#انت_قلبي٤
___________
الحلقة ٢
في فيلا كريم.
محمد : براحته يا مامي محدش بيتغصب إنه يكمل في علاقة مش جايه على هواه.
فريدة : يعني هو كان لعب عيال ولا دخول بيوت الناس سهل كده علشان حضرته بين يوم وليلة يقول خلاص فركش.
زين : معلش ممكن أعرف هو مين اللي هيتجوز أنا ولا أنتم؟
فريدة : اتكلم كويس علشان أنا على أخري منك.
زين : حاضر هتكلم كويس.. دلوقت أنا منكرش اني كنت بحبها بس حصل كام موقف قفلني وخلاني مش حابب أكمل.. هل كده أنا ابقى ظلمتها؟
محمد : من غير دخول في تفاصيل دي حياتك وأنت حر فيها ومسؤل مسؤلية كاملة عن قراراتك لكن متحاولش إنك ترجع لها تاني ومتحطنيش في موقف وحش أنت عارف إن موقفي حساس قد ايه
تجاه الموضوع ده علشان العيلتين داخلين في بعض ومش عاوز مشاكل في بيتي.
زين : مشاكل ليه؟ كل شيء نصيب.
محمد : أخر كلام؟
قدامك اهو يا مامي.. هعيد عليه السؤال مرة تانية.. أخر كلام يا زين؟
زين : أخر كلام.
محمد وهو قايم : خلاص.. سلام عليكم.
فريدة : اقعد رايح فين؟
محمد : هروح أخد ميرا من بيت باباها واروحها علشان ارجع المستشفى.
فريدة : طيب يا حبيبي سلملي عليها.
محمد اخد والدته على جنب.
محمد : معلش يا مامي ميرا بس مش حابه تيجي خصوصا في الظروف دي لحد ما الدنيا تهدأ شويه.
فريدة : براحتها يا محمد.
محمد : متزعليش علشان خاطري.
فريدة : روح أنت علشان متتأخرش.
زين : حد عاوز مني حاجه؟
فريدة : أنت رايح فين؟
زين : خارج.
فريدة : ما أنا عارفه وشايفاك لابس ومتشيك بسأل رايح فين؟
زين : خارج مع صحابي شويه.
فريدة : فين؟
زين : معرفش محددناش مكان معين.
فريدة : هترجع امتى؟
زين : مش هتأخر.
فريدة : امتى بقولك؟
زين : يعني على حداشر كده.
فريدة : الساعة تسعه تكون هنا.
زين نظر في الساعة : الساعة سبعه يا مامي.
فريدة : وفيها ايه ساعتين كويس.
زين : حاضر.. سلام.
محمد : هتحتاجي حاجه يا مامي؟
فريدة : لا يا حبيبي سلامتك.
___________
في جنينة فيلا مراد.
أمل : طب يلا بقى علشان الأكل جهز.
مراد : في ورق عنب؟
أمل : لأ معملناش.
مراد : ليه بقى؟
أمل : علشان رباب مجاتش النهاردا وأنا يدوب عملت حاجات كده سريعه متاخدش وقت.
مراد : طب كنتي قوليلي كنت قعدت مريم لفت كام صباع محشي معاكي.
أمل : لا مريم كفاية عليها الولاد مكانتش اصلا هتعرف تعمل حاجه منهم وبعدين كنت عاوز تضيع عليها اليوم الوحيد اللي بتشوف مامتها فيه.
مراد : كانت تعوضه بيوم تاني عادي المهم ورق العنب.
أمل : هههههههههههه هعملك بكرة ولا تزعل.
هشام الابن بابتسامة : ايه بتقولوا ايه؟
أمل : هههههههههههه كنا بنتناقش في حلة ورق عنب.
هشام الابن : هههههههههههه أنا سايبه في البيت.
مراد : مش تقول.
هشام الابن : أقول ايه
ههههههههههههه
مراد : الناس لبعضيها كنت ادخل علينا بالحلة كهدية يعني.
هشام الابن : هههههههههههه اروح اجيبهالك حالا.
أمل : تروح فين تعالى علشان تاكل يلا بكرة اعمله.
هشام الابن : أنا كنت بعزم اصلا الحلة دي هتغدا بيها بكرة علشان ياسمين مش ناويه تطبخ هههههههه
مراد : عزومة مراكبيه يعني؟!
أمل : هههههههههههه يلا الأكل هيبرد.
_________
أمام شقة سيف آسر يرن الجرس.
سيف بيجري ورا يوسف بيلحقه علشان يفتح باب الشقة.
سيف : يوسف روح شوف مامي عاوزه ايه.
يوسف : هفتح الباب الأول.
بيفتح يوسف باب الشقة.
آسر بابتسامة ياخد يوسف بالحضن.
يوسف بفرحه : جدو جه جدو جه.
سهر : هههههههههههه ونانا مجاتش؟!
بيسلم سيف على آسر وسهر وبيدخلوا.
سيف : يوسف ادخل لمامي قولها جدو ونانا جم.
يجري يوسف يدخل جوه.
كانت مليكة خارجه من المطبخ... تسلم وتقعد.
سهر : امال حلا فين يا مليكة؟
مليكة : نايمه يا مامي.. ها بقى تشربوا ايه؟
آسر : اقعدي يا مليكة متتعبيش نفسك.
مليكة : يا سلام هتعب نفسي في ايه بقى هعمل حاجه نشربها عقبال ما الأكل يخلص.
________
في التليفون... 📞
علا : طبعاً ما هو يوم الجُمعة لـ أما مقضياه عند باباكي ومراته لـ أما عند حماكي إنما أمك دي ملهاش أي لازمه متستحقش إنك تجيلها تطمني عليها أصلها مشتلكيش في بطنها ولا تعبت فيكي انتي بنت قليلة الأصل زي أبوكي.
ياسمين : ليه كل دا يا ماما ما أنا كنت عندك من كام يوم وبلاش تشتمي بابا عاوزه تهنيني ماشي انا موافقة بس بابا لأ.
علا : من كام يوم دا مش تلات اسابيع واه اشتم ابوكي وأهلك كلهم لإنهم قلات الأصل.
ياسمين : خلاص ماشي اعمل ايه أنا دلوقت؟!
علا : متعمليش حاجه يا ياسمين بس أنا لو موت دلوقت هموت غضبانه عليكي انتي واخوكي اللي مبيسألش فيه ده.
ياسمين : هجيلك بكرة يا ماما.
علا : لا متجيش أنا مش عاوزه اشوف وشك.
وقفلت علا التليفون قبل ما ياسمين ترد.
هشام من المطبخ : ياسمين كام معلقة سكر؟
ياسمين مردتش.
هشام خرج من المطبخ..
