أنت قلبي الجزء الثالث

الحلقة ١٤٩

#انت_قلبي٣
_________
الحلقة ١٤٩

في شقة سيف.
مليكة قاعدة وايدها على خدها وسرحانه.

سيف قلق فقام يشوفها.
سيف : مليكة انتي هنا؟!
مليكة تفوق من سرحانها : عاوز حاجه يا سيف؟
سيف : ايه اللي مقعدك هنا يا حبييتي منمتيش ليه؟
مليكة : حاضر هقوم أنام اهو.
سيف : فكرتك قومتي تذاكري.
مليكة : لا مليش مزاج.
سيف : طب ادخلي نامي علشان تصحي فايقه الصبح ان كنتي عاوزه تذاكري ولا تقعدي مع الولاد.
مليكة : حاضر.
وقامت دخلت تنام قبله.
مليكة : كنت فين؟
سيف : بشرب مين اللي اخد الازازة اللي كانت هنا؟
مليكة : يوسف قام عطشان فشربته وسيبتها جوه.
سيف : طيب تصبحي على خير.
ونام سيف فقامت مليكة لما افتكرت إنها تركت عقد الشقة على الكنبه مكان ما كانت قاعدة راحت أخدته واحتفظت بيه في الدولاب.
________
في التليفون.. 📞
مريم : أنا كويسه يا ماما
اه مراد هنا بس قاعد قدام التليفزيون.
هنادي : قاعد قدام التليفزيون!
مريم : أصل بيقول في ماتش بيتفرج عليه وأنا مليش في الكورة قولت يقعد بقى يتابعه بدل ما ينزل يتفرج عليه في حته تانية.
هنادي : هههههههههههه قوام كده دا انتو لسه عرسان.
مريم : خليه براحته مش عاوزه اخنق عليه.
هنادي : عاقله يا حبيبتي طيب اسيبك بقى يمكن اجيلك بكرة ولا حاجه قبل ما تسافروا.
مريم : ياريت يا ماما أنتو وحشتوني قوي.
هنادي : قوام كده لحقنا نوحشك؟
مريم : من أول دقيقة سيبتكم فيها.
هنادي كانت هتبكي فقالت لها : طيب يا حبيبتي مع السلامة هشوف كده اخوكي ظروفه ايه بكرة وابقى اجيلك.
مريم : ماشي مع السلامة.
وقامت مريم خرجت من الغرفة وجات وقفت وراء مراد من غير ما يحس بيها.
مراد مندمج في الماتش : يا عم بقى العب مش كفاية الفرص اللي ضيعتها
ايوه.. ايوه هييييييييييه وجول وجول وجوووووول هههههههههه
مريم : دا أنا وشي حلو بقى.
التفت مراد ليها وبابتسامة مسك ايدها فقعدت جنبه وطبع قُبله على كف ايدها : طبعًا يا حبيبتي اقعدي بقى كملي معايا الماتش.
مريم : بس أنا مبحبش الكورة.
مراد : حبيها علشان خاطري ما هو أنا مش قادر اسيبك قاعدة لوحدك ولا هعرف استريح
و الماتش شغال وأنا معرفش النتيجة ايه.
مريم : للدرجة دي الماتش مهم قوي كده؟
مراد : مش أهم منك يا روحي.
مراد اندمج في الماتش مرة تانية ومريم حاولت تعمل نفسها بتابع معاه لكن دماغها كانت في حته تانية خالص لحد ما انتهى الماتش لصالح فريق مراد اتنين واحد.
قام يهلل وحملها وهو بيحضنها.
مراد يغمز لها : أنا كده بقى مزاجي رايق.
مريم : هههههههههههه طب كويس كنت خايفه تخسروا وبعدين أنا اللي يتنكد عليه في الأخر.
مراد : ولو خسرنا يعني فيها ايه أنا مش ممكن ازعلك أبدًا في داهيه الماتش.
مريم : ما كان من شويه مهم على العموم مبروك.
مراد : طب تعالي أما أقولك.
مريم : طب استنى اقفل التليفزيون.
______
في الصباح في فيلا كريم.
محمد نازل من فوق يقعد جنب والدته اللي كانت بتشتغل تريكو.
محمد : مامي.
فريدة : نعم يا حبيبي.
محمد : هي طنط مروة مبقتش تيجي لحضرتك؟
انتهبت فريدة لمحمد ونظرت ليه : ليه بتسأل؟
محمد : يعني سؤال كده جه في دماغي.
ابتسمت فريدة : لأ أخر مرة كانت هنا من حوالي شهر كده بس شوفت ميرا امبارح الصبح.
محمد : اه.
