أنت قلبي الجزء الثالث

الحلقة ١٥٤

#انت_قلبي٣
__________
الحلقة ١٥٤

بعد كام يوم.. وتحديدًا أول يوم دراسي.

في شقة مراد.
مراد قاعد على السفرة وبيفطر وفي ايده مج النسكافيه وبينظر في الساعة.
مراد : يلا يا مريم.
مريم : جايه اهو ثواني.
مراد : بتعملي ايه كل ده؟!
كانت مريم لبست بس قعدت تستريح بعد شعرت بدوخه خفيفه وبدأت تزيد.
مراد واقف عند باب الغرفة : يلا يا حبيبتي عندي شغل بابي معندوش هزار انتي عارفه.
مريم : حاضر هقوم.
مراد : البسك أنا الطرحه.
ونزل على ركبته بيلبسها الطرحه اللي كانت جنبها.
مراد : مالك يا مريم؟
مريم : دايخه وحاسه إن ضغطي بيوطى مش عارفه دا من ايه.
مراد : طب قومي معايا اخدك للدكتور.
مريم : لأ أنا هبقى كويسه.
مراد : يبقى علشان لسه مفطرتيش وكمان نمتي امبارح من غير عشا.
مريم : لا عادي مش أول مرة أنا مبتعشاش أنت عارف.
مراد : طب قومي افطري وهنزل اشغل العربية لو فضلتي تعبانه كده هاخدك للدكتور.
مريم : لأ علشان تشوف شغلك.
مراد : الشغل مش هيطير المهم اطمن عليكي.
مريم : طيب هقوم.
نزل مراد يشغل العربية ومريم لفت الحجاب وقعدت تفطر يمكن اللي عندها ده زي ما قال مراد لإنها مفطرش ولا اتعشت بالليل.
طلع لها كانت الدوخه راحت وشعرت إنها احسن.
مراد : يبقى من قلة الأكل زي ما قولتلك خُدي بالك من نفسك بقى واتغذي كويس.
مريم بابتسامة : حاضر.
مراد : يلا بينا لو ناسيه حاجه افتكريها قبل ما ننزل علشان عارف الوسواس اللي عندك.
مريم : شباك المطبخ كنت سيبته يدخل شمس شويه.
مراد يدخل مرة تانية : شمس ايه الصبح كده هو في شمس الناحية دي؟!
مريم : اه في.
مراد : هههههههه عندي شغل هتطرد من الشركة بسببك.
مريم : دا أول يوم في الدراسة وبتعمل كده!
مراد : أصلك مش عارفه دكتور هشام.
ويمسك ايدها : يلا بينا.
__________
في فيلا كريم.
فريدة من المطبخ لمحمد اللي كان قاعد على السفرة بيفطر : صحيت زين يا محمد؟
محمد : اه يا مامي وبيلبس.
زين : أنا جيت اهو مين بيسأل عني؟
فريدة : صباح الخير.
زين بابتسامة : صباح النور.
فريدة : هاتي اللانش بوكس بتاعك يا جميلة.
جميلة : اه رجعنا تاني.
فريدة : ايه مالك؟
جميلة : مفيش.
زين : مش عاوزه تاخد ساندوتشات معاها المدرسة معروفة يعني.
جميلة : خليك في حالك أنا مكلمتكش.
محمد : هههههههههههه
زين : عجبتك قوي؟!
كريم نازل من فوق : صباح الخير.
يرددوا : صباح النور.
فريدة : القهوة طبعا.
كريم بابتسامة : ما انتي عارفه يا حبيبتي.
بتدخل فريدة المطبخ ويقعد كريم على السفرة.
كريم : ها يا جيجي حضرتي كل حاجه؟
جميلة : اه لبست وعملت ضفاير ولبست شوز المدرسة والشراب الأبيض ومامي جهزت اللانش بوكس.
زين : وياترى لبستي الشراب ولا الشوز تحت الشراب؟!
ههههههههههههه
جميلة : بابي قول لزين ملوش دعوة بيه.
كريم : زين ملكش دعوة بـ أختك.
زين : هي اللي بتقول لبست الشوز وبعدها الشراب..
جميلة : نسيت الشراب فقولته بعد الشوز متركزش أنت بس وخليك في نفسك.
محمد : هههههههههههه
كريم : جميلة نكلم اللي أكبر مننا بـ أسلوب كويس.
زين : لا هي بس مش شاطرة غير في الكلام.
كريم : ياريت تخليك في حالك وملكش دعوة بيها.
زين : حاضر.
فريدة : القهوة.. حد عاوز حاجه؟
كريم : لا يا حبيبتي تسلم ايدك اقعدي افطري.
فريدة : فطرت هطلع ألبس.
كريم : عاوز نركز بقى ونذاكر كويس.
محمد : حاضر يا بابي.
كريم : مسمعتش صوتك يعني يا زين؟
زين : حاضر يا بابي هركز حاضر.
جميلة : وأنا كمان يا بابي.
كريم بابتسامة : حبيبة بابي.
تقوم جميلة تطبع قُبله على خد والدها فيحضنها.
كريم : نقعد نفطر بقى.
جميلة : حاضر.
فريدة : جميلة امسكي الشنطة علشان نسيت مفاتيح العربية فوق.
جميلة : حاضر.
كريم : على مهلك يا فريدة.
فريدة : متأخرة يا كريم.
محمد : هطلع اشغل العربية.
كريم : وأنت يا زين عربيتك أخبارها ايه؟
زين : عطلانه يا بابي ما حضرتك عارف.
كريم : لا مكونتش أعرف
وبعدين مش تفتكر تصلحها قبل ما الدراسة تبتدي.
زين : بصراحه يعني يا بابي العربية على قدها خالص وأنا يعني كنت..
كريم : عاوز تغيرها طبعا.
زين : ما هي راكنه في الجراج ملهاش أي لازمه.
كريم : هنشوف الحوار دا بعدين فريدة أنا ماشي عاوزه حاجه؟
فريدة بتشيل الأطباق من على السفرة بسرعة وداخله المطبخ : عاوزه سلامتك سيب مصروف البيت قبل ما تخرج.
كريم نظر لها بابتسامة : مش عارف ليه مبتقوليش بالليل دايمًا كده على الصبح.
فريدة : هتفرق ايه يعني يا كريم؟
كريم : طيب يا ستي اتفضلي سيبتهملك على السفرة.
فريدة : طيب مع السلامة زين المفاتيح عندك شغل العربية معلش.
