#انت_قلبي٣
__________
الحلقة ٥٦
داليا اخده انتصار في حضنها : كلم بالاسعاف يا مجدي.
مجدي : بتصل اهو بس ابعدي شويه خلي ماما تعرف تتنفس.
رُقية ومروان بيبكوا.
داليا : بس بطلي انتي وهو.
مروان : تيته كويسه يا مامي؟
داليا : ايوه وامسك نفسك شويه قدام باباك.
رُقية : هي اللي قالت لي ابقي صحيني يا رُقية اخد الدوا قومي بقى يا تيته.
بعد دقائق جات الإسعاف ونقلوا انتصار المستشفى.
___________
في فيلا آسر.
يدخل الغرفة أول ما تلمحه سهر تخبي حاجه كانت في ايدها في الدرج.
آسر شك فيها : ايه اللي كان في ايدك دلوقت؟
سهر : اهو مفيش في ايدي حاجه.
آسر : ما أنا عارف إن مفيش في ايدك حاجه وريني ايه اللي مخبياه ده؟!
سهر : في ايه يا آسر ما قولت لك مفيش في ايدي حاجه.
آسر : طب وسعي كده.
وبيفتح الدرج يلاقي شريط المهدئ اللي كانت بتاخد منه.
آسر : كان قلبي حاسس لو بتاخدي حاجه تانية مش هتخبيها رجعتي للبتاع دا ليه يا سهر؟
سهر : هات الشريط يا آسر.
آسر : مش هتاخديه.
سهر بانفعال : بقولك هاته.
آسر يدخل الحمام يفضي الشريط كله ويشد عليه السيفون.
سهر : ايه اللي أنت عملته ده؟!
آسر : انتي ايه مبتتعلميش مش فاكره حصلك ايه أخر مرة أخدتي من البتاع ده؟!
سهر : دا علشان كنت باخده من غير حساب بس أنا منتظمه ومش هلخبط تاني.
آسر : ليه كل ده ما تفهميني يا سهر ليه رجعت للمهدئات انتي كنتي كويسه؟
سهر : علشان مبقتش كويسه ومتفكرش لما ترميه مش هجيب غيره.
آسر : ابقى اشوفه هنا مرة تانية يا سهر.
سهر : ها هتعمل ايه؟
آسر : مش هقول لك خليها مفاجأة.
سهر بتصرخ : انزل هاتلي بداله يلا.
آسر : مش هنزل اجيب حاجه واتفضلي نامي بقى.
سهر : خلاص هنزل أنا.
آسر : هتنزلي فين يا مجنونة انتي.
سهر بتصرخ : بقولك ايه متعصبنيش انزل هاتلي
غيره يلا.
آسر : وطي صوتك الولاد يقولو ايه؟!
سهر : هاتلي غيره حالا مش هعرف أنام.
آسر : خلاص متناميش وافضلي صاحيه للصبح بس برضه لا هتخرجي تجبيه ولا حد يسمحلك إنك تدخليه البيت مرة تانية.
سهر بتصرخ : أنت بتعاند؟!
آسر : بطلي بقى الولاد نايمين.
سهر : طب اخرج مش عاوزاك تقعد معايا.
آسر : اخرج يعني ايه سهر حاولي تهدي كده وخليكي عاقله.
سهر بتصرخ : أنا مجنونة سمعت أنا مجنونة اخرج بقى.
آسر : خلاص خلاص هخرج بس اهدي.
سهر بتصرخ : بقولك اخرج.
فتح آسر باب الغرفة وخرج كانت ملك ومجدي وعلي كل واحد واقف عند باب اوضته ومش فاهمين ايه اللي بيحصل نظر لهم آسر.
آسر : مامي اعصابها تعبانه شويه كل واحد يدخل اوضته ينام.
___________
في شقة هشام.
ياسمين : نسافر ليه يا هشام؟
هشام : مش عاوزه تسافري معايا؟
ياسمين : أنا بسألك ليه نسافر؟
هشام : هكمل دراستي ياياسمين.
ياسمين : ايش معنى الوقت دا بالذات اللي فكرت فيه في الفكرة دي؟
هشام : مش فاهم وبعدين لو عاوزه تقعدي هنا في مصر براحتك.
ياسمين : أنت فاجئتني وبعدين أنت أخدت رأي مامتك؟
هشام : مامي مش هتمانع في حاجه فيها مصلحة ليه.
