#انت_قلبي٣
___________
الحلقة ١٠٦
في شقة طارق.
مراد : امال فين العروسة؟
أمل : اشششش ايه اللي بتقوله ده؟
مراد : قولت ايه غلط؟
أمل : العروسة زمانها جايه متقعدش بقى كل شويه تسأل واهمد بقى.
مراد : بقالنا ساعة قاعدين وهي مخرجتش خايف تكون مكسوفه ولا حاجة أنا بقول ادخل اجيبها.
أمل تمسك ايده : تعالى هنا رايح فين؟!
اقعد يا مراد لـ اقول لبابي نمشي ونفركش الحوار دا كله.
مراد : أنا حاسس إني بتهدد طول الوقت.
أمل : اهي العروسة شكلها جات.
يوقف مراد بابتسامة وهو بيزرر الجاكت ويمد ايده يسلم فتعديه مريم وتسلم على أمل.
أمل : يا حبيبتي أنا بخير اقعدي يا مريم
شويه كده يا مراد روح اقعد جنب بابي
يقوم مراد ويهمس لـ والدته : هي مش شايفاني ولا ايه؟
أمل : وأنت تمد ايدك بتاع ايه؟!
مراد يعني بلاش نسلم؟
أمل : ايوه بلاش أنا بسلم على رجاله؟
مراد : لأ.
أمل : خلاص مستغرب ليه؟
مراد : كده طيب.
ويقعد يقعد على الكرسي اللي جنبهم.
تيجي هنادي وتقعد جنبهم.
هنادي : شرفتونا ونورتونا يا أمل.
أمل : حبيبتي البيت منور بـ أصحابه.
مراد بابتسامة : ازيك يا طنط؟
هنادي بابتسامة : أنا بخير يا مراد اخبارك أنت ايه؟
مراد : أنا تمام انتي كويسه يا مريم؟
مريم وهى ناظره في الأرض وبخجل : كويسه.
مراد يغمز لوالدة.
هشام : طيب اصبر.
مراد : لـ امتى طيب؟
هشام : مش لما خالها يجي.
مراد : واخوها يعني مينفعش؟
هشام : خالها يعتبر زي والدها وهما بياخدوا رأيه في كل حاجة ثم دا اللي اتقال أول ما دخلنا ولا أنت مكونتش معانا؟!
مراد : خلاص نستنى شويه مفيش مشكلة.
ويلتفت ينظر لمريم اللي كانت مكسوفه وبتحاول
متركزش معاه.
_________
في فيلا آسر.
سهر بصوت مبحوح ومتعب من البكاء :
اتصل تاني يا مجدي.
مجدي : بتصل يا مامي مفيش رد..
يوسف يقرب يقعد جنب مليكة.
يوسف : مامي بتعيطي علشان جدو تعبان؟
مليكة وهي بتمسح دموعها وتهز رأسها.
يوسف : هو جدو هيموت؟
سهر صرخت : لأ.. متقولش كده.
مجدي وهو متعصب : يوسف ممكن تطلع تلعب في الجنينة الحكاية مش نقصاك.
مليكة : حبيبي اطلع ألعب في الجنينة.. رِهام معلش خُدي يوسف يلعب شوية في الجنينة.
رِهام : حاضر.
سهر : حاول تاني يا مجدي.
مجدي : بتصل برضو مفيش رد.
مليكة : هو مش انكل حسام معاه عنوان المستشفى؟
مجدي : تقريبا اه.
مليكة : طب يعني ممكن يكون معاه تليفون المستشفى.
مجدي : هو هياخد عنوان المستشفى ليه وبعدين لما بيحب يكلم بابي أكيد يعني بيكلمه على الموبايل.
سهر : طب اتصل مش هتخسر حاجة.
مجدي : حاضر.
سهر بتبكي : اه يا وجع قلبي أنا مش عارفه اعمل ايه.
مليكة تقرب من والدتها وتحاول تهديها.
_________
في فيلا كريم.
كريم : بتقولي ايه؟!
فريدة : بقولك اللي حصل.
كريم : وانتي ايه اللي أكدلك إنه حقيقي مش يمكن بتكدب.
مليكة : واجهت زين وما أنكرش دا بالعكس أكد كلامها.
كريم خارج من الغرفة.
فريدة : رايح فين؟
كريم : رايح اشوف المصيبة دي كمان.
بيخبط كريم ويدخل.
كريم : زين... أنت يا بيه.
زين بصوت ناعس : بابي!
كريم : قوم صحصح كده علشان عاوز اتكلم معاك.
زين : الصبح يا بابي تصبح على خير.
كريم : قوم يلا هو بمزاجك.
زين : فيه ايه بس.
كانت فريدة دخلت فزين فهم إن الموضوع بخصوص الحوار إياه.
زين : ثواني بس يا بابي أنا هفهم حضرتك.
كريم : تفهمني ايه الكلام اللي قالته مامتك دا حصل؟
زين : هو حصل بس مش بالصورة دي أنا هفهمك.
كريم : وكمان لسه عاوز تفهمني؟!