هشام : يا سلام.. ما انتي صاحيه اهو أمال بكلمك مبترديش ليه؟!
ياسمين : عاوز حاجه يا هشام؟
قعد جنبها : مالك يا حبيبتي حصل ايه؟
ياسمين : مفيش.
هشام : امال وشك مخطوف كده ليه؟
ونظر للتليفون اللي في ايدها : انتي كنتي بتكلمي مين؟
ياسمين : ماما لاقيتها متصله عليه كتير ومسمعتش التليفون واحنا بره.
هشام : طيب خير في حاجه حصلت يعني؟
ياسمين : لأ.
وقامت ياسمين.
هشام : رايحه فين؟
ياسمين : هعمل الشاي.
هشام : أنا عملته كنت جاي أسألك هتاخدي كام معلقة سكر بما إنك يعني بتعملي دايت.
ياسمين : أنا هحط سكر واجيبه.
هشام قعد بيفكر يا ترى إيه اللي مغير ياسمين كده.
__________
في غرفة هشام وأمل.
هشام : ما كل واحد حر يا أمل انتي شاغله نفسك بالحوار دا ليه؟
أمل : اتعودت عليهم يا هشام بقوا جزء من يومي كل يوم بصحى على وش مريم اغيرلها واكلها والاعبها مش متخيله إن يومي هيعدي كده من غير ما أعمل كل ده طب مين اللي هيجي جري يصحيني ويضحك في وشي الصبح ويناديني بـ اسمي أخدها في حضني واحس إن روحي طايرة من الفرحه أنا عايشه معاها طفولتي معاها بحس إني لسه صغيرة.
هشام : هههههههههههه
قولي كده بقى انتي عاوزه ترجعي عيله صغيرة من تاني ثم تعالي هنا قوليلي يعني ايه مين هيصحيني ويضحك في وشي الصبح امال أنا هنا بعمل ايه؟!
أمل : أنت حاجه وهي حاجه تانية خالص يا هشام.
هشام : لا يبقى مراد كان عنده حق لازم يرجع شقته أنا كده هضيع ومش هلاقي حد يهتم بيه.
أمل : بالعكس وجود مريم في حياتنا خلا لها طعم ونفسيتي أتحسنت كتير عن الأول ومبقتش بركز معاك اتأخرت ليه وكنت فين.
هشام : لا ارجعي زي زمان ابوس ايدك أنا محتاج أحس بهلفتك عليه وسؤالك عني حتى لو أوقات كنت بضايق بس أحسن من الطناش بتاع دلوقت ده وبعدين هو وجودي معاكي مش كفاية؟!
أمل : كفاية يا حبيبي بس مفيش مانع إنهم يفضلوا معانا خصوصا إن مريم مرات ابنك تعبانه وشايله مسؤلية الولاد وأنت عارف لسه صغيرة محتاجه حد يساعدها.
هشام : بكرة تتعود ومن وقت للتاني ابقي روحيلهم وزينة كمان اهي هانت وهتشرف بنتها ومش هتبقي فاضيه.
أمل : عندك حق بس لأ برضو مراد والولاد يفضلوا قاعدين معانا.
هشام : أقولك اتصرفي مع ابنك أنا قولت اللي عندي.
أمل : طب اهدا زعلت ليه دلوقت؟
هشام : علشان انتي اللي مكبره الموضوع مسيرهم هيرجعوا شقتهم خُدي بالك.
أمل : عارفه.. هي نور جايه امتى؟
هشام : فكرتيني بكرة هروح اجيبها من المطار.
أمل : الساعة كام علشان التليفون فصل شحن وأنا بكلمها من شويه مسمعتش قالت ايه.
هشام : بكرة الساعة سبعه هتكون في المطار.
أمل : الصبح؟
هشام : الصبح ايه بس يا أمل بالليل يا حبيبتي اطفي النور دا خلينا ننام بقى.
أمل : حاضر.
_________
في شقة سيف.
واقفه مليكة بتغسل طبقين في الحوض بسرعة يجي سيف يحدف طبق في الحوض.
سيف : ايه مالك؟
مليكة : مفيش.
سيف : زعلانه علشان هتغسلي طبق زيادة؟
مليكة بابتسامة : أكيد لأ بس أنت اللي مالك زعلان من حاجه؟
وقف جنبها وبدأ يتكلم ومليكة مشغوله بتغسل الأطباق بالمياه.
سيف : هو باباكي زعلان مننا في حاجه؟
مليكة انتبهت ليه ونظرت له بدهشة : مش فاهمه؟
سيف : يعني باباكي ومامتك جم مكملوش نص ساعة وقاموا مشيوا حتى العشا كان بيجهز رفضوا ياكلوا معانا.
مليكة : بابي قال لك لما عزمت عليه إنه رايح لملك علشان الوقت وكمان اتغدا مع اخواتي.
سيف : ويا ترى هناك عند عمار مبيكملش نص ساعة ويمشي برضو ولا عندي أنا وبس؟!
مليكة : فيه ايه يا سيف ليه بتقول الكلام ده بابي بيحبك واعتذر إنه مش هيقدر ياكل وقال مرة تانية لإنه مكانش جعان.
سيف : بس أنا لو عند حد بحبه وعزم عليه بالأكل حتى لو شبعان مش هكسفه وهجبر بخاطره علشان له معزه في قلبي ومش حابب يزعل مني.
مليكة : أنا مش فاهمه أنت عاوز توصل لـ ايه بالظبط؟
سيف : ولا حاجه يا مليكة خلصي اللي في ايدك ويلا علشان ننام.
مليكة " مش نايمه دلوقت.
سيف : خلاص براحتك تصبحي على خير.
وتركها وخرج من المطبخ.
مليكة تتنهد بقوة وبعدها تجفف الأطباق وتخرج من المطبخ كان سيف فعلا دخل اوضته علشان ينام.
__________.
في غرفة آسر وسهر.
آسر : وهزعل منه ليه يا سهر؟
سهر : معرفش بس حسيتك إنك مش مستريح في القعدة هناك مع إن سيف بيحبك ومليكة كانت مبسوطه قوي بوجودنا عندهم وخصوصا إنك مبتروحش هناك كتير.
آسر : احنا مش متفقين هنقعد شويه وننزل علشان نلحق نقعد مع ملك نص ساعة ولا حاجه واخدك نتعشا بره مش دا كان طلبك؟
سهر : بس حسيت إنه زعل يعني لما رفضت تتعشا معاهم خصوصا إن مليكة كانت عامله حسابها
كنا جبرنا بخاطرها على الأقل وقعدنا.
آسر : مقولتليش وقتها ليه الكلام دا يا سهر؟
سهر : مش عارفه ارتبكت كده ومعرفتش اتصرف.
آسر : خلاص يبقى متلومنيش دلوقت.
