أنت قلبي الجزء الثالث

الحلقة ١٢٣

#انت_قلبي٣
_________
الحلقة ١٢٣

بعد مرور خمس شهور.
في شقة أكرم.
ندى : هههههههههههه اعملي بضمير يا فريدة العريس والعروسة هياكلوا من الكحك ده.
فريدة : ما أنا بعمل بضمير اهو يا ندى.
ميرفت : هههههههههههه مش هتبطلي يا ندى
فريدة شكلها تعبت معانا من الصبح.
فريدة : لا يا طنط أنا متعبتش.
ندى : اوعي تكوني ماأخدتيش الدوا.
فريدة : لا اخدته قبل ما نبدأ... بطلي بقى يا جميلة مش عاوزه لعب في العجين.
ندى : سبيها دي واخده حته صغيرة بتعملها محدش هياكلها غيرك يا جميلة.
فريدة بعصبيه : قومي وسيبي اللي في ايدك.
جميلة بتبكي.
ندى : اخص عليكي يا فريدة هاتي يا تالا حتة عجينه لجميلة.
فريدة : لا يا ندى متخلنيش اقوم اضربها.
ميرفت : على ايه بس يا بنتي دي عيله متعرفش حاجة.
ندى : البنت فريدة دي بقى خُلقها ضيق قوي انتي بتعملي كده في البيت؟
فريدة : مبحبش حد يلعب في العجين يا ندى ولما اقول لبنتي حاجة ياريت متكسريش كلامي قدامها.
ندى : حاضر يا أختي مكانتش كلمة.. هي شهد قالت طالعه تشوف الأكل ومنزلتش ليه؟
ميرفت : سبيها براحتها يا بنتي.
ندى : أنا مش عارفه يا ماما معملناش الكحك والبسكوت دا في الفرن زي كل الناس ليه ولا حتى كنا نشتريه من بره.
ميرفت : هو في احلى من عمايل البيت تصدقي القعدة دي فكرتني لما كنت بعملك الكحك والبسكوت بتاع فرحك
كانت سميرة قاعدة مكانك كده ومنيرة قاعدة مكان فريدة.
دمعت فريدة وهي بتحاول تحبس دموعها.
غمزت ندى لوالدتها.
ميرفت : كانت أيام جميلة.
ندى : والايام دي كمان جميلة يا ماما ادينا اهوه بنعمل الكحك والبسكوت بتاع علي وبكرة نعمل لـ تالا وأنس ومحمد وزين والبسكوته الصغيرة هههههههه زعلانه ليه يا جيجي مامتك دي أنا هضربها بس لما اغسل ايدي.
فريدة : معلش يا تالا هاتيلي كوباية مياه.
ندى : قومي هاتي لعمتك تشرب.
تالا : حاضر يا ماما.
ندى : افتحي الباب بالمرة تلاقيها شهد.
بتفتح تالا باب الشقة.
قسمت بابتسامة : سلام عليكم.
يرددوا : وعليكم السلام.
ميرفت : ادخلي يا بنتي.
ندى : خُدي ريتان من قسمت يا تالا.
قسمت بتقعد : طبعاً مفيش سلام دلوقت هههههههه ألف مبروك.
ندى : عقبال ريتان.
قسمت : عقبال تالا بقى الأول دا آدم لسه بيقول لي الصبح معلش اتأخرت عليكم.
ميرفت : لا ولا يهمك يا بنتي كفاية جيتك لحد هنا.
قسمت : ازيك يا طنط فريدة.
فريدة : بخير يا قسمت.
ندى : تالا انتي نسيتي ولا ايه هاتي لعمتك تشرب هههههههه معلش أنا اللي لخبطها يا فريدة.
قسمت : طب هاتي ريتان يا تالا.
تترك تالا ريتان وتدخل المطبخ.
قسمت : كلمت فريدة الصبح لما عرفت من آدم
بقولها قالت لي مش هتعرف تيجي علشان رايحه للدكتورة يمكن تعملها الليله.
ندى : يا حبيبتي تقوم بالسلامة.
فريدة : مامتها كانت عندها؟
قسمت : لأ كانت لوحدها في البيت ياسين بيرجع على الساعة تلاته كده.