زين : حاضر.
محمد : مش جاي؟
زين : امال يعني لابس وصاحي من بدري ليه؟
محمد : هو كده صاحي من بدري امال لو مش بقالي ساعة بصحي فيك كنت قولت ايه؟!
زين : يا عم وسع بقى خلينا نخلص.
__________
في فيلا مراد.
أمل : مع السلامة يا هشام.
كانت أمل بتتكلم مع هشام اللي خارج من الباب.
في التليفون.. 📞
زينة : أنت واقف بره؟
طيب خارجه اهو.
مجدي : طب سلام علشان باباكي خارج بالعربية هسلم عليه.
زينة : اوك أنا كمان خارجه.
وقفلت زينة مع مجدي.
أمل : ايه يا حبيبتي خلصتي فطارك؟
زينة : ايوه
يا مامي.. أنا خارجه بقى علشان مجدي مستني بره.
أمل : طيب يا حبيبتي عاوزه تاكلي ايه على الغدا؟
زينة : أي حاجه.
أمل : طيب هنعمل أي حاجه متجيش تقولي بقى مليش نفس.
زينة بابتسامة تطبع قُبله على خد والدتها.
زينة : سلام يا أموله.
أمل بتشاور لها بابتسامة : مع السلامة خُدي بالك من نفسك.
زينة : حاضر.
____________
في فيلا آسر.
آسر : سهر تعالي بقى بتعملي ايه؟
سهر : كنت بعمل طبق الفول ده.
آسر بابتسامة : تسلم ايدك بس أنا مش هاكل فول.
سهر : بقى كده دا أنا قومت عملته مخصوص علشانك.
آسر : تسلم ايدك يا حبيبتي.
سهر : تعرف وأنا في بيت خالتي كان طبق الفول دا أساسي على الفطار وأوقات العشا كمان الناس زمان مكانتش بتدقق قوي أي حاجه تسد جوعها رغم كل ده إنه كان أحلى من أي أكل تاني ويا سلام بقى على العدس والبصاره والبتنجان المخلل أبو دقه.
آسر : هههههههههههه ايه يا سهر جريتي ريقي وأنا ممنوع عن الأكل ده.
سهر : زمان الدنيا مكانتش سهله برضه بس كان فيها حاجات حلوة كتير عارف ايه هي؟
آسر : ايه هي؟
سهر : البساطه في كل حاجه أي حاجه كانت بترضينا دلوقت مش كده خالص.
آسر : كنت دايمًا اقرا عبارة القناعة كنز لا يفنى ومكنتش فاهم معناها كويس بس لما كبرت عرفت المعنى الحقيقي ليها.
سهر : فعلا القناعة والرضى بالمقسوم هي السعادة الحقيقية.
آسر : لو قولتي الكلام دا لحد دلوقت ممكن يكون رده عليكي كفاية مثاليه بقى قناعة ايه البحر يحب الزيادة.
سهر : طبعا يحب هو في حد ميحبش يبقى معاه بزيادة بس المهم الوسيله ايه.
آسر : اممم حلو الحوار ده كان بودي أكمله بس عندي اجتماع الساعة عشرة ونص وحسام زمانه بيشد في شعره.
سهر : هههههههههههه
طب وطبق الفول؟
يقطع آسر لقمه صغيرة ويغمسها بالفول وبيدوق : اممم لذيذ قوي علشان من ايدك.
سهر بابتسامة : بألف هنا وشفا.
بيشرب بؤ مياه ويخرج.
سهر : اما اتصل بمليكة اطمن عليها.
في التليفون... 📞
مليكة وهي صوتها رايح خالص : صباح النور يا مامي.
سهر : ايه يا حبيبتي لسه تعبانه؟
مليكة : جسمي كله مكسر وزوري مش قادرة.
سهر : ما هو باين من صوتك يا مليكة مبتاخديش الدوا؟
مليكة : بـ اخد بس التكييف كان عطلان شغلت المروحة لحد ما يتصلح كسرت جسمي خالص.
سهر : قولت لك نامي في الاوضة التانية عقبال ما يتصلح أنا عارفه مبتستحمليش هوا المروحة.
مليكة : قولت الجو فك شويه مش مشكلة يعني اهو كنت بهديها شويه بس وجعت جسمي.
سهر : ويوسف وحلا عاملين ايه؟
مليكة : كويسين سيف اللي تعبان قوي.
سهر : معلش يا حبيبتي يومين وهتبقوا زي الفل سيف نايم؟
مليكة : لأ نزل الشغل.
سهر : ماأخدش اجازة ليه؟
مليكة : خلص كل الاجازات اللي عنده.
سهر : على كده يوسف مراحش المدرسة.
مليكة : لأ قومت الصبح بدري لبسته ونزلت تحت لحد ما باص المدرسة جه.
سهر : طيب هكلم بابي واجيلك.
مليكة : اوك يا مامي هشوف مين بس اللي بيرن الجرس.
سهر : طيب يا حبيبتي مع السلامة.
_________
في منزل عُمر.. بعد الظهر.
عُمر : صحيها يا ياسمين.
ياسمينا : ادخل صحيها أنت.
عُمر : معلش تعالي على نفسك وادخللها انتي هيبقى احسن علشان هي واخده على خاطرها منك.
ياسمينا : ليه يا حبيبي كنت عملتلها ايه بلاش دلع ماسخ بقى ولا تكونش زعلانه علشان وقفت في صف جوزها وقولتله ميسمعش كلامها؟!
عُمر : وأنا قولتله نفس الكلام يا ياسمين بس تفتكري هي زعلانه منك ليه؟
ياسمينا : تخبط دماغي في الحيط أنا مش مصالحه حد هي يعني تعكها وعاوزه اللي يوقف معاها في الغلط لا يا حبيبي تشرب بقى لحد ما تشبع علشان تمشي بدماغها بكرة تخرب فوق نافوخها محدش بينفع حد.
وقامت ياسمينا من على الأكل دخلت جوه.
عُمر واقف عند باب الغرفة : هتنامي؟
ياسمينا : ايوه
لما تقوم تاكل خليها تشيل الأطباق وتشطب المطبخ والهدوم اللي سايباها في السبت قدام الغسالة بقالها يومين تتعب نفسها كده وترميهم في الغسالة يتغسلوا وتروق الدولاب الهدوم تضرب تقلب فيه اكتئابها ده ميجيش على دماغي أنا كبرت وصحتي على قدي.
