أنت قلبي الجزء الثالث

الحلقة ٦٢

#انت_قلبي٣
________
الحلقة ٦٢
في التليفون 📞
سهر : ايه يا حبييتي كنتي نايمه قلقتك؟
مليكة : لا يا مامي صاحيه
بس كنت بغير ليوسف.
سهر : عامله ايه يا ملوكه؟
مليكة : كويسه.
سهر : طب مال صوتك يا حبيبتي؟
مليكة : مفيش يا مامي
حضرتك بخير علشان امبارح كان شكلك تعبان.
سهر : أنا بخير طمنيني عليكي اتصالحتي انتي وجوزك؟
مليكة : اه اتصالحنا.
سهر : يا سلام ومالك بتقوليها كده؟
مليكة : علشان مبقتش فارقه معايا يا مامي.
سهر : ازاي يا حبيبتي مش فارقه؟!
مليكة : علشان بعد الصلح ببقى منتظرة الخناقة اللي هتحصل لكن لما بنكون متخاصمين هيتخانق معايا ليه ما احنا اصلا متخانقين.
سهر : ايه الكلام اللي بتقوليه ده؟!
مليكة : متشغليش بالك بيه أنا خلاص اتعودت
المهم تاخدي بالك من صحتك ومن بابي.
سهر : هو بابي قال لك حاجه؟
مليكة : لأ بس أنا حاسه كده يعني إن حضرتك مشغوله عنه.
سهر : عندك حق.
مليكة : أنا آسفة لو كلامي ضايقك.
سهر : لا يا حبيبتي مضايقنيش ولا حاجه بالعكس أنا فرحانه إنك بتنبهيني لحاجه زي كده
انتي كمان خلي بالك من جوزك وابنك وفوتي مرة عاتبي مرة المهم متتخاصموش.
مليكة : حاضر يا مامي.
سهر : هسيبك بقى علشان تعملي أكلة حلوة كده لجوزك لما يرجع نفسه تتفتح ولا اطلبلك أكل؟
مليكة : لأ أنا فعلا كنت بعمل أكل دلوقت لإن سيف زمانه على وصول.
سهر : طيب يا حبييتي بألف هنا وشفا سلام.
قفلت سهر مع مليكة وبتفكر هتعمل ايه.
سهر : بس لاقيتها ولازم تبقى مفاجأة هههههههه
حاسه إنك اتجننتي يا سهر يا مجنونة ههههههههههه
_________
في شقة عمار.
وفاء : ليه بس كده عملت ايه علشان تزعلي مني؟
سلمى : مفروض أنا اللي ازعل انتي تزعلي من ايه
هو أنا جيت لاقيتك ولا انتي؟!
منه : سامعه يا وفاء انتي جايباني بقى هنا علشان تهزقيني؟!
سلمى : اسمعي يا منه لا أنا كلمت حد ولا جيت ناحية حد وشكرًا يا حبيبتي على الواجب اللي عملتيه في عزا ابويا.
منه : دا حمايا يا سلمى.
سلمى : اه يعني روحتي بس علشان أبو جوزك
هو دا اللي عاوزه تقوليه؟
وفاء : جرا ايه بس يا سلمى ما دا الطبيعي يا حبيبتي.
سلمى : حتى انتي يا وفاء؟!
وفاء : ما هو حمايا يا سلمى
هكدب يعني وبعدين تعالي هنا انتي ازاي متروحيش العزا بتاع جدة خطيبة علي؟
سلمى : أنا حرة حد شريكي؟
منه : حتى علشان خاطر سهر.
سلمى : وهي سهر كانت عملت ليه خاطر لما جات قعدت شويه وبعدين اخدت بعضها ومشيت دي الناس جايه ليها ملقتهاش.
منه : بترديها ليها يعني
طب على الأقل هي جات انتي بقى كنتي عملتي زيها وروحتي خمس دقايق وأخدتي بعضك ومشيتي اسمك عملتي الواجب.
سلمى : مش انتو عملتوا الواجب؟
خلاص عاوزين من سلمى ايه؟!
وفاء لسه هتتكلم.
منه : ملوش لازمه الكلام يا وفاء متتعبيش نفسك معاها.
سلمى : ايوه محدش يتعب نفسه معايا.
وفاء : بس امبارح ببص كده لسهر حساها تعبانه
متعرفيش مالها يا منه؟
منه : لا معرفش أنا يدوب كده لمحتها وأنا داخله ومشوفتهاش تاني.
سلمى : طب ما تتصلوا تطمنوا عليها.