سهر : ايه رأيك نروحلهم الجُمعة الجايه ويبقى اليوم كله ليهم؟
آسر : هشوف وقتي كده وارد عليكي لإن احتمال الجُمعة انزل اتابع المشروع الجديد بنفسي.
آسر : خلاص ماشي تصبح على خير.
________
في غرفة كريم وفريدة.
كريم : خلاص لو زعلانه كلمي محمد وقولي ليه خليه يقلب على مراته ويتخانق معاها.
فريدة : ايه اللي بتقوله دا يا كريم كل دا علشان بفضفض معاك وبقول لك على اللي مزعلني؟!
كريم : انتي قبلتي الموضوع بمنتهى الهدوء وقولتي لمحمد انك مش زعلانه ليه بقى جايه دلوقت تقولي الكلام ده.
فريدة : ما هو أنا مكانش ينفع أقول كلام غير ده حقيقي زعلت بس محسستوش خالص إني زعلانه.
كريم : يبقى تعدي الموقف وتنسيه خالص.
فريدة : كريم.
كريم : نعم.
فريدة : قيسلي السكر.
كريم استدار ليها : ليه انتي تعبانه؟
فريدة : مش عارفه قيسه وخلاص.
كريم بيقوم : حاضر.
يجيب الجهاز ويخرج الشريحة وياخد عينة دم الجهاز يخرج النتيجة.
كريم : السكر مظبوط انتي كويسه متقلقيش.
فريدة : بجد ولا بتقول كده علشان تطمني؟
كريم : طب اهو شوفي طالما مش مصدقاني.
فريدة : امال ليه حاسه إني تعبانه؟
كريم : اخدتي الدوا؟
فريدة : اه اخدته.
كريم : طيب نامي يمكن اللي عندك دا إرهاق مش أكتر السكر مظبوط ودا يخلينا نطمن.
فريدة : طيب تصبح على خير.
كريم يقرب من فريدة وياخدها في حضنه : وانتي من أهله يا حبيبتي.
فريدة : بتخاف عليه يا كريم؟
كريم : امال هخاف على مين يا فريدة؟
فريدة : لو حصل لي حاجه هتزعل؟
كريم : ايه يا فريدة الكلام ده؟!
فريدة : هتزعل كام يوم؟
كريم : نامي يا فريدة.
فريدة : استنى هنا رايح فين؟
كان كريم استدار الناحية التانية.
كريم : عاوزه ايه أنا هنام.
فريدة : طيب بس خلي وشك ناحيتي.
كريم : حاضر.. كده كويس
فريدة : أنت اضايقت علشان سألتك هتزعل عليه ولا لأ؟
كريم : انتي في ايه الليلة؟
نامي يا فريدة محدش يعرف عمره هينتهي امتى ووقتها اصلا مش هيفكر في الدنيا دي كلها نامي يا حبيبتي.
فريدة : هتتجوز يا كريم؟
كريم : بقولك ايه نامي بقى.
فريدة بتنهيدة : طيب.
كريم : قال اتجوز قال.
فريدة : كريم.
كريم : لأ بقى أقوم اسيبلك الأوضة بحالها؟
فريدة : خلاص خلاص تصبح على خير.
_______
في الصباح.. في غرفة مراد.
مريم : مراد.. مراد.. قوم بقى الساعة تسعه.
مراد بصوت ناعس : بتقولي الساعة كام؟!
مريم : تسعه.
مراد قام بسرعة : طب وسايباني نايم لحد دلوقت يا مريم.
مريم بدهشه : سيباك نايم ايه أنا بقالي ساعة عماله اصحي فيك.
مراد : هدخل اخد شاور
وهاتيلي هدوم بسرعة.
مريم : كل حاجه جاهزة ادخل أنت بس.
بعد خمس دقايق خارج مراد من الغرفة وهو بيزرر القميص يخبط في مامته من غير قصد.
أمل : ايه يا ابني حاسب.
مراد : صباح الخير يا مامي آسف معلش ماأخدتش بالي.
أمل : صباح النور طيب على مهلك.
مراد : عندي إجتماع تسعه ونص وبابي لو ملاقنيش قاعد قصادة معرفش هيعمل ايه.
أمل : طب على مهلك وأنت سايق.
مراد : حاضر.
بعد ما مراد نزل وبيشغل العربية تنزل مريم جري وهي بتنادي عليه.
مراد ينزل من العربية : ايه في ايه؟
مريم : التليفون نسيته.
مراد بياخد التليفون : اه.. طيب خلاص سلام.
مريم بابتسامة وتحدفه قُبله في الهواء : مع السلامة.
مراد بيدوس بنزين : ودا وقته يا مريم بابي هيرميني بره الشركة يقولي امشي مش عاوزك
ايه دا يا مراد أنت بتكلم نفسك ولا ايه؟!
الظاهر اتجننت فعلاً.
التليفون يرن : لا لا مش وقتك أنت كمان يا شادي.
في التليفون.. 📞
شادي : أنت فين يا أستاذ مش عارف إن عندنا...
يقاطعه مراد : لا بقولك ايه أنا عارف كل حاجه مش ناقص تقطيم دلوقت علشان طاير بالعربية.
شادي : طب خلاص على مهلك وأنت جاي.
مراد : دلوقت على مهلي؟!
شادي : خلاص بقى يا مراد ما هو ابقى اظبط المنبه يا أخي وخلي نومك خفيف.
مراد : أنت بالذات متتكلمش في الموضوع ده علشان كلنا عارفين إن نومك تقيل.
شادي : اهو اللي نومه تقيل بيجي قبلك.
مراد : دا علشان بتنام بدري يا حبيبي.
شادي : خلاص بسيطة نام بدري يا عم ولا تزعل نفسك هههههههه سلام.
مراد بيقفل التليفون.. يرن تاني.
مراد : ودا وقته يا مريم
لحقت اوحشك للدرجة دي؟!
مراد : الو.
مريم : متنساش تجيب الحاجات اللي طلبتها منك امبارح.
مراد : حاضر يا مريم بقولك ايه ما تخرجي انتي ومامي وشوفي عاوزه تشتري ايه مامي ذوقها حلو قوي.
مريم : معندكش وقت صح؟
مراد : انتي شايفه ايه؟
مريم : ماشي يا مراد.. سلام.
___________
أمل تخبط على كتف مريم : بتعملي ايه؟
تلتفت مريم ليها بابتسامة : كنت بكلم مراد.
أمل تاخدها من ايدها : بقولك ايه تعالي معايا المطبخ طالما العيال دي نايمه اهو نعمل حاجه ناكلها.
مريم بابتسامة : ماشي.
في المطبخ.
أمل : هعملك شاورما تاكلي صوابعك وراها هههههههه لا تقولي سوري ولا مصري.
