أنت قلبي الجزء الثالث

الحلقة ١٤

#انت_قلبي٣
__________
الحلقة ١٤

في البلد.. وفي الطريق.
حامد : جاي منين كده يا محمود؟
محمود : اهلااا ازيك يا حامد يا ابن عمي؟
حامد : بخير ليه كنت جاي من السفر واحشك للدرجة دي؟
محمود : طبعا واحشني يا ابن عمي شوف احنا ساكنين في بيت واحد بس فين و فين لما بلمحك طالع و لا خارج من البيت.
حامد : جاي منين يا محمود؟
محمود : جاي من عند بيت عمك كامل كنت بزور مرات عمك وولادها و بطمن عليهم.
حامد : غريبه دي!
محمود : ما غريب إلا الشيطان اللي دخل ما بينا يا ابن عمي.
حامد : الصراحه اني مش مرتحالك.
محمود : هههههههههههه
ب يعجبني فيك صراحتك يا حامد بس مش مرتحالي ليه؟
حامد : مش عارفه ليه؟!
دا أنت لا بطيق مرات عمك و لا حتى الشارع بتاعهم ايه اللي حدفك على هناك يا محمود و اوعى تقولي بشوف ولاد عمي و بطمن عليهم مش داخل دماغي اني الحوار ده.
محمود : هههههههههههه
يدخل دماغك و لا ميدخلش هيفيدني بـ ايه ثم ليه سوء الظن ده محدش مننا معصوم من الغلط و إن كنت غلطت قبل كده فكان طيش شباب و خلاص راح لحاله.
حامد : يمكن.. سلام عليكم.
محمود : و عليكم السلام.
تركه حامد واقف لوحده وراح يشوف اشغاله.
محمود : دا أنت حشري يا اخي انت مالك كنت فين و بعمل ايه ما تخليك في حالك.
_________

في شركة مراد..
في التليفون 📞
شادي : و عليكم السلام.
داليدا : مين معايا قصدي هو دكتور جمال موجود؟
شادي : اقوله مين؟
داليدا : هو موجود بس؟
شادي : ايوه موجود بس راح يخلص حاجه في الشغل و جاي.
داليدا : أنا اخته قوله بابا تعبان قوي و انا و ماما في البيت لوحدنا و مش عارفين نتصرف.
شادي : طيب حاضر هقوله مع السلامة.
قفل شادي و بسرعه خارج من المكتب يقابل جمال.
جمال : ايه يا شادي بتجري رايح فين؟
شادي : اختك اتصلت بتقول إن باباك تعبان.
جمال : ايه!
شادي : مش وقته أنت لسه هتندهش يلا بينا.
جمال : أنت جاي معايا؟
شادي : ايوه بس الأول اتصل بالدكتور اللي باباك بيتابع عنده.
جمال : طيب ثواني اكلم داليدا افهم منها.
شادي : طب أنا هسبقك على تحت.
__________

