#انت_قلبي٣
__________
الحلقة ٧٦
كمال : ليه هو أنا مش عارفك؟!
سيف : لا يا بابا في الموقف دا بالذات أنا مغلطتش خالص ولا فاهم أنا أصلا بتعامل بالاسلوب دا ليه؟!
كمال : معلش يا ابني ممكن يكون في حاجه مضايقاها كلمها بالراحة وافهم منها ولا خرجها شويه تفُك عن نفسها.
سيف : كنت ناوي اعمل كده بس اسلوبها معايا قفلني بصراحه.
كمال : معلش أنت الراجل
لازم دماغك تكون كبيرة وتعدي شويه بلاش توقفلها كده على الواحدة
مسألتهاش مامتها كويسه ولا حصل حاجه زعلتها؟
سيف : قالت إنهم كلهم كويسين قولت لها خلاص تعالي طالما اطمنتي على مامتك جات بقى وهي مضايقه بالشكل ده.
كمال : ما أنت عارف السبب اهو امال لما سألتك قولت معرفش ليه؟
سيف : ما أنا مش متأكد
ايه اللي مزعلها بالظبط.
كمال : خلاص ادخل صالحها وخُدها كده وانزلوا اتمشوا في أي مكان ودردشوا مع بعض
هترجعوا مبسوطين ونفسيًا هتكونوا أفضل.
سيف سكت بتنهيدة.
كمال : يلا مستني ايه
يوسف هيفضل معايا هنلعب وناكل ونتفرج على الكرتون من غير ما تعملنا دوشه ولا تقلب القناة
يلا بقى.
ابتسم سيف وقام : حاضر.. بعد اذنك.
وخبط على الباب ودخل.
_______
في شقة حازم.
فريدة بتتألم : اااه يا أنا يا أمه ااااه يا ضهري هموت يا ندى قولي لي اعمل ايه
اروح البيت وأنا مدغدغه كده ازاي؟
ندى : هههههههههههه
حد قال لك تروحي الجيم
يا بنتي مش بعد ما شاب ودوه الكُتاب كل حاجه وليها سن يا اختي.
فريدة : الملافظ سعد يا اختي ايه شايفاني عجزت للدرجة دي.
ندى : دفعتي اشتراك كام في البتاع ده؟
فريدة : لسه مدفعتش حاجه دي صاحبة الجيم دي المس اللي بتدرس لجميلة في المدرسة وهي اللي حطت الموضوع في دماغي اااه يا انا يا شماتت جوزي فيه ااااه.
ندى : هههههههههههه
هو دا كل همك؟!
فريدة : أصل مشوفتهوش بصلي امبارح ازاي وكأنه عاوز يقولي متنفعيش للمهمه دي وأنا اللي اتجننت وعملت في نفسي كده مالها المشايه اللي بالكهربا اللي عندي اديني كنت بمشي عليها وتمام وزي الفل لازم اعمل فيها سوبر مان يعني؟
ندى : هههههههههههه لا متقوليش على نفسك كده
مان ايه بس انتي ست الستات يا فراولة.
فريدة : بطلي ضحك وتريقة يا اختي هاتي الكريم اللي كنتي بتستعمليه ضهري هيموتني تمارين ضغط ايه بس كانت شورى مهببه يا اختي.. آآآآه.
ندى : هههههههههههه
انتي كنتي فاكرها مراجيح رايحه تلعبي على كل لعبة شويه؟!
فريدة : ايوه أنا كنت عماله اتنتقل من دي لدي
وكنت فرحانه قوي وحاسه إني بنت في العشرين لحد ما ووقعت خالص لاقيت نفسي بيترش عليه مياه.
ندى : هههههههههههه
انتي اغمى عليكي؟!
فريدة : ايوه... هاتي بقى الكريم اخلصي.
ندى : حاضر بس ريحي على الكنبه هنا لما اجي.
___________
في شركة مراد.
شادي بيدخل مكتب الحسابات ومعاه أوراق بيسلمها للموظف.