مريم : هههههههههههه امال أقول ايه؟
أمل : قولي ساندوتشات أمل هههههههه
مريم : أكيد هاكل حاجه محصلتش.
أمل : من حلاوتها ولا علشان حاجه تانية؟
مريم : هههههههههههه أكيد من حلاوتها يا طنط.
أمل : أنا مقطعه اوراك الفراخ ومتبلاها من بالليل وتاخد تشويحه كده ونسيبها تاخد وتدي مع بعضها عقبال ما نعمل التوميه.
مريم : لا شكلنا كده هناكل حاجه محصلتش فعلا.
أمل : بقولك ايه في لحمه مفرومه في التلاجة طلعيها اعمل كفته بالمرة اهو يبقى فطار وغدا علشان رباب مش جايه كمان النهاردا.
مريم : هي تعبانه ولا ايه؟
أمل : مش عارفه هي قالت عندها ظروف كده
قولت ماشي خليها تاخد اجازة ما هي معانا على طول بس شكلها كده تعبانه هروح اشوفها.
مريم : اجي معاكي.
أمل : ومريم وريان هنوديهم فين؟
مريم : ناخدهم معانا.
أمل : شكلك رايحه مشوار تاني.
مريم بابتسامة : بصراحه يعني اه.
أمل : هههههههههههه شوفتي بقى أنا بفهمها وهي طايرة.
مريم : هشتري شوية حاجات ليه وللولاد ومراد مش فاضي يجي معانا.
أمل : فحبيتي تستغليني مش كده؟
مريم : لا أبدًا يا طنط هو براحتك يعني أنا مش عاوزه اضايقك.
أمل : هههههههههههه ومين قال لك إني مضايقه بالعكس أنا عاوزه أخرج
هناكل ونخرج نعدي على رباب نطمن عليها وبعدين اخدك نشتري كل اللي انتي عاوزاه واشتري أنا كمان معاكم بالمرة ايش معنى أنا يعني هههههههه
مريم : هههههههههههه
حضرتك قبلنا.
أمل : طب كفاية رغي بقى ونكمل اللي كنا بنعمله علشان جعانه قوي هههههه
________
في شقة زوج (علا).
ياسمين : ايوه يا ماما بس أنا معييش المبلغ ده.
علا : نعم!
معكيش ايه يا ياسمين ليه هو المطعم دا مبيكسبش ولا بتودي فلوسك فين؟!
ياسمين : ما هو الأرباح مباخدهاش كلها ليه مش في ضرايب ورخصه وفواتير مياه وكهرباء واجور عمال وبعدين المطعم دا مش بتاعي لوحدي أنا ليه فيه النص حق شغلي وتعبي والنص التاني لهشام لإن دي فلوسه.
علا : انتي مش شاريه حتة الأرض اللي وسعتي بيها المطعم من فلوسك؟!
ياسمين : اه من الأرباح اللي جاتلي وهشام كتبلي عقد بالجزء ده.
علا : ايه دا بقى هو بيحاسبك بالمليم امال فين شركة جدو واملاك مامي وكل الهلمه دي ولا بيجي لحد عندك ويدقق في كل قرش بيدفعه ليه يا بنتي هو انتي مش مراته ام عياله ولا ايه؟!
ياسمين : ايوه
يا ماما بس هشام مبيحاسبنيش بالمليم زي ما حضرتك قولتي الحكاية كلها إن أنا اللي قولت له يعمل كده وهو الحقيقة كان رافض بس أنا عملت كده علشان ميجيش يقول لي اقعدي في البيت.
علا : بترشيه يعني
هو يقعد مستريح وانتي يطلع عينك في الشغل وفي الاخر ياخد الأرباح على الجاهز.
ياسمين : هشام بيشتغل يا ماما مش قاعد في البيت ثم دي فلوسه أنا مدفعتش أي حاجه في المطعم من البداية واللي دفعته دلوقت كتبلي عقد بيه علشان يحفظ حقي زي ما قال لي مع إني كنت رافضه كده ثم هو كتبلي المطعم كله بـ اسمي يعني قانونيًا بتاعي بس أنا بعتبره بتاع ولادي ولازم أشارك هشام في الأرباح علشان لو في خساير يساهم معايا مشلش كل حاجه لوحدي.
علا : ومعكيش خمسوميت ألف جنيه يا ياسمين معقوله؟!
ياسمين : معييش صدقيني أنا ممكن أجمع متين ألف وتاخديهم وعلى مهلك في السداد.
علا : هو انتي كمان عاوزه تديهملي سلف يا ياسمين؟!
ياسمين : طب هقول ايه لهشام لما نيجي نتحاسب يا ماما ما هو هيسألني الفلوس دي صرفتها في ايه.
علا : اتصرفت مكان ما تصرفت هو دا مش حقك ولا ايه؟
ياسمين : خلاص هدبر أموري وهجمعلك المبلغ حاضر.
علا : الاسبوع الجاي علشان أنا محتاجاهم ضروري.
ياسمين : الاسبوع الجاي مش هينفع اجمع المبلغ دا ازاي في الفترة القصيرة دي الشهر الجاي يكونوا عندك.
علا : ماشي.
ياسمين : طب ممكن أعرف عاوزه المبلغ دا في ايه؟
علا : ما قولت لك حاجه ضروري مش لازم تعرفي يعني.
ياسمين : كده طيب استأذن بقى علشان لسه هعدي اخد الولاد من المدرسة.
علا : طيب ابقي سلميلي عليهم.
ياسمين : حاضر.. سلام عليكم.
علا بتفتح باب الشقة : وعليكم السلام.
___________
في شقة سيف.
مليكة : يوسف اقفل الكتاب وتعالى علشان تاكل يلا.
يوسف : حاضر يا مامي أخر حاجه هكتبها اهو واجي.
سيف بيفتح باب الشقة ودخل : سلام عليكم.
مليكة : وعليكم السلام.
دخل يغير هدومه ومليكة قاعد بتأكل الولاد ومستنياه لما اتأخر دخلت تشوفه.
مليكة : سيف.. سيف.
كان نايم رد عليها بصوت ناعس : ايه في ايه؟
مليكة : مش هتقوم تاكل؟
سيف : لأ هنام علشان ساعة ونازل تاني.
مليكة : طيب هو في ايه؟
سيف : في ايه مش فاهم؟
مليكة : يعني داخل من بره لا سلام وكلام هو في حاجه حصلت في الشغل؟
سيف : لأ وبعدين ما أنا دخلت قولت سلام عليكم.
مليكة : ايوه
بس متكلمتش معايا ولا حتى قربت من الولاد أنت زعلان من حاجه؟
سيف : لا يا مليكة وسبيني بقى اريح شويه نازل الشغل كمان شويه.