بقى رايح تتقدم وتخطب وأنت معكش تمن الدبل نفسها ولا حضرتك فاهم هتتجوز من البنك اللي فاتحه والد سعادتك ليك؟!
زين : دي خطوبه كده يعني علشان محدش يتقدملها لكن حضرتك أكيد هتكون معايا لو حصل خطوبة رسمي.
نظرت فريدة لكريم اللي بدأ يتعصب من ردود زين.
فريدة : هو أنت مش مدرك بتقول ايه ولا لسه مفوقتش خطوبة ايه وتتقدم لمين شوف انا كنت جايه اهدي باباك بكلمتين علشان ميتهورش
ويخليك تندم إنك فكرت تتقدم لـ البنت دي.
كريم : فريدة معلش ممكن تسبينا لوحدنا شويه.
نظرت فريدة لكريم بدهشة.
كريم : ايه مالك؟
أنا هتكلم مع ابني كلام رجالة مينفعش يعني تقعدي تسمعيه.
وغمز لفريدة.
فريدة بهمس : كلام رجالة؟!
كريم : هقولك بعدين.
فريدة : ماشي مش هنام لحد ما تيجي اشوف كلام الرجالة ده.
خرجت فريدة وقفلت الباب.
كريم : قوم علشان نعرف نتكلم راجل لراجل كده.
زين وهو بيقوم : حاضر.
كريم : ايوااا اقعد كده وفتح مخك معايا.
زين : بابي أنا عارف إن الموضوع ممكن يكون مفاجئ لحضرتك بس اللي حصل إن طنط رُفيدة هي اللي كلمتني صحيح كنت مبسوط وسعيد بالنتيجة اللي وصلت ليها بس اللي كان مضايقني إن دا بيحصل بدون علمكم لكن دا حقي هو الحب غلط يا بابي حاجة مفروض نخبيها ونخاف الناس تعرفها؟
كريم : لأ الحب مشاعر طيبة جميلة صادقة مبتستخباش مهما حاولنا لكن الغلط إنها تخرج من الإطار اللي مفروض توضع فيه.
زين : بمعنى؟
كريم : يعني الحب دا لو اترتب عليه خطوبة وبعدها جواز ايه المشكلة؟
زين : طب ما هو دا اللي هيحصل.
كريم : خطوبة بدون علمنا؟
زين : ما هو دا اللي قولت إنه غلظ.
كريم : تمام ممكن اسامحك بس وبعدين؟
زين : هنتجوز.
كريم : امتى وازاي؟
زين : لما اتخرج.
كريم : تمام أنت معرفها الكلام ده؟
زين : اه وموافقة.
كريم : اممم منين بقى؟
زين : ما أنا لما اتخرج هشتغل.
كريم : هتشتغل وتجيب شقة وكمان لازم يكون في دخل ثابت علشان تعرفوا تعيش منه.
زين : اه طبعًا.
كريم : بس أنا معنديش حاجة اساعدك بيها.
زين : تمام وأنا مش عاوز غير موافقة حضرتك.
كريم : تمام وأنا هقعد مع أمجد واتكلم معاه واشوف رأيه ايه.
زين : ليه أمجد؟
كريم : مش هو راجل البيت برضه ولا ايه؟
زين : اه طبعًا بس ممكن تتكلم مع طنط رُفيدة.
كريم : لا طنط رُفيدة مامي اللي تقعد معاها.
زين : اه طيب.
كريم : تصبح على خير.
زين : وحضرتك من أهل الخير.
________
في شقة طارق.
مراد : على فكرة أنا كنت مفكر إنك تعرفيني.
مريم : لأ أنا شوفتك بس مرة أو اتنين مش فاكره وكمان يعني ماأخدش بالي قوي.
مراد بابتسامة : طيب عاوزه تعرفي عني ايه وأنا اقولك.
مريم : لأ أنت عرف نفسك براحتك.
مراد بابتسامة : اسمي مراد هشام مراد
السن اتنين وعشرين سنه إلا شهر وكام يوم كده
بدرس ايه؟ بدرس إدارة أعمال في تجارة انجلش
عندي تلات اخوات ولدين وبنت وانا قبل الأخير
بشتغل في شركة بابي بعد ما بخلص محاضرات وبرجع بالليل أكل واذاكر شويه وأنام أما أيام الاجازة فشغل بس ونوم
هواياتي بلعب باسكت وكنت زمان يعني بلعب سباحه ومعايا كام ميدالية كده وطموحي بقى اتولى منصب قيادي كده في شركة بابي واتجوز بنت الحلال ونعيش في تبات ونبات ونخلف صبيان وبنات قولتي ايه؟
مريم بخجل : قولت ايه في ايه؟
مراد : في إننا نتجوز قصدي نتخطب يعني الأول؟
مريم : ردي هيوصلك مع ماما أو مازن اخويا.
مراد : طب وليه ميوصلنيش منك على طول؟
مريم بخجل وارتباك : أصل.. أصل...
مراد بابتسامة : أصل ايه؟
مريم : أصل مينفعش يعني.
مراد : وليه مينفعش مش انتي صاحبة القرار؟
هزت مريم رأسها.
