاص خليه يوصلك مفيش مشكلة
سلام.
أمل : مع السلامة.
_________
في فيلا كريم.
كان راجع من بره.
فريدة واقفه مضايقة ومتكلمتش معاه.
كريم : هقولك كل حاجه بعدين بس سيبيني دلوقت اخد شاور واغير هدومي علشان نلحق وقتنا بدري.
فريدة : بدري!
كريم نظر لها بابتسامة وطلع فوق.
فريدة : جميلة تعالي اظبطلك شعرك ده.
محمد : سلام عليكم.
فريدة : وعليكم السلام
ادخل يا حبيبي امال فين زين؟
محمد : بيركن العربية.
فريدة : هو اللي كان سايق؟
محمد : ايوه.
فريدة : تاني يا محمد
بابي قال ايه؟
محمد : دي مسافة صغيرة يا مامي.
فريدة : بلاش باباك يعرف بقى.
محمد : اوك.. هطلع اخد شاور واغير هدومي.
زين : سلام عليكم.
فريدة : وعليكم السلام
ادخل حصل اخوك.
زين : أنا مش عارف هي حبكت يعني يتعمل الفرح ده أيام الإمتحانات!
فريدة : معلش يا حبيبي
ابقى اعمل فرحك بعد ما تخلص امتحاناتك.
زين : دي تريقه بقى.
فريدة : زين أنا مش فايقه ليك.
زين : مالك بس يا ست الكل؟
فريدة نظرت في الساعة : متأخرين يا حبيبي اخلص بقى.
زين بيجري على السلم : حاضر رهوان اهوه.
فريدة تعطي جميلة الآيباد : امسكي ألعبي عقبال ما اخواتك يخلصوا لبس.
وتطلع فريدة لكريم.