#انت_قلبي٣
_________
الحلقة ٤٩
أمل : خلاص يا نور ماتطلعيش لهشام هو جه.
نورهان تنزل جري : بجد؟
أمل : ايوه لسه شايفاه داخل من البوابة.
نورهان : طب رايحه فين؟
أمل : هطلع أنام.
نورهان : طب مش تشوفيه كان فين وتطمني عليه وبعدين تطلعي تنامي.
أمل : لا عاوزه اشوفه ولا اتكلم معاه.
نورهان : طيب على مهلك هتوقعي.
تطلع أمل فوق ويدخل مراد.
مراد : عمتو حضرتك لسه صاحيه؟
نورهان : سؤالك دا معناه إنك عارف إن الوقت اتأخر يا مراد كنت فين؟
مراد : كنت بتمشى مع صحابي.
نورهان : صحابك مين دول وكنت بتتمشى فين وايه اللي اخرك لحد دلوقت؟
مراد : بصراحه بقى مكونتش ناوي ارجع البيت اصلا.
نورهان : نعم!
وبعدين اتصلت بيك فوق العشرين مرة مردتش ليه يا واد يا بارد أنت؟!
مراد : واد!
نورهان : خلاص طالما شايف نفسك راجل قوي مش تسترجل كده وتتحمل المسؤلية شويه وتعقل بقى مامتك كان هيجرالها حاجه بسببك.
مراد : آه طبعا ولا ضميرها وجعها علشان ضربتني بالقلم الصبح.
نورهان : ياريتها كانت كسرت دماغك يا أخي.
________
بتقرب أمل من السرير علشان تنام تخبط في هشام بدون قصد.
هشام يفتح عينه بخضه وبصوت ناعس : أمل!
أمل : معلش يا هشام ماأخدتش بالي.
هشام نظر في الساعة : انتي ايه اللي مصحيكي لغاية دلوقت؟!
أمل : كنت قاعدة مع نور تحت.
هشام : طب نامي يا حبيبتي الساعة أربعة.
أمل : اه ما أنا هنام اهو.
هشام : انتي فيه ايه مالك؟
أمل : مفيش يا هشام نام يا حبيبي.
هشام : ما أنا كنت نايم انتي اللي خبطتي فيه قلقتيني.
أمل : خلاص يا هشام قولتلك حقك عليه خلصنا بقى.
هشام : انتي هتتخانقي معايا؟!
أمل : اسيبلك الأوضة واروح أنام في اوضة تانية؟!
هشام : اقولك ايه بس نامي يا أمل الظاهر السهر وقلة النوم مأثرة عليكي تصبحي على خير.
__________
في فيلا كريم.
فريدة : كريم.. كريم أنت نمت؟
كريم بصوت ناعس : يعني مفروض احنا داخلين نعمل ايه دلوقت مش قولنا هنام؟
فريدة : طب خمسة بس عاوزاك في حاجه مهمة.
كريم : اتفضلي.
فريدة : بص لوشي كده واتحقق منه قوي.
كريم : ليه يعني مش فاهم؟
فريدة : ألبس النضارة علشان تشوف كويس
قولي شايف ايه؟
كريم : شايف ايه يعني ايه مش فاهم؟!
فريدة : يا حبيبي بص كويس.
كريم بابتسامة : شايف ست زي القمر نايمه جنبي تصبحي على خير.
تمسك ايده : تعالى بس أنت عاوز تنام وخلاص قمر ايه بقولك شايف ايه في وشي؟
كريم : بصراحه مش فاهمك يا فريدة ماله وشك يعني عاوز افهم؟
فريدة : الخطوط اللي فيه دي واضحه ولا عاديه مش باينه قوي؟
كريم بتنهيدة : فين الخطوط دي؟
فريدة : قرب شوفها كويس.
يقرب كريم منها ويطبع قُبله على خدها : عارف انك عاوزه نقعد نتكلم مع بعض بس معلش انتي عارفه الوقت اتأخر.
فريدة : لأ أنا مش عاوزه كده أنا سألتك سؤال محدد الخطوط اللي في وشي باينه قوي؟
كريم : مفيش خطوط اصلا.
فريدة : غريبه ازاي امال مرات صاحبك بتقولي إن
في تجاعيد ظاهرة قوي في وشي ومخليه شكلي كأني واحدة عجوزة.
كريم : لا مفيش الكلام دا اللي يشوفك ميدكيش سنك.
فريدة : ميدنيش سني! انت بتقول ايه يا كريم؟!
وبعدين غريبه دي سمعت الكلام دا فين قبل كده؟
كريم : حبيبتي النهار قرب يشقشق عاوز ألحق اناملي ساعتين تصبحي على خير.
___________
في الصباح.
ياسمين : صباح الخير يا حبيبي ايه مش هتنزل
الشغل النهاردا ولا ايه؟
هشام : مش قادر يا ياسمين.
ياسمين : ليه يا هشام مالك يا حبيبي وبعدين صوتك متغير انت اخدت دور برد ولا ايه؟
هشام : الظاهر كده رجعت امبارح تعبان وحاسس جسمي مكسر شوفي كده عندي حرارة أصل حاسس إني حران.
ياسمين تقيس الحرارة..
ياسمين : يا خبر تمانية وتلاتين عندك حرارة فعلا يا هشام هنزل اجيبلك حاجه تنزل الحرارة دي مع الكمادات هتبقى زي الفل.
هشام : لأ كلمي ليلى شوفي شادي نزل كده ولا ايه لو مرحش الشغل لسه قولي لها ينزل يجيبلي دوا من الصيدلية هو عارف هيجيب ايه.
ياسمين : اقولها على الأعراض اللي عندك يعني؟
طب يا حبيبي لو تعبان قوي ننزل نروح للدكتور.
هشام : دا دور برد عادي يا ياسمين مش مستاهله دكتور يعني.
ياسمين : طيب ولو اني شايفه الدور ده شكله تقيل حبتين.
يغطي هشام نفسه علشان ينام.
تنهي ياسمين المكالمة مع ليلى وبعدها ينزل شادي تحت الصيدلية وراحت ياسمين تعمل كمادات لهشام.
___________
أنت تقرأ
أنت قلبي الجزء الثالث
Werewolf(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