مليكة : أنا معرفش ليه بتعمل معايا كده هو أنا غلطت فيك؟
سيف : يوووه بقى ما قولتلك سبيني أنام شويه.
مليكة : حاضر يا سيف براحتك.
خرجت مليكة وقفلت باب الغرفة ورجعت قعدت على السفرة.
يوسف : شبعت.
وقام يكمل واجباته ومليكة قاعدة سرحانه.
حلا : مامي.. مامي مم مم.
مليكة : حاضر يا حبيبتي.
يوسف : مامي مش هنروح لجدو؟
مليكة : ليه هو أنا قولت لك إننا هنروح؟
يوسف : امبارح لما جدو ونانا كانوا عندنا.
مليكة : مش النهاردا علشان عندنا واجبات ومذاكرة كتير.
يوسف : يوووه بقى هو كل يوم واجبات ومذاكرة واجبات ومذاكرة امال هنخرج امتى؟!
مليكة وضعت ايدها على دماغها.
يوسف يقرب منها : مامي حضرتك تعبانه؟
مليكة وهي مدمعه : لا يا يوسف أنا كويسه.
يوسف : هو بابي مجاش ليه ياكل هو تعبان؟
مليكة : لا بابي كويس لما يقوم من النوم هياكل.
يوسف : بابي نام؟
مليكة : اه وبطل أسأله بقى دماغي مصدعه.
يوسف : لو خرجنا الصداع هيروح.
نظرت مليكة ليوسف بابتسامة : حاضر هنخرج.
يوسف : بجد.. طب امتى؟
مليكة : لما بابي ينزل.
يوسف : طب يلا يا حلا خلصي أكل علشان نلبس بسرعة.
مليكة : سيبها تاكل على مهلها وهات أما اشوف كتبت ايه.
_______
في التليفون... 📞
كريم : لا كله تمام.
هشام : يعني مفيش غير الأدوية اللي بعتهم دول هما اللي ناقصين من المستشفى؟
كريم : ايوه.. ويبقى كويس لو وصلوا النهاردا.
هشام : تمام.. كمان ساعة هيبقوا عندك.
كريم : متشكر جدًا.
هشام : أنت اخبارك ايه؟
كريم : تمام.
هشام : كنت عاوز اتكلم معاك في موضوع كده بس مينفعش في التليفون.
كريم : خلاص أي وقت تكون فاضي فيه أنا موجود في المستشفى تعالى نتكلم.
هشام : تمام هشوف كده واكلمك.
كريم : مش عاوز اعطلك عن شغلك.. سلام.
هشام : قول أنا اللي معطلك وعاوز تشوف شغلك هههههه
كريم : لا أبدًا براحتك.
هشام : لا مش هعطلك.. سلام.
كريم : مع السلامة.
_______
في شقة حازم.
ندى : يا ستي اقعدي هتروحي تعملي ايه ما بنتك قاعدة اهي بتعمل واجباتها وكله تمام.
فريدة : عندها درس الساعة خمسه.
ندى : لسه بدري عقبال ما يستوي الرز واهو السمك مشوي وجاهز باقي السلطة بس ثواني هجيب الخضار اعملها هنا علشان متمشيش.
فريدة : هههههههههههه فكرتيني بالذي مضى يا ندى.
ندى : زمان وليالي زمان
خلاص يا فريدة مبقاش في حاجه من ريحة زمان.
فريدة : لا بقولك ايه أنا على أخري مش ناقصه.
ندى : امسكي جيبت سكينه تانية علشان تعملي معايا بدل ما انتي قاعدة فاضيه كده.
فريدة : هههههههههههه أول مرة في حياتي اشوف اتنين بيعملوا السلطة..
ندى : نحن نختلف عن الآخرين.
فريدة : هههههههههههه
جميلة : مامي خلصت..
فريدة : طيب يا حبيبتي خُدي الآيباد بقى اتسلي فيه شويه عقبال ما طنط ندى تخلص الرز اللي من ساعة ما جينا وهي بتعمل فيه ده.
ندى : يا سلام!
امال لو مكونتيش معايا من الأول.. راجعه مهدوده من المدرسة وعلى الرغم من كده وقفت في المطبخ اطبخ.
فريدة : طبيخ ايه اللي طبختيه يا ندى امال لو مكونتيش جايبه السمك مشوي جاهز ولا بتسمي طبخ الرز دا واقفه في المطبخ أنا بعمله في دقيقتين لا لا مش عاجبني يا ندى أنا بفكر اتكلم مع حازم يتجوز اهو يجيب واحدة تساعدك.
ندى : يا أختي ما يتجوز شايفاني قاعدة عماله اقطع في نفسي واعيط عليه يتجوز يا حبيبتي
اهو على الأقل صحتي تبقى على قدي أعرف اخدم نفسي.
فريدة : هههههههههههه دا انتي بايعه بقى.
ندى : خلاص يا فريدة دا كمان زمان أما كنت بموت نفسي لو عينه رمشت بس لوحده لكن دلوقت مهما يعمل ولا بقى يفرق.
فريدة : هههههههههههه
دا بس علشان لا بقى يغمز ولا حتى يرمش حازم مبقاش حازم بتاع زمان.
ندى : طب كويس إنك عارفه.
فريدة : بس أنا مش كده خالص يا ندى.
ندى : هههههههههههه
ايه لسه بتغيري على جوزك؟!
فريدة : وما غيرش ليه كريم مهما يكبر بيتحب برضو يا أختي.
ندى : هههههههههههه
علشان مجنونه.
فريدة : تبدل الوردة وتفضل ريحتها فيها الحب والغيره ملهاش سن محدد.
ندى : هيييح بقى
نسينا الكلام دا من زمان يا فراولة.
فريدة : الحب مبيتنساش يا ندى.
ندى : صدقيني بيتنسى ويتحول لحاجه تانية
زي مثلا يصعب عليكي إن الراجل اللي حبتيه يروح لواحدة تانية بتبقى غيره
مش أكتر.
فريدة : حتى الغيره دي حب يا ندى مفيش واحدة هتغير على واحد مبتحبوش دي الأم بتغير على ابنها حتى بعد ما يتجوز.
ندى : هههههههههههه
قوليلي بقى عامله ايه مع مرات ابنك عايشه دور الحماه برضو ولا طيوبه كده وملكيش دعوة؟
فريدة : حياتهم أنا مليش علاقة بيها طالما كويسين مع بعض مبسألش وميرا طيبه وبتحب محمد بس أنا اوقات بزعل لما بينساني شويه وينشغل بحياته بعيد عني لكن هي لأ مبزعلش منها.
ندى : طب عيني في عينك كده.
فريدة : هههههههههههه أقول لك الصراحه.
ندى : اه أنا عاوزه الصراحه دي.