ندى : زمانه جه وأكيد مامتها هتروح معاها.
قسمت : اه أكيد.
تالا في ايدها كوباية المياه : اتفضلي يا عمتو.
_________
في شقة ياسين.
ياسمينا : اصبري شويه يا فريدة الدكاترة يا بنتي بيستسهلوا ويروحوا يولدوا قيصري على طول.
ياسين : مش الدكتورة دي يا طنط احنا بقالنا اسبوع يوميًا عندها وكل ما فريدة
تحس بتعب تقولها اصبري.
فريدة : مش عارفه أخرتها ايه أنا تعبانه قوي يا ماما.
ياسمينا : معلش يا حبييتي كله يهون علشان خاطر النونو.
فريدة بابتسامة : هو دا اللي مصبرني.
ياسمينا : طب ايه مش يلا بينا.
ياسين : ميعاد الساعة خمسة باقي ساعة.
ياسمينا : عقبال ما نوصل هناك علشان تسوق على مهلك.
فريدة : اه يا ياسين أصل أنا مش قادرة أقعد أكتر من كده.
ياسين : حاضر هقوم اغير هدومي.
_________
في شقة كمال ونادين.
كمال : زَ.. رَ.. عَ.. زَرَعَ.
يوسف : زَ.. لـ
كمال : هتيجي يلا.
يوسف : طب اقولها في أول الكلمة معلفش اجيبها في نصها.
كمال : رَ.. جَ.. عَ.. رَجَعَ.
يوسف : لـ... لـ..
كمال : هاه يلا.
يوسف : رَ.. جَ.. عَ ... رَجَعَ.
كمال بابتسامة : شاطر يا يوسف.
مليكة جايه بالعصير : برافو يا يوسف.
كمال : يلا قولها تاني بس كلمة جديدة.
يوسف : رَ.. بَ.. طَ.. رَبَطَ.
مليكة بتصقف : هيييييه
ههههههههههههه
كمال : طب يلا قول.. زَ.. رَ.. عَ.. زَرَعَ.
يوسف : دي في وسط الكلمة.
كمال : قولها عادي ما أنت شاطر وقولت اللي في أول الكلمة.
يوسف : زَ.. (لـ.).. لأ.. زَ.. رَ.. عَ.. زَرَعَ.
مليكة بتصقف : برافووووو هههههههههه
كمال : انطق حرف الراء.
يوسف : لـ... ر.. ر. راء.
تطبع مليكة قُبله على خده : شاطر يا يوسف أنا هقول لبابي يجيبلك حاجة حلوة وهو جاي.
كمال : كمل كتابة بقى.
يوسف : حاضر.
مليكة بتصقف : هههههههه
يااااه اخيرًا سمعتها منك قبل ما اموت.
كمال : بعد الشر عليكي يا بنتي.
مليكة : أنا متشكره قوي يا عمي حضرتك تعبت قوي معاه.
كمال : يا سلام بتشكريني على ايه دا واجب عليه.
يوسف : خلاص خلصت.
مليكة : طب يلا اشرب كوبايتك الجو حر ولا أنا اللي حرانه لوحدي.
كمال : التكييف بس عاوز يتظبط.
يجري يوسف ياخد الريموت : أنا عارف بيتعمل ازاي.. اتنين وعشرين.. عشرين اهو يا مامي.
مليكة : شاطر يا حبيبي.
بتقعد مليكة تستريح.
يوسف : هو البيبي هيخرج امتى علشان اشوفه؟
مليكة : لسه شويه يا حبيبي.
يوسف : أنا هحبها والعبها معايا بكل اللعب اللي عندي.
مررت مليكة ايدها على شعر يوسف.
يوسف : متشتروش لعب بقى وتخلي بابي يدفع فلوس كتير لعبي هتبقى بتاعتها أنا بس عاوز شوية لعب صغننين مش كتير.
كمال : هههههههههههه
طب ما تخلي اللعب دي ليك وبابي يشتري للنونو.
يوسف : لأ النونو هياخد لعبي علشان دي بتاعة الصغيرين أنا بقى بابي يجيب ليه لعب بتاعة الكبال.