فريدة : اه ايه؟
محمد : يعني اه وبعدين؟
فريدة : ما تجيلي دوغري كده وتقولي أنت عاوز ايه؟
محمد ابتلع ريقه ومتردد يتكلم.
فريدة : حبيبي صارحني من غير ما تتكسف أنا ماما يعني محدش هيحبك قدي وسرك في بير متقلقش.
محمد بابتسامة : هو مش سر ولا حاجه بس أنا كنت عاوز اقول يعني..
فريدة : ها.. عاوز تقول ايه؟
محمد : يعني بدأت كده احس إني مشدود لها
مش عارف بقى دا اسمه ايه؟
فريدة بابتسامة : طبعاً الكلام دا على ميرا مش كده؟
محمد بخجل : ها؟
فريدة بابتسامة : ها ايه بقولك الكلام دا على ميرا؟
هز محمد رأسه.
فريدة : اتشديت لها يعني بدأت تحبها؟
محمد : معرفش.
فريدة : ازاي يعني متعرفش؟
محمد : هو يعني ايه احبها يا مامي؟
فريدة : ها؟
محمد : يعني ازاي اعرف إني بحبها؟
كريم نازل من فوق.
كريم بابتسامة : صباح الخير.
يرددوا : صباح النور..
فريدة : أنا هدخل اعمل القهوة لبابي الفطار على السفرة.
كريم بيقعد على كرسي السفرة.
كريم : ايه يا محمد مش هتفطر؟
محمد : جاي اهو يا بابي.
فريدة من الطبخ : بابي يجاوب بقى على السؤال اللي لسه سألهولي.
كريم : سؤال ايه ده؟
محمد : ها.. لا مفيش.
كريم : امال مامتك بتقول ايه؟
محمد : لا دي حاجه كده يعني مش مهمه قوي.
كريم وهو مش فاهم حاجه : طيب.
وبدأ ياكل.
جميلة نازله من فوق : مين اللي قفل التكييف وسابني في الحر ده؟
فريدة : أنا علشان تقومي بقى كفاية نوم.
كريم : اغسلي وشك وتعالي افطري يا جيجي.
جميلة تقعد على الكرسي أمام التليفزيون : مش عاوز أكل دلوقت.
فريدة خارجة من المطبخ : اقفلي التليفزيون واسمعي الكلام روحي اغسلي وشك وتعالي.
جميلة : غسلت وشي.
فريدة : طب تعالي افطري.
جميلة : مش عاوزه.
فريدة : بنت اتكلمي كويس.
كريم : خلاص يا فريدة سيبيها براحتها.
فريدة بتحط القهوة : القهوة.
كريم : تسلم ايدك يا حبيبتي.. زين مصحيش
يا محمد؟
محمد : دخلت صحيته قالي سيبني شويه.
فريدة بتقعد بتنهيدة.
كريم : ايه مالك؟
فريدة : كل واحد في البيت ده عاوز يعيش على مزاجه شوف بنتك.
كريم : سيبيها هي لما تجوع هتيجي لوحدها.
فريدة : رايح فين؟
محمد : شبعت.
فريدة : اشرب كوباية اللبن بتاعتك.
محمد : مش قادر هحطها في التلاجة وشويه كده وهشربها.
فريدة : متحطش حاجه في التلاجة علشان هتوقع.
محمد : حاضر.
فريدة : جميلة بتفتح التلاجة وتيجي تقفلها تروح رزعاها على أخر ما عندها افتح التلاجة بعدها الاقي كل الازايز واقعه من باب التلاجة.
كريم : هههههههههههه
فريدة : بتضحك!
كريم : اعمل ايه بس يا فريدة؟
فريدة : كريم.. بقولك.
كريم : نعم.
فريدة بهمس : محمد شكله بيحب.
كريم : وموطيه صوتك ليه؟!
فريدة بهمس : علشان جميلة هتروح تقوله احنا بنقول ايه.
كريم بهمس : طيب وأنا اعمل ايه؟
فريدة : كنت عاوزاك تتكلم معاه علشان سألني ازاي يعرف إنه بيحبها.
كريم بهمس : طب هو سألك مسألنيش أنا.
فريدة : عادي يا حبيبي اتكلم معاه راجل لراجل أنا ست أنت قوله بقى عرفت ازاي إنك بتحب.
كريم : هههههههههههه
فريدة : بتضحك على ايه؟
كريم : على الإجتماع السري اللي عاملينه وشغالين همس كإنها أسرار عسكرية.
فريدة : قوله عرفت إنك بتحبني ازاي.
كريم : هههههههههههه انتي عاوزاني احكي أسرار حياتي بقى.
فريدة : وماله اهو تعرفه إنك كنت بتحب مامته.
