أنت قلبي الجزء الثالث

الحلقة ١٥٣

#انت_قلبي٣
__________
الحلقة ١٥٣

في شقة أكرم.
كريم : خليها تعمل التحليل الصبح قبل الفطار.
فريدة : حاضر هقولها.
ونظرت لكريم : مالك يا كريم؟
كريم : عاوز أنام خلاص مش قادر.
فريدة : طب ما تطلع تنام.
كريم : انتي مش طالعه؟
فريدة : لأ أنا هنام هنا مع ندى جميلة نيمتها جوه.
كريم : طيب تصبحي على خير.
فريدة : وأنت من أهله.
كريم : يلا يا ولاد ولا سهرانين؟
أنس : قاعدين شويه يا عمي.
حازم : لأ يلا كفاية كده علشان ماما هتنام.
معتز : طيب بعد اذنكم.
زين : خُدني معاك يا معتز.
كريم : أنت هتنام فين؟
زين : هنام فوق في شقة عمو علاء.
كريم : وأنت يا محمد؟
محمد : هنام فوق مع حضرتك.
كريم : طب يلا تصبح على خير يا حازم.
حازم : وأنت من أهل الخير.
__________
في المستشفى.
منه : معلش يا سهر متزعليش مني.
سهر : لا يا منه وهزعل منك ليه أنا بس مستغربه التغيير اللي حصل لوليد اخوكي فجأة كده أنا مفيش بيني وبينه أي حاجه معرفش ليه بيعمل معايا كده؟!
منه : ولا أنا ومش مصدقه خالص اللي بيعمله ونصحته كتير مفيش فايدة مش عارفه اعمل ايه معاه.
سهر : أهم حاجه نبعد عن آسر أي توتر أو انفعال أنا مش ناقصه يا منه.
منه : حاضر يا سهر علشان خاطري متعيطيش بقى.
سهر : خايفه حاسه زي اللي ماشيه على الحبل خايفه توقع في بحيرة فيها تماسيح على رأي اخوكي دموع تماسيح مش عارفه ايه اللي خلاه يقول كده هل أنا يعني بمثل حزني على جوزي وبتمناله حاجه وحشه طب ليه هو حد هيتوجع أكتر مني دا أنا بتمنى إن أخد التعب بداله ولا اشوفه يا حبيبي كده.
منه : عارفه يا سهر معلش حقك عليه.
علي : مامي أنا هروح رُقية واجي تاني.
منه : لا يا علي روح يا حبيبي استريح وابقى تعالى الصبح أنت عارف مبيقعدوش حد هنا مامتك قاعدة بالعافية لما وافقوا.
سهر : عمتك كلامها صح يا ابني روح استريح وتعالى الصبح.
علي : طيب تصبحو على خير.
يرددوا : وأنت من أهل الخير.
منه : أنا كمان هروح واجي الصبح.
إياد : يلا يا منه؟
منه : يلا يا إياد.
إياد : عاوزه حاجه يا سهر؟
سهر : لا يا إياد مع السلامة.
________
في الصباح.. في شقة أكرم.
ندى : ايه يا تالا الأخبار؟
تالا : مفيش.
ندى : مفيش ايه؟
تالا : مفيش حمل يا ماما.
فريدة : روحي يا تالا افطري مع جوزك.
تخرج تالا وتقعد فريدة جنب ندى.
فريدة : ايه يا ندى مالك؟
ندى : شهد مش مبطله يا فريدة كل اما تروح عند بنتي تسألها ها حملتي ولا لسه زي اللي واقفه مستنيه نتيجة ابنها.
فريدة : ما هي لازم تتوتر ودا يأثر على نفسيتها وبالتالي يأثر على الحمل
خليها متاخدش الموضوع على اعصابها هي بس محتاجه حد يطمنها إن دا طبيعي ومفيش أي حاجه تخليها تقلق.
ندى : الكلام دا حد يقوله لشهد مش تالا دي مهما كان لسه عيله مهما تقولي ليها غصب عنها هتتوتر من كتر سؤال حماتها في الموضوع ده.
فريدة : عندك حق شهد اللي من نفسها لازم تبطل تتكلم في الموضوع ده ما كريم ابنها اللي يقولها.
ندى : قال لها كتير وكمان قال لها إن مراته كويسه وتحاليلها مفيهاش حاجه لدرجة إنه قال لها تعالي معانا متابعة الدكتور واسمعي بنفسك في ايه أكتر من كده.
فريدة : لأ مش من حقها تروح.
ندى : لأ أنا بقولك يعني الموضوع وصل لحد فين
عاوزه ايه تاني معرفش.
فريدة : بكرة تملا البيت عيال وتزهقي من دوشتهم يا ندى.
ندى : اه يا فريدة شوفي احنا بنتكلم في ايه وبابا سابنا ومشي خلاص البيت وحش قوي من غيره.
فريدة : ندى علشان خاطري حاولي تهدي كده العياط مش هيرجع اللي راح أنا حزنت على بابا علشان وقتها مكانش بيكلمني وكنت خايفه قوي يكون غضبان عليه ولسه ولحد دلوقت عندي الاحساس ده وخايفه منه
لكن انتي باباكي راضي عنك وكنتو كويسين مع بعض.
ندى : لا يا فريدة انتي معملتيش حاجه علشان باباكي كان يغضب عليكي دا كان سوء تفاهم بسبب رحمه يلا بقى الواحد مبيصدق ينسى.
فريدة : بابا وماما ورحمه وعمو حلمي وعمو أكرم وطنط سميرة شوفي البيت فضي ازاي يا ندى.
ندى : انتي لسه بتقوليلي ايه دلوقت يا فريدة؟
فريدة بتبكي : غصب عني يا ندى.
ندى بتبكي : وأنا كمان غصب عني.