عُمر : حاضر يا ياسمين.
نادين خارجه من جوه : مساء الخير يا بابا.
عُمر : مساء النور يا بنتي اقعدي علشان تاكلي.
ياسمينا : عُمر اقفل الباب ده علشان أنام.
عُمر : حاضر.
دخلت نادين المطبخ.
عُمر : مش هتاكلي يا نادين؟
نادين : لأ هعمل كوباية شاي علشان مصدعه.
عُمر : طب ما هو الصداع ده يمكن من قلة الأكل يا بنتي.
نادين : مليش نفس كوكي اقعدي كُلي.
عُمر : تعالي يا كوكي اقعدي هنا جنبي.
وبيقدم عُمر الطبق قدامها علشان تاكل.
_______
في شقة طارق.
أمل : ما تهدي بقى يا هنادي حصل ايه لكل ده؟
هنادي : مش سامعه يا أمل بتقولك ايه.. حامل!
ابنك عملها فيه واقنع البنت متاخدش حاجه تمنع الحمل دلوقت.
مريم وهي بتبكي : لا يا ماما باخد.
هنادي : امال ايه اللي حصل؟
مريم : معرفش.
أمل : ما تهدي بقى يا هنادي موتره البنت وخلتيها تعيط بسبب اللي بتعمليه ده ايه يعني لما حصل حمل الدنيا متهدتش.
هنادي : ودراستها يا أمل
دي حامل في شهر احسبيها كده ميعاد ولادتها على وش الإمتحانات بالظبط اعمل ايه دا دلوقت؟
أمل : متعمليش حاجه أكتر من إنك تدعيلها تقوم بالسلامة.
هنادي : اه يا اني أنا اللي عملت كده نفسي جواز ايه بس دلوقت ما كانت تكمل السنة عندي وخلاص.
أمل : يوووه بقى ما تبطلي يا ست انتي بنتك هاريه نفسها من العياط وكل دا بسببك.
بتطبطب أمل على مريم : اهدي يا مريم متخافيش هتعدي يا حبيبتي سيبي كل حاجه لوقتها.
هنادي : ووقتها متدخلش الامتحانات يا أمل صح؟
دي أخر سنة يا ناس اعمل ايه؟
أمل : أنا هاخد مريم واقوم امشي واسيبك تندبي لوحدك يلا يا مريم.
__________
في شقة سيف.
مليكة سندت سيف ونام في السرير.
مليكة : جيت ازاي؟
سيف : دكتور هشام لاقاني تعبان اداني اجازة.
مليكة : وقدرت تسوق العربية؟
سيف : حمزة وصلني لحد هنا بس أنا قولتله هطلع لوحدي علشان يروح يشوف شغله.
مليكة : طيب هعملك حاجه سُخنه تشربها.
سيف : لا مش هشرب حاجه اطفي النور دا بس علشان هنام شويه.
مليكة : حاضر.
مليكة خرجت من الغرفة : رايحه فين يا مامي؟
سهر : مروحه يا مليكة عاوزه مني حاجه؟
مليكة : اقعدي اتغدي معانا.
سهر : لا يا حبيبتي مش هينفع هروح لملك اشوفها وانتي ريحي شويه يا بنتي سيف عامل ايه؟
مليكة : تعبان بس قال هينام شويه هعمله حاجه ياكلها علشان ياخد الدوا.
سهر : أنا سلقت الفراخ وعملت شوربة خضار شوفي هتعملي ايه تاني
لو رز أبيض من غير سمن ولا زيت يكون احسن.
مليكة : اوك يا مامي.
سهر : انتي حاسه إنك احسن دلوقت ولا بتقوليلي كده علشان مقلقش.
مليكة : لا أنا حقيقي بقيت احسن بعد ما أكلت واخدت الدوا.
سهر : طيب لو احتاجتي حاجه ابقي اتصلي أنا هجيلك بكرة الصبح اطمن عليكي.
مليكة : اوك يا مامي مع السلامة.
_________
في فيلا هارون.. في غرفة ميرا.
هلا : وبعدين؟
ميرا : مامي قالت لي انهم منتظرين يعني رأينا بس جه جد محمد توفى وبعدين سكتنا بقى.
هلا : ومامتك متكلمتش تاني خالص في الموضوع ده؟
ميرا : لأ ما أنا بقولك حصلت ظروف والموضوع متفتحش تاني.
هلا : طب ما تتكلمي معاه.
ميرا : اتكلم معاه!
هلا : اه اعرفي إذا كان هو اللي طالب ايدك ولا مامته اللي جات كده من نفسها
مش بتقولي متكلمش معاكي خالص؟
ميرا : ايوه...هو متكلمش اروح أنا اكلمه يا هلا
ازاي بس؟!
هلا : أنا مبقولكيش يعني روحي اتكلمي معاه كده من الباب للطاق بس انتهزي أي فرصة مثلا وانتي داخله البيت قابلتيه طبعاً هو بيقولك ازيك وبيسأل عن اخبارك اللي هو العادي ده يعني انتي بقى وقتها افتحي معاه الموضوع وافهمي دماغه رايحه لحد فين.
ميرا : مامي قالت إنه هيجي يتقدم يعني
وهيبقى في فرصة نقعد مع بعض ونتكلم دا لو وافقت يعني.
هلا : طب كويس بس السؤال هنا بقى انتي رأيك ايه؟
ميرا : معرفش يا هلا أنا محتاره وخايفه.
هلا : خايفه من ايه؟
ميرا : خايفه مكنش فاهمه أنا عاوزه ايه.
هلا : بتحبيه؟
ميرا : بحبه!
هلا : طيب موافقه على المبدأ يعني يجي يتقدم وبعدين تدرسيه كويس وتقرري بعدها تكملي ولا لأ؟
ميرا : ممكن.
هلا : ممكن ايه بس يا ميرا ما هو لا اه لا لأ يا حبيبتي.
ميرا : بس علشان مامي جات.
هلا : هههههههههههه طب ما هي مامتك عارفه كل حاجه انتي مجنونه؟!
_________
في شقة طارق.
أمل : خلاص بقى يا هنادي.
هنادي قامت وقعدت جنب مريم.
هنادي : خلاص يا مريم اللي حصل حصل بقى هنعمل ايه.
أمل بفرحه : هو ايه اللي حصل حصل ده قولي مبروك بنفس يا هنادي
ههههههههههههه ألف مبروك يا مريم دا مراد هيطير من الفرحه لما يعرف.