كريم : كنت!
فريدة : أنا أعرف بقى.
كريم : ومازلت يا حبيبتي.
فريدة : دي حاجه أنت ادرى بيها بقى.
كريم : ايه ده انتي زعلانه بقى؟
فريدة : عاوزه اتعزم على عشا رومانسي يا كيمو.
كريم : حاضر.
فريدة : علشان السكر يتظبط يا حبيبي.
كريم بابتسامة : حاضر.
فريدة : امتى يا حبيبي؟
كريم : قريب.
فريدة : هو أنت هتخترع الذرة يا كريم؟!
كريم : هههههههههههه
حاضر يا فراولة بكرة.
ابتسمت فريدة.
كريم : أو بعد بكرة لسه معرفش.
فريدة نظرت بغضب.
كريم : هههههههههههه حاضر يا حبيبتي خليها يوم الخميس.
فريدة : النهاردا السبت!
كريم : خلاص هانت.
فريدة بتنهيدة : كده طيب.
كريم : سلام يا حبيبتي أنا خارج يا جيجي عاوزه حاجه؟
فريدة : مندمجه في الكرتون سيبها وروح شوف شغلك.
يخرج كريم ويقفل الباب.
زين نازل من فوق : هو بابي خرج؟!
فريدة : لسه اهو خارج من الباب.
بيجري زين يفتح الباب ويخرج.
فريدة : ماله ده؟!
جميلة : مامي عاوزه كوباية لبن.
فريدة : تعالي اشربي هنا.
جميلة : لأ هاتيها هنا.
فريدة : مش جايبه حاجه قومي انتي.
جميلة : كده طيب مش عاوزه.
نظرت فريدة لبنتها بتنهيدة ودخلت المطبخ تخرج حاجه من الفريزر تفُك علشان تتعمل على الغدا.
_________
في فيلا آسر.
سهر نايمه وبتتقلب فجأة تلمح حد واقف قدام المرايا.
سهر تفتح عيونها وبصوت ناعس : صباح الخير.
آسر بابتسامة وينظر من المرايا : صباح النور يا حبيبتي.
سهر تقوم من النوم وتقعد على السرير : أنت نازل؟
آسر : اه عاوزه حاجه؟
سهر : لأ.
قرب وقعد جنبها : ابقي انزلي افطري رِهام جهزت الفطار وأنا ومجدي أكلنا.
سهر : طيب.
آسر : لسه زعلانه؟
سهر : هزعل من ايه بس يا آسر؟
آسر : أنا عملت الحاجه اللي ريحتني.
سهر : بس تعباني أنا.
آسر : ليه؟
سهر : معرفش بس مش مستريحه.
آسر : نشوف الموضوع دا بعدين.
تمسك ايده وهو قايم : مستعجل؟
آسر : مالك يا سهر؟
سهر : مش عاوزاك تنزل وتسيبني لوحدي.
آسر : فيه ايه يا حبيبتي حصل ايه؟
سهر : كوابيس كتير ورا بعض كإن حد بيخنقني وهموت وعماله اصوت ومحدش سامعني.
آسر : بعد الشر عليكي يا حبيبتي.
سهر خايفه وبتبكي.
آسر : : طب خلاص اهدي
أنا هنزل بس علشان لازم اروح الشركة دلوقت هكلم ملك ولا مليكة تيجي تقعد معاكي عقبال ما اجي.
سهر : لأ خلاص أنا بقيت كويسه.
آسر : تلاقي دا العقل الباطن دماغك مشغوله بحاجه بتشوفيها وانتي نايمه حاولي متفكريش في أي حاجه وصفى ذهنك كده اقولك انزلي اقعدي في الجنينة وأنا ساعتين وراجع مش هتأخر.
سهر : طيب.
__________
في فيلا مراد.
أمل : اه عرفت.
زينة : في حاجه يا مامي؟
أمل : عرفت بالصدفه محدش قال لي.
زينة : هههههههههههه
هو دا بس اللي مزعلك يا ست الكل؟
أمل : اه كنت فاكرة إني مهمه قوي كده علشان يتقالي خبر زي ده واعرفه كده بالصدفه من باباكي.
زينة : حضرتك بقى زعلانه من دكتور هشام؟!
أمل : بقولك ايه روحي افطري وسيبيني في حالي.
________
في مكتب هشام في الشركة.
هشام : بتقولي ايه؟
سيرين : كنت بقول لحضرتك ياريت يعني تشرفنا دي ماما هتفرح قوي.
هشام : هشوف.