مليكة : هاه قولنا ايه؟
يوسف : الكبااااا.. ر.
كمال : مسبتش حاجة من سيف كان بيعمل نفس الحركات هههههه
مليكة : اه ناصح قوي كل ده علشان يجيله لعب جديدة هههههههه
اهو بابي جه اهو.
يوسف يجري على سيف : جيبت لي ايه معاك بقى؟
سيف : طب مش لما ارتاح الأول.. سلام عليكم.
يرددوا : وعليكم.
سيف بيقعد يستريح : الجو حر قوي النهاردا.
مليكة : لسه كنت بقول لعمي.
سيف بيعطي يوسف الكيس اللي معاه : اتفضل.
يوسف بيفتح الكيس كان فيه سناكس وشيكولاته.
مليكة : أسنانه مسوسه قولتلك تمنع الحاجات دي.
سيف : اعمل ايه مش شايفه أنا لو نسيت في يوم مينامش إلا لما انزل اجيب له.
يوسف : كفاية دول وهحط الباقي في التلاجة.
حاضن الحاجة اللي خرجها من الكيس حطها على السفرة والباقي دخله التلاجة ورجع ياكل.
قامت مليكة : ثواني الغدا يكون جاهز عقبال ما تغير هدومك.
سيف : ماشي.. عامل ايه يا بابا؟
كمال : بخير يا ابني.
يوسف : بابي أنا نطقت حرف الراء صح.
سيف بفرحه : شاطر يا يوسف.
يوسف : اه أنا شاطط..ر.
سيف : هههههههههههه
كمال : بكرة يقولها بكل سهولة.
سيف : دا كده كويس قوي
دا عقدني في حرف الراء
ههههههههههههه.
__________
في فيلا آسر.
آسر : مش فاهم يا وليد يعني نعيد القسمه من تاني بابا متوفي بقاله كام سنه؟!
وليد : ودي مالها ومال القسمه يا آسر بصراحة أنا شايف إن فيها ظلم.
آسر : مش أنا اللي قسمتها المحامي اللي حسبها كده ودا حسب الشرع مش من دماغنا منه اخدت نصيبها وأنا وأنت اتقاسمنا في الباقي قد بعض.
وليد : والفيلا يا ترى اتحسبت من ضمن القسمه؟
آسر : انهي فيلا؟!
وليد : بتاعتك اللي عيشت واتربيت واتجوزت وربيت ولادك فيها.
آسر : ااااه تقصد الفيلا بتاعت ماما بقى.
وليد : بتاعة ماما ولا بابا؟!
آسر : بابا كتبها لماما بالتراضي وأنا ورثتها عن أمي فيها حاجة دي؟!
وليد : أنت عارف كويس إن فلوس الفيلا دي بابا اللي دافعها مش مامتك يا آسر.
آسر : ولو إني محبش اقول مامتي ومامتك بس بنفس المنطق ده طنط سعاد بابا سابلها الفيلا وهي باعتها.
وليد : ااااه قول كده بقى.
آسر : أنت اللي فتحت موضوع قديم مكانش له لازمة يتفتح يا وليد.
وليد : لأ له لازمه يا آسر
ما هو مش في النهاية فلوس بابا اللي ياخد سيف جوز بنتك مليكة ولا بنت المحامي اللي شغال في شركتك.
آسر : كمل سكت ليه ولا ابن أختي جوز بنتي ولا بنت الدكتور هشام كمل كمل.. أنا لسه عايش يا وليد ماموتش ويوم ما تم القسمه وكل واحد ياخد نصيبه دا بعد موتي اللي هياخد ملكي هما ولادي لا جوز بنتي ولا مرات ابني.
سهر تدخل لما تلاقي آسر بدأ ينفعل وكلام وليد مستفز.
سهر : أظن كده كفاية قوي يا وليد.
وليد : أظن الرجاله لما تتكلم الحريم تسكت يا سهر متتدخلش.
آسر : وليد الزم حدودك.
وليد : مبقاش إلا بنت سهير كمان اللي هتتدخل ما بيني وبين اخويا.
آسر : عيب كده ميصحش بقول لك.
