أنت قلبي الجزء الثالث

الحلقة ١٥٨

#انت_قلبي٣
_________
الحلقة ١٥٨

ياسمينا بانفعال : حق ايه يا أم حق جاك كسر حوقك.
أم حمزة : اهدي بس يا أم نادين المشكلة مش هتتحل بالطريقة دي.
ياسمينا : عنها ما تحلت يا أختي روحي قولي لـ ابنك طلق البنت دي مبقتش تنفعك.
نادين : يبقى احسن برضو.
أم حمزة : ازاي بس يا نادين انتي عندك عيلين يا بنتي حافظي عليهم.
نادين : هيجرالهم ايه يعني ولو كنتي عاوزة تاخديهم اجيبهملك.
أم حمزة : هاخدهم اعمل بيهم ايه انتي أولى بيهم يا بنتي.
ياسمينا : انتي قليلة الأدب معرفتش اربيكي.
نادين : ليه علشان عاوزه اعيش لوحدي؟!
أم حمزة : ماشي يا بنتي إن كان دا حل المشكلة أنا هسيب البيت واشوفلي شقة اعيش فيها وانتي هاتي ولادك وارجعي اقعدي في بيتك يا نادين.
ياسمينا : مش هيحصل هي تغور في داهيه إنما انتي ماتخرجيش من بيتك.
أم حمزة بتبكي : ابني صعبان عليه وأنا عاوزه اريحه ولو راحته من راحت مراته أنا موافقة.
ياسمينا لنادين : غوري ادخلي جوه.
تتركهم نادين وتدخل الغرفة.
ياسمينا : اقعدي يا أم حمزة هعملك ليمون يروق أعصابك ومتعيطيش مفيش حاجه تستاهل يا أختي ابنك لو طاوعها اتبري منه أنا عن نفسي متبريه منها.
أم حمزة : لا يا أم نادين دي بنتك يا حبيبتي مهما كان معلش لسه صغيرة ومتفهمش قوي في الحاجات دي بكرة تعرف لوحدها.
ياسمينا : دي أم يا حبيبتي يعني عارفه غلاوة الضنا ولو حتى معهاش عيال هي مش عارفه كنت بعمل ايه علشانها بقى يبقى دا جزاءنا في النهاية أنا بقولك دلوقت وأنا ضميري مرتاح روحي لحمزة قوليله البنت دي يا ابني متنفعكش دي هتبقى سبب عذابك دنيا وآخرة ما هو عقوق الوالدين ده له حساب وأنا مرضاش جوز بنتي يفضل مراته اللي هي بنتي على أمه أنا نفسي مش هطمن عليها معاه روحي قوليله الكلام ده علشان خاطري.
أم حمزة : ما تحاولي معاها تاني يمكن دماغها تلين أنا اتحايلت على حمزة يشوف مكان بره ولا اشوف أنا شقة واسيب لهم البيت هو موافقتش طب اعمل ايه؟
ياسمينا : متعمليش حاجه ابنك راجل هو اللي يعمل لو هيمشي على هواها يبقى سيبيه براحته بكرة يجيلك ندمان لو موافقش يبقى خير وبركه وخُديه في حضنك وشوفيله واحدة تانية تشيلك على دماغها قبله.
أم حمزة : نادين طيبه وبنت حلال بس أنا بقول حد لعب في دماغها وفهمها إنها كده هترتاح
أنا مش عاوزه منها حاجه بس يعيشوا مبسوطين وهقفل بابي عليه اللي يحب ينزل اهلا وسهلا واللي مش عاوز ينزل مش هزعل كل واحد براحته.
وجات عند اوضة نادين : ها يا نادين ايه رأيك هقفل بابي اللي ناحية البوابة الكبيرة وخليه دا مدخل ليكم وهفتح باب من الناحية ومش هتشوفيني ولا تلمحيني وخلي المدخل الرئيسي ليكم ادخلوا واخرجوا براحتكم.
ياسمينا : انتي بتقولي ايه بس يا أم حمزة؟!
أم حمزة : بدور على راحة ابني يا أم نادين ما هو غضوبة نادين مزعله ابني ومخلياه تايه مش عارف يشوف شغله فأنا لما اعمل كده هريحهم واستريح أنا كمان ما هو أنا تعبانه لتعبه.
ياسمينا : تعالي بس اقعدي استريحي وسيبك من كل ده هي لو فضلت على عنادها ده تخبط دماغها في الحيط محدش هينولها اللي في دماغها.
_________
في منزل والد معتز.
معتز : اتفضل يا علاء ادخل.
علاء بيدخل ويقعد في الصالون.
معتز : هي شهد كانت كلمتني في الموضوع ده من فترة كده انكم تقعدوا مع بعض يمكن يكون عندك كلام تقوله ليها.. واسمع أنت تعمل اللي يريحك مهما كان لا تقول صاحبي هيزعل ولا معرفش ايه أنا مش هبقى فرحان لما تعمل حاجه غصب عنك.
علاء : ماشي يا معتز.
