أنت قلبي الجزء الثالث

الحلقة ١١٩

#انت_قلبي٣
__________
الحلقة ١١٩

ملك تخبط وتفتح الباب بفرحه : مليكة بابي ومامي جايين بعد بكرة.
مليكة : اوك يا حبيبي مع السلامة.
وتقفل مليكة مع سيف.
ملك : سيف ده؟
مليكة : اه سيف.
ملك تقعد جنبها و بابتسامة : اممم.. أكيد كنتي بتزفيله الخبر السعيد أنا عارفه إنك مستنيه على نار ههههههههه.
مليكة : هكدب عليكي يعني بس أهم حاجة طبعًا إن بابي يكون بخير ويرجعوا لينا بألف بسلامة.
ملك : أنا فرحانه قوي حاسه الفترة اللي فاتت دي كنت يتيمه من غيرهم.
مليكة : بعد الشر.
ملك : هههههههههههه
بقولك ايه ما تيجي نفكر كده في مفاجأة نحضرها لهم.
مليكة : مفاجأة ايه معنديش أي فكرة دلوقت.
ملك : نفكر مع بعض نعملهم ايه يفرحهم نعملهم ايه يفرحهم؟
مليكة : هما لما يشوفونا متجمعين مع بعض دي فرحتهم الحقيقية هنروق المكان كده ونزينه علشان يبقى مناسب لـ استقبالهم
والاوضة اللي جوه دي نروقها كده ترويقة عرسان
ههههههههههههه ونقفلها.
ملك : عقبال ما اجي اروق شقتك يا ملوكه.
مليكة : سيف بيروقها قصدي يعني....
وتسكت مليكة بخجل.
ملك : هههههههههههه
حقه الصراحة انتي بقالك كتير غايبه عنها لازم تتروق ومش أي ترويقه طبعًا ههههههههه
تخبطها مليكة في كتفها : طب قومي بقى من هنا.
ملك : هههههههههههه قايمه يا أختي عمار شكله جه.. سلام.
مليكة قاعدة بتفكر وسرحانه وهي فرحانه برجوع باباها ومامتها قريب لكن في نفس الوقت قلقانه ومش عارفه مقابلة باباها بسيف هيكون شكلها ايه اتنهدت وقامت تشوف ابنها.
___________
في التليفون 📞
آسر : تمام يا حسام
احتفظ بالاوراق اللي عندك لحد ما ارجع.
حسام : توصل بالسلامة أنت وسهر يا حبيبي متعرفش أنا فرحت قد ايه لما عرفت من مجدي.
آسر : معلش مكلمتكش وقتها.
حسام : المهم تكون بخير.
آسر : أنا كويس حوار العملية ده مكانش أكيد
بس أنت عارف الدكاترة بقى وتوصياتهم يخلوك متتحركش من مكانك.
حسام : يعني ايه هو أنت مش كويس؟
آسر : اه سمحولي بالسفر بس مع شوية محاذير بقى وتوصيات مقولكش تخلي الواحد ميت وهو عايش.
حسام : لأ يا آسر لازم تسمع الكلام يا حبيبي دي صحتك يعني مفيهاش لعب ولا هزار.
آسر : هحاول على قد ما اقدر هاه محتاج ايه اجيبهولك وأنا جاي؟
حسام : عاوزك ترجعلنا بألف سلامة دا أهم حاجة عندي.
آسر : حبيبي يا ابن عمي اشوف وشك على خير.
حسام : مع السلامة يا حبيبي.
ويقفل آسر مع حسام.
سهر : خلاص قفلت الشنطة بتاعت ملك ومليكة ودي شنطة علي ومجدي لسه هبدأ فيها وبعدين نلم حاجتنا بقى.
آسر : دايمًا حاجتنا كده في الأخر هههههه
سهر : مش مهم المهم نفرحهم.
آسر : بقولك ايه انتي تخلصي اللي في ايدك ده وتيجي تنامي علشان بكرة هخرجك حتة خروجك تودعي بيها ألمانيا كلها.
سهر : هههههههههههه
مش عاوزين نيجي هنا تاني أكتر بلد محبش اجيها مرة تانية.
آسر : ليه بس البلد هنا جميلة.
سهر : بس لينا فيها ذكريات محبش افتكرها.