فريدة : أوقات بحس بغيره بس مش كتير يعني
بلحق نفسي على طول وأقول ايه الهبل اللي بفكر فيه ده ما أنا كنت زمان كده وبزعل لما طنط سميرة تلمح ولا حاجه.
ندى : هههههههههههه فاكره لما راحت عليكي نومه وبيتي تحت في شقتكو القديمة وكريم جه طلع فوق ونام محسش غير الصبح ومامته اتصلت بيه بتقول له مراتك فين؟
فريدة : هههههههههههه
فاكره طبعًا دا كان يوم متنسيش.
ندى : وبعدين حصل ايه لما طلعتي فوق؟
فريدة : قلبت الطربيزة عليه وقولت له ما هو لو أنا في دماغك كنت منمتش غير لما طلعت لكن أنت نمت ولا في دماغك الست اللي متجوزها.
ندى : هههههههههههه مفتريه.
فريدة : الصراحه اه أوقات بفتري على كريم بس دا من حبي فيه.
ندى : هههههههههههه من حبك فيه دا انتي يتفاتلك بلاد يا فريدة كويس إنه مستحملك لحد دلوقت.
فريدة : احنا الاتنين متحملين بعض يا ندى.
ندى : عندك حق هاتي الطبق اللي قدامك يلا يا جميلة اغسلي ايدك علشان هحط الأكل اهو.
جميلة : حاضر يا طنط.
فريدة : افتحي الباب يا جيجي.
بتفتح جميلة باب الشقة.
تالا بابتسامة : جيجي.. يا اهلا وسهلا.
جميلة تاخد أكرم من تالا اهلا وسهلا بحضرتك اتفضلي.
بتدخل تالا تسلم على فريدة.
تالا : هههههههههههه جميلة بتقول لي حضرتك.
فريدة : هههههههههههه مش لازم تحترمك يا أم أكرم اتفضلي استريحي تعالى يا كيمو.
فريدة وتاخد أكرم من جميلة.
تالا : امال فين ماما؟
ندى وهي خارجه ب الأطباق على السفرة : حماتك بتحبك.
تالا : هههههههههههه ايه دا هو أنا دايمًا كده اجي وأنتو بتاكلوا؟
فريدة : يمكن ريحة السمك وصلت لحد عندك جابتك جري.
تالا : هههههههههههه بجد دا اللي بيحصل كتير قوي اجي الاقي ماما لـ اما قاعدة بتاكل أو بتجهز السفرة زي كده.
فريدة : دا بس علشان مامتك همها على بطنها دايمًا هههههه.
ندى : بقى كده ماشي يا فريدة قومي اغسلي ايدك يلا علشان ناكل.
فريدة : امسكي أكرم يا جميلة.
تالا : هاتيه يا عمتو.
جميلة : لا خليه معايا.
تالا : يا سلام اتفضلي دا يوم المنى.
فريدة : هههههههههههه بنتك عاوزه تخلص من الواد بـ أي طريقة.
تالا : اعمل ايه بس يا عمتو ما هو شبطان فيه على طول بالشكل ده.
ندى : جوزك مش في البيت؟
تالا : لأ خرج من الشغل راح المستشفى لمامته.
ندى : هي طنط شهد عامله ايه دلوقت يا تالا؟
تالا : أنا مشوفتهاش بقالي أكتر من اسبوعين اهو بس كريم بيقول زي ما هي.
فريدة جايه ناحيتهم : الزيارة ممنوعه حقيقي يا تالا؟
تالا : اه محدش بيروح هناك حتى أنا قولت لكريم قال لي مش هينفع.
ندى : طيب يا حبيبتي قربي بقى علشان تاكلي هاتي أكرم يا جيجي أأكله.
________
سهر خارجه من المحل كانت بتشتري شوية حاجات فتحت باب العربية الخلفي دخلت الحاجه اللي معاها وقفلت الباب وقربت تفتح الباب الأمامي وبتشغل العربية سرحت شويه وفجأة تلاقي الباب بيفتح وحد قعد جنبها.
استدارت سهر علشان تلاقي رجل قاعد جنبها.
سهر : فارس!
فارس : كويس إنك لسه فاكراني يا سهر ولا أقول لك سهر هانم؟
سهر : أنت ايه اللي جايبك هنا امشي اخرج بره.
فارس : لا يا روح ماما أنا مش خارج رايح في أي حته غير لما تسمعي الكلمتين اللي هقولهملك.
سهر : مش هسمع منك حاجه وانزل يلا.
فارس : متخافيش محدش هيروح يقول لـ آسر اني معاكي في العربية.
سهر : أنت قليل الأدب انزل يلا بدل ما انزل أنا والم عليك الناس وساعتها محدش هيخرجك من ايديهم..
فارس : اه زي ما عملتي زمان لما وقفتي واتصدرتي بيني وبين مامتك وكانت اخرتها لما ضربتها بالسكينه اللي جريتي جيبتيها من المطبخ.
سهر : أنت مش بس قليل الأدب ومعندكش دم لا دا أنت بجح ومجرم وقاتل وشايف إنك كنت بتدافع عن نفسك على العموم مبروك عليك السنين اللي قضيتها في السجن ياريتك كنت قضيت باقي عمرك كله هناك.
فارس : اهو أنا بقى جاي اكلمك في سنين عمري اللي ضاعت جوه السجن وعاوز تعويض.
سهر : تعويض لـ ايه يا مجنون أنت هو أنت بعد اللي عملته لك حق اصلا عندي انزل يلا احسنلك.
فارس : مش نازل اللي معاكي اعمليه أنا معنديش حاجه أخاف عليها انتي اللي عندك.
سهر : أنت جاي تهددني صحيح بجح وعينك يدب فيها رصاصة.
فارس : اسمعي يا سهر علشان منقعدش نتكلم كده على الفاضي بدون نتيجة انتي كسبتي كتير في حياتك أنا بقى عاوز فتفوته من كل اللي عندك ده.
والتفت للكرسي الخلفي.
فارس : وشايف إنك جايبه حاجات بس بقيمة عشرتلاف جنيه دا بس في مشوار واحد ويمكن لسه هتكملي في حته تانية فأنا مش هاخد منك كتير هما مليون جنيه.
سهر : مجنون.. مفكر إني هسمعلك اصلا.. يلا انزل
بدل ما اطلبك البوليس.
يمسك التليفون منها : لا بقولك ايه أنا مجنون زي ما بتقولي وممكن ارتكب جنايه أصل مش هخسر أكتر من اللي خسرته خافي على نفسك وعلى ولادك وكمان على اللي السبب في العز اللي انتي فيه ده دا انتي راكبه عربية بس بضعف المبلغ اللي طالبه منك بلاش تبقي بخيله واشتري مني علشان متندميش.