شهد بابتسامة داخله بالقهوة : سلام عليكم.
يرددوا : وعليكم السلام.
معتز : هاخد فنجان القهوة واقعد هناك واسيبكم بقى تتكلموا براحتكم.
يخرج معتز ويقعد قصادهم في الصالة كانت والدته قاعدة معاه.
شهد : اتفضل القهوة يا علاء.
علاء : متشكر.
شهد : على ايه بس دا أقل واجب أنت عامل ايه؟
علاء : كويس.
شهد : أنا كنت عاوزه اعرف أنت مستريح كده؟
علاء : مش فاهم.
شهد : يعني وضعنا احنا الاتنين بعد الانفصال أنت كده مستريح للوضع ده ولا تعبان أنا عن نفسي مش مستريحه وعاوزه اقولك نرجع لبعض من تاني واوعدك إن كل اللي كان مضايقك مني هحاول اغيره.
علاء : نرجع فين؟!
شهد : علاء أنا بحبك ولسه شارياك بلاش تبيع.
علاء : أنا مبعتكيش يا شهد وانتي عارفه أنا وصلت معاكي لطريق مسدود و مكانش فيه حل غير الانفصال.
شهد : أنا معاك بس لما طلقتني فوقت لنفسي وعرفت إني غلطت في حقك وحق نفسي وولادي كمان.. علاء علشان خاطر ولادنا أنا برضو لسه بحبك.
علاء : معلش حب ايه اللي بتكلميني عنه دلوقت؟
انتي محبتيش غير نفسك يا شهد وياما قولتلك بلاش اسلوبك ده حاولي تغيري من نفسك ملكيش دعوة بجد متتحشريش في أي موضوع ميخصناش سيبي تالا في حالها دا حتى ندى مسلمتش منك وتلميحات من تحت لتحت
إن كان في مشروع ارتباط بينها وبين معتز ومكانش ليهم نصيب مع بعض استخدمتي كل معلومة عرفتيها عن طريق اخوكي أو جمعتيها معرفش منين علشان تبقى وسيلة لـ ابتزازها كلنا.. اخويا أنا اللي طول عمره في حاله ولا بيدخل ما بينا غير أخر مرة لما لاقى الموضوع دخل في الجد قال يصلح ما بينا روحتي اهانتيه وهو اللي ياما وقف جنبي وانتي عارفه دا كويس
فريدة بنت عمي مسلمتش من لسانك ونازله كلام كلام عن حياتها مع اخويا وهي برضو اللي عمرها ما تدخلت في حياتك وكل اللي في البيت في حالهم ما عدا انتي مدخله نفسك في كل حاجه أنا يا بنت الناس مستريح كده ومش عاوز اجيب وجع الدماغ لنفسي تاني كفاية علينا كده يا شهد ولادنا كبروا يعني حكاية نرجع علشانهم دي ملهاش أي ضرورة مش لسه بيبهات عاوزين ماما وبابا.
شهد : دا أخر كلام عندك يعني مش هتفكر وبعدين تقولي وصلت لـ ايه؟
علاء : أخر كلام عندي يا شهد أنا جيت علشان اريحك واجيبهالك على بلاطه احنا يا بنت الناس مبقناش ننفع مع بعض.
شهد : مش هتتجوز يا علاء؟
علاء : دي بقى حياتي وأنا حر فيها اتجوز متجوزش أنا حر زي ما انتي دلوقت أصبحتي حره.
شهد قامت وهي بتبكي.
دخل معتز لعلاء يتكلم معاه.
_______
في شقة طارق.
هنادي بتضرب كف بكف ومش مصدقه الكلام اللي بيتقال.
وائل : في ايه بس يا هنادي هو أنا قولت حاجة غلط؟
هنادي : قولت ايه غلط؟
لا يا وائل مفيش غلط ولا حاجه بس لما تبقى عارف رأيي كويس قوي في الموضوع ده وتيجي بعد العمر دا كله تقولي معرفش مين متقدملك وعاوز يتجوزك يبقى لازم اعمل كده.
وائل : هو أنا يعني كنت اديته كلمة؟
كل ما فيها إني محبتش اقطع معاه وقولت اشوف رأيك ايه.
هنادي : رأيي أنت عارفه من زمان يا وائل وأنا لو بفكر في الجواز كنت عملتها من زمان مش بعد ما خلاص شعري شاب هفكر اتجوز.
وائل : هنادي انتي برضو لسه صغيرة وفي ستات كتير في سنك ب يتجوزوا دا حقهم وحقك انتي كمان.