آسر : كله بيعدي يا سهر.
سهر : آسر حقيقي أنت خفيت وبقيت كويس خلاص؟
آسر : اه مفيش عمليات.
سهر : يعني ايه؟
آسر : يعني في أدوية ولازم اخد بالي من صحتي دي حاجة مفروغ منها.
سهر : حاضر يا حبيبي.
آسر : أنا اللي اخد بالي من صحتي.
سهر : وأنا كمان احاول اهيئ لك الجو اللي تقدر فيه تحافظ على صحتك.
آسر : تعبتك معايا يا سهر.
سهر : وأنا مش تعبانه أنا كُلي فداك يا حبيبي.
آسر : حبيبتي أنا اللي كُلي فداكي.
سهر : هههههههههههه خليك اقعد اتكلم كده وعطلني بقى.
يقرب منها ويمسك ايدها : ما تيجي ننام والصبح ابقي كملي.
سهر : عاوز اخلص علشان اريح دماغي.
آسر : متشتغليش دماغك بكرة هساعدك.
سهر : مش مستاهله سيبني بس أقفل الشنط.
آسر : خلاص طالما مصممه هاتي اللي عندك ده احطه هنا.
سهر بابتسامة : اتفضل.. ودا كمان.
سهر : بس دي حاجتنا متلخبطش الحاجات في بعض بقى.
آسر : هههههههههههه طيب انتي عارفه هتعملي ايه يبقى مليش لازمه بقى.
ونام على السرير وهو ناظر لها.
سهر : هو دا اللي هتساعدنا؟!
آسر : هههههههههههه اعملك ايه ما هو مش عاجبك ترتيبي رتبيها انتي بقى بمعرفتك.
سهر بابتسامة : خلاص ماشي.
___________
في شقة كمال ونادين.
ياسمينا : ما خلاص بقى يا هدى.
سيف : أنا مش عارف مين اللي مفروض يزعل من التاني حضرتك اللي ادتيها مساحة إنها تتدخل في حياتي أنا ومراتي ولا أنا اللي مليش علاقة بـ اللي بينكم وبتسخدمني علشان تضايقك.
هدى : لأ مراتك اللي جايبه لينا الكلام.
سيف : لو سمحتي يا هدى ياريت متتكلميش عن مليكة هي مبتجبش سيرتك خالص علشان أنا مبديش فرصة لحد إنه يتكلم عن أختي مهما كان كمان مش هسمح لحد يجيب سيرة مراتي ولو أخت جوزك دي كانت راجل أنا كنت روحت عرفتها ازاي تتدخل في اللي ملهاش فيه لكن أنا مليش كلام معاها وبدل ما انتي محموقه كده كنتي تبطلي كلام علينا قدامها.
هدى : ماشي يا سيف حاضر مش هتكلم عنكم قدام أي حد لكن يا حبيبي الكلام دا بيوصلها مش مني متنساش إن سلفتها تبقى صاحبة حماتك والكلام واضح إنه بينتقل من هناك.
ياسمينا : سهر اعقل من كده يا هدى وبعدين هي كانت في ايه ولا في ايه علشان تتكلم في المواضيع دي سهر جوزها تعبان ومسافر يتعالج ولا معندكيش خبر؟!
هدى : عندي يا ياسمين بس الحوار دا من وقت ما الهانم راحت بيت باباها بعد ما اخوكي طلقها.
سيف : قولت لك متجبيش سيرة مليكة هي ملهاش علاقة بيكي ولا انتي كمان ليه بتحاولي تستفزيني.
ياسمينا : خلاص يا سيف اهدا بقى وانتي يا هدى ياريت تخرجي مليكة خالص من دماغك هي في ظروف متسمحش بده لا دلوقت ولا بعدين سيبي كل واحد في حاله ولو حتى شايفه إنها غلطانه عاجبه اخوكي وهو راضي بكده.
سيف : مليكة غلطت في ايه يا ياسمين؟!
ياسمينا : أنا بقول حتى لو غلطانه يعني بس اللي حصل دا كان رد فعل طبيعي للي عملته معاها.
قام سيف بتنهيده.
ياسمينا : متزعلش مني يا سيف.
سيف : وهزعل منك ليه يا ياسمين انتي مقولتيش غير الحقيقية معلش هدخل اريح جوه شويه.