سهر : أنت مفكر كلامك دا هيخوفني كنت مفكره إن السجن هيأدبك لكن للأسف أنت زي ما أنت طماع وبجح ومصمم تفضل عايش عاله على اللي حواليك.
فارس : ياريت كنت طمعت في حاجه عليها القيمه زي ملك هانم مثلا أم جوزك اهي دي اللي كانت هتعيشني ملك مش أمك اللي مكانتش حيلتها غير الشقة وكام مليم عايشه منه واهو الشقة لهفتيها لوحدك عاوز حقي بقى.
سهر : ملكش حاجه عندي.
فارس : فاكره زمان لما ملك هانم اتفقت معايا اجيب البيه جوزك الشقة في الوقت اللي هتبقي فيه انتي وابن خالتك هناك ووقتها تنزلي بفضيحه ويطلقك.
سهر : دا أنت فاكر كل قاذوراتك اهو.
فارس : هههههههههههه ودي حاجه تتنسي بس ممكن تتعمل برضو دلوقت وفي حد من ولادك قولتي ايه؟
سهر : قولت إنك حقير وسافل ويطلع منك أي حاجه انزل يا فارس بدل ما اطلب لك البوليس.
فارس : مليون جنيه واشيل الأفكار دي من دماغي لا اوز حد على ولادك يخبطه بعربية ولا حاجه ولا اصلط واحد على بنتك يشكك جوزها فيها قولتي ايه؟
سهر : قولت تنزل يا سافل يا قليل الأدب.
فارس : هديكي مهله أسبوع تفكري وهتلاقيني هنا في عربيتك في أي مكان تروحيه ما أنا مراقبك فاتتني دي اهو اديكي عرفتي اه وحاجه كمان متفكريش تقولي لـ آسر علشان لو عرف هنفذ اللي في دماغي وانتي عارفه إن دا ممكن يحصل في ثانية يجيلك الخبر في التليفون تقومي تجري على المستشفى ولا جوز بنتك يتصل بيكم يقول لكم تعالوا خدوا بنتكم متلزمنيش دا لو طلع ابن ناس يعني ومحترم ومقتلهاش.
وفتح فارس باب العربية وبينزل ويلتفت لسهر : فكري وردي عليه زي النهاردا كده وأي حركة فيها خيانة أنا موصي حد يعمل الواجب لو جرا لي حاجه.. سلام ههههههههه
قعدت سهر مكانها بتفكر في كلام فارس ليها وهي سرحانه التليفون يرن.
في التليفون... 📞
مليكة : مامي احنا في البيت عندك حضرتك فين؟
سهر : عندي!
مليكة : يوسف صمم يجي يشوفك خرجتهم الملاهي وبعدين جبنا بعضنا وجينا رِهام قالت لي خرجتي تشتري شوية حاجات وزمانك جايه أنا هنا بقالي نص ساعة هتتأخري امشي واجي يوم تاني ولا جايه؟
سهر : لا جايه يا حبيبتي متمشيش.
مليكة : حاضر هستنى نص ساعة كمان.
سهر : لا جايه في أقل من كده مسافة السكه أكون عندك.
مليكة : توصلي بالسلامة.
سهر : ماشي يا مليكة مع السلامة.
__________
في شقة طارق.
هنادي من المطبخ : طارق أنت جيت يا ابني؟
طارق كان بيقفل باب الشقة : ايوه
يا عمتي.. سلام عليكم.
هنادي خارجه من المطبخ : وعليكم السلام
ايه مالك؟
طارق : الست اللي قصادنا دي كل أما تشوفني تقفل الباب في وشي.
هنادي : عادي يا طارق يمكن مش قصدها.
طارق : لا يا عمتو أنا متأكد إنها قاصده لإن بتكون باصه ليه وهي بتقفل الباب وبتخبطه جامد وهي مضايقه أنا حتى بطلت أقولها سلام عليكم لتفكر إني عاوز اتكلم معاها.
هنادي : ايه اللي بتقوله دا يا طارق؟!
طارق : بصراحه جوزها الأستاذ سالم محترم وكل أما يشوفني يسلم عليه ويسأل عن أخباري وعامل ايه في الدراسة وكلام من ده لكن مراته دي معرفش بتعاملني ليه بالأسلوب دا مش فاهم.
هنادي : طنش متاخدش في بالك يلا ادخل غير هدومك علشان أنا واقعه من الجوع.
طارق بابتسامة : حاضر يا عمتو.
________
في فيلا آسر.
سهر : مليكة تعالي يا بنتي علشان تأكلي حلا مش عاوزه تاكل من ايدي.
مليكة كانت سرحانه.
سهر : مليكة... مليكة انتي سمعاني؟
مليكة : ها يا مامي بتكلميني؟
سهر : امال بكلم نفسي يا بنتي تعالي اكلي بنتك.
مليكة : حلا أنا أكلتها قبل ما نيجي على طول.
سهر قامت وجات قعدت جنب مليكة.
سهر : مالك يا حبيبتي وشك متغير كده ومهمومه ليه؟
مليكة : مفيش يا مامي.
سهر : عليه برضو؟
على العموم براحتك.
مليكة : هو بابي زعلان مني في حاجه يا مامي؟
سهر : لأ يا مليكة وبابي هيزعل منك ليه بس يا بنتي؟
مليكة : معرفش حسيت امبارح كده وهو عندنا إنه زعلان من حاجه قولت اسأل حضرتك.
سهر : باباكي مبيزعلش من حد يا مليكة ما انتي عارفه.
مليكة : عارفه يا مامي بس كنت بطمن هو كويس صحته تمام يعني؟
سهر : اه يا حبيبتي صحته تمام انتي عامله ايه؟
مليكة : بخير.. كله كويس.
رد مليكة مطمنش سهر لكن محبتش تضغط عليها أكتر من كده.
سهر : تعالى يا يوسف قول لي عاوز ايه.
مليكة : سيب اللعبة اللي معاك دي بتاعة آدم ابن خالك.
سهر : سيبيه يلعب بيها أنا هجيبله واحدة غيرها.
مليكة : مش كده يا مامي بس دي لعبة بيبهات أنت لسه بيبي؟
يوسف : حلا تلعب بيها.
مليكة : ملكش دعوة بحلا روح رجعها مكانها.
سهر : مفيش حاجه هترجع هات اللي في ايدك ده.
يوسف : اتفضلي.
سهر : تعالي يا حلا ألعبي مع يوسف.
مليكة : حسابي معاك في البيت.
سهر : اخص عليكي يا سهر ايه اللي بتقوليه ده.
مليكة : علشان مليون مرة اقول له ميمدش ايده على حاجه مش بتاعته مبيسمعش الكلام بيعمل نفس الاسلوب دا مع أخته.
سهر : طب اهدي بس انتي أعصابك تعبانك يا رِهام.. رِهام.