هنادي : طبعاً وهو خسران حاجه؟!
أمل : هههههههههههه متقلقيش يا حبيبتي احنا معاكي وهنساعدك ومتشليش هم الامتحانات خالص وقتها هكون معاكي ومامتك كمان.
هنادي : اه يا وجع قلبي يا اني.
أمل : هههههههههههه
افرحي يا هنادي هتبقي جده.
هنادي : حاضر يا أمل هفرح.
أمل : فرفشي بقى يا مريوم وفكري هتفاجئي مراد بالخبر السعيد دا ازاي.
مريم : هقوله وخلاص.
أمل : لأ قوليله اه بس بـ أسلوب كده يتفاجئ بيه أكتر.
هنادي : دا أنا اللي اتفاجئت تلاقي ابنك عارف كل حاجه يا أمل.
مريم : لا يا ماما مراد ميعرفش حاجه دا أنا حتى كنت تعبانه الصبح ملمحش خالص بموضوع الحمل ده مع إن الأعراض كلها كانت بتقول كده.
هنادي : يعني كنتي عارفه.
مريم : كنت شاكه بصراحه بس قولت يمكن دا عادي علشان يعني باخد موانع للحمل زي ما قولتيلي.
هنادي : عاوزه اعرف مين الدكتور اللي انتي روحتيله وكتبلك الوسيله دي.
أمل : هههههههههههه خلاص بقى يا هنادي.
هنادي : طبعا يا أمل ليكي حق تفرحي وتضحكي كمان.
أمل : يا ستي خلاص بقى
ههههههههههههه تعالي يا مريم اوصلك مش مروحه برضه ولا مراد قالك هيعدي عليكي؟
مريم : لأ هروح علشان ألحق اجهز أكل.
أمل : لا متجهزيش حاجه أحنا هنشتري أكل يلا بينا عاوزه حاجه يا هنادي؟
هنادي : عاوزه سلامتك خلي بالك من نفسك يا مريم.
مريم تسلم على والدتها : حاضر يا ماما.
_________
في شركة وليد.
مدير مكتب وليد : ثواني حضرتك هدي للبشمهندس خبر.
آسر : لا مفيش داعي.
بيخبط آسر ومدير مكتب وليد واقف جنبه ومعترض على دخوله ومصمم يدخل الأول يدي وليد خبر.
وليد : في ايه ممدوح؟
ويتفاجئ وليد بـ آسر.
آسر : ايه يا بشمهندس وليد جيتلك في وقت غير مناسب.. اهلاااا سراج عندك ؟! طب كويس وفر عليه المشوار.
سراج : في ايه يا آسر بيه مش برضه واجب تحترم اللي أكبر منك.
آسر : عندك حق بس مش اللي يطلب من الناس تحترمه لازم هو كمان يكون بيحترم غيره وميقعدش ينهش في لحمه وياكل فيه.
وليد : جاي ليه يا آسر؟
آسر : خلي مدير مكتبك يشوف شغله علشان نعرف نتكلم.
وليد يشاور لمدير مكتبه فيخرج.
آسر بيقفل باب المكتب.
آسر : شوف يا سراج أنت راجل كبير على مشارف  التمانين مش كده ولا أكبر كمان صح ؟
سراج : عاوز تعرف سني ليه يا آسر؟
آسر : يعني مبقاش في العمر قد ما مضى ياريت تلم لسانك وتحترم نفسك وسيرتي وسيرة عيلتي متجيش على لسانك.
نظر سراج لوليد.
آسر لسراج : ايه بتبصله ليه هو صحيح ندل
ومعندوش دم وخاين وفيه كل العبر بس الكلام جه من عندك أنت الأول وهو اللي نقله ليه وصحيح كمان المثل بيقول ما شتمك الا اللي بلغك بس كمان برضه انت اللي هلفط في الكلام من الأول وأنت عارف كويس قوي إن كله كذب ومفيش حاجه من اللي قولتها صح غير إنك كتت متجوز حماتي والقلم اللي اخدته من مراتي فاكره؟
شكله لسه معلم على وشك ومخليك مش طايق نفسك.
وليد : آسر ياريت مفيش داعي للكلام ده.
آسر : بقى خايف على مشاعر المحامي بتاعك ومخوفتش على مشاعر أخوك بالكلام القذر اللي قولتهولي اسمع أنت وهو أنا أقدر ارفع عليكم قضية سب وقذف وعارف إني هكسبها فبقول تخرسوا خالص وكل واحد يحط لسانه جوه بؤه بدل ما احط جزمه في بؤك أنت وهو.
وليد : أنت بتقول ايه؟!
آسر : بقول تتكتم خالص ومنطقش بولا كلمة اسمع الشغل اللي كنت بتاخده عن طريق الناس اللي بتتعامل معانا أنا كنت بعديه وبطنش بمزاجي وبقول دا لـ اخويا لكن هتقل أدبك هربيك وبالأدب.
سراج قايم يخرج.
آسر مسكه من الكرافته اللي لابساه : الفلوس اللي قولت سهر قبضتهم راحت رجعت كل مليم مامتها ادتهولها وفوقيهم قلم حلو على وشك يا متحرــ*ـش يا عديم النخوه والشرف.
وليد قرب بسرعة يخلص سراج اللي يدوب قادر يتحرك من ايد آسر.
آسر بيضرب وليد فيوقعه على الأرض.
آسر : ايه متفاجئ صح
فاكر إن آسر تعبان يا عيني وخلاص صحته راحت لأ يا حبيبي أنا قلبي حديد وصحتي بمب
وأنت يا راجل يا شايب أنت لسانك ده تحطه جوه بؤك زي ما قولتلك أنت اصلا مفكش نفس ولا حمل تتسجن ساعة واحدة  يبقى تغور وتنسانا خالص.
خرج سراج من المكتب.
آسر : أما أنت يا وليد فـ أحب اقولك هترجع للصفر من تاني وبكرة تشوف.
وخرج آسر من المكتب.
وليد : بقى كده يا آسر.. مااااشي هنشوف مين اللي هيضحك في الأخر.
_________
في غرفة نادين.
نادين : لأ مجاش خالص من يوم ما سيبت البيت ولا سأل عليه حتى سيف لما بيجي يقعد مع ماما مبيوصلنيش أي كلام عنه وكأن خلاص مفيش بينا أي حاجه الولاد بس اللي سيف اخدهم يوم الجُمعة علشان مامته طلبت تشوفهم وطبعا كنت هدخل في خناقه مع ماما فسيبته ياخدهم.
