أنت قلبي الجزء الثالث

الحلقة ١٣٧

#انت_قلبي٣
__________
الحلقة ١٣٧

في شقة علاء.
علاء : لا يا كريم أنا استحملت كتير.
كريم : معلش مش بعد ما الولاد كبروا يا علاء.
علاء : لا بالعكس دا الوقت المناسب الولاد كبروا وكل واحد يقدر يتحمل مسؤلية نفسه.
معتز : دا أخر كلام عندك يا علاء؟
علاء : أنا اتحملت أختك بما فيه الكفاية يا معتز.
شهد خارجه من جوه ومعاها شنطة هدومها : لا يا حبيبي كفاية عليه أنا لو أنت بقى مزهقتش أنا طهقت وبقولك يا علاء طلقني علشان خلاص مبقتش عاوزه أعيش معاك.
معتر : اسكتي يا شهد بقى.
شهد : ليه ما هو عمال يقول أختك متلزمنيش خليه يبقى راجل ويطلقني.
علاء نظر لها بغضب : ابقى راجل!
انتي واحدة قليلة الأدب متربتش.
ولسه بيرفع ايده يضربها مسكه كريم ومنعه.
شهد : ما تسيبه يا دكتور يضرب خليه يضرب أنا أهو يا علاء اتفضل اضربني.
كريم لشهد : ما كفاية استفزاز بقى دكتور معتز دخل أختك جوه.
شهد : مش داخله جوه وبعدين أنت بـ انهي صفه اصلا تكلمني كده؟!
اعمل راجل على مراتك مش عليه أنا.
معتز بغضب ويزعق فيها :"شهد اسكتي بقى حقك عليه يا دكتور أنا متأسف لحضرتك.
علاء : شهد انتي....
كريم : لا يا علاء اسكت بقى.
علاء : اللي بيني بينك انتهى خلاص أنا قولتها لـ اخوكي وهقولها تاني انتي يا بنت الناس متلزمنيش
انتي طالق يا شهد.
قعدت شهد من الصدمه ومعتز سكت مش لاقى كلام يقوله.
كريم : ليه كده يا علاء كنت تتروى شويه يا أخي.
علاء : أنا صبرت عليها كتير يا كريم بس الظاهر إنها فكرت صبري عليها ومسامحتي ليها في حاجات كتير إن دا ضعف مني مش علشان المركب تمشي ولا حاجه اتمنى يا شهد إنك تكوني استريحتي دلوقت انتي اللي طلبتي وأنا نفذتلك رغبتك لإن مفيش واحدة عاوزه تعيش بجد تعمل اللي بتعمليه ابنك لو كان غلط فغلطه يتصلح إنك تنصحيه مش تروحي تبهدلي البنت بالشكل ده ومين بنت ابن عمي يعني بنت اخويا لما تهنيها كأنك اهانتي رجالة البيت ده
صحيح ما انتي مش شايفانا رجاله قدامك
وطايحه في الكل ياريت تكوني استريحتي بقى دلوقت.
شهد : اه استريحت
وسايبه ليك البيت ابقى اشبع بيه.
__________
في التليفون... 📞
ندى بصوت ناعس : الو.
فريدة : انتي نايمه يا ندى؟
ندى : فريدة!
خير في حاجه ولا ايه؟
فريدة : كنت بتصل أطمن ايه الأخبار عندك؟
ندى : أخبار ايه؟
فريدة : لا انتي شكلك نايمه بجد أخبار الشقة اللي جنبك حصل ايه طمنيني حازم اتصل بكريم من ساعة كده وقاله في مشكلة عندكم غير هدومه ونزل ومش عارفه أكلمه علشان قولت له يبقى يتصل يطمني وطالما متصلش ببقى لسه هناك انتي في الشقة عندك؟
ندى : اه.
فريدة : ما روحتيش تهدي ما بين علاء وشهد ليه؟
ندى : يا أختي أنا مالي
أنا قفلت عليه بابي ونمت لا عاوزه اسمع مشاكل ولا زغريط خليني في حالي.
فريدة : يعني متعرفيش حاجه؟
ندى : لا يا فريدة معرفش حاجه ابقى كلمي جوزك واعرفي منه طالما مهتمه قوي كده.
فريدة : في ايه يا ندى مالك؟
ندى : أنا مالي بمشاكل شهد مع علاء دلوقت أنا في اللي قالته في حق بنتي.
فريدة : ما هو المشكلة اللي بينهم بسبب الموضوع ده علاء أكيد مسكتش على الكلام اللي قالته ليكي ولتالا.
ندى : اه وبعدين؟
فريدة : يعني أنا بقول كده معرفش هيحصل ولا لأ.
ندى : اللي هو ايه؟
فريدة : إنه يجيب شهد تعتذر ليكي ولتالا وتنهوا الحوار ده.
ندى : تعتذر دا ايه خلاص يا فريدة اللي اتقال اتقال خلاص الصبح هرجعلهم حاجتهم مع أنس ونفضها سيرة الجوازة دي مش نافعه يا أختي.
فريدة : متكسريش قلب بنتك يا ندى.
