أنت قلبي الجزء الثالث

الجزء الرابع /الحلقة ٤

#أنت_قلبي٤
__________
الحلقة ٤

جرس الباب يرن يقوم إياد يفتح باب الشقة.
إياد وهو متفاجئ : سهر!
سهر بخجل : سلام عليكم
ازيك يا إياد؟
إياد : وعليكم السلام
أنا بخير.. اتفضلي.
سهر : منه جوه؟
إياد : اه جوه... منه... يا منه.
منه خارجه من جوه وكانت بتقفل مع سهر بنتها : طيب يا حبيبتي تصبحي على خير..
وقربت من سهر وهي قلقانه : ايه يا سهر في ايه آسر كويس؟
سهر : آسر تمام أنا بس كنت جايه عاوزه اتكلم مع إياد في موضوع كده.
إياد نظر لمنه.
منه : طيب يا حبيبتي اقعدي.
إياد : اتفضلي استريحي يا سهر.
منه : هدخل اعملك حاجه تشربيها.
سهر : لا مش ضروري أنا هدخل في الموضوع على طول علشان بس مش عاوزه اتأخر.
إياد : خير يا سهر؟
سهر : هو مش خير خالص يا إياد.
منه تهمس لسهر : في ايه حصل حاجه جديدة بخصوص الموضوع إياه ولا جايه في حاجه تانية؟
سهر : خليكي قاعدة وانتي هتعرفي.
منه : طيب اتكلمي قلقتينا.
_________
مراد : طب وأنا مالي يخرج ولا ميخرجش حاجه متخصنيش.
رغد : مراد خلي بالك من نفسك.
مراد : ليه هو انتي قابلتيه وكلمك إنه ناوي يخلص عليه ولا ايه؟
رغد : لأ أنا مقابلتوش هو بيحاول لكن أنا مش مدياه فرصة كرهته على قد ما حبيته ومبقاش ينفع نرجع زي زمان.
مراد : انتي مستريحه في الشغل هنا؟
رغد : يعني.
مراد : لو تحبي ممكن اشوفلك شغل احسن من ده.
رغد : لأ أنا اتعودت على المكان هنا وأول مرة على فكرة يحصل الموقف ده خصوصًا جنب المكان اللي شغاله فيه بس يمكن علشان اتأخرت الليله شويه.
مراد : طيب مش عاوز أأخرك...سلام.
رغد : مع السلامة.
وقرب مراد ركب العربية وداس بنزين كانت رغد بتركب تاكس شاورتله وهي واقفه مع مراد.
_______
في شقة إياد.
إياد : انتي بتقولي ايه وازاي اصلا تخبي حاجه زي دي عن جوزك؟!
سهر : ما هو آسر مينفعش يعرف.
إياد : ليه مينفعش يعرف أنا مبقولكيش إني هشيل ايدي من الموضوع ولا اني مش هقدر اتعامل مع الشخص ده لكن جوزك لازم يعرف يا سهر مينفعش حاجه زي دي تخبيها عليه.
سهر : أنت عارف آسر ممكن يتهور والواد ده يعمل فيه حاجه أنا مش ناقصه يا إياد.
إياد : بتقولي معاكي رقم تليفونه؟
سهر : اه أهو هو لسه مدهولي دلوقت علشان قال ايه يعني اكلمه بعد ما أدبر له المبلغ اللي طالبه.
إياد : طب هاتي.
سهر : اتفضل بس قول لي هتعمل ايه؟
إياد : اصبري بس هتعرفي دلوقت..
منه : اتفضلي يا سهر الليمون علشان يروق دمك كده ويهدي أعصابك.
سهر : متشكره يا منه.
منه : على ايه بس يا سهر بتعمل ايه يا إياد بتتصل بمين؟
بيشاور لها إنها تستنى علشان سامع صوت جرس التليفون ومنتظر صاحب الرقم يرد.
_________.
في فيلا كريم.
كريم : أنت شبعت؟
علاء : اه شبعت يا كريم.
فريدة خارجه من المطبخ وفي ايدها طبق الفاكهه : يبقى أكلي مش جاي على هواه.
علاء بتنهيدة : لا الأكل حلو تسلم ايدك يا فريدة.
فريدة : على ايه بقى هو أنت أكلت حاجه؟!
علاء : لا بجد أكلت بس أنا أصلا لسه قايم من على الأكل قبل ما اجي على هنا على طول.
كريم : خلاص يا فريدة سيبيه براحته تعالي بقى كملي أكلك.
فريدة : لا أنا كمان شبعت.. أكلت؟
كريم : اه.. فنجانين قهوة بقى ويبقى كتر خيرك على كده.
فريدة : حاضر.
بتلم الأطباق على المطبخ وتنضف السفرة.