هنادي : طب قولي أنا بعد العمر دا كله هبقى عاوزه
راجل ليه في حياتي هيعملي ايه هيصرف عليه؟
طب ما أنا مستوره وعندي اللي يكفيني عاوزه راجل مثلا علشان أحب واتحب؟
لا مش عاوزه أنا حبيت راجل واحد في حياتي خد قلبي معاه وقفلت عليه من وقتها ومش ناويه افتحه تاني.. عاوزه راجل مثلا علشان يخرجني ويفسحني وكلام من ده؟ لأ مش عاوزه ولا أنا غاويه الكلام ده أنت عارف عاوزه راجل يشيل معايا الحمل ويربي ولادي؟
اهم اتجوزوا وكل واحد في بيته هعوز راجل لـ ايه؟
ونس مثلا؟ لأ أنا متونسه بطارق ابنك وحتى لو مش عايش معايا أنا خلاص مكتفيه بنفسي وعايشه وحدتي من غير ما اضايق ولا اقعد أفكر واوجع دماغي أنا تمام كده ومش ناقصني أي حاجه.
وائل : براحتك يا هنادي بس حتى لو فكرتي وقررتي تختاري ونيس ليكي يكمل معاكي محدش هيلومك الراجل أرمل من زمان معندوش ولاد وسنه قريب من سنك وشغال في منصب كويس جارك هنا لا هتتنقلي من مكانك ولا هيبعدك عن ذكرياتك يعني الموضوع يستحق التفكير.
هنادي : اقعد رايح فين؟
وائل : هروح اشوف شغلي بقى.
هنادي : اقعد اتغدا معانا اهو طارق جه هدخل اجهز الغدا.
بيسلم طارق على والده.
وائل : هنادي أنا ماشي.
هنادي من المطبخ : اقعد بس يا وائل الغدا خلص
تعالى خُد مني الأطباق يا طارق.
طارق : حاضر يا عمتي.
وائل : معلش يا هنادي علشان متأخر بس.
هنادي خارجه من المطبخ وبتحط الطبق على السفرة : مجاتش على الخمس دقايق اللي هتاكل فيهم يعني يا وائل غير هدومك يا طارق وتعالى يلا.
طارق : حاضر يا عمتي.
وائل : وادي قاعدة.
هنادي : ايوه
كده اقعد خلينا ناكل مع بعض من زمان معملتهاش نرمين وقمر عاملين ايه؟
وائل : جيبت لنفسي وجع الدماغ يا هنادي.
هنادي : هههههههههههه
شوفت بقى إن الواحد عايش في روقان.
وائل : مش قوي كده يا هنادي روقان ايه بس؟!
هنادي : طب كُل وقفل على الموضوع ده.
وائل : هههههههههههه حاضر يا ستي هاكل تسلم ايدك قبل ما ادوق.
________
في منزل عُمر.
ياسمينا : طبعا ما أنت مهاودها.
عُمر : مهاودها ايه بس يا نادين يعني انتي شايفاني موافق على اللي بتعمله ده؟!
ما انتي عارفه إني روحت واتكلمت مع جوزها وقولتله ميسمعش كلامها وهي شويه كده وهتعقل معقلتش بقى اعمل ايه ادخل اضربها علشان يبقى كده اخدت موقف؟!
ياسمينا : شايف رجلي الشمال منمله مش حاسه بيها بنتك هتجبلي جلطه.
عُمر : بعد الشر عليكي يا ياسمين.
بيحاول يفُك رجلها.
ياسمينا وهي بتبكي : اااه يا اني اعمل ايه هرتاح امتى بس؟
ياريت الواحد يموت بقى ويستريح.
عُمر : بلاش الكلام دا يا نادين.
ياسمينا : شايف بنتك بتعمل فينا ايه أنا هافف في عقلي دلوقت ادخل اطردها من البيت واهي لما تخرج متلاقيش مكان تروحه ترجع بيتها.
عُمر : مش حل يا ياسمين علشان هتقعد هناك كام يوم وهترجع تاني هي لازم تعرف إن اللي بتعمله دا غلط ولازم ترجع بيتها من نفسها.
ياسمينا : ما تكلمنا كتير وقولنا لما شبعنا وحماتها كانت هنا وقعدت تعيط واللي انتي عاوزاه يا نادين اسيب البيت واشوف شقة اعيش فيها طب يا بنتي هفتح باب من الناحية التانية علشان متشوفنيش طب شوفي انتي عاوزه ايه واللي يريحك يا نادين هنعملهولك مكانش ناقص غير إن الست تنزل تبوس رجل بنتك علشان ترضا عليها قولي اعمل ايه ادخل اكسر دماغها اقتلها ولا اعمل ايه قولي؟
عُمر : الحل يطلقها يمكن عقلها يرجعلها.
ياسمينا : تصدق نفسي علشان اشوف هتعمل ايه
علشان بنتك دي افترت قوي واتبطرت على النعمه اللي عايشه فيها.
__________
في فيلا آسر.
سهر : وأنا ايه علاقتي بكل ده يا منه؟
منه : تتكلمي مع آسر هو هيقتنع بكلامك أنا مش عاوزه غير إنه يبعد خالص عن وليد علشان خاطري يا سهر.
سهر : أنا مش فاهمه حاجه هما أخوات أنا دخلي ايه؟
منه : آسر مصمم ينتقم من وليد.
سهر : مستحيل آسر ميعرفش حتى يكره حد علشان ينتقم من أخوه يا منه.
