أنت قلبي الجزء الثالث

الحلقة ٦٧

#انت_قلبي٣
__________
الحلقة ٦٧

فريدة : أنت هتنام؟
كريم : طلباتك يا فريدة؟
فريدة : تسيبني أنا أتكلم معاها.
كريم : نعم!!
فريدة : أنت ليه واخد الموضوع على كرامتك قوي كده ما تسيبني أنا اتعامل معاها وافهمها إنه مينفعش واحساسها دا غلط.
كريم : انتي شايفاني عيل صغير مش هقدر احل الموضوع دا لوحدي؟!
فريدة : كبير وعاقل وكل حاجه بس يمكن يكون الحوار دا محرج بالنسبة لك فخليني انا اتعامل معاها.
كريم : نامي يا فريدة.
فريدة : مش هعرف أنا.. وافق خليني ارتاح بقى.
كريم : يووووه انتي ايه مبتزهقيش قولتلك لأ.
فريدة : انتي بتزعقلي يا كريم؟!
كريم : امال اعملك ايه علشان تفهمي إنك تبعدي عن الحوار ده.
فريدة : معلش نصيبك كده اخدت واحدة مبتفهمش.
كريم : أنا مبحبش طريقة الحوار بتاعتك دي وانتي عارفه.
فريدة : تصبح على خير.
وغطت نفسها علشان تنام.
فقفل كريم النور علشان ينام هو كمان.
________