سيرين وهي بتتحرك بشكل يلفت هشام ليها : على فكرة احنا مش ساكنين بعيد يعني نص ساعة وهتلاقي حضرتك قدام بيتنا.. هشام تجاهل النظر لها وبيتابع شغله وهي بتتكلم فكرت تلفت نظره أكتر وبدأت تدخل البلوزة في الجيب وسيبت شعرها وقربت من مكتب هشام فكرته مرتبك من حركاتها فقالت تزود الاحساس دا أكتر لكن العكس اللي كان حاصل هشام بدأ يشمئز من تصرفاتها وفهم دماغها وهو كان فاكر إنها بنت غلبانه بيحاول يساعدها لحد ما قربت من المكتب
وعينها في الورق اللي بيقراه.
هشام قفل الملف اللي قدامه ونظر لها بحده : خلصتي كلامك يا أستاذة سيرين؟
سيرين بميوعه : اه يا دكتور حضرتك عاوز حاجه؟
هشام : عاوزك تتفضلي تسيبي استقالتك على مكتب دكتور مازن وانتي خارجه.
سيرين اتصدمت وبدهشه : ليه يا دكتور أنا عملت ايه؟
هشام : دخلتي بشكل غير اللي انتي عليه دلوقت مش عاوز كلام كتير احنا جايين هنا الشركة نشتغل وبس والاسلوب ده يتعمل في الشوارع في مكان مقفول براحتك مش هنا.
سيرين : اسلوب ايه يا دكتور حضرتك فهمتني غلط.
هشام : لا أحب أقولك إني راجل وفهمتك صح اتفضلي.
سيرين بتخرج وهي مضايقه.
بيقعد هشام يتابع شغله مرة تانية وهو بيفكر شويه هل القرار اللي اخده دا كان صح ولا كان اتعامل
مع الموقف بذكاء أكتر من كده.
_________
في شقة مراد.
مراد : يلا يا حبيبتي علشان منتأخرش.
مريم : حاضر يا مراد جايه.
مراد بيدخل الغرفة.
مراد : بتعملي ايه؟
مريم : مش عارفه اقفل سوستة الشنطة.
مراد بيقرب يقفلها : ما هي لازم متتقفلش ايه كل ده احنا مهاجرين ايه كل الهدوم دي وشامبو وكريمات وكتب
واخده كتب معاكي في شهر العسل ليه احنا هنقضيها قرايه هههههههههه
يا حبيبتي احنا في رحلة يعني ضحك ولعب وجد وحب.
مريم تبعد عن نظراته ليها : ما هو اسمع احنا متأخرين اقفل الشنطة وخلينا ننزل.
مراد : هههههههههههه حاضر يا مغلباني بس شيلي الكتاب ده علشان مش طالبه نكد.
مريم : بس دا مفيهوش نكد خالص.
مراد : امال ايه عنوان الكتب ده؟
مريم : لا دا عكس اللي موجود جوه.
مراد : يعني قريتي الكتاب دا قبل كده؟
مريم : ايوه.
مراد : بيحدفه على السرير.
مريم : بتعمل ايه؟!
مراد : ملوش لازمه ليه نقرا حاجه قريناها قبل كده وايه دا كمان؟
مريم : لا كله إلا ده.
مراد : خلاص علشان خاطرك هسيبه بس بلاش من ده كده الشنطة اتفقلت هاتي ايدك بقى.
مريم بابتسامة حب : اتفضل.
________
أمام فيلا كريم.
محمد : لا عادي محصلش حاجه.
ميرا : فكرت يعني انك اضايقت بس مش أنا اللي كنت سايقه دي هلا بنت عمي وأنا اصلا بخاف من سواقتها.
محمد : حصل خير.
ميرا : طب بعد اذنك.
محمد اتفضلي.
دخلت ميرا جوه ومحمد دخل البيت.
مسك زين ايده وهو لسه بيقفل البوابة.
محمد : ايه فيه ايه؟
زين : كنت واقف عندك بتعمل ايه؟
محمد : واقف فين؟
زين : محمد بطل تلف وتدور علشان احنا فاهمين بعض.
محمد : اه تقصد علشان كنت واقف مع بنت الجيران؟
زين : بنت الجيران!
محمد : ايه قولت حاجه غلط؟
زين : علشان أنت عارف إنها مش بنت الجيران وبس.
محمد : مش فاهم.
زين : لا أنت فاهم كل حاجه وبتستعبط
ههههههههههههه وقعت يا دكتور واللي كان كان.
يضع محمد ايده على بؤ زين.
محمد : بس وطي صوتك هتفضحنا.
زين : هههههههههههه
هو الحب فضيحه؟!
قر هنا واعترف وقعت ولا الهوا اللي رماك؟ ههههههههههههههههه
محمد : يا عم اسكت بقى.