منه : في حوار كده حصل بينهم بعد الخناقة اللي حصلت هنا في الفيلا بينكم.
سهر : تقصدي لما وليد راح لـ آسر الشركة؟
منه : انتي عرفتي؟
سهر : عرفت ايه أنا كل معلوماتي إن وليد قال لـ آسر حاجه خلته يتعب التعب الأخير ده ايه هي بقى معرفش حسام مقالش وآسر مكلمنيش في الموضوع ده وأنا مش عاوزه اعرف هما أخوات يتخانقوا يتصالحوا مليش فيه متدخلنيش في حاجه يا منه.
منه : حتى لو دا في صالح آسر قبل وليد؟
سهر نظرت لمنه وسكتت.
_______
أمام المطعم يوقف مراد بالعربية.
مريم : نضارة ايه اللي تخليك تخبط كل المشوار ده علشان تلاقيها؟
مراد : نضارة غاليه عندي كانت هدية من مامي.
مريم كانت شاكه إن مراد مش جاي مخصوص علشان النظارة اللي بيقول نسيها من يومين وهما بيتغدوا في المطعم ده.
مراد بينزل من العربية : ثواني هسأل جوه كده اشوفه واجيلك.
مريم : هاجي معاك.
مراد : هتيجي تعملي ايه بس يا مريم خليكي يا حبيبتي مستريحه انتي مش راجعه من الجامعة تعبانه خليكي هنا ثواني وجاي.
مريم تنظر ليه.
مراد : ايه في ايه بتبصي في ايدي ليه؟
كانت مريم بتتأكد إن مراد نازل من العربية مفيش في ايده أي حاجه.
مراد : مريم سيبي ايدي.
مريم : ماشي بس متتأخرش.
مراد : حاضر.. متأكدة في أكل في البيت ولا
اطلب أكل ناخده معانا؟
مريم : أنا عامله أكل الصبح هسخنه في الميكرويف كله مش هياخد عشر دقايق.
مراد : متأكدة؟
مريم بابتسامة : متأكدة يلا بقى.
مراد يدخل جوه ومريم تخرج من العربية توقف تنظر داخل المطعم من بره كان مراد واقف بيتكلم مع مدير المطعم شويه وخرج بالنظارة.
مراد : ايه اللي موقفك كده يا مريم؟
مريم : كنت بطمن عليك
لاقيت النضارة؟
مراد : اه لاقيتها جوه.
مريم وبتركب العربية : طيب مش يلا بينا؟
_________
في منزل عُمر.
سيف : لأ ليه ونص يا نادين واكسر دماغك كمان.
ياسمينا : اقعد يا سيف.
سيف : باعته مسج لجوزها بتقوله لو راجل طلقني.
ياسمينا : قليلة الأدب.
نادين : ماما لو سمحتي أنا مغلطتش لما بعت له المسج ده هو نفسه قال الكلام ده لما قعدنا مع بعض لو فاهمني كان فهم إن مرواحي لحد عنده معناه اني لسه باقيه عليه.
سيف : باقيه عليه ازاي وانتي مصممه على اللي في دماغك؟!
نادين : ممكن اتنازل بس هو كمان بيلعب بيه قالك إنه مسافر وهو ولا مسافر ولا حاجه كل ده علشان اجري عليه واقوله لا يا حمزة متسافرش وأنا متنازله عن الطلب اللي طلبته منك وهعيش معاك في المكان اللي تحبه.
سيف : تصدقي لو طلقك هيبقى معاه حق علشان انتي إنسانه متتعاشرش.
نادين : اسمع يا سيف من غير غلط وبعدين أنت متتحمقش لصاحبك على حسابي أنا.
سيف : يا شيخه دا انتي خلتيني أندم إني كنت سبب في إنه يرتبط بيكي زمانه بيدعي عليه دلوقت.
نادين : معلش قوله ميندمش ويروح يتجوز مش هيخسر حاجه.
ياسمينا : انتي تتكتمي خالص مش عاوزه اسمع صوتك.
سيف : نهايته يا نادين علشان هو مستني
رد منك هترجعي بيتك بولادك ولوحدك هو مش جاي ياخدك علشان هو مخرجكيش من بيتك انتي اللي مشيتي بمزاجك ولا تفضوها كده وزي ما دخلتم بالمعروف تخرجوا بالمعروف؟
نادين : هو عاوز ايه؟
سيف : انتي عاوزه ايه؟
نادين : يجي ياخدني أنا مش مروحه لوحدي.
سيف : بس هو مش جاي.
نادين : خلاص براحته.
وقامت دخلت جوه.
سيف : ها يا ياسمين أرد عليه أقول له إيه؟
عُمر جاي من بره.
عُمر : وابوها ملوش رأي يا سيف؟
سيف يقوم يسلم على عُمر.
سيف : العفو يا بشمهندس حضرتك الخير والبركه.
عُمر : اتفضل استريح.
سيف : معلش بس علشان أنا هنا من بدري جيت أعرف نادين عاوزه ايه حمزة قال لي شوف طلباتها وعلى الأساس ده هيبدأ يشوف ايه اللي يناسبه.