وفاء : ما تتصلي انتي.
سلمى : وأنا مالي مش انتو اللي قلقانين.
وفاء : احنا بس؟
سلمى : عاوزين مني حاجه أنا ماشيه.. سلام.
_________
في التليفون 📞
فريدة : عمي عامل ايه؟
ندى : بخير لسه نازل من شويه.
فريدة : نزل كده وهو تعبان!
ندى : لا ما هو بقى كويس.
فريدة : طيب.
ندى : ايه عاوزه تقولي حاجه؟
فريدة : هاه... عرفتي منين؟
ندى : ليه هو أنا مش عارفاكي يا بنت عمي؟!
فريدة : عرفت إن حازم كان عندكم.
ندى : اممم تالا اللي قالت لحبيبة عمتو مش كده؟
فريدة : طب وانتي زعلانه ليه إنها تقول لي؟
ندى : فريدة يا بنت عمي انتي عاوزة ايه بالظبط؟
فريدة : عاوزه اشوفك سعيدة ومتهنيه يا نودي.
ندى : أنا يا اختي تمام وزي الفل خُدي بالك انتي بس من نفسك.
فريدة : نودي متلايميها بقى.
ندى : لايميها انتي واقفلي علشان مش عاوزه اقفل  في وشك.
فريدة : هههههههههههه
بقى كده طيب يا ندى سلام.
ندى : مع السلامة.
تقفل ندى مع فريدة.
ندى : هي كل اما تشوفني تقول لي الكلمتين دول أنا زهقت.
طب يا ندى ليه اضايقتي لما شوفتيه امبارح مفروض يعني ميفرقش معاكي ولا ايه؟
لا طبعًا ازاي دول ستة وعشرين سنة من عمري معقول هنساهم بسهولة كده!
________
في شقة كمال ونادين.
هدى : لا هو اللي مدلوق قوي على الست هانم
اللي فيها ايه يعني لما يكون مضايق شوية ويزعق ما تستحمله ما احنا بنستحمل ايش معنى يعني هي وبعدين ازاي يستحمل حماه يقعد يبيع ويشتري فيه بالشكل دا؟!
فيروز : بابا مليكة لا باع ولا اشترى في اخوكي يا هدى بالعكس الراجل اتكلم بكل ذوق واحترام وبعدين حطي نفسك انتي مكانه لو ليكي بنت وشوفتيها في الحاله دي هتعملي ايه
طب بلاش انتي حضرتك يا بابا كنت هتعمل ايه؟كمال : مش هتحمل طبعًا إن جوزها يكسر قلبها بالشكل ده ولا كل شويه يتخانق معاها علشان قال ايه اعصابه تعبانه شويه.
فيروز : سيف استحمل امبارح علشان عارف إنه غلطان وكمان بابا مليكة مغلطش في حاجه.
كمال : انتي بقى سايبه بيتك وجايه تقعدي معايا ولا متخانقه مع جوزك علشان افهم؟
هدى : لو قولت لحضرتك إننا متخانقين هتجيبلي حقي زي ما عمل بابا مليكة ولا ساعتها هيبقى مليش حق زيها؟
كمال : يا بنتي شيلي مرات اخوكي من دماغك وادعيلهم بقى مش كفاية كل يوم والتاني في خناق ومشاكل يعني هتكوني مستريحه لما تشوفي اخوكي ومراته تعبانين في حياتهم؟
فيروز : استأذن أنا بقى يا بابا.
كمال : اقعدي يا فيروز رايحه فين؟
فيروز : معلش هبقى اجيلك بكره مش قاعدة برضه الليلة يا هدى؟
هدى : ايوه.
فيروز : خلاص يبقى أنا كده مطمنه بعد اذنكم.
وفتحت فيروز باب الشقة وخرجت.
كمال : مجاوبتش يعني ولا مش عاوزة تتكلمي؟
هدى : أنا هقول لحضرتك يابابا وتشوف بقى أنا غلطانه ولا لأ؟
كمال : خير اتكلمي.
_________
في شقة علاء.
شهد : أنت جاي تتخانق معايا يا معتز؟!
معتز : لا اسيبك في حالك وكأن مفيش حاجه حصلت توقعي بين وبين مراتي وتحطي في دماغها إني لسه بحبها وعاوزاني ابقى هادي كده ومفيش أي حاجه!
شهد : ايه مش حابب تقول اسمها ولا خايف تنطقه؟!