فريدة : مش عيب لما تتصلي بيه وتتفقوا تتقابلوا بره علشان توصلوا لحل يا نادين.
نادين : هو عارف أنا عاوزه ايه كويس قوي يا فريدة.
فريدة : يعني انتي لسه عند رأيك يا نادين بعد شهر ونص سايبه بيتك فيهم؟!
نادين : لو تنازلت هيفكر اني ضعيفه وقليلة الحيله.
فريدة : بالعكس هو هيعرف إنك شاريه بيته وشارياه ومش عاوزه حاجه تفرقكم عن بعض حتى لو تنازلتي عن طلب زي ده لإن صعب تنفيذه دا ولد وحيد يسيب مامته ازاي وهي اصلا مش عامله ليكي مشاكل ايه الداعي إنك تطلبي بيت لوحدك ما هو يعتبر البيت لوحدك يا نادين أنا واخده شقة في عمارة عارفه يعني ايه يعني مملكش غير الشقة وبس ومبسوطه وسعيدة طالما قافله عليه بابي وعايشه ملكة جوه بيتي لكن انتي عندك دورين وحتى بيت حماتك بتدخليه صاحبة بيت مش ضيفه اهو عندك تلات أدوار يعني بيت كامل والست يا حبيبتي طيبه خالص معاكي لا بتهش ولا بتنش زي ما بيقولوا.
نادين : بس عندها حب تملك لكل حاجه ولادي كإنهم ولادها جوزي مش معتبراه ابنها وبس لأ دا كل حياتي طلباتها ومشاوير الدكتور دي بس لو وصلت لحد أول الشارع ينزل جري يجيبها.
فريدة : دي مامته يا نادين عارفه يعني ايه مامته
طب ما هو بيجري يجيبك من عندي ولا عند ماما واي مكان بتروحيه بيجي ياخدك ومشاوير الدكاترة كمان عارفه ليه علشان هو راجلك وراجل مامته كمان اه متبصليش بـ استغراب كده الست مش وخداه يعني أربعة وعشرين ساعة عندها ولا مستكترة يقضي مصالحها زي ما بيعمل كده في بيته ولا مامته حاجه وانتي حاجه تانية ما هو فهميني علشان بصراحه أنا مش فاهمه حاجه ولا عارفه انتي عاوزه ايه بالظبط؟!
نادين : مش عاوزه حاجه يا فريدة دا زي ما يكون ماما اللي بتتكلم بالظبط.
فريدة : يبقى الكلام مش جاي على هواكي أنا خارجه هقعد مع ماما شويه علشان نص ساعة وماشيه سلام.
نادين : مع السلامة.
_______
في شقة مراد.
بيفتح باب الشقة وداخل جوه يتفاجئ النور مطفي.
بيحاول يشغل النور مرة تانية.
مريم : متحاولش أنا فاصله الكهرباء.
مراد يلتفت لمصدر الصوت كانت مريم بتولع الشموع.
مراد بابتسامة ويغمز لها : جو رومانسي يعني وكده.
مريم : هههههههههههه
مراد : ليلتنا زي الفل.
مريم : هههههههههههه
غير هدومك وتعالى يلا علشان ناكل أنا واقعه من الجوع.
مراد : ثواني واكون عندك.
يحدف مراد المفاتيح والموبايل والملف اللي في ايده ويدخل جري.
بعد شويه.
مراد : انتي فاصله كهربة الريسبشن بس؟
هزت مريم راسها.
مراد : أنا لاقيت انوار باقي الشقة شغاله قولت ايه ده في ايه.
مريم : طب تعالى يلا بقولك جعانه.
مراد بابتسامة وقرب منها : وأنا نفسي مفتوحه قوي الليلة.
مريم بتقسم الفراخ وبتحط الحمام في الطبق وبتقدمه لمراد.
مراد : مش معقول لحقتي تعملي كل الأكل ده؟!
مريم : هههههههههههه
دا سر بقى هقولك بعدين.
مراد : ايه دي تورته؟!
مريم : اه علشان في مناسبة سعيدة هنحتفل بيها بعد الأكل.
مراد : أنا مش فاهم حاجه مناسبة ايه لسه بدري أنا في شهر اتنين وانتي في أربعة وجوازنا في سبعه
ايه المناسبة قوليلي؟
مريم : تاكل الأول وبعدين اقولك.
مراد : أكل مااكلش ليه يعني؟!
ههههههههههههه
________
في فيلا مراد.
هشام : هههههههههههه
أمل : تقولها ازاي وانتي بتاخدي موانع للحمل بس البنت صعبت عليه قوي يا عيني قعدت تعيط وخايفه كده ومبتترعش من كلام مامتها فين وفين بقى لحد ما فكت كده وعدينا جيبنا أكل وحلويات وشوية زينة علشان تفرفش كده
وقولت لها زيني البيت وجهزي السفرة عقبال ما مراد يجي وزمانهم دلوقت بياكلوا ومبسوطين.
هشام يُقبل يدها : خير ما عملتي يا اموله.
أمل : امال اسيبهم يتعكننو لأ لازم يفرفشوا ويفرحوا بالخبر السعيد ده.
هشام : يلا بقى عقبال ما نطمن على زينة في بيتها
والجو يروق يا اموله.
أمل : يعني الجو لما يروق هتوديني فين يا اتش؟
هشام وهو بيقرب منها : أي مكان تشاوري عليه يا حبيبتي.
أمل : أي مكان أي مكان؟
هشام يغمز لها : المهم ترضي علينا يا أم هشام.
أمل : هههههههههههه ياااه من زمان مقولتيش الاسم ده.
هشام : العيال كبرتنا يا اموله بس احنا لسه فيها نقدر نرجع شباب من تاني.
أمل : هههههههههههه
_______
في شقة مراد.
مراد : لأ انتي بتهزري.
مريم : طب اعملك ايه علشان تصدق؟
اه اقولك هجيبلك التحليل اللي عملته النهاردا.
دخلت جوه وفتحت الشنطة اخدت ورقة التحليل وخرجت : اتفضل.
مراد بيقرا اللي مكتوب في الورقة.
مراد بفرحه : مبروك يا حبيبتي شوفتي بقى اهو حصل وانتي برضو بتاخدي اللي يمنعه.
مريم : بس ماما اللي صعبانه عليه قوي.