رِهام : نعم يا مدام.
سهر : اعملي كوباية ليمون وهاتيها.
رِهام : حاضر.
مليكة : لمين؟ أنا مش هشرب.
سهر : هتشربي علشان تروقي دمك كده وتهدي أعصابك..ادخل أنت وحلا جوه يا يوسف العبوا مع بعض.
مليكة : مش عاوزها تيجي تشتكي منك.
يوسف : حاضر.
سهر : بلاش تقعدي تقوليله الكلام ده علشان يفضل يحبها.
مليكة : ما هو بيحبها بس لازم يقعد يناقر فيها.
سهر : العيال كلها كده يا مليكة.
مليكة : عيال!
دا مجنني يا مامي.
سهر : معلش يا حبيبتي انتي واخواتك كنتو كده مع بعض مش فاكرة مجدي وملك كانوا بيعملوا ايه في بعض انتي الوحيدة اللي كنتي هادية فيهم وعلي يمكن شويه بس هو ومجدي طول عمرهم ناقر ونقير.
__________
في فيلا مراد.
أمل : يلا يا مراد.
مراد : حاضر يا مامي جاي اهو.. وادي قاعدة.
مريم : اتفضل.
مراد : ايه ده؟
مريم : ساندوتشات شاورما وسجق وكفته.
مراد : اه يعني مفيش عشا.
أمل : هههههههههههه امال ايه يا ابني اللي قدامك ده؟!
يلا يا هشام بقى الأكل هيبرد.
هشام : حاضر جاي ثواني.
أمل : يا ادي التليفون اللي جاي يكمل الشغل هنا كمان.
هشام بيقعد بابتسامة : ايه ريحة الأكل اللي تجنن دي.
أمل : قول للأستاذ اللي قاعد جنبك.
هشام : مين مراد؟
ايه ماله ؟
مراد : مفيش يا بابي.
مراد بهمس : تجهزي الشنط علشان هنشمي بعد بكرة.
مريم : لا هنقعد هنا.
مراد : نعم!
امال كنا بنتكلم في ايه امبارح وانتي وافقتي.
مريم : رجعت في كلامي فيها حاجه دي؟
أمل : مبتاكلش ليه يا مراد؟
مراد : هو حضرتك قولتي ايه لمريم؟
أمل : قولت لها ايه في ايه؟
مريم : محدش قال لي حاجه دا قراري أنا.
مراد : وأنا مش موافق.
مريم : خلاص روح لوحدك ولا اقول لك علشان متحسش بالوحدة خُد الولاد معاك.
مراد : نعم!
احنا هنهزر يا مريم؟!
مريم : هههههههههههه طب وطي صوتك.
مراد : ما انتي بتقولي كلام يجنن بصراحة.
مريم : خلاص اهدا بقى
ههههههههههههه
هشام لـ أمل : هو في ايه؟
أمل : معرفش.
هشام : متاكل يا مراد ولا قاعد على السفرة ضيف شرف.
مراد : هاكل اهو يا بابي.
أمل : هقوم أعمل حاجه سُخنه نشربها.
هشام : متعمليش حسابي يا أمل.
أمل : ليه بقى دا أنا هعملك حاجه هتحبها قوي أنا متأكدة.
هشام : أوك أما نشوف.
مراد : حلوة قوي الشاورما دي جايبنها منين؟
مريم : طنط عملاها في البيت.
مراد : لا مش معقول.
هشام : وليه مش مصدق
مامتك طول عمرها نفسها حلو.
مراد : ايوه بس الحاجات دي شغل مطاعم غير الأكل البيتي.
أمل : ها ايه رأيكم؟
مراد : بصراحة يا مامي تسلم ايدك بجد فكرت السندوتشات دي جايه من بره.
أمل : وهو يعني اللي بيتعمل بره مينفعش نعمله جوه هههههههه
مريم : هههههههههههه عندك حق يا طنط.
مراد : طب اخدتي سر الصنعه علشان لما نروح تعمليها؟
أمل : مريم شاطرة
وبتتعلم بسرعة هي اللي عامله كل دا معايا.
مراد : معقوله؟!
لا حيث كده بقى نقعد كمان شويه يمكن اخدها من هنا شيف ولا حاجه.
مريم : على اساس إني مبعملش أكل في البيت يعني؟!
مراد : لا يا حبيبتي مقصدش انتي بصراحة شاطرة في المحاشي والمحمر والمشمر هههههه
ناقصك البيتزا والشاورما والحاجات دي.
مريم : ماشي هعديها المرادي.
هشام : هههههههههههه
ممكن تاكلوا بقى.
مراد : بطلي رغي بقى وكُلي.
مريم : أنا؟!
مراد : هههههههههههه لأ أنا.
___________
في التليفون... 📞
كريم : طيب يا حبيبي أنا جاي.
فريدة : في ايه يا كريم؟
كان كريم قفل التليفون وبيلبس هدومه بسرعة.
فريدة : أنت بتلبس رايح فين مش لسه جاي؟!
كريم : فين الشراب اللي كان هنا؟
فريدة : اتفضل.. مترميش ده هاتوا علشان يتغسل ما تقول لي رايح فين يا كريم؟
كريم : شهد تعبانه في المستشفى.
فريدة : طب ما أنا عارفة إنها تعبانه.
كريم : بس هي تعبانه قوي علشان كده كريم كلمني.. علاء بيتصل.
كان كريم نازل جري على السلم.
فريدة : طب استنى يا كريم دقيقة هلبس واجي معاك.
كريم : لأ خليكي مش هستنى.. ايوه يا علاء
اه رايح على هناك.
________
في فيلا آسر.
آسر بينام على السرير : آآآآه.. الواحد ما يصدق يحط جسمه بس على السرير مش مهم حتى ينام... مالك يا سهر؟
كانت سهر سرحانه في اللي حصل لها النهاردا.
آسر : مليكة مقعدتش ليه دايماً كده مستعجله.
سهر : يوسف عنده مدرسة الصبح زي ما أنت عارف ولازم تنيمه بدري علشان بيغلبها الصبح.
آسر : سمعتيني يعني لما سألت عن مليكة.
سهر : ليه هو أنت قولت حاجه تانية؟
آسر : بسألك مالك مردتيش كنتي سرحانه في إيه؟
سهر : مفيش.
آسر : عليه برضو.. ليه هو أنا مش عارفك.
سهر : تصبح على خير.
آسر : تعالي هنا تصبح على خير ايه قوليلي مالك الأول؟
________
نكمل الحلقة الجايه.

👇👇
الجزء الرابع بينشر هنا مع الجزء الثالث
يتبع مع الحلقة ٣👈
أنت تقرأ
أنت قلبي الجزء الثالث
Werewolf(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
