#انت_قلبي٣
___________
الحلقة ٩١
في التليفون 📞
نادين : مش خلاص ريحتها مني عاوزه ايه بقى؟
فريدة : مينفعش تتكلمي عن ماما كده يا نادين
أنا بجد مستغربه انتي مضايقه إن ماما قلبها على مصلحتك وكانت عاوزاكي تقعدي في بيتك معززه مكرمه ولا انتي شايفه إن أي حد له وجهة نظر غير اللي انتي شايفاها يبقى بيكرهك؟!
نادين : وانتي كمان بتدافعي عنها؟
فريدة : يا بنتي ادافع عنها ايه دي مامتك يا نادين انتي واخده بالك من اللي بتقوليه ولا فاكره إنك بتتكلمي عن واحدة صاحبتك جرالك ايه مش فاهمه؟!
نادين : بقولك ايه يا فريدة أنا مصدقت إن الولد نام عاوزه حاجه علشان هدخل أنام أنا كمان.
فريدة : لا عاوزه سلامتك.. سلام.
نادين : مع السلامة.
_________
في فيلا كريم.
فريدة : طب اسمعني وبلاش اسلوبك ده.
كريم : قولتلك مش سامع حاجه وسبيني بقى دلوقت اخرج.
فريدة : يعني مصمم إنك تخاصمني مش كده؟
كريم : اخاصمك ليه مش عملتي اللي انتي عاوزاه وقدرتي تاخدي بتارك اللي أنا معرفش ايه هوه بس مش مهم المهم إنك تكوني مستريحه دلوقت وتفكري في حيله جديدة تردي بيها كل اللي فات يا بنت عمي.
فريدة : حاجه عجيبه بصراحه يعني أنا لما اتكلم معاك بكل بصراحه واحكيلك عن اللي حصل اللي هو مفيهوش أي حاجه غلط بالمناسبة يبقى برد كرامتي وبخلص تاري يا كريم؟
كريم : انتي ادرى بنفسك يا فريدة وطالما متأكدة إنك معملتيش حاجه غلط خلاص بتبرري ليه ايه دلوقت؟!
فريدة : أنا مبررش وواثقه قوي من نفسي.
كريم : خلاص اهم حاجه ثقتك في نفسك دي.
فريدة : ايه بقى بتاع ستات اللي قولتها امبارح دي؟
كريم : مش هو دا اللي في دماغك خلاص صدقي
اللي عاوزه تصدقيه بقى ممكن اخرج دلوقت ولا في حاجه تانية عاوزه تقوليها؟
فريدة : لا يا كريم اتفضل.
كريم : سلام عليكم.
فريدة : وعليكم السلام.
يخرج كريم ولسه فريدة هتقعد التليفون يرن.
في التليفون 📞
فريدة : الو.. وعليكم السلام.. صباح الخير يا ندى.
ندى : صباح النور بتعملي ايه؟
فريدة : لسه اهوه كنت بفطر بعد الولاد خرجوا.
ندى : وجوزك خرج؟
فريدة : ايوه.. ليه؟
ندى : فاضيه يعني تيجي تقعدي معايا شويه؟
فريدة : اجي عندك ليه ما كنت عندكم امبارح يا ندى.
ندى : وفيها ايه يا فريدة ما تيجي نقعد مع بعض شويه.
فريدة : طب ما تيجي انتي.
ندى : لا معلش تعالي انتي.
فريدة : ماشي هشوف كده وابقى اكلمك اقولك.
ندى : ما تقوليلي دلوقت جايه ولا لأ.
فريدة : بصراحه شديت شويه مع كريم ومش عاوزه اتصل بيه النهاردا.
ندى : ليه يا خايبه متخانقه مع جوزك ليه علشان الموضوع إياه دا برضو؟
فريدة : أنا مش عاوزه اتكلم في الموضوع ده لو سمحتي يا ندى.
ندى : خلاص براحتك هاه هتيجي ولا لأ؟
فريدة بتنهيدة : حاضر جايه هبعتله مسج أقوله.
ندى : طيب متتأخريش علشان نتغدا مع بعض وهاتي جميلة معاكي.
فريدة : جميلة مع أخواتها في النادي.
ندى : كده طيب تعالي بقى هتقعدي لوحدك تعملي ايه ولا كنتي ناويه تروحي النادي؟
فريدة : لا كنت هطلع أنام مليش مزاج اعمل اي حاجه.
ندى : شوفتي أنا حاسه بيكي ازاي تعالي اهوه نفضفض مع بعض شويه.
فريدة : امممم... نفضفض!
يبقى اللي جه في دماغي صح بقى.
ندى : هو ايه اللي جه في دماغك ده؟
فريدة : لا لما اجي واسمعك هعرف إن كان صح ولا لأ.
ندى : ماشي يا أختي.. سلام.
وتقفل ندى مع فريدة اللي تبعت رسالة لكريم.
فريدة بتكتب : كريم أنا خارجه رايحه لندى 🙂
كريم بيرسل : 👍
فريدة تكتب : يعني حتى مش قادر تيجي على نفسك وتكتب أي حاجه! 🙄
كريم : 👍
فريدة : تاني؟!😕
هو أنت ايدك بتوجعك ولا ايه؟!
كريم : عاوزه ايه يا فريدة دلوقت ما قولتلك ماشي روحي.
فريدة : فين ده؟!
كريم : اهوه 👆فوق 👍
فريدة : ماشي يا كريم بس ابقى خليك فاكرها.
كريم : 👍
فريدة : دا أنت مستفز يا أخي 😏
كريم : 👍
فريدة : سلام يا كريم أنا هقفل ومتبعتليش الصباع دا تاني.
كريم : 👍
فريدة : 🤨
أنت تقرأ
أنت قلبي الجزء الثالث
Hombres Lobo(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