مراد : ليه؟
مريم : قعدت تعيط لما عرفت خايفه دا يأثر على دراستي.
مراد بيحضنها : متخافيش مفيش حاجه هتتأثر.
مريم : ولا حتى حبك ليه ومش هترجع من بره تزعق من دوشة البيبي وتقولي عاوز ارتاح في بيتي؟
مراد : لأ دا أنا هحبك أكتر علشان هيبقى في حته مننا بتربط ما بينا وبتقوي علاقتنا أكتر وهنخاف ونراجع نفسنا كتير ونحافظ على البيت ده علشان خاطره.
مريم : هههههههههههه هو مين؟
مراد وهو بيحملها : ابننا يا حبيبتي.
مريم : طب خُد بالك علشان البيبي هنا
ههههههههههههه بتعمل ايه؟
مراد : بحاول اسمع هو مبيتحركش دلوقت؟
مريم : هههههههههههه لأ وبعدين حتى لو بيتحرك هتسمع ايه دا كلام أفلام يا حبيبي أنت بتشوف بس.
مراد : لأ بسمع نبضه بالسونار اللي بيتعمل.
مريم : هههههههههههه أنت صح معلش بقى لسه مستجده.
مراد : هههههههههههه
أنا فرحان فيكي قوي.
بتخبطه في كتفه.
مراد : هههههههههههه
علشان تعرفي المكتوب ممنوش مهروب لو حتى عملتي ايه هيحصل هيحصل.
مريم : ميرو أنا نفسي رايحه للمانجا.
مراد : انزل أملا التلاجة كلها مانجا.
مريم : نفسي في رنجه.
مراد : اوك شغال بس اوعي تطلبي حاجه تانية.
مريم : هههههههههههه
لأ أنا مباكلوش.
مراد : هههههههههههه
حلو قوي احنا كده تمام
تعالي بقى ندخل ننام.
__________
في منزل والدة معتز.
شهد : ما تعزم علاء بكرة على العشا يا معتز.
معتز : ايش معنى؟
شهد : يعني مش صاحبك؟
معتز : ما أنا ليه صحاب كتير ايش معنى علاء يعني؟
شهد : اه عندك صحاب بس علاء أقرب واحد ليك.
معتز : شهد انتي عاوزه ايه بالظبط من غير لف ولا دوران خليكي واضحه وصريحه.
شهد : هو عيب يا معتز لما احاول ارجع لجوزي؟
معتز : بس علاء مش جوزك دلوقت يا شهد.
شهد : عارفه مفيش مشكلة إننا نحاول نرجع لبعض ونتجوز من جديد.
معتز : بس هو ملمحليش بحاجه زي كده.
شهد : مش مهم يلمح أنا بقولك إني عندي رغبة نرجع لبعض أنا عاوزه ارجع بيتي علشان معتز ابني كمان.
معتز : لسه بتحبي علاء يا شهد؟
شهد : هنكر يعني يا معتز
ايوه لسه بحبه وبعدين أنا مشوفتش منه حاجه وحشه طول عمره بيعاملني كويس وبيحترمني وعمره ما غلط فيه شوف لحد دلوقت بيجي يطمن على ماما علشان فاكر إنه أكل عيش وملح في بيتنا وماما بتحبه حتى بعد ما طلقني وايوه ملمحش ليه بـ أي حاجه ومقتصر قوي معايا في الكلام لما بيجي ودا هيجنني أكتر خايفه يعجب بواحدة ويتجوزها مش أنا أولى من غيري صح؟
معتز : تمام بس هقولك حاجه يا شهد رجوع لعلاء من غير تغيير منك كده احنا معملناش حاجه هنوصل برضه لنقطة الصفر وهترجعي تاني ندمانه
وتقولي خليه يسامحني ويحصل نفس اللي حصل دلوقت ده.
شهد : معتز ساعدني ارجع بيتي.
معتز : هتتغيري يا شهد؟
شهد : هحاول.
معتز : هتعيشي في حالك وملكيش دعوة غير بنفسك بس؟
شهد : ماشي يا معتز خلاص.
معتز : لأ أنا كلامي واضح هتعيشي في حالك وملكيش علاقة لا بمرات ابنك ولا بعلاقة علاء مع أهله؟
شهد : ماشي يا معتز خلاص بقى.
معتز : معرفش ردك كده مش مريحني.
شهد : قولتلك حاضر يا معتز هتغير وهعيش في حالي بس حاول مع علاء لإنه مبيدنيش ريق حلو صحيح بيجي هنا ومهتم بماما لكن مبيتعاملش معايا خالص بقول يمكن عاوز يحسسني إني غلطت وبيديني درس علشان افوق لنفسي وإلا كان بعد خالص لإن القرب ده هو اللي خلاني ارجع احن ليه تاني دا عشرة عمر يا اخويا.
معتز : وعلشان كده أنا هحاول اساعدك واساعده بس علشان خاطري متخلنيش اندم إني ساعدتك.
شهد : حاضر مش هتندم متقلقش.
معتز : طيب أنا ماشي عاوزه حاجه؟
شهد : لأ سلامتك تصبح على خير.
___________
في شقة طارق.
هنادي : طارق.. طارق قوم اصحى يا ابني أنت نايم كده من ساعة ما رجعت من الجامعة هما كانوا بيعذبوك هناك ولا ايه؟!
ههههههههههههه
طارق بصوت ناعس وابتسامة : صباح الخير يا عمتي.
هنادي : هههههههههههه مساء النور الصبح لسه مجاش احنا بالليل يا حبيبي قوم علشان تتعشا أنت مجوعتش ولا ايه؟
طارق : بصراحه يعني جعان.
هنادي : طب قوم أنا جهزت العشا وقعدت مستنياك بس لاقيتك مش عاوز تصحى قولت ادخل اشوف مالك.
طارق : لا أنا كويس بس زي ما تقولي كده يا عمتو   من الفرحه بقالي يومين منمتش ولما رجعت كنت تعبان قوي محستش بنفسي.
هنادي : طب قوم بقى علشان تفتح نفسي أنا مش عارفه أكل لوحدي.
طارق : اهو رهوان هقوم بس اغسل وشي.
هنادي : طيب وأنا هقعد بره استنى لما تيجي.
________
تاني يوم في فيلا آسر.. في المكتب.
آسر : هو كمان اللي بيشتكيلك مني؟!