ندى : هي اللي جابت الكلام لينا ولنفسها يبقى تتحمل نتيجة تصرفاتها بقى يا فريدة أنا مش هطبطب عليها المرة دي علشان غلطت وخلت شهد تتكلم في حقنا بالأسلوب ده.
فريدة : معلش اصبري بقى متبعتيش حاجه استني شوفي الأمور هتوصل لفين يمكن حقك يرجعلك من غير كسرة قلب بنتك دي.
ندى : تصبحي على خير.
فريدة : وانتي من أهله.
_________
في التليفون... 📞
مراد : يعني انتو في الطريق وجايين على هنا دلوقت؟
مريم : اه.. أنت منمتش ليه؟
مراد : أنام ازاي من غير ما أطمن عليكم... انتو كلكم كويسين يعني؟
مريم : اه يا مراد أطمن بقى.
أمل : مريم دي يا مراد؟
مراد : اه يا مامي حضرتك عاوزه تكلميها؟
أمل : اه هاتها أطمن عليها.
مراد : مريم مامي معاكي.
مريم : ايوه يا طنط ازاي حضرتك؟
أمل : أنا بخير يا مريم انتي وماما ومازن عاملين ايه؟
مريم : بخير كلنا كويسين.
أمل : طب هاتي ماما أكلمها.
مريم : حاضر.. ماما طنط أمل عاوزه تكلمك.
كانت هنادي سانده دماغها على الكرسي اللي قدامها ونايمه.
هنادي : ايوه يا أمل ازيك عامله ايه؟
أمل : أنا بخير يا هنادي انتي ايه أخبارك عملتوا ايه في الحوار ده؟
هنادي : الأمور مشيت على خير والواد ده اتقبض عليه.
أمل : طب كويس يعني خلاص مسكوه هو واللي كان معاه ده؟
هنادي : لأ هو لوحدة التاني ده لسه هربان مش مهم المهم إن محمود اتقبض عليه التاني ده عمره ما كان هيعمل حاجه من دماغه.
أمل : عندك حق المهم المؤذي اللي بيخطط ده.
هنادي : احنا ربع ساعة وهنكون في البيت.
أمل : توصلوا بالسلامة أمك بخير؟
هنادي : أمي واجعه قلبي يا أمل.
أمل : ليه يا حبيبتي خير مش بتقولي خرجت من المستشفى وصحتها بقت أحسن.
هنادي : ايوه بس مش عاوزه تيجي تعيش معايا هنا ومصممه تفضل في البلد وأنا خايفه عليها.
أمل : سبيها براحتها أصل مهما تقولي هي خلاص اتعودت على الحياه في البلد انتي كل كام يوم كده مازن يوصلك لحد هناك تطمني عليها وترجعي لشغلك وبيتك هتعملي ايه.
هنادي : بس تعبانه وقلقانه عليها يا أمل.
أمل : أكيد طبعا بس في ايدك ايه تعمليه اهو حاولي تاني يمكن تغير رأيها.
هنادي : ياريت.
أمل : طيب اسيبك بقى دلوقت وهبقى أكلمك بكرة بعد ما تستريحي كده من السفر.. سلام عليكم.
هنادي : وعليكم السلام.
وقفلت هنادي مع أمل.
مازن : في حاجه يا ماما؟
هنادي : لا يا حبيبي دي طنط أمل كانت بتطمن علينا.
مازن : اه طيب.
____________
نزل كريم وبيشغل العربية يفتح علاء الباب ويدخل يقعد جنبه.
كريم : في حاجه يا علاء؟
علاء : كريم أنا مش عاوزك تزعل ولا تحط الكلام دا في دماغك.
كريم : أنا اللي عاوزك تهدا شويه وبعد ما تهدا تروح تردها وترجعها البيت علشان خاطر ولادك.
علاء : كريم الموضوع دا انتهى خلاص أنا مظلمتهاش هي اللي عملت كده في نفسها مش محترمه حد في البيت لا راجل ولا ست حتى أنت جيت علشان تهدي ما بينا ووقفت قصادي ومنعتني أمد ايدي عليها كان جزاءك إنها تقولك كلام زي ده.
كريم : أنا مسامح في اللي قالته لا هينقص مني ولا هيزودني المهم تحافظ على بيتك.
علاء : مسامح في ايه يا كريم؟! وحتى لو سمحت أنا مش مسامح في اللي ليه عندها اهانتني وخلت شكلي وحش قدام حازم وندى.
كريم : أنا مش عارف أقولك ايه.
علاء : أنا اللي مكسوف منك ومش عارف اقولك ايه حقك عليه.
وقرب قبل رأسه.
كريم : بتعمل ايه بس يا علاء خلاص محصلش حاجه.
علاء : خلاص مش عاوز اعطلك علشان الوقت اتأخر تصبح على خير.
بيخرج علاء من العربية
يمسك كريم ايده.
علاء : عاوز حاجه يا كريم؟
كريم : عاوزك تطلع تنام والصبح تروح ترد مراتك.
علاء : ممكن تريح نفسك من الموضوع