معتز : انتي عاوزه ايه مني يا شهد؟
خدي بالك انتي كده مش بتعمليلي أنا وبس مشاكل اللي بتقوليه وبتحاولي تحطيه في دماغ هدى هيجي على دماغك انتي
ولا مفكره إن علاء لما يشم خبر بالفتنه اللي بتزرعيها في البيت
هيسكتلك دي بنت عمه يا حبيبتي والعيله هنا مش هتسيبك لا باباها ولا مامتها ولا ولاد عمها ولا ولادها كمان فتهدي كده وترجعي لعقلك احسنلك.
شهد : هي حصلت يا معتز بتهددني كمان؟!
معتز : شوفي أنا هادي معاكي ازاي وبكلمك بكل ذوق لكن يا شهد لو كلامك دا كان سبب في خراب بيتي هيبقى عليه وعلى أعدائي ما هو يا حبيبتي متهديش بيتي وتفكري إني هسكتلك.
شهد : طيب يا معتز على العموم البيت بيتك خُد راحتك أنا رايحه اعمل الغدا لعلاء زمانه على وصول اقعد بقى اتغدا معانا.
معتز : لا يا حبيبتي أنا خلاص عمري ما أكل في بيتك لقمة بعد اللي عملتيه ده وبحذرك يا شهد إنك تتدخلي في حياتي وتخربيها علشان أنا هردهالك.
ويفتح باب الشقة ويخرج.
شهد : بقى كده يا هدى توقعي بيني وبين اخويا أنا كنت بتكلم بهزار ايه خلاص نارك ولعت وحبيتي توقعي بينا علشان تستفردي بيه.
_______
في شقة كمال ونادين.
كمال : طبعًا غلطانه والراجل مغلطش ولا عمل حاجه كل اللي فيها إنه مقبلش يتقال له الكلام ده وبعدين انتي مالك ومال الماضي بتاعه؟!
هدى : يا بابا دا مش ماضي ما هي الست دي لسه موجودة في حياته صحيح ممكن تكون موجودة بصورة غير مباشرة لكن موجودة برضه.
كمال : خلاص يقطع علاقته بجوز اخته وميهوبش من بيتها علشان تقتنعي إنه مبيفكرش فيها
يا بنتي الكلام دا قديم والست دي اتجوزت وخلفت وبقى ليها بيتها وحياتها بتفكري في ايه بس؟!
هدى : ما هي انفصلت وفضيت بقى يا بابا.
كمال : عيب يا بنتي الكلام ده العيله دي مشوفناش منهم حاجه وحشه لا جوزك ولا جوز اخته ولا ولاد
عم جوز اخته
دكتور كريم وأخوه وعمه وكلهم ناس محترمه رجاله وستات
متشيليش نفسك ذنب بالكلام الوحش اللي بتقوليه عن واحدة مأذتكيش في حاجه.
هدى : يعني اتجاهل كلام اخته يا بابا؟!
كمال : ايوه كنتي عملتي كده ولا كأنك سمعتي حاجه انتي ليكي باللي ظاهر من جوزك دلوقت
باين عليه انه بيحب واحدة غيرك؟
هدى : هيحصل وهيحن ليها طالما بيروح هناك كتير.
كمال : انتي مفيش فايدة فيكي أنا داخل أريح شويه في اوضتي.
دخل كمال جوه وترك هدى عماله تفكر في كلام شهد وكلام باباها وشايفه إنه معقول لكن في نفس الوقت الغيره مخليه تفكيرها ميال لكلام شهد أكتر.
_________
في فيلا مراد.
أمل : يبقى لسه بتحبيه يا نور.
نورهان : مش عارفه بس أنا كمان مبعملش حاجه من يوم ما جيت هنا وطول الوقت قاعدة مش لاقيه حاجه تشغلني.
أمل : كلامي ده مش معناه إني بقولك ترجعي أو لأ
بس لو عاوزه تشغلي وقتك بجد اشتغلي افتحي مشروع تشغلي نفسك فيه.
نورهان : مشروع ايه بس يا أمل أنا دماغي واقفه اصلا وحاسه إني مبقتش افهم في أي حاجه علشان اشتغل فيها.
أمل : أقولك هعينك عندي في الدار.
نورهان : وهشتغل هناك ايه بقى؟!
لا سيبك من فكرة الشغل دي هو أنا لو رجعت فعلا لعُمر هيتغير ويرجع يهتم بيه زي زمان خصوصًا بعد ما الولاد اتجوزوا.
أمل : انتي مياله للرجوع يا نور فمتحاوليش تسألي عن أي حاجه بقى.