دا على اساس ايه إن أنا اللي اهانته وأنا اللي رفعت عليه قضية ووقفت قصاده في المحاكم وأنا اللي جيبت سيرته وسيرة مراته بكل وقاحه وقذاره ومراعتش الدم اللي بينا لأ يا منه انتي بتقولي مهما كان أنتو اخوات
ومينفعش إني اهدده اخرب بيته طيب واحنا مكناش اخوات لما عمل كل ده هو كده مكانش بيخرب بيتي ولا حاجه؟!
منه : يا حبيبي ما أنا عارفه كل ده وفاهمه إنك رد فعل مش أكتر بس ابعد عنه خالص لا هو يقربلك ولا أنت كمان لكن لو دخلنا في دايرة الانتقام دي مش هنخلص وهنفضل بناخد التار من بعض ابعد عنه خالص يا آسر.
آسر : ما أنا بعيد عنه عمري ما قربت منه علشان اخد شغل ولا اخسره ولا اجيب سيرته بكل سوء مع الناس اللي بيتعامل معاهم لكن هو اللي عمل كل ده سيبك من الأمور المادية دي وقوليلي هل كلامه عن مراته بالاسلوب ده يتسكت عليه ولا علشان اتهاونت معاه في حاجات كتير ماديه افتكر آسر دا الحيطه المايله اللي كل ما يتنزنق يسند عليها
وهيفضل يشيل ويتحمل لا يا منه أنا قلبي اتوجع منه بما فيه الكفاية والمرة دي لازم اخد حقي وادفعه تمن كل كلمها قالها في حق سهر.
منه : طب وطي صوتك.
آسر : متخافيش الباب مقفول وسهر اصلا فوق أنا قولتلها متنزلش مهما حصل لإني عارف إنه جه يجري عليكي ويشتكيلك مني وانتي طبعا جايه فاكره إن الأمور ممكن تتصلح مفيش حاجه هتتصلح يا منه واللي ولع النار يطفيها.
منه : أنا صعبان عليه اشوفكم كده وقلبي وجعني قوي.
آسر : سهر تستاهل كل الكلام اللي اتقال عليها ده يا منه هل انتي شايفه إنها علشان تحاملت على نفسها وقررت تكمل معايا يبقى دا جزاءها يتكلم عن أخلاق مراتي بكل خسه ونداله وفاهم إني هغلط نفس الغلط بتاع زمان لما شكيت في أخلاقها لا خلاص انتهى الواحد بيتعلم من أخطاءه علشان ميكررهاش سهر اللي يوم ما قولتلها بحبك وعاوز أتقدم لك جريت وسابت المكتب وقعدت اسبوع متجيش الشركة وأنا اللي روحت اتحايلت عليها علشان ترجع سهر اللي في فترة خطوبتها عمرها ما سمحت ليه إني امسك ايدها هل كل ده كانت بتمثل الأخلاق والاحترام
سهر اللي لو سيبتها حتى فين برجع الاقيها هي اللي بتدور عليه اللي اتحملت كل أذى عاشته معايا ومع اهلي وانتي عارفه كويس قوي حصلها ايه وهي اصلا يا حبيبتي مكانتش ناقصه اختارتني علشان اتعشمت إني المنقذ ليها أنا اللي هحبها واحتويها واعوضها عن كل اللي شافته في حياتها وقفت جنبي وأنا معنديش أي حاجه بعد ما كنت رئيس مجلس إدارة في شركة بابا وعندي كل حاجه تتمناها أي بنت تفكر ترتبط بيه سهر لو وخداني علشان فلوسي مهربتش ليه لما البنك فلس وقررت هي اللي تساعدني وتبيع الشقة اللي ورثتها عن باباها ومامتها و معندهاش أي حاجه غيرها يعني لو خسرت لـ أي سبب هي مكانتش هتلاقي مكان تعيش فيه سهر باتت ليلة في الشارع عارفه يعني ايه؟!
كل دا علشان رفضت ترجع عند مامتها لما كانت متجوزه سهر مقبضتش حاجه من مامتها زي ما قال سراج هو بس اللي مريض وفاكر الناس كلها زيه حب يرد القلم اللي اخده منها علشان هي كانت عارفه إنه قذر وحقير وراجع بعد كل السنين دي ومش ناسي التار اللي له عند سهر بس منكرش إنه كان سبب إن سهر تشتغل معانا في الشركة وأعرفها أكتر بس كان بيعمل كل ده علشان يتقرب من بابا مكانش عارف إن ده هيكون سبب إني اطرده من حياتنا بعد ما عرفت اللي علمه.
منه : وأنا مبنكرش إن سهر وقفت جنبك واتحملت كتير وخصوصاً أذى هايدي ليها ومنساش أبدًا إنها بتعتبر نفسها عندها أربع أولاد وعمرها ما فرقت بينهم بالعكس أنا بحس بحب من ناحية علي ليها أكتر من مجدي كمان وبيخاف عليها بجنون.
آسر : دي حقيقة ودا مجاش من فراغ كان سببه حب سهر ليهم.
منه : بس علشان خاطري ابعد عن وليد وانسى حوار الانتقام ده هو أكيد بعد اللي قولته ليه هيبطل اللي بيعمله ده.
آسر : للأسف أشك في ده وليد كل ما يعمل محاولة علشان يدمرني وتفشل يخترع حاجه جديد وزمانه بيرتب لحوار تاني بعد ما خطته فشلت.
منه : لأ هو خلاص مش هيعمل حاجه تانية.
آسر : وايه اللي يثبتلي ده؟
منه : أنا بقولك اهو لو فكر بس يعمل حاجه وقتها اعمل اللي أنت عاوزه.
_______
في شقة سيف.
حمزة : يعني بقيت احسن دلوقت.
سيف وهو بيتعدل ويقعد على السرير : اه احسن دلوقت.
الباب بيخبط.
سيف : ادخل.
مليكة : الشاي يا سيف.
يقوم حمزة ياخد الصنيه منها.
حمزة : طب ليه التعب ده شاي وكيك وساندوتشات كمان!
سيف : علشان لسه مفطرتش.
حمزة : هههههههههههه يعني دا ليك مش ليه؟
شوفت يا أخي وأنا اللي افتكرت ههههههه
سيف : هات علشان جعان قوي تسلم ايدك يا أم يوسف.
مليكة بابتسامة : بألف هنا وشفا.
وخرجت مليكة من الغرفة.
حمزة : اتفضل يا عم محدش زيك نايم والاكل بيجيلك لحد عندك.