عُمر : نادين طالبه بيت لوحدها بس هو مش موافق ولا أنا ولا أختك موافقين.
سيف : طيب والحل ايه؟
عُمر : هو عاوز ايه؟
سيف : عاوزها ترجع بيتها هو مش جاي.
عُمر : حقه لإنه مقالهاش تمشي.
سيف : قال لي البيت بيتها تيجي في أي وقت لكن مفيش بيوت بره وأمي فوق دماغي ودا وضعي مش عاجبها تشوف بقى هي عاوزه ايه.
عُمر : خلاص ماشي.
سيف : يعني أقول له ايه؟
عُمر : سيبني بس كام يوم وأنا هحلها.
سيف بيقوم : خلاص ماشي تصبحو على خير.
عُمر : ما أنت قاعد اتعشا معانا.
سيف : معلش أصل سايب مليكة عند باباها ولسه هروح هناك أنت عارف بقى المكان بعيد شويه.
عُمر : طيب ماشي مع السلامة.
بيسلم سيف على ياسمينا وهي قاعدة مكانها مقدرتش تقوم وخرج.
عُمر بعد ما وصل سيف ورجع : ايه يا ياسمين رجلك نملت تاني ولا ايه؟
ياسمينا : هتاكل؟
عُمر : أنا بطمن على رجلك مجبتش سيرة الأكل دلوقت.
ياسمينا : متشغلش بالك المهم هتاكل ولا أدخل أنام؟
نظر لها ومردش راحت قامت دخلت جوه.
______
في فيلا آسر.
سهر : الغايب حجته معاه متبقيش قلوقه كده زمانه جاي.
مليكة : مكلمني من ساعة قال لي جاي هو الطريق ياخد كل ده؟
آسر : اقعدي يا مليكة ولو حتى مجاش باتي انتي يعني هتباتي عند حد غريب دا بيتك يا بنتي.
مليكة : عادي يا بابي ما أنا عملتها كتير بس يبقى قايلي إنه مش جاي لكن كده لازم اقلق.
سهر : طب افتحي الظاهر جه.
كان سيف بيركن العربية في الجنينة.
__________
في شقة مراد.
مريم : على فكرة لو قولتلي إنها كانت خطيبتك أنا مكنتش هزعل بس إنك تخبي عليه لما أسألك وتقولي معرفهاش لازم ازعل.
مراد : لا يا مريم كنتي هتزعلي أنا مبقولش إني كنت صح لما كدبت لما سألتيني تعرفها قولتلك لأ
علشان لو قولت هتفكري إني اخدتك للمطعم دا بالذات علشان هي شغاله فيه مع إني معرفش عنها حاجه من بعد ما نهينا الموضوع ده معرفش إنك هتفضلي تدوري لحد ما تعرفي مين البنت دي.
مريم : بس شكلها لسه بتحبك.
مراد : شوفتي بقى إني مكانش ينفع اصارحك خالص إني اعرفها.
مريم : أنا بتكلم عنها هي
علشان شوفت الدموع في عينها لما شافتك.
مراد : عادي ممكن افتكرت حاجه زعلتها مش لازم حب يعني.
مريم : ليه أنت عملت فيها ايه؟
مراد : حصلت مشاكل فقررت إني ابعد اظن انتي عندك خلفيه بالحوار ده ابوها ولا اسمه ايه جوز أمها كان هيورطني في مشاكل كتير فخلعت.
مريم : بس هي مأذتكش.
مراد : بس كان هيجي من ورا علاقتي بيها مشاكل كتير بقولك فكان لازم ابعد.
مريم : وشايف دلوقت إنك كنت صح؟
مراد : طبعا مليون في الميه صح ما هو لو مبعدتش ونهيت العلاقة دي مكنتش هاخد بالي منك.
مريم : ايه ده أنت مكنتش واخد بالك مني لما كنت بروح عندكم مع ماما؟
مراد : هههههههههههه ولا كنتي في دماغي اصلا.
مريم : بقى كده.. ماشي.
مراد : هههههههههههه
ايه دا انتي زعلتي ولا ايه؟
بس أنا بقول وقتها يعني لكن دلوقت واخد بالي منك قوي ولا ايه؟
ويغمز لها.
مريم : لأ زعلانه منك وأنت عارف بقى إن الزعل غلط على الحمل.
مراد : هههههههههههه خلاص اصالحك.
مريم : لا لا ابعد عني مش عاوزاك تصالحني.
مراد : هههههههههههه هصالحك يعني هصالحك.
_________
في منزل والدة معتز.
معتز : خلاص يا شهد متزعليش نفسك بقى.
شهد : مكنتش متوقعه منه كده أبدًا يا معتز
دا مهما كان بيحصل بينا مشاكل
وممكن أكون أنا اللي غلطانه يجي برضو ويكلمني علشان نتصالح لكن يطلقني ولما اطلب منه إننا نرجع ونفتح صفحة جديدة فيرفض دي اللي جديدة أول مرة أشوف علاء قلبه من ناحيتي كده دا زي اللي مصدق خلص مني.