في شقة هشام.
ياسمين : انتي اللي مش عارفه تحاوطي على جوزك الراجل بكلمتين حلوين بيصفى و لا كأن في حاجه.
ليلى : بيتهيألك يا ياسمين أو يمكن مش كل الرجاله زي بعض ثم أنا مش فاهمه عملت ايه لكل دا؟
ياسمين : معرفش بس اكيد في حاجه يعني مش هيزعل كده من نفسه.
ليلى : صدقيني مفيش أي مشكلة حقيقية بينا يمكن اختلاف الطباع هي اللي عامله المشكلة دي.
ياسمين : يا ستي فوتي ما هو مستحيل هتلاقي واحد طبق الأصل نسخه منك لازم هيكون مختلف عنك شويه كبري دماغك و كله بيعدي.
ليلى : ارجع اخليه يحبني ازاي يا ياسمين؟
ياسمين : ارجعي ليلى اللي عرفها و حبها و هيرجع الحب دا من تاني.
ليلى : ما أنا مش عارفه يعني اعمل ايه ما هو أنا زي ما أنا متغيرتش.
ياسمين : خلاص شوفي ايه اللي مضايقه و متعملهوش.
ليلى : بحاول بس مش عارفه.
ياسمين : جوزك بيهتم بالجوهر أكتر من الشكل الخارجي صح؟ هههههههههههه ايه اللي أنا بقوله ده؟!
ليلى : مش عارفه.
ياسمين : اذا كان انتي مش فاهمه جوزك هفهمه أنا يا ليلى؟!
ليلى : طب اتكلم مع مين؟
ياسمين : يا حبيبتي مقصدش بس لازم تعرفي جوزك بيحب ايه بيكره ايه علشان دا هيسهل الحياة ما بينكم لكن واضح إنك مبتحاوليش تقربي منه و تفهمي دماغه
صدقيني دا هو الحل للخلافات اللي ما بينكم.
ليلى : افهم دماغه!
ياسمين : ايوه تفهمي دماغه علشان تعملي اللي هو عايزة.
ليلى : و ليه اعمل اللي هو عايزة مش اللي أنا عايزاه؟!
ياسمين : يييييه رجعنا لنشوفية الدماغ من تاني يا حبيبتي لما تعملي اللي هو عايزة هتعرفي تاخدي اللي انتي عاوزاه الحياة كده خد و هات محدش قالك و لا ايه؟!
ليلى : لا محدش قالي بس
عرفت دا من تعاملي مع الناس بره.
ياسمين : طب شوفتي علشان تعرفي تتعاملي معاهم بتستخدمي نفس اسلوبهم صح؟
ليلى : يعني ساعات.
ياسمين : يبقى اعملي مع شادي كده و زيادة شويه.
ليلى : هحاول.
ياسمين : اقعدي مع ريتاج تكتب الواجب علشان أنا بتعصب بسرعه و مش عاوزه اضرب.
ليلى : لا مش للدرجادي ضرب ايه بس
ههههههههههههه
ياسمين : طب اقعدي معاها خمس دقايق و شوفي إن ما خرجتك عن شعورك ابقي قولي ياسمين دي مبتعرفش حاجه.
ليلى : هههههههههههه
طب هنشوف تعالي يا ريجو نعمل الهوم ورك.
_______
في شقة عمار(والد ياسمين).
عمار : جم علشان يعتذروا!
وفاء : هما قالوا كده
بس الصراحه الناس ذوق جدا و محترمين و البنت كانت مكسوفه.
عمار : مش عارف يعني ايه مكسوفه و بعدين هما ايه اللي عرفهم إن إياد ساكن مع عيلته مش يمكن يكون ساكن لوحده ازاي يجوا لحد ميعرفهوش مش فاهم؟!
وفاء : لأ ما هو مطلعوش غير لما الست دولت جارتنا نادت عليه و قالتلي ضيوف جاينلكم و الست سألتني أنا مامت إياد قولتلها ايوه يا حبيبتي عايزة مين فطلعت منى كمان فاطمنوا يعني و دخلوا البيت.
عمار : طب و عاوزه ايه؟
وفاء ببتسامة : عاوزه نرد الزيارة.
عمار : نعم!
وفاء : الناس جم شايلين و محملين بصراحه كنت مكسوفه حتى اتحايلت عليهم يتغدوا معانا مرضيوش بقول نعزمهم أو ناخد زيارة ليهم.
عمار : برضو عاوزه ايه يا وفاء؟
وفاء : بص أنا حاسه كده إننا هنفرح قريب.
عمار : طيب يا ستي ابقي فرحيني معاكي.
وفاء : عمار انت عارف أنا أقصد ايه.
عمار : صدقيني و أنا كمان نفسي افرح بس هضحك على نفسي يا وفاء ناس منعرفش اصلهم و لا أي حاجه عنهم اروح اخد ابني و اقوله تعالى نخطبلك!
وفاء : مين قال كده بس احنا في الأول نزورهم و الزيارة دي هتبين يعني شوية حاجات كده و لو طلعوا ناس كويسين يبقى وقتها نتكلم اقولك أنا اللي هروح بزيارة ليهم و هاخد معايا منى خليك أنت و إياد بعيد عن الموضوع دا دلوقت.
عمار : اعملي اللي تعمليه يا وفاء.
________