سيف : تحب تنام كده ويجيلك الأكل لحد عندك؟
حمزة : اه بس مكنش تعبان ولو إني أشك إن حد هيعبرني.
سيف : ليه يا ابني أنت في شهر العسل مكانتش نادين بتجيبلك الأكل لحد عندك؟!
ههههههههههههه آآآه.
حمزة : ايه مالك؟
سيف : لما بضحك حاجه هنا بتوجعني.
حمزة : معلش دا من أثر دور البرد اللي اخدته
نادين بقى يا سيف عمرها ما بتدي هي بتاخد بس علشان كده أنا قررت أسافر واسيب البلد خالص.
سيف : أنت مجنون تسافر تروح فين؟!
حمزة : مجنون ليه علشان بفكر ابعد عن المشاكل واعيش في روقان؟
سيف : وهي الغربة روقان برضه يا حمزة ولا وحدة وشغل ليل ونهار وبعد عن أهلك وبيتك وبلدك.
حمزة : معاك بس أنا هنا في وجع دماغ عاوز اريح نفسي من كل ده واهو اسيبها تعيش زي ما هي عاوزه وابقى ابعت مصاريف الولاد وخلاص.
سيف : أنت مش مسافر يا حمزة وكل اللي بتقوله ده كلام في الهوا.
حمزة : مين قالك الكلام ده؟
سيف : اسمع مني بس أنا عارفك هتسيب مامتك لوحدها ما هو لو قادر تعمل كده كنت سيبتها ووافقت على طلب نادين وبعدين أنت مجربتش السفر قبل كده و مرتحتش؟!
حمزة : رجعت علشان خاطر بنت أختك وكنت مغفل يوم ما فكرت ارجع.
سيف : اعقل يا حمزة أنت لا في سفر ولا أنت أصلا هتقدر تسافر لو في فرصة حقيقية.
حمزة : بقولك ايه كُل وأنت ساكت ومتوجعش دماغي.
سيف : ايه الصوت ده؟
حمزة : معرفش اطلع اشوف فيه ايه.
قام سيف يجري كانت حلا واقعه في الأرض على دماغها ومليكة بتطمن عليها.
سيف : ايه حصل ايه؟
مليكة : معرفش شوف حلا كده.
سيف : مالها؟
مليكة : وقعت على دماغها.
حمزة : وريني كده يا سيف.
بياخد البنت يطمن عليها.
حمزة : متخافش مفيهاش حاجه.
مليكة : اتأكد كده.
حمزة : اطمني اهي مفيش حاجه مش كده يا صغنن يا جميل أنت هههههه
سيف : هاتها كده يا حمزة.
حمزة : اتفضل اهي سليمه وزي الفل هههههههه
________
أمام فيلا كريم.
محمد : لا طبعا أنا اللي قولت لمامي.
ميرا : طب مكلمتنيش ليه على طول؟
محمد : اكلمك اقولك ايه؟
ميرا : تصارحني عادي مش دي رغبتك؟
محمد : اه طبعاً رغبتي
بس يعني كنت محرج اكلمك معرفش رد فعلك هيكون ايه قولت مامي تكلم مامتك الأول.
ميرا : ومش عاوز تعرف ردي؟
محمد : أكيد يعني.
ميرا : خلاص بابي هيرد على باباك الليلة.
محمد : طب ممكن تقولي رأيك انتي.
ميرا : هتعرف بالليل.. سلام.
وتركته ودخلت بيتها.
محمد واقف وبيحاول يفهم هل دا معناه إنها موافقة ولا محرجه تقوله إنها رفضاه وعاوزه والدها هو اللي يوصل ده لوالدة بدون احراج.
فريدة واقفه في بلكونة غرفة النوم وبابتسامة.
في التليفون... 📞
فريدة : لأ سابته ودخلت جوه.
ندى : كده الصنارة غمزت يا فراولة.
فريدة : هي كده الصنارة غمزت يا ندى؟!
ندى : اسمعي مني بس طالما وقفت اتكلمت معاه يبقى في حاجه عاوزه تقولهاله انزلي بس لما ابنك يدخل واقري كده من تعبيرات وشه الحوار اللي دار ما بينهم.
فريدة : تفتكري تكون قالت له إنها موافقة ولا تكون رفضت بس بشياكه؟
ندى : يا ستي ما تنزلي وتعرفي بنفسك انتي بتسأليني؟!
فريدة : أنا بكلمك عن احساسك.
ندى : لأ أنا مبحسش ايه رأيك بقى؟!
فريدة : هههههههههههه
صح انتي معندكيش احساس في دي انتي مكدبتيش.
ندى : بقى كده طيب يا فريدة اقفلي ومعدتيش تتصلي تاني.. ماشي؟
وراحت ندى قافله.
فريدة : ايه دا هي زعلت ولا ايه؟!
أنا كنت بهزر يا نونه..لا نونه ايه دي قفلت اما اكلمها اصالحها ولا انزل لمحمد اعرف منه ميرا قالت له وندى ابقى اكلمها بعدين أصل لو اتصلت مش هترد عليه هتتقل شويه.
_____________
في شقة سيف.
سيف : معرفش هو اللي قال لي الكلام ده.
نادين : يعني محجزش؟
سيف : لا ما اظنش بس حمزة لما بيحط حاجه في دماغه انتي عارفاه.
نادين : عارفه دماغه يا سيف بس خليه براحته.
ياسمينا داخله الغرفة : ألف سلامة عليك يا سيف.
سيف : متشكر يا ياسمين اقعدي استريحي.
مليكة : الشاي يا سيف.
سيف : حطي الصنية عندك يا مليكة.
ياسمينا : هاتي يا حبيبتي.
سيف : بطل شقاوة يا يوسف.
ياسمينا : سيبه يلعب هو فرحان إني جيت هههههه
وبعدها نظرت لنادين ورجعت تتكلم مع سيف.
سيف بيغمز لها.
ياسمينا : ايه مالك؟
سيف : ها... بعدين بعدين.
نادين نظرت لسيف.
سيف : اشربي الشاي يا نادين وكُلي الكيك مليكة اللي عاملاه.
ياسمينا : جميل تسلم ايدها.
مليكة بابتسامة : متشكره يا طنط.
نادين : أنا هاخد كوبايتي واطلع اقعد بره.
خرجت نادين من الغرفة قربت ياسمينا تقعد جنب سيف : احسن برضو.
مليكة : طيب أنا هطلع اقعد مع نادين.
__________

نكمل الحلقة الجايه.