مراد : طيب أنا محتاج اسمع رأيك قبل ما اخرج من هنا.. ممكن؟
مريم هزت رأسها.
مراد : ها أنا مستني.
مريم : يوم كده ولا حاجة.
مراد : وايه اللي هيحصل في اليوم ده مش فاهم؟!
مريم : يعني أكون فكرت.
مراد : اممم ممكن تفكري دلوقت عادي.
مريم : هو أنا ممكن أفهم مستعجل على ايه؟
مراد : يعني محبش الانتظار.
مريم : طيب.
مراد : طيب ايه أنا عاوز اعرف رايك حالًا موافقة ولا اقوم امشي؟
مريم : لأ تمشي ليه أنت ضيف يعني و...
مراد : ها كملي.
مريم بابتسامة : ممكن ثواني.
وقايمه مريم تخرج.
مراد : لأ تعالي هنا رايحه فين؟!
اسمعها بودني الأول.
مريم بخجل : موافقة.
وخرجت بسرعة وقف مراد وهو فرحان وبيضحك.
_________
في فيلا كريم.
فريدة : أنت قولت لـ ابنك الكلام ده؟
كريم : ايوه قولت الكلام ده .. ايه مالك؟
فريدة : يعني أنا بقولك ابنك راح أتقدم وخطب من ورانا تروح أنت تقوله هتكلم اخوها علشان الارتباط يبقى رسمي.. أنت عاوز تجنني يا كريم؟!
كريم : طب ممكن تهدي أعصابك شوية.
فريدة : اهدي اعصابي دا ايه أنت بالشكل ده شايف إنك حليت المشكلة.. تكلم اخوها دا ايه احنا اصلا مش موافقين إنه يتنيل يرتبط بحد دلوقت وخصوصا البنت دي.
كريم : اخوها مش هيوافق ولو وافق بعد الشروط اللي هيقولهالها هي نفسها مش هتوافق.
فريدة : شروط ايه دي؟
كريم : مش هيكون في خطوبة اصلا مجرد وعد ب الارتباط ودا بعد ما يتخرج ويشتغل وطول المدة دي مفيش أي إتصال ما بينهم أمجد هيوافق لكن البنت مش هتوافق ولا ابنك هيوافق.
فريدة : هي مش هتوافق وانا عارفه ليه ومتأكدة إنها مبتحبش ابنك ولا حاجة وأنت فاهم وأنا فاهمه.
كريم : هو بعيدًا عن تلميحاتك اللي أنا فاهمها طبعًا فهي فعلًا مش هتوافق وزين مش هيوافق والكلام دا هيبقى رأي أخوها اللي أنا وانتي ملناش علاقة بيه طبعًا.
فريدة : أنت تقصد إن اخوها هو اللي يحط الشرط ده وبكده تضمن إنه يتنفذ ولو منفذوش وهو شم خبر يفركش الخطوبة؟
كريم : تمام.. كده انتي فهمتيني.. لو أنا دلوقت اتعصبت وفضلت ازعق وأنت ازاي تتقدم وتخطب من ورانا وأنا مش موافق وأنت لسه عيل وشوف مين اللي هيجوزك وكلام من ده زي اللي بدأت بيه كلامي معاه هيقول وماله أنا هجوز نفسي ويبقى ملحناش الموضوع لكن أنا فهمته إني موافق بشرط موافقة اخوها وإن دا اللي مفروض كان يحصل من الأول واقتنع ومستني اكلم اخوها ويشوف رأيه ايه وأنا هسيبهم هما يتكلموا مع بعض بعدها وعارف إن أمجد عاقل ومش متهور وهيختار الصح لـ أخته.
فريدة : ولو عام على عومهم ووافق تحت ضغط من الراس الكبيرة أمهم هيبقى ايه الحل؟
كريم : مظنش إن دا ممكن يحصل.
فريدة : ماشي هنشوف.
كريم : اقفلي بقى النور ده خلينا ننام.
فريدة بتنهيدة : حاضر بس كلمه الصبح اتصل بيه خليه يجيلك على المستشفى.
كريم : هرتب كل حاجة متقلقيش.. تصبحي على خير.
__________
في فيلا آسر.
في التليفون 📞
مجدي : لأ مش أنا اللي كنت بكلم بابي دي مامي اللي كانت بتتكلم معاه وبعدها الخط قطع وقالت لنا إن بابي داخل العمليات احنا منعرفش اصلا كان مسافر يعمل شوية فحوصات بس هو دا اللي كنا نعرفه لكن اتفاجئنا إن في عملية ومن بعدها بقى اتقطع الاتصال بنحاول من وقتها نتصل مفيش رد.
حسام : أنا كمان معرفش بموضوع العملية ده واللي اتقالي هو نفس اللي اتقال لكم.
مجدي : طب حضرتك يعني مش عندك رقم تليفون المستشفى اللي بابي عمل فيها العملية اللي قبل دي؟
حسام : كان معايا اديني بس وقت ادور على الرقم وهاكلمك.
مجدي : اوك وأنا مستني.
أنت تقرأ
أنت قلبي الجزء الثالث
Hombres Lobo(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