نورهان : مش حكاية مياله بس بقول اجرب يمكن الاقي حاجه تغيرت اهو احسن من الملل اللي أنا فيه دلوقت.
أمل : خلاص ارجعي بشروط.
نورهان : طب ايه هتكون الشروط دي؟
أمل : معرفش بس انتي شوفي أي اللي يريحك وكلميه وقولي له إن دي شروطي علشان ارجع.
نورهان : تمام هفكر.
أمل : فكري يا حبيبتي.
نورهان : أمل كنت عاوزه اقول لك حاجه شوفتها امبارح بس مش عارفه بقى هيكون رد فعلك ايه.
أمل : رغد كانت هنا امبارح.
نورهان : انتي عرفتي؟
أمل : ايوه.
نورهان : بس أنا شوفت حاجه تانية.
أمل : حاجة ايه يا نور؟
نورهان : يعني شايفه علاقتهم ببعض غريبة شويه غيرنا خالص
أنا فاكره مرة وأنا مكتوب كتابنا دخل علينا هشام واحنا قاعدين عادي بس للأسف كان في الاوضة اللي تحت دي وكنت داخله لعُمر بالأكل لانه كان جاي يبات عندنا في الليلة دي بعد ما اتخانق مع باباه اظن فاكره.
أمل : معلش الذاكرة بعافيه شويه.
نورهان : المهم يا بنتي دخلت اقدم الأكل وقعدنا مع بعض وعلشان يعني يعتبر مراته كنا قاعدين جنب بعض بس هشام دخل من هنا وشافنا كانت مشكلة طبعًا بنت وشاب في مكان لوحدهم انتي فاهمه بس هشام وقتها قالي لو محصلش نصيب وسيبتوا بعض هيبقى ايه العمل طبعًا بعد ما قولت له إننا متجوزين فخايف من ايه لكن مراد وخطيبته وضع تاني خالص.
أمل : اتكلمت معاه يا نور بس اعمل ايه دماغه ملقوبه خالص مش عارفه اعدلها.
نورهان : كنت هتخانق معاه لما لاقيته نازل جري هو وهي صراحه اتصدمت بس ملحقتوش.
أمل : عرفت واتخانق معاه.
نورهان : مش عارفه اقول لك ايه يتجوزوا بسرعة ولا مفروض يسيبها لإن الموضوع دا ميطمنش.
أمل : يعني علشان ابني اجيب اللوم عليها بس يا نور؟!
نورهان : لأ اللوم عليهم هما الاتنين يا أمل
هي تيجي هنا ليه اصلا وهو كمان مفروض يخاف عليها الموضوع كله غلط اصلا.
أمل : عارفه بس مبقتش قادرة عليه دا لو هشام عرف هيطربقها فوق دماغه بس ساعتها هكون خسرت ابني مراد عنيد ولو خرج المرة دي مش راجع.
نورهان : أنا مش عارفه الواد دا طالع لمين؟
أمل نظرت لها وسكتت.
نورهان : لأ بقول لك ايه بلاش البصه اللي أنا عارفه وراها ايه دي
صحيح شادي كان شقى بس مكانش بجح بالشكل ده.
أمل فضلت تسكت ومتتكلمش مش عاوزه تقلب على نفسها المواجع ولا توجع نورهان بكلام على اخوها ممكن يزعلها
لكن في النهاية شادي كان بدأ يتغير وهي سامحته أو قالت لمراد وهشام كده.
_________
في فيلا آسر.
سهر : لأ اعملي لون الشعر اللي تحت غير اللي فوق مش العكس.
الكوافيرة : حاضر
شوفي الميكب دا ولا دا؟
سهر بتشوف كذا صورة : دا حلو قوي خفيف ورقيق.
الكوافيرة : اصلا يا مدام ملامح حضرتك رقيقة قوي مش محتاجه غير ميكب خفيف بس يحليها أكتر.
سهر بابتسامة وهي ناظره في المرايا : متشكره شوفي الفستان دا ولا دا يليق على الميكب دا أكتر.
الكوافيرة : على حسب دا فرح ولا خطوبة ولا مناسبة عادية يعني ولا عزومة عشا.
سهر : لأ دا في البيت.
الكوافيرة : في البيت!!
سهر : ايوه.
الكوافيرة بابتسامة : خلاص فهمت.. يبقى ده.
سهر : اوك هشوفه بقى قبل ما تحطي الميكب.
الكوافيرة : تمام.
بتقيس سهر الفستان وتشوفه عليها.
الكوافيرة : بصراحه يجنن.
سهر وهي ناظرة في الساعة : طب يلا بسرعة بقى.