ياسمين : مش عارفه يا هشام سيبني أفكر أنا ممكن أسافر معاك نغير جو ماشي لكن سنتين تلاته خمسة
أو على حسب الظروف زي ما قولت دي صعبه شويه
أنا مش عارفه هقدر ابعد عن أهلي الفترة دي كلها ولا لأ.
هشام : أنا بس قولت اديكي خبر علشان متتفاجئيش.
ياسمين : طيب والشركة بتاعتك يا حبيبي هتعمل فيها ايه؟
هشام : هصفيها الحوار دا مفيهوش مشكلة.
ياسمين : خسارة يا هشام.
هشام : الخسارة الأكبر إني أفضل ادفع رواتب للموظفين والشركة مبتشتغلش صحيح دا مش ذنبهم بس أنا كمان مقدرش اتحمل الخساير دي كلها
ومش عارف الوضع هيفضل مستمر كده لـ امتى.
ياسمين : طب بقولك ايه يا حبيبي أنا طبعا مبفهمش في شغلك بس هو اقتراح يعني ممكن تشوف شريك يدخل معاك ويشتري نص نصيبك في الشركة تستفيد من خبرته
جوز عمتك نور مثلا ما هو بيشتغل في نفس المجال
وعندك خبرة بقاله سنين زي ما قولت لي ولا وضع شركته زينا كده؟
هشام : معرفش أي حاجه عنه وبعدين انكل عُمر مستحيل يبقى في شغل ما بينا.
ياسمين : ليه..علشان يعني المشكلة اللي بينه وبين عمتك؟
يا حبيبي بكره يتصالحوا وأنا سمعت يعني إنه عاوز يصالح طنط نور والست التانية دي هيطلقها هي مش عايشه معاه صح؟
هشام : معرفش يا ياسمين بقولك معرفش أي حاجه عنه.
ياسمين : طب علشان خاطري حاول تفكر تحسن وضع الشركة بـ أي طريقة بدل فكرة السفر دي.
هشام : أنا مش هسافر علشان اشتغل بس يا ياسمين الشغل دا هيبقى بجانب الدراسة فهمتيني؟
ياسمين : تمام بس ممكن تأجل الموضوع دا شويه.
هشام : هأجله لـ امتى يعني أنا بقالي كتير بفكر في الموضوع ده وعمري ما نسيته وغلطت فعلا لما مكملتش دراستي كان زماني دلوقت اخد الدكتوراه كان قدامي فرصة لكن محاولتش استغلها.
ياسمين : ما هو لو فضلت عايش بره مكوناش اتقابلنا واتجوزتني ولا ندمان؟
هشام : ندمان !!
دا أنتي أجمل حاجه حصلتي في حياتي.
ياسمين : ميرسي لقد اخجلتم تواضعنا.
هشام : هههههههههههه
ياسمين : ايوه كده فُكها واضحك بقى مفيش حاجه مستاهله كله بيعدي.
هشام : مش بقولك انتي أجمل حاجه حصلت لي في دنيتي كلها.
ياسمين : لا كده هتغر في نفسي ومفيش حد هيعرف يكلمني بعد كده.
هشام : هههههههههههه
طبعاً مش حرم هشام
هو معرفش ايه المميز في الموضوع يعني بس اهو اعتبريها تدبيسها وادبستيها يا حبيبتي.
ياسمين : أجمل تدبيسه في حياتي كلها.
___________
في فيلا آسر.
آسر : مجدي خبط على مامي اطمن إنها كويسه.
مجدي : حاضر يا بابي.
بيخبط مجدي على والدته.
كانت سهر قعدت في الأرض وبدأ النوم يغلبها سمعت صوت خبط على الباب ردت بفزع : مين؟
مجدي : أنا يا مامي حضرتك كويسه؟
سهر : أدخل اوضتك ونام يا مجدي.
مجدي : طب طمنيني بس وافتحي الباب ده وقولي لي إنك كويسه.
سهر بانفعال : روح نام محدش له دعوة بيه.
مجدي رجع لوالده اللي كان واقف بعيد شويه
وقلقان على سهر.
مجدي : قالت لي ادخل أنام.
آسر : ما قالتش حاجه تانية؟
مجدي : لأ.
آسر : طيب ادخل نام يلا يا علي يلا يا ملك واقفه ليه ادخلي نامي يا بنتي.
ملك : حاضر يا بابي بس ادخل اطمن على مامي.
آسر : شويه كده يلا ادخلوا ناموا تصبحو على خير.
ودخل آسر غرفة تانية وقفل الباب.
الولاد نظروا لبعض وكل واحد دخل اوضته علشان ينام.
أنت تقرأ
أنت قلبي الجزء الثالث
Lobisomem(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
