#انت_قلبي٣
__________
الحلقة ٢١
سهر : ادينا اهو بقينا لوحدنا و نيمتلك الاستاذ يوسف علشان نعرف ندردش كده على روقان و لو إني مش في المود يعني بس هسمعك.
مليكة : عاوزه تسمعي مني ايه يا مامي؟
سهر : عاوزه اعرف أحوالك يا حبيبتي وشك دبلان ليه ملوكه و مهمومه ليه يا حبيبتي؟
مليكة : مامي أنا مخنوقه قوي.
سهر تضمها ليها : مالك يا حبيبتي؟
مليكة : سيف متغير قوي معايا وبقى عصبي جدا انا بقيت اخاف منه.
سهر : ايه!! ازاي ده؟
مليكة : بقيت اخاف اسأله على حاجه أو اطلب منه حاجه بقيت اخاف اصلا اتكلم معاه.
سهر : ليه يا حبيبتي؟
مليكة : من كام يوم مسك ايدي كانت هتتكسر.
سهر : يا خبر ليه؟
مليكة : خايفه الموضوع يطور و بعد كده يمد ايده عليه و انا مش هستحمل يا مامي.
سهر : طب بس اهدي متعيطيش اعتذرلك و لا لأ؟
مليكة : اعتذر و قعد يصالحني بس انا مش قادرة انسى اللي حصل و كل أما اجي اكلمه افتكر اللي حصل و اخاف.
سهر سكتت بحزن و هي بتفكر.
مليكة : خايفه اكرهه و مقدرش اكمل معاه.
سهر : هو يعني بيقولك ايه وقتها؟
مليكة : بيقول غصب عني
و إن انا اللي بستفزه مع إن أنا يا مامي مبعملش كده خالص و مبقتش اعترض على أي حاجه حتى لو مش عجباني بقيت انفذ كلامه و انا مش مقتنعه و مقدرش انقاشه انا مش حابه كده خالص بس بخاف من الخناق و الخصام.
سهر : طيب هو اعتذر و قالك مبرراته بعدها بقى عمل حاجه تانية؟
مليكة : ايوه بيتعصب كتير.
سهر : معلش يا حبيبتي يمكن مضغوط في الشغل و لا حاجه انتي متحاوليش تستفزيه خالص.
مليكة : مبستفزوش يا مامي خلاص اعتبري مقولتش حاجه.
سهر : ندمانه انك قولتيلي؟
مليكة : لأ بس حضرتك في ايه و لا في ايه و كمان يعني هتعمليلي ايه؟ سيف بيتصل.
سهر : طيب يا حبيبتي بالراحه ردي عادي.
في التليفون 📞
مليكة : الو.
سيف : مليكة اجهزي علشان جاي اخدك.
مليكة : حاضر.
سيف : عاوزه حاجه اجيبهالك و انا جاي؟
مليكة : لأ.
سيف : متأكدة يعني مش هنروح و بعدها تقوليلي نسينا نجيب معرفش ايه؟
مليكة : لأ مش هقول حاجه.
سيف : اوك مسافة السكه.
مليكة : مع السلامة.
سهر : ايه ماشيه؟
مليكة : سيف جاي في الطريق.
سهر : طب و ايه المشكلة اقعدوا اتعشوا معانا.
مليكة : معلش يا مامي علشان عمو زمانه راجع من بره و سيف بيحب يتعشا معاه.
سهر : طيب يا حبيبتي براحتكوا.
____________
في شقة أكرم.
فريدة : هطلع بقى و ابقى اجيلك الصبح.
ندى : اقعدي يا فريدة هتطلعي تنامي دلوقت؟
ميرفت : سبيها يا بنتي كريم ابن عمك جه شايفه
العربية واقفه تحت.
ندى : خلاص تصبحي على خير.
فريدة : هجيلك الصبح.
ندى : ماشي.
تخرج فريدة.
ميرفت : مالك يا ندى؟
ندى : هو حازم فين يا ماما؟
ميرفت : و بتسألي عنه ليه؟
ندى : هو مينفعش اسأل عنه يا ماما؟
ميرفت : لأ و قفلي على السيرة دي علشان باباكي جه.
_________
في الكافيه.
البنت اللي معاه : لاااا انت مش معايا خالص.
حازم : بتقولي حاجه؟
..... : عماله اتكلم من الصبح ايه مش سامعني؟
حازم : معلش أصل عندي مشاكل قالبه دماغي.
...... : طب ما تفضفض كده يمكن تستريح.
حازم : محدش بيرتاح بعد الفضفضه.
...... : يا سلام دا ايه الفلسفه دي يا متر؟
بقولك ايه متيجي نتمشى شويه.
حازم : لا مليش مزاج.
..... : و لما ملكش مزاج خرجت معايا ليه؟
حازم : كنت فاكر إني هقدر اخرج من اللي أنا فيه.
..... : خلاص متتصلش بيه لما يتعدل مزاجك.
يشاور حازم للويتر يحاسب و يخرج و يتركها قاعدة لوحدها.
يركب العربية و يبعد عن المكان.
في التليفون 📞
أنس : يعني ايه يا بابا مش جاي؟!
حازم : هبات في الشقة الجديدة.
انس : يعني حضرتك مش عايز تيجي تطمن على ماما؟
حازم : مامتك عامله ايه؟
أنس : كويسه سألت عنك على فكرة.
حازم : سألت عني!
أنس : ايوه حضرتك مش مصدق.
حازم : خلي بالك من مامتك و اختك.
أنس : يعني حضرتك مش جاي برضو؟
حازم : أنس متتعبنيش انا شويه كده و هبقى اجي اطمن على ماما.. سلام.
أنس : مع السلامة.
ندى : ها قالك ايه؟
أنس : قال مش جاي.
ندى : انت ليه قولت إني سألت عنه؟
أنس : مش دا اللي حصل يا ماما؟!
ندى : ايوه بس مكونتش تقوله و بعد كده متقولش غير الكلام اللي اقولهولك و بس.
أنس : حاضر.
ندى : ادخل نام بقى.
أنس : يعني حضرتك مش عاوزه مني حاجه؟
ندى : لأ أنا كمان هنام تصبح على خير.
____________
أنت تقرأ
أنت قلبي الجزء الثالث
Werewolf(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