ياسمينا : ماشي يا اخويا أنا عارفه إنك راجع من الشغل تعبان.
هدى : مش من الشغل بس كان في الشقة بيروقها الظاهر العروسة راجعه قريب.
سيف : ما تخليكي في حالك يا هدى.
ياسمينا : هههههههههههه فرحتني يا واد يا سيف
بجد العروسة قصدي مليكة راجعه شقتها قريب؟
سيف وهو ناظر لهدى : ادعيلنا يا ياسمين إن شملنا يتلم من تاني نضفي دا من جوه وانتي بتدعي.
ياسمينا وهي ناظره لهدى : حاضر.
هدى : حاضر ايه انتي مش سامعه؟!
ياسمينا : يا بنتي بيكلمني أنا.
كان سيف دخل اوضته.
هدى : لا يا ياسمين كان موجه الكلام دا ليه.
ياسمينا : ادعيلهم يا هدى
لما يكونوا كويسين مع بعض دا مش هيعكنن عليكي يعني بالعكس حقك تفرحي لهم وبعدين تعالي هنا قوليلي انتي شايله مليكة فوق دماغك ليه وزاعقه هي عملتلك ايه دي البنت غلبانه وفي حالها؟!
هدى : مبحبش الدلع الماسخ ده يا ياسمين.
ياسمينا : يا ستي متدلع هي يعني بتدلع عليكي دي بتدلع على جوزها هو انتي يعني لو اتدلعتي على دكتور معتز حد هيقولك حاجة ههههههه
هدى : بطلنا دلع من زمان خلاص يا ياسمين.
ياسمينا : ما انتي اللي خايبه هنعمل لك ايه يعني
ههههههههههههه اتدلعي يا اختي حد واخد منها حاجة.
_______
في فيلا كريم.
كريم قاعد بيخلص شوية شغل خاص بالمستشفى.
وفريدة قاعدة قصادة بتشتغل تريكو.
فريدة : ايه رأيك يا جيجي؟
جميلة : حلو قوي يا مامي
اعملي فستان لعروستي.
فريدة : حاضر يا حبيبتي
ايه رأيك في البلوفر دا يا كريم؟
كريم : حلو يا حبيبتي.
فريدة : من ساعة ما اتعلمت شغل التريكو من فيديوهات اليوتيوب وأنا عاوزه أحول كل القماش لتريكو هههههههه حتى الستاير هعمل مفرش للسرير بتاعنا.
كريم : حلو يا فريدة.
فريدة : أنت اصلا مش معايا جميلة هاتيلي ازازة المياه اللي عندك دي.
جميلة : حاضر.
فريدة : كريم ايه رأيك نعمل عزومة لحازم وندى لما يرجعوا من السفر؟
كريم : براحتك اعملي اللي يريحك.
فريدة : لا متقلقش ما نبيله هتكون معايا تحب اعمل لك أكل ايه بقى؟
كريم : أي حاجة يا فراولة.
فريدة : أنا عارفه بتحب ايه بس قولت يعني يمكن عاوز حاجة جديدة.
كريم : أي حاجة من ايدك بتبقى لذيذة يا حبيبتي.
فريدة بابتسامة : كده طب هسيبك بقى تشوف شغلك واضح إن معطلاك.
كريم : معلش يا حبييتي ميزانية المستشفى بس الشهر ده فيها لخبطه وأنا دماغي خلاص فصلت.
فريدة : امال بتوع الحسابات بيعملوا ايه لما أنت بتراجع كل صغيرة وكبيرة يا كريم ؟!
كريم : بيعملوا شغلهم بس أنا كمان لازم اراجع كل حاجة.
فريدة : كريم هو أنت مشوفتش دكتور هشام من امتى؟
كريم : ليه؟
فريدة : يعني بسأل متقابلتوش من بعد أخر مرة فتحتوا الموضوع إياه ده؟
كريم : لأ.
فريدة : اممم.. طيب.
كريم : متوهنيش بقى يا فريدة خليني اركز.
فريدة : حاضر أنا هخرج اقعد بره.
كريم : معلش بس فنجان قهوة علشان اصحصح كده لإني شكلي هنام وأنا قاعد.
فريدة : حاضر يا حبيبي.