والدة معتز : علشان سامح كتير يا شهد وملقاش فايدة انتي اللي غلطانه علشان فكرتي إنك مهما تغلطي هيسامحك اهو خلاص رمى طوبتك ومش عايزك.
قامت شهد وهي بتبكي دخلت جوه.
والدة معتز : طبطبنا كتير يا ابني وبرضو كنت بنصحها واقول لها حافظي على بيتك جوزك راجل محترم مكانتش بتسمعي كلامي واللي متخانقين بسببه الاسبوع ده تكرره الاسبوع اللي بعده.
معتز : أنا مش عارف اقولها ايه لاني حاسس بجد إنها ندمانه ولا قادر اقول لعلاء معلش تعالى على نفسك المرة دي لإنه جه على نفسه فعلا كتير وسامح هي اللي مافقتش غير متأخر.
والدة معتز : روح بيتك يا ابني الوقت اتأخر وأنت عندك شغل الصبح بدري.
معتز : ماشي يا ماما تصبحي على خير.
_________
في شقة طارق.
هنادي بتتقلب يمين شمال مش عارفه تنام من التفكير.
هنادي : ايه اللي خلاه يطلب طلب زي ده هو يعرفني اصلا ولا له تعامل معاه طب لما اشوفه بعد كده اعمل ايه؟
مالك يا هنادي الراجل مغلطتش طلب حاجه وانتي رفضتي يبقى خلاص مكبره الموضوع ليه؟
وهو وائل اصلا ازاي يكلمني في موضوع زي ده وهو عارف اللي فيها ولا فاكرني إني بعد ما حوزت الولاد هفكر تاني في الجواز وازاي افكر في حاجه زي كده بعد السنين دي كلها ايه يا هنادي هتنسي طارق وتسمحي لراجل تاني يدخل حياتك من بعده
لا يا طارق أنا لا يمكن اعمل كده أنت هتفضل أول وأخر راجل في حياتي أنا هعيش الباقي من عمري زي ما أنا خلاص اخدت على كده وبعدين ذكرياتنا مع بعض كفاية أنت سيبت لي حته منك كبروا قدام عينيه صحيح تعبت كتير بس أنا دلوقت سعيدة ومستريحه بعد ما أديت رسالتي معاهم باقي مريم تخلص السنة اللي فاضله ليها وتقوم بالسلامة علشان قلبي يستريح من ناحيتها وكده ابقى عملت اللي عليه
اوعي يا مريم تخذليني ومتكنيش بتذاكري وواخده بالك من نفسك هتفضلي قلقانه كده لحد امتى يا هنادي ريحي نفسك شويه هي كبيرة ومفروض عارفه مصلحتها.
_______
بتقوم مريم تجري على الحمام بعد ما شعرت بغثيان مراد بيطمن عليها.
مراد : مريم انتي كويسه؟
مريم : ثواني يا مراد جايه.
مراد : طيب.
ورجع قعد على طرف السرير منتظرها شويه وجات قام واخد بـ ايدها وبيقعدها.
مراد : ها يا حبيبتي عامله ايه؟
مريم : هو أنا هفضل كده طول شهور الحمل تعبانه؟
مراد : هههههههههههه وأنا اعرف منين؟
مريم : أنت بتضحك على ايه؟
مراد : يعني احساس حلو لما تلاقي حته منك جواكي اهو دا نفس احساسي.
مريم : بس أنا اللي بتعب أنت بقى تعبان في حاجه؟
مراد : طبعا تعبان.
مريم : تعبان في ايه بقى؟!
مراد : مش بشتغل وبتعب علشان اعمله مستقبل.
مريم : هو مين؟
مراد : ابني.
مريم : هو فين ده؟
مراد : هنا في بطنك.
مريم : أنت فايق ورايق.
مراد : هههههههههههه
مفيش جامعة بكرة اقعدي استريحي.
مريم : لا يا حبيبي هو أنا ناقصه اغيب كمان مش كفاية إني مقصره في المذاكرة وهروح في داهيه بسببك.
مراد : بسببي أنا!
ليه هو أنا بقولك متذاكريش؟
مريم : اذاكر ازاي وأنت بتخرج الصبح معايا وترجع معايا وتقعد ترغي لحد ما نام اذاكر امتى بقى؟
مراد : ليلة الامتحان.
مريم : ليلة الامتحان!
مراد : اسمعي مني بس دي وصفه متجربه أنا كنت بعمل كده مذاكرش غير ايام الإمتحانات واديني اهو قدامك متخرج السنة اللي فاتت وزي الفل مقعدتش زيك كده شغال مذاكرة من أول يوم.
مريم : اهو قرك ده اللي موديني في داهيه.
مراد : هههههههههههه
تعالي بس اما اقولك.
مريم : لا اقولك ولا تقولي أنا عندي محاضرة الساعة تمانية ممكن تطفي النور ده وتسيبني أنام؟
مراد : حاضر بس متتنرفزيش عليه علشان بخاف ههههههههه.
