أنت قلبي الجزء الثالث

الجزء الرابع /الحلقة ٨

#انت_قلبي٤
__________
الحلقة ٨

في فيلا آسر.
سهر : علشان خاطري يا مليكة اشربي أي حاجه تبل ريقك يا بنتي.
مليكة وهي بتبكي : أنا مش عاوزه حاجه غير يا بنتي هاتولي بنتي.
سيف وهو منفعل : وحضرتك كنتي فين وبنتك بتتخطف كنتي نايمه ولا سيبتيها وروحتي فين؟!
مليكة بصوت متعب : كانت جنبي بتلعب أنا عيني مغابتش عنها خمس دقايق.
ياسمينا : دا حد مترصدلها ومراقبها من وقت ما دخلت جوه واستنى اللحظه المناسبة واخد البنت وهرب.
نظرت سهر لـ آسر.
ياسمينا : بيحصل لنا كتير بننشغل عن العيال في أي حاجه واحنا بره وخصوصًا واحنا بتشتري أصل الحرامي ده مش واقف مخصوص لنا علشان يخطف العيل ويجري دا حد عارف هو بيعمل ايه وقاصد البنت بعينها مش حد تاني.
سيف : يعني ايه يا ياسمين؟
ياسمينا : يعني دا حد يعرفك يا سيف أو يعرف مليكة.
مليكة : يعرفني أنا؟!
علي : وهو حد يعرف مليكة هيعمل كده ليه يا طنط مليكة عمرها ما أذت حد علشان يبقى لها أعداء.
ياسمينا : معرفش يا دكتور بس دا التحليل المنطقي للي حصل.
ملك : طنط ياسمين بتتكلم صح مفيش واحد هياخد بنت كده عشوائي في لمح البصر غير لو كان واقف ومستعد للبنت دي بالذات علشان ينتهز فرصة انشغال مليكة وياخد البنت ويجري زي ما الراجل دا عمل بس مين ده يا ترى؟
مليكة : أنا ميهمنيش كل ده دلوقت أنا عاوزه بنتي جيبولي بنتي.
سهر بتاخدها في حضنها وبتحاول تهديها.
سيف : لو فارقه معاكي كنتي حافظتي عليها.
مليكة بتبكي.
سهر غمزت لياسمينا.
ياسمينا مسكت ايد سيف : تعالى معايا عاوزاك في كلمة.
وخرج سيف مع ياسمينا للجنينه.

سهر : معلش يا آسر ما هي بنته برضو زي ما أنت واخد على خاطرك من كلامه وطريقته مع بنتك اللي ميتلامش عليها في ظرف زي ده دي بنته وقلبه محروق عليها.
آسر : بس ميكلمهاش كده يا سهر.
سهر : معلش اعذره اللي حصل دا يجنن أي حد.
علي : هو معذور يا بابي ميتلامش زي ما مامي قالت.
آسر سكت بتنهيده وهو ناظر لمليكة اللي سانده دماغها على الكرسي وبتبكي.

سيف : مفروض اعمل ايه يا ياسمين وأنا بنتي اتخطفت ومعرفش الراجل ده عمل فيها ايه دلوقت.
ياسمينا : معلش يا سيف مليكة اللي فيها مكفيها هي أكيد عماله تأنب نفسها على اللي حصل دلوقت طبطب عليها وحاول تهديها ليحصلها حاجه.
سيف : أنا اللي هيحصلي يا ياسمين لو ملقتش بنتي.
ياسمينا : هنلاقيها يا حبيبي معلش علشان خاطري عارفه إن صعب عليك تتحكم في أعصابك في ظروف زي دي بس معلش..
سيف : دا أنا بحاول امسك اعصابي على قد ما أقدر يا ياسمين أنا جوايا نار ومحدش حاسس بيه لا وفي القسم باردين برود معرفش ايه ده لو بنتهم كان دا رد فعلهم.
ياسمينا : احنا بس يطلع إذن بتفريغ الكاميرات دي ونعرف مين الراجل ده.
سيف : دا أنا هقطعه بـ اسناني بس الاقي حلا الأول.
ياسمينا : هتلاقيها يا حبيبي أنا قلبي حاسس حد عامل الفصل دا فيك.
سيف : ياريت يا ياسمين ياريت.
__________
فارس : بس بقى انتي ايه متعبتيش من كتر الزن والعياط ده؟!
بيفتح ماجد باب الشقة ويدخل.
ماجد : ايه دا في ايه ومين دي؟
فارس بابتسامة ويشيل البنت : دي بنت بنت أختي سافرت وسابتها معايا وأنا محتاس بيها قولت اجي اقعد معاك يومين بما إن المفتاح معايا لو مضايق امشي.
ماجد بيفكر وينظر للبنت.
ماجد : بس دي مش مبطله عياط أنت عملت فيها ايه؟
فارس : معملتش حاجه دا أنا حتى اشتريت لها أكل ومياه وعصير ومش عاوزه تسكت عاوزه مامتها.
حلا : مامي.. بابي.. يوسف.
ماجد : طب دي هتسكتها ازاي وليه أختك ولا بنتها مأاخدتهاش عندها؟!
فارس : كلهم مسافرين والبنت كان ناقص لها شوية ورق كده كان هيعطلهم فقالوا يسيبوها معايا كام يوم هما مش هيتأخروا يعني.
ماجد : أنت هتقعد بيها هنا؟
فارس : براحتك لو مضايق اخدها وامشي.
حلا بتبكي : مامي.. بابي.. 
ماجد : طيب طيب سكتها.
فارس : بس بس هنروح لمامي بس اسكتي.
ماجد : دي بتنام.
فارس : احسن دي بقالها أربع ساعات على الحال ده خليها تنام شويه.
ماجد : طيب أنا هدخل أنام شويه علشان خارج بالليل.
فارس : طيب.
عمال يتحرك بيها في الشقة لحد ما نامت على كتفه.
فارس : ايوه كده اتخمدي انتي ايه راسك مصفحه
بس حلو يا واد يا فارس
اهم دلوقت عمالين يلفوا حوالين نفسهم مش عارفين يعملوا ايه أنا بقى اختفي كده كام يوم وبعدها أطلب اللي أنا عاوزه.
________
في المطعم.
ياسمين : طب اهدي بس يا ماما وادخلي المكتب نتفاهم.
علا : نتفاهم على ايه يا ياسمين بقى دي اخرتها جوزك يروح يهدد جوزي لو مجابش الفلوس هيدخلنا السجن هو ده اللي مأمنه على نفسك معاك؟!
ياسمين : يا ماما يا حبيبتي وطي صوتك الناس بتتفرج علينا.
علا : ما يتفرجوا يا حبيبتي علشان يعرفوا جوز بنتي البخيل القيحه اللي على قلبه ملايين قد كده وبيحسبها معاكي بالمليم دا أنا هخلي اللي مايشتري يتفرج عليه هشام ابن أمل دا أنا هفضحه في كل حته هخلي سيرته على كل لسان.
ياسمين : يا ماما بلاش كده ابوس ايدك انتي بتهيني جوزي وناوي تقفليلي المطعم.
علا : ما يتقفل يا حبيبتي بلا وكسه خايفه على ايه هو بيديكي منه حاجه دا معيشك بلقمتك هو مخلي ليكي قيمه بس شاطرة تشتغلي أخر الشهر تروحي تديه الفلوس علشان يتبغدد ويشوف نفسه عليكي بكرة يرميكي ويروح يتجوز واحدة تانية اه ما هو دا صنف أنا عارفاه ميملاش عينه غير التراب.
ياسمين : ابوس ايدك كفاية فضايح لحد كده.
تصفع علا ياسمين على وجهها : هي مين دي اللي بتقوللها كفاية فضايح يا بنت عمار ليه هي أمك فضيحه ولا انتي وعيلتك وجوزك اللي عاوزين فضايح ماشي يا هشام إن ما وريتك أما انتي بقى انسي إن ليكي أم قلبي غضبان عليكي يا ياسمين خليه ينفعك بس لما يطلقك اوعي تجيلي روحي لمرات ابوكي تمرمطك هناك عندها وتذلك وابوكي يبقى فرحان علشان يرضي الست هانم بتاعته ما هو جوز الست دا أنا هوريكم كلكم.
وتركت علا ياسمين واقفه مدمعه وماسكه اعصابها بالعافية لحد ما دخلت جوه المكتب وانهارت وقعدت تبكي.
_________
في فيلا آسر.. في غرفة البنات.
سيف واخد مليكة في حضنه وبيحاول يهديها ويطمنها.
مليكة بتبكي : سيف أنا عاوزه حلا هاتلي بنتي.
سيف بصوت مخنوق بيحاول يتغلب على دموعه : حاضر يا مليكة بس اهدي.
مليكة : أنا مسبتهاش مكملتش تلات دقايق كنت بس بقرا حاجه مكتوبة على العلبة علشان اعرف بتتركب ازاي علشان اجيبها ليوسف يلعب بيها بلتفت ملقتهاش..ملقتهاش يا سيف بنتي ااااه أنا خايفه يكون الراجل ده عمل فيها حاجه.
سهر بتمسح دموعها : اقطمي حته من الساندوتش ده يا مليكة معلش علشان خاطري
يا بنتي انتي مش قادرة توقفي.
مليكة : مش هاكل يا مامي احط حاجه ازاي في بؤي وبنتي بعيد عني معرفش عنها حاجه دي مبتنامش غير في حضني يا ترى عمل فيها ايه ااااه قلبي مش قادرة.
سهر بتصرخ وبتنادي : مجدي..  علي.
يجوا جري.
علي : حصل ايه مالك يا مليكة؟
سهر : اديها أي حاجه تهديها وتخليها تنام.
سيف : لسه واخده يا طنط.
سهر : طيب مبتنامش ليه؟
مليكة وهي بتغمض عينها وبتنام : مش هنام.. مش هنام لأ.
مجدي بيغطيها.
سيف بحزن : يوسف فين؟
علي : يوسف نايم جوه مع آدم.
سهر : رايح فين يا سيف؟
سيف بحزن وحابس دموعه : معرفش أهو أروح في أي حته.
مجدي وعلي بيطبطوا عليه.
مجدي : تعالى نقعد تحت وسيب مليكة تستريح شويه.