في شقة هشام.
هشام : ولا قصدها يا ياسمين مش فارقه
لو سمحتي قفلي على الحوار ده وعاوزه تروحي لمامتك أنا مش ممانع ولا عمري حرجت عليكي إنك تروحي هناك بس قولت لك أنا لأ وانتي عارفه السبب.
ياسمين : خلاص يا هشام بقى متزعلش نفسك.
هشام : تصبحي على خير.
ياسمين : وانت زعلان كده لا مينفعش.
هشام : ياسمين انتي عارفه أنا بحبك قد ايه.
ياسمين : عارفه يا حبيبي.
هشام : يبقى لما نتعامل مع بعض بلاش هاه انتي عارفه.
ياسمين : خلاص يا هشام أنا تعاملي هيبقى مع مامتي وبس وأنت هتبقى بعيد.
هشام : ولو عاوزه تيجي هنا تتفضل البيت بيتها.
ياسمين : حبيبي أنت ابن أصول متشكره قوي.
هشام : على ايه بس يا ياسمين يعني تكرمي أهلي وتهتمي بيهم وأنا ابسط حاجه ممكن اعملها إن بيتي يفضل مفتوح لـ أهلك.
ياسمين : رغم كل حاجه إلا إنك مبتردش الإساءة بالاساءة ودا في حد ذاته محتاج شكر.
وتُقبله من خده.
هشام بابتسامة يحتضنها ويقفل نور الابجورة.
__________
في شقة كمال ونادين.
سيف : مليكة.. مليكة انتي نمتي؟
تلتفت مليكة لسيف وبصوت ناعس : سيف أنت لسه منمتش؟
سيف : كنت عند بابا ولسه جاي اهوه.
مليكة : عاوز حاجه؟
سيف يمسك ايدها ويُقبلها : متشكر قوي.
مليكة : على ايه؟!
سيف : متشكر إنك واخده بالك من بابا وفضلتي قاعدة جنبه لحد ما رجعت من بره.
مليكة : ايه متشكر دي هو أنا عملت ايه يعني يستحق الشكر ده وبعدين باباك زي بابي بالظبط مفيش فرق يعني من الطبيعي أفضل جنبه امال يعني هسيبه وادخل أنام؟!
سيف : لا طبعًا أنا عارف إنك بنت أصول ومتعمليش كده رغم إني اوقات بفقد اعصابي وبزعلك بس انتي مبتحاوليش تغطلي ولا تردي كل دا ليه.
مليكة : سيف نام علشان عندك شغل الصبح.
سيف : مليكة أنا بحبك خليكي جنبي اوعي تبعدي عني.
مليكة : طب ما أنا بحبك بس عاوزه اطلب منك طلب ياريت علشان خاطري تحاول تمسك أعصابك علشان دلوقت بستحمل معرفش بعدين بقى ايه ممكن يحصل.
سيف : عارف يا حبيبتي ومقدر إنك بتتحملي وتضغطي على نفسك علشان البيت دا ميتهدش
سامحيني وأنا بحاول صدقيني.
مليكة : طيب تصبح على خير.
سيف : شكلك تعبانه.
مليكة : اه عاوزه أنام.
سيف : اوك يا حبيبتي وانتي من أهل الخير
يوسف صمم ينام جنب بابا.
مليكة : طيب بس ميجيش بعد شويه يقلقني علشان عاوزه انام..
سيف : متقلقيش نامي براحتك..
_________
في فيلا عُمر.
عُمر : أدخلي يا نور.
نورهان عينها بتدور في المكان وهي بتحاول تسترجع ذكرياتها في البيت ده.
عُمر : البيت وحشك مش كده؟
نورهان : يعني مش قوي.
عُمر : بس انتي وحشتيه ووحشتيني قوي.
بيقرب منها وهي بتبعد.
نورهان : هطلع حاجتي فوق.
عُمر : استني أنا هطلعها.
نورهان : هو مفيش حد هنا ولا ايه؟
عُمر : اديتهم كلهم اجازة علشان نبقى لوحدنا.
ابتسمت نورهان ابتسامة خفيفه مكانتش فرحانه من جواها رغم إنه بيحاول يراضيها.
يطلع بالشنطة فوق وهي تطلع بعده بتدخل تتفاجئ إنه عامل جو حلو في الغرفة.
عُمر : هاه ايه رأيك؟
أنا قولت نعيد الذكريات من تاني فاكره؟
وبيقرب منها وهي بتبعد.
نورهان : مايا كلمتني وقالت إنها جايه بكره.
عُمر : اه ما هي قالت لي.
نورهان بتفتح الشنطة وتخرج هدوم ليها.
عُمر يفتح الدولاب : ألبسي من هنا.
نورهان : ايه ده هدوم مين دي؟
عُمر : هدومك.
نورهان : بس مش دي هدومي.
عُمر : لأ هدومك نزلت اشتريت كل الحاجات دي النهاردة أول ما هشام قال لي.
نورهان : طب وفين هدومي التانية؟
عُمر : هنا اهوه متقلقيش كل حاجه زي ما هيه.
نورهان : طب كويس.
عُمر : ألبسي حاجه من دي بقى.
نورهان : مش مهم أي حاجه.
وبتخرج هدوم ليها من الشنطة ودخلت تغير وعُمر منتظرها..
خرجت فقام مسك ايده واخدها في حضنه : وحشتيني قوي يا نور.
نورهان بتبعد عنه : تصبح على خير.
عُمر : أنا فاهم إن علاقتنا مش هترجع كده بين يوم وليلة بس على الأقل حاولي تنسي شويه.
نورهان : للأسف كنت جايه ومستعده للعتاب لكن حتى ده مش قادرة اعمله أنا مليش نفس اعمل أي حاجه.
عُمر : براحتك وخُدي وقتك أنا عارف إن الموضوع مكانش سهل بالنسبة ليكي وصعب نرجع زي الأول بسرعة كده.
نورهان : زي الأول!
هو احنا كانت حياتنا عامله ازاي في الأول؟
فكرني كده علشان شكلي نسيت لا لا أنا قولت مش عاوزه اعاتب ولا اعمل أي حاجه خالص؟
عُمر : حياتنا مكانتش في أفضل حال بس اهي كانت ماشيه.
نورهان : علشان كنت بعدي على أمل إن الوضع هيتغير معرفش إنه هيتغير لدرجة إنك تتجوز عليه.
عُمر : اتكلمي وفضفضي.
نورهان : هترتاح لما أخرج كل اللي جوايا بس أنا معنديش طاقة للعتاب والكلام تصبح على خير.
عُمر باستسلام : وانتي من أهل الخير.
__________
في الصباح.
جرس الباب يرن.
نجيب يقوم من النوم مش شايف قدامه : دا مين اللي جاي الصبح بدري كده؟!