________
في شقة معتز.
معتز : هو ايه اللي كنت فين يا هدى؟!
ما انتي عارفه إن أنا روحت لماما اقعد معاها شويه.
هدى : من الساعة أربعة يا معتز لحد اتنين صباحا وأنت هناك؟
معتز : مش فاهم يعني لو مش هناك هكون فين يعني يا هدى؟
هدى : معرفش أنت ادرى بقى.
معتز : طب معلش ممكن تقفلي النور ده علشان اعرف أنام.
هدى : معتز أنت ممكن تتجوز عليه؟
معتز : اهلا دا احنا مش هنخلص الليلة بقى.
هدى : رد عليه ممكن تتجوز؟
معتز : اتجوز ليه يا هدى ما أنا متجوز يا حبيبتي اطفي النور خليني أنام عندي شغل الصبح بدري.
هدى : يعني مش ممكن؟
معتز : معملتهاش زمان هعملها وأنا في السن ده برضو يا هدى؟!
هدى : وفيها ايه ما الراجل بيتجوز عادي حتى لو عنده سبعين سنة أنت لسه موصلتش للسن ده.
معتز : هو دا مدح ولا ذم بس علشان ابقى فاهم.
هدى : تصبح على خير.
معتز : ودا اسمه ايه ده؟!
هدى : مش كنت عاوز تنام
اديني هسيبك تنام.
معتز : يعني تفتحي حوار ملوش أي لازمه وبعدين تقولي تصبح على خير؟!
هدى : عندك شغل الصبح يا حبيبي اطفي النور ونام.
معتز قام يطفي النور وهو مش فاهم تصرفات هدى معاه.
_________
بعد كام يوم.
دخل عُمر لنادين.
عُمر : البسي يا نادين علشان عاوزك في مشوار.
نادين : مشوار ايه يا بابا أنا لسه راجعه من الشغل وتعبانه.
عُمر : معلش هناك هتستريحي.
نادين : هناك فين؟
عُمر : اقولك ومتقوليش لمامتك؟
نادين : ماما اصلا مبتكلمنيش علشان اقولها حاجه.
عُمر : عازمك على أكلة سمك من اللي قلبك يحبها ها ايه رأيك؟
نادين : رأيي في ايه؟
عُمر : عازمك على الغدا بره لبسي الولاد وجهزي نفسك يلا قبل ما مامتك تيجي.
نادين : حضرتك مش عاوز تاخد ماما معاك ليه؟
عُمر : هتقعد تقولي ما كنا عملناه في البيت ووفرنا الفلوس دي كلها بس أنا عاوز اخرجك تمشي شوية هوا.
نادين بابتسامة : ماشي هلبس والبس الولاد خمسة وجايه.
عُمر بابتسامة : ماشي هستنى تحت في العربية لحد ما تخلصي ابقي اقفلي الباب وراكي.
________
في شقة طارق.
ياسمينا : هههههههههههه
هنادي : ممكن اعرف بتضحكي على ايه؟!
داليا : هههههههههههه
أنا ضحكت على ضحك ياسمين.
أمل وسهر وفريدة :ههههههههههه
هنادي : لا دا أنا بقيت مضحكه بقى.
ياسمينا بتمسح دموعها اللي نزلت من كتر الضحك : يا بنت الـ إيه يا هنادي ههههههههه
لسه بيجيلك عرسان لحد دلوقت!
ههههههههههههه
داليا : هههههههههههه
هنادي : بلاش انتي يا داليا علشان منزعلش من بعض.
سهر : هههههههههههه
وايش معنى داليا يعني ما كلنا ضحكنا
ههههههههههههه
فريدة : ياسمين بتحب تبص لنص الكوباية المليان
ههههههههههههه
إنك يعني لسه حلوة وبيتقدملك عرسان.
ياسمينا : انتي كده يعني بتكحليها يا فريدة
ههههههههههههه
فريدة : امال انتي تقصدي ايه؟
أمل : هنادي لو وافقتي محدش يقدر يلومك دا حقك ولو رافضتي برضو دا حقك انتي حره.
داليا : صح يا أمل وبعدين مكبره الموضوع كده ليه يا هنادي ولا ليكي غرض تاني واحنا منعرفش؟!
ياسمينا : هههههههههههه
قالت لك بلاش انتي يا داليا علشان منزعلش مع بعض.
هنادي : ما تبطلي ضحك يا ياسمين بقى هزعل بجد.
ياسمينا بتمسح دموعها مرة تانية : هههههههههههه
مش عارفه أنا مالي وكإن وحشني الضحك وعاوزه اضحك كده للصبح.
سهر : اضحكي يا ياسمين محدش واخد منها حاجه.
فريدة : زين ابني عاوز يرتبط.
ياسمينا : هههههههههههه
اربطيه في رجل السرير يا فريدة وريحي نفسك.
أمل وسهر وداليا وهنادي : هههههههههههههه
ياسمينا : خيبة ايه دي يا أختي هي العيال كلها عاوزه ترتبط واللي مرتبطين عاوزين يفركشوا.
الجميع : هههههههههههه
فريدة : عاوزه تخلعي ولا ايه يا ياسمين؟
ياسمينا : لا أخلع ايه أنا عاوزه اجوزه هههههههه
داليا : عاوزه تجوزي جوزك يا ياسمين!
ههههههههههههه
ياسمينا : مش عارفه بقيت متبلدة المشاعر والأحاسيس ههههههههههه
حاسه زي اللي عاوزه تهرب من الدنيا كلها.
أمل : بعد الشر عليكي يا ياسمين.
هنادي : شر ليه يا أمل يا أختي احسن من الدنيا وبلاويها.
ياسمينا : هههههههههههه
يعني أمل تقولي بعد الشر عليكي وانتي عاوزاني أموت علشان اهرب من الدنيا وبلاويها يا هنادي؟!
داليا : هههههههههههه
مريم عامله ايه يا هنادي؟
هنادي : اسألي حماتها.
سهر : مبتروحيش هناك ولا ايه؟
هنادي : بروح بس بقالي اسبوع مشوفتهاش.
ياسمينا : يا أختي وعاوزه تشوفيها تعملي بيها ايه خليها في بيتها.
سهر : هنادي قعدت تقول لمريم مفيش حمل السنة دي عاوزاكي تتخرجي بالسلامة ههههههههه اهي هتتخرج بعيل.
الجميع : هههههههههههه
هنادي : بقى كده يا سهر ماشي.
ياسمينا : هههههههههههه
جوزها ضحك عليكي واكلك الحلاوة في الأول يا هنادي هههههه
داليا : لا دي كانت بسبوسه بالقشطة هههههههه
فريدة : مربى يا داليا
ههههههههههههه
هنادي : متحوشيهم عني يا أمل ولا فرحانه اكمن ابنك اخد البنت وزحلقني.
ياسمينا : هههههههههههه
أمل : اهي هناك في بيتها روحيلها محدش مانعك.
هنادي : ما أنا كل اما اروح هناك اسح دموع وابقى عاوزه اخدها في أيدي وأنا ماشيه فقولت اجمد قلبي ومروحش بقى اليومين دول خصوصا إن الإمتحانات قربت خلي ابنك يسيبها تذاكر يا أمل.
فريدة : هههههههههههه
اه فكرتيني بنفسي أول جوازة ليه كنت متورطه الورطه دي بس معداش ست شهور وكنت مطلقه من كريم.
ياسمينا : هههههههههههه
انتي كده بتطمنيها يعني يا فريدة؟!
داليا : هههههههههههه
انتي بتقولي ايه يا فريدة؟
فريدة : ما هو أنا اتجوزت مرتين ههههههه لأ تلاته
ما هو أنا وكريم اتجوزنا مرتين.
ياسمينا : جاحده
ههههههههههههه أنا وسهر وهنادي اللي فلتنا بس هنادي احتمال تخرج بره المجموعة وتتصفصف عليه أنا وانتي يا سهر.
فريدة : هههههههههههه
بطلي تقل دم بقى هو بمزاجنا.
داليا : عندك حق يا فريدة
دا نصيب.
ياسمينا : لأ بقولكم ايه متحسسونيش بتأنيب الضمير أنا كان قصدي نضحك ونفرفش كده مالك يا أمل زعلتي ولا ايه؟
أمل : لا يا ياسمين وهزعل من ايه كل شيء نصيب.
___________
في شقة جد ليلى.
... : طب واللي يساعدك تخلصي منها؟
سوسن : اخلص منها؟!
... : ايوه
مش بتقولي عاوزه نارك تبرد.. اهي مش هيطفيها غير إنك تاخدي بتار ابنك من اللي قتلته.
سوسن : وأنت مستفيد ايه؟
...  : هو أكل وبحلقه؟ !
انتي ليكي إني اساعدك وخلاص استفيد مستفيدش
شيء ميخصكيش.
سوسن : ايوه
عاوزه اقتلها زي ما قتلت ابني.
... : رصاصة في دماغها وتخلصي منها خالص
ولا أقولك هنفكر لك في فكرة تانية تخلصي بيها منها لإن مسك المسدس عاوز تدريب أما السكينة ضربتين وتخلص.
سوسن : نفسي أحرق قلبهم عليها زي ما أنا اتحرق قلبي كده.
... : كام يوم كده وهجيلك تاني علشان نرتب للموضوع ده.
سوسن : ماشي.
... : بس بقولك ايه مفيش داعي تتكلمي مع حد ولا تجيبي موضوع ابنك ولا البنت ولا عاوزه اخد بالتار ولا كل الكلام ده انتي تفضلي مكتمه كده لحد ما الموضوع يخلص خالص مش عاوزين حد يشك فيكي.
سوسن : ماشي بس متتأخرش علشان أنت مش عارف الكام يوم اللي بتقول عليهم دول هيعدوا عليه ازاي.
_________
نكمل الحلقة الجايه.