أنت قلبي الجزء الثالث

الحلقة ١٠٧

#انت_قلبي٣
__________
الحلقة ١٠٧

في التليفون 📞
فريدة : هتتأخر يا كريم؟
كريم : شويه كده يا فريدة نامي يا حبيبتي.
فريدة : لا مش نايمه غير لما تيجي.
كريم : أنا احتمال اتأخر شويه مش عاوزك تقلقي.
فريدة : ليه في حاجة ولا ايه؟
كريم : يعني العادي بتاع المستشفى بس في حالة هنا جات في حادثة والشرطة بتحقق مع صاحب العربية اللي مسؤل عن الحادث.
فريدة : طيب خُد بالك من نفسك وأنت راجع
تصبح على خير.
كريم : وأنتي من أهله.. هتنامي؟
فريدة : ساعة كده لو اتاخرت هنام.
كريم : اوك .. مع السلامة.
________
في فيلا آسر.
سيف : يعني مفيش أي اخبار خالص؟
مليكة : لأ.
يقوم سيف من مكانه ويقرب يقعد جنب مليكة ويمسك ايدها تحاول تسحب ايدها.
سيف : مليكة بلاش كده.
مليكة : أنت اللي بلاش كده وياريت تراعي الظروف اللي احنا فيها.
سيف : أنا بحاول اهدي أعصابك شايفك تعبانه.
مليكة : ملكش دعوة بيه.
سيف : يعني ايه مليش دعوة بيكي هو أنا مش جوزك ولا ايه؟
مليكة : أنا مقولتلكش ترجعني بعد ما طلقتني.
سيف : بس أنا رجعتك علشان بحبك.
مليكة : وأنا خلاص مبقتش أحب حد ولو سمحت بقى أنا اعصابي تعبانه مفروض تعرف دا لوحدك.
سيف : أنا عذرك ومقدر الظروف اللي انتي فيها وهعتبر نفسي مسمعتش حاجة.. تصبحي على خير.
مردتش مليكة.
فخرج سيف قابله علي وهو جاي من بره.
سيف : لا همشي بقى علشان الوقت اتأخر.
خرج معاه علي يوصله لحد ما خرج من البوابة بالعربية.

في غرفة المكتب.
منه : يعني ايه مش عاوز حد يعرف وليه سهر بالذات يعني؟
وليد : علشان هتشبط وتقولك اروح قبلكم ما انتي عارفه.
منه : حتى لو كده هو دا مش حقها؟
وليد : لأ علشان هي هتروح مش هتعمل حاجة اخرها تعيطلها شويه وخلاص لكن إحنا رايحين علشان وجودنا هناك ضروري.
منه : على كده بقى لو قولتلك اجي معاك مش هتوافق.
وليد : هي رحلة يا منه
عاوزه تروحي تعملي ايه خليكي هنا ولادك وولاد اخوكي محتاجينك.

حسام بيخبط على باب المكتب.
وليد : ادخل يا حسام.
حسام : ازيك يا منه؟
منه بتنهيدة : مش تمام يا حسام.
وخرجت من المكتب.
وليد : خليك معايا دلوقت
فين الورق اللي طلبته منك؟
حسام : في خزنة الشركة.
وليد : ما أنا وقولتلك هاته بما إن معاك الباسورد
وتقدر تفتحها.
حسام : بس دي أمانة وإلا لو آسر عاوز حد تاني يفتح الخزنة وهو مش موجودة كان قال لك مثلا.
وليد : جرا ايه يا حسام دي خزنة اخويا.
حسام : واخوك مش موجود يا وليد ثم دا ورق شغل أنت بقى عاوزه في ايه ولا علشان المشروع خاص بالشغل اللي كانت الشركة عندك هتنفذه؟
وليد : أنت تقصد ايه؟؟
حسام : بكرة آسر يرجع بالسلامة واللي أنت عاوزه ابقى اطلبه منه ولحد ما يرجع أنا امين على شركته وماله.
وليد : وأنا بقى اللى هسرقهم يا ابن عمي؟!
على العموم متشكر قوي.
حسام : ايه رايح فين؟
وليد : مروح عاوز حاجة؟
حسام : لأ...مع السلامة.

في غرفة البنات.
ملك : مليكة.. مليكة انتي هتنامي؟
مليكة : بحاول.
ملك : اقعدي معايا شويه.
مليكة : عاوزه حاجة؟
ملك : هو يعني لو بعد الشر بعد الشر بابي حصل له حاجة احنا هنعمل ايه؟
نظرت مليكة لملك وهي مدمعه ومردتش.
ملك : أنا مش متخيله حياتنا من غير بابي أنا تعبانه قوي وخايفه.
مليكة خرجت توقف في البلكونة تلحقها ملك.
ملك : انتي مبتردش عليه ليه؟
مليكة بصوت مخنوق : ارد اقولك ايه حالك هو حالي.
ملك : هي مامي نايمه؟
مليكة : مامي مبتنامش
بتغمض ثواني وتقوم مفزوعه تسأل هو بابي متصلش يا مليكة؟
مبعرفش ارد اقولها ايه.