الكوافيرة بابتسامة : حاضر.
رهام تخبط على الباب.
سهر : ادخل.
رهام : الحاجه وصلت يا مدام.
سهر : حطيها عندك يا رهام ومعلش رتبي بس الأوضة ودخلي الهدوم دي الدولاب.
رهام : حاضر.
سهر : هتروحي الليلة بدري متقلقيش.
رهام بابتسامة : عادي يا مدام لو عاوزاني معاكي أنا قاعدة.
سهر : هههههههههههه مستغناش بس مش عاوزاكي لأ.
رهام بابتسامة : بصراحه لما بشوفك فرحانه أنا كمان قلبي بيفرح.
سهر بابتسامة : حبيبتي بقى.
الكوافيرة : الصراحه مدام سهر تتحب دي كفاية بس ضحكتها.
سهر : متشكره بس أنا كده هتغر في نفسي.
رهام : لا مش ممكن طبعًا.
سهر : شوفي يا رهام لون الشعر دا حلو كده؟
رهام : يجنن.
سهر للكوافيرة : داري بقى شوية الشعر الأبيض دول
مش عاوزين الطبخه تبوظ.
الكوافيرة : هههههههههههه
رهام : هو فين الشعر الأبيض ده امال أنا بقى أقول ايه؟
سهر : ايوااا احسديهم بقى
ههههههههههههه
رهام : لا مقصدش ههههههههه هنزل اخلص العشا وهطلعه قبل ما امشي.
سهر : كلك ذوق.
نزلت رهام تحت تخلص العشاء اللي قالت لها عليه  ودا طبعًا ليها ولـ آسر.
شويه وخلصت الكوافيرة ونزلت وبدأت سهر تظبط الأوضة بالشموع والورد اللي على السرير وغرقت الأوضة بلالين وقلوب
وسحبت الطربيزة وضعتها في نصف الغرفة.
تخبط رهام.
سهر تفتح الباب وتاخد منها الأكل.
رهام : أنا مروحه يا مدام سهر عاوزه مني حاجه؟
سهر : لا متشكره.
خلصت كل حاجه وقفلت أنوار الغرفة والبلكونة ووقفت تنتظر آسر اللي باقي نص ساعة على وصوله.
___________
في شركة آسر.
آسر بتنهيده : خلاص هلكت.
حسام : طب كويس إنك اعترفت بنفسك قوم بقى علشان عاوز اروح اخد شاور واغير هدومي دي وأكل.
آسر : هو أنت لسه هتاكل؟
حسام : هو أنا أكلت النهاردا اصلا؟!
آسر : نعم يا حبيبي مش اخدت بريك ربع ساعة أكلت فيهم؟!
حسام : الساندوتش اللي أكلته ده بتسميه أكل؟!
آسر : امال اسميه ايه؟
حسام : نص أكل دا ميشبعش عيل صغير
آسر مش علشان معدتك بايظه تزهقنا يا حبيبي.
آسر : خلاص ابقى اطلبلك كوارع وممبار المرة الجايه.
حسام : لا الكوارع
والممبار دول تاكلوهم عندي يوم الجُمعة دا أنا هعملكم حتة سفرة هتحكي بيها العمر كله.
آسر : مش جاي.
حسام : ليه بس؟
آسر : ما هو طالما أكل مباكلوش مش جاي هتبقى أكله واتحسبت عليه وأنا ميضحكش عليه.
حسام : فاكر لما أكلت كوارع وممبار كان يوم فرح مين؟
وليد اخوك صح ولا منه؟
تصدق مش فاكر الواحد جاله زهايمر ولا ايه؟
آسر : ايوه يعني عاوز تقول ايه؟
حسام : يومها مرمطني معاك ههههههههه
آسر : يا ابني أنا معدتي متستحملش وأنت عارف
اه نفسي أكل كل حاجه مخبيش عليك بس خلاص حاسس إني زهدت الأكل من كتر الممنوعات.
حسام : ممنوعات!!
ههههههههههههه بتتعاطى يا ابن عمي.
آسر : اه يا اخويا بتعاطى أدوية تحب تشوفها؟
حسام : لا بلاش ما أنا حافظهم قوم بينا نروح ولا شكلك مش عاوز ترجع البيت دلوقت.
آسر : ليه؟
حسام : معرفش حاسس كده.
آسر : طب حط الأوراق دي في الخزنة واتأكد إنها اتقفلت.
حسام : اوك.
_________
في شقة مجدي.
داليا : يا رُقية انتي يا بنتي.