#انت_قلبي٣
__________
الحلقة ٣٤
ملك : هتروحي فين بس وانتي كده بابي ومامي هيعملوا الواجب متقلقيش وانتي لما تحسي إنك كويسه ابقي روحي اطمني عليه.
مليكة : عمو كمال ملوش علاقة بمشاكلي مع سيف يا ملك و مينفعش في دي بالذات مروحش كده ميبقاش عندي أصل.
ملك : هو انا قولتلك متروحيش بس انتي تعبانه والدكتور قال لازم تستريحي في السرير كام يوم.
سهر : اختك بتتكلم صح يا مليكة لما تتحسني هبقى اخدك تروحي تطمني عليه .
مليكة : طيب.
سهر : محتاجين حاجه؟
مجدي وعلي معاكم متخافوش.
ملك : ورانا رجالة يعني.
مجدي : عندك إعتراض؟
ملك : لأ مضطرة امشي اموري.
مجدي : يبقى احسن.
_____________
في فيلا مراد.
هشام : ايوه كنت نايم.
عُمر : أنا آسف يا هشام إني قلقت نومك.
هشام : ادخل في الموضوع على طول يا عُمر.
عُمر : جاي اخد نور.
هشام : كده بكل ببساطه؟!
عُمر : امال هاخدها ازاي يا هشام مش فاهم؟
هشام : هو انت بتستهبل ولا بجد مش فاهم قولت ايه ولا عملت ايه؟
جرا ايه يا عُمر مش مفروض قولتلها إنك عاوز تتجوز و قالتلك اتفضل اتجوز بس انا مش هكمل معاك و أنا اخدتها على الأساس ده ايه اللي تغيرت دلوقت؟!
عُمر : مفيش حاجه تغيرت أنا قولتلها إني بحبك ومقدرش اعيش من غيرك وفي نفس الوقت حابب اتجوز تاني طالما مقتدر.
هشام : و ايه هي طبيعة القدرة دي حضرتك؟
عُمر : عندي كل المقاومات اللي تخليني اقدر اتجوز اكتر من اتنين كمان يا هشام.
هشام : اوك.. مبروك عليك
بس اختي مش هتبقى واحدة منهم.
عُمر : انت عاوز تحرم الحلال يا هشام؟!
هشام : طب بما إنك اتهمتني اتهام زي دا يبقى انت تعرف تفرق بين الحلال والحرام صح؟
قولي بقى ايه هو الحلال
إنك تسيب اختي بالشهر لا تكلمها ولا يبقى بينكم أي تواصل وانت في شغلك وهي اما عندي وفي بيتها زهقانه مش لاقيه حضرتك علشان مشغول عنها فروحت عملت قرشين طالب تتجوز دلوقت وبتقولي حلال
طيب يا اخي الأولى تهتم بالأولى ولما تلاقي نفسك
جات للتانية اتفضل لكن انت اصلا ظالم الأولى معاك رايح تتجوز تاني
اشمعنه دي اللي هتديها من وقتك وصحتك وتفكيرك واختي لأ؟
عُمر : ومين قالك إني مش هعدل بينهم؟
هشام : يا ابني انت بتضحك على نفسك
إذا كان انت مش محقق العدل مع مراتك وظالمها معاك امال لما يكون معاك اتنين هتعمل ايه؟
هتيجي على واحدة علشان ترضي التانية ولا هتظلمهم هما الاتنين
يعني مثلا لو فاتح مشروع ومش متفرغ ليه ولا بتباشره وسايبه يخسر فقومت قولت لأ أنا هفتح مشروع تانية جنب ده وهشغل الاتنين وهكسب و هيبقى عندي وقت لـ دا ودا
يبقى انت بتضحك على نفسك كفاية خسارة واحدة
أو حاول على الأقل تلملم نفسك وتعوض الخسارة دي
عارف إن المثال اللي طرحته دا بيقلل من قيمة اختي وهي اغلي من كده بكتير بس قولت اللي هتقدر تفهمه وتستوعبه يا عُمر.
عُمر : اطلع قولها اني هنا واحنا هنتفاهم مع بعض.
هشام : شوف يا عُمر أنا معنديش مانع يا حبيبي تقنع نور باللي في دماغك ده لو واثقه إنك هتفضل تحبها وهتديها حقها بس لو حسيت إن اختي مقهورة واتكسرت بسبب جوازتك دي مش هسيبها كده ودا علشان بس متقولش إني بحرضها على الرفض اهي جات اتفاهم معاها.
نورهان : جاي ليه يا عُمر
علشان نتفق هتجيب المأذون امتى مش كده؟
عُمر : لا يا نور.
نورهان : يبقى تراجعت عن القرار اللي كنت واخدة وشوفت إنك تهتم بيه وببنتك صح؟
عُمر : صح ههتم بيكي انتي و مايا يلا اطلعي ألبسي.
نورهان : يعني صرفت نظر عن حوار الجواز ده؟
نظر عُمر لهشام.
نورهان صرخت في وجهه : يبقى مش مروحه معاك يا عُمر ويلا بقى طلقني مستني ايه؟
هشام : اهدي يا نور و اقعدي استريحي.
نورهان : اقعد استريح ايه يا هشام انت مش شايف نظراته دا مجاوبش على سؤالي صرفت نظر ولا لسه واخد قرار الجواز يا عُمر؟
عُمر : خلينا نتفاهم في بيتنا يا نور.
نورهان : لأ مفيش تفاهم وانت بقى تطلقني علشان مستحيل يبقالي ضره يا عُمر تقولي بحبها تقولي معرفش ايه مليش فيه اتفضل اتجوز ممناعتكش بس انا كمان ليه حق اني انفصل واسيبك تكمل حياتك مع اللي اخترتها.
عُمر : أنا اخترتكم انتو الاتنين.
نورهان : لا متبصليش يا هشام أنا مش هرد
تصبح على خير.
عُمر : نور استني.
هشام : عُمر سيبها اظن مفيش كلام تاني يتقال.
__________
في التليفون 📞
رغد : بتعمل ايه؟
مراد : قاعد اهو هعمل ايه يعني؟
رغد : واضح إنك مضايق.
مراد : لا أنا هطق بس.
رغد : زهقت من قعدة البيت وعاوز تخرج مش كده؟
مراد : ياريت بس مبعرفش اخرج لوحدي
واتخنقت من النظام ده.
رغد : معلش فترة وتعدي
انت مبتروحش النادي خالص؟
مراد : لأ من وقت الحادثة مروحتش.
رغد : أنا كل تلات وخميس بكون هناك.
مراد بفرحه : بجد؟
رغد : ايوه.
مراد : يعني يوم الخميس لو روحت هلاقيكي هناك؟
رغد : أكيد دا لو ممتش يعني.
مراد : بعيد الشر عنك.
رغد : طيب تصبح على خير.
مراد : هقابلك هناك.
رغد : اوك.. مع السلامة بقى.
أنت تقرأ
أنت قلبي الجزء الثالث
Wilkołaki(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