شادي : لما يجي الأستاذ حاتم سلمها ليه.
الموظف : حاضر.
شادي بيقرب من مكتب احد الموظفين وبيشبه عليه لإن الموظف كان قاعد ومنحني برأسه أمام شاشة التليفون.
شادي بدهشه : مراد!
مراد يرفع رأسه : شادي!
بتعمل ايه هنا؟
شادي : أنت اللي بتعمل ايه هنا؟
مراد : عادي جيت اشتغل.
شادي : وهو فين الشغل ده أنت قاعد وفي ايدك الموبايل مبتعملش حاجه.
مراد : ما هو لسه بفهم الشغل وكمان محدش فاضي يعرفني أي حاجه قولت لما يخلصوا بقى.
شادي : اممم قولت لي بقى... طيب سلام.
مراد : بقولك ايه ما تاخدني عندك أصل زهقت من المكان ده.
شادي : اخدك عندي فين
أنت مفكر إنك في رحلة هتنتقل ما بين المكاتب وتشوف المكتب اللي يعجبك تقعد فيه ثم أنت تفهم ايه في شغلي اساسًا؟!
خليك في الحسابات اهو تتعلم حاجه تنفعك.
مراد : طيب.
شادي : انت بتعمل ايه؟
مراد : استنى بس لحظة لما احصد المحصول علشان اخد الفلوس اللي أكبر بيها المزرعة.
شادي : بقولك ايه ما تيجي تقعد الناحية دي.
مراد : ايش معنى؟
شادي : أصل هنا بالظبط في كاميرا وهتبقى في وشك وهيظهر لدكتور هشام حضرتك بتعمل ايه علشان يقعدك في البيت بناقص حضرتك يا حبيبي الشركة مش محتاجه اصلا..
مراد : بقى كده.. عاوز تعملي مشاكل وتقعدني في البيت!
شادي : طب هو أنت بتعمل حاجه اقعد في البيت احسن يا حبيبي.
مراد : لا يمكن أبدًا أنا حبيت هنا قوي.
شادي : غريبة!
مراد : ما غريب إلا الشيطان اتفضل روح شوف شغلك.
شادي : اوك.. سلام.
مراد : ييييييه اديني خسرت المحصول اللي كنت عمال ارويه.
نظر الموظف لمراد بدهشه.. فمراد نظر له بابتسامة.
_________
في فيلا آسر.
آسر : خلاص يا ملك اطلعي غيري هدومك وروحي
مع جوزك يا بنتي.
ملك بدهشه : أنا!.
قام عمار وقعد بجانبها ومسد على يدها : صدقيني
يا ملك أنا مقولتش حاجه لعمتو ولا اعرف اصلا مين اللي قال لها ومش فارق معايا كل ده
أنا اللي يهمني هو انتي وابننا وبس أنا آسف يا خالو على سوء التفاهم اللي حصل بس صدقني معرفش حاجه عن الحوار ده.
آسر : خلاص يا ابني حصل خير قومي بقى يا ملك اسمعي الكلام.
ملك :"مش قادرة يا بابي ازاي بس هروح هناك بعد اللي حصل؟
عمار : انتي قاعدة في بيتك محدش له حاجه عندك واللي هيتكلم أنا هعرف ازاي اخد حقك منه
دي حياتنا مفيش حد له حق يتدخل ما بينا.
ابتسم آسر لكلام عمار.
آسر : يلا يا ملك مش هكرر كلامي تاني.
ملك : طب بس ازاي هروح يعني ومامي لسه تعبانه؟
آسر : مامي كويسه متقلقيش مليكة رجعت بيتها وأنا كمان الصبح هنزل اروح شغلي عادي.
عمار : ها يا ملك قولتي ايه؟
ملك بتنهيده : طيب حاضر هقوم اغير هدومي.
ابتسم عمار ليها وبينادي على سليم اللي كان بيلعب قصادهم.
أنت تقرأ
أنت قلبي الجزء الثالث
Hombres Lobo(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