وليد : أنت بتزعقلي أنا قول الكلام دا للهانم مراتك ايه اللي يدخلها اصلا في الحوار ولا خايفه على نصيبها بعد ما كتب لها نص الشركة.
آسر : أخرس كلمة زيادة وهضربك اتفضل اخرج بره.
وليد : تمام قوي بس خليك فاكر يا آسر إنها ملهاش أمان على رأي ماما
تعبان ودخل وسطنا.
آسر بانفعال : اخرج بره بقول لك.
وكان آسر بيخرج وليد بالعافية.
وليد : سيبني هخرج لوحدي.
وفتح وليد الباب وخرج.
سهر : آسر اقعد استريح.
آسر بغضب : انتي ايه اللي دخلك اصلا من الأول؟
سهر : أنا خوفت تنفعل أكتر من كده وتتعب فقولت ألحقك.
علي جاي من بره : هو في ايه بكلم عمي مبيردش.
آسر بيقعد يستريح : مفيش حاجة يا علي.
نظر سهر لـ آسر وهي مدمعه وخرجت من المكتب.
علي أخد باله لكن مرضيش يسأل فهم إن في مشكلة ما ما بينهم.
_______
في التليفون... 📞
مريم : اخلص بقى وقول لي عملت ايه؟
مراد : هو أنا لو منجحتش انتي هتعملي ايه؟
مريم : متوقعش قلبي بقى يا مراد.
مراد : هو الحقيقة يعني.
مريم : اه يلا قول.
مراد : نجحت بتقدير جيد.
مريم بفرحه : ألف ألف مبروك.
مراد : وقعت قلبك صح؟
ههههههههههههه
مريم : طبعاً دا أنا كنت حاطه ايدي على قلبي.
مراد : هههههههههههه مبروك علينا احنا الاتنين نتيجتك كانت امبارح وأنا النهاردا عاوزين نحتفل بقى.
مريم : هتعمل حفلة؟
مراد : اه على الضيق كده أنا وانتي.
مريم : نعم!
مراد : هعزمك على الغدا ونجيب تورته صغيرة كده ونحتفل.
مريم : ماشي هجيب ماما ومازن معايا.
مراد : ماما ومازن!
بقولك حفلة صغيرة على قدي أنا وانتي.
مريم : لا خليها على قدك أنت علشان مش جايه.
مراد : هستأذن مامتك.
مريم : مش هتوافق ولا أنا كمان موافقة.
مراد : طب ما تصبري اما اقول لها الأول.
مريم : أنت فهمتني أنا قولت ايه؟ .. مش موافقة.
مراد بتنهيدة : خلاص اجيب التورته واجي احتفل عندكم.
مريم : تشرف وتنور.
مراد : طيب.
مريم : ايه مالك؟
مراد : مفيش.
مريم : مراد احنا متفقين على ايه؟
مراد : هو الحقيقة احنا اتفاقنا على حاجات كتير
مش فاكر حاجة منهم دلوقت.
مريم : خلاص روح قول لباباك خطيب أختك كلمك وبستأذنك إنه عازم أختي على الغدا بره شوف رد فعل ايه.
مراد : بترديها ليه يعني؟!
مريم : كلم حاجة تفكر فيها قيسها على أختك وشوف تنفع ولا لأ.
مراد : غلبتيني المرة دي.
مريم : أنا على طول بغلبك على فكرة.
مراد كده.. طيب هههههههههههه سلام شويه كده وهكلمك.
مريم : ماشي.. مع السلامة.
_________
في التليفون.. 📞
ياسمينا : اه يا فيروز احنا في المستشفى.
فيروز : هاه الدكتورة قالت ايه؟
ياسمينا : فريدة جوه في اوضة العمليات يا فيروز ادعيلها.
فيروز : يا حبيبتي.. بجد؟
متقلقيش يا ياسمين هتقوم بألف سلامة.
ياسمينا : مش قادرة اتلم على اعصابي صويتها متوترني.
فيروز : معلش اجمدي كده دلوقت تخرج هي والبيبي.
ياسمينا : طب اقفلي الممرضة خرجت بالبنت.
فيروز بفرحه : ألف مبروك.
ياسمينا : اقفلي أما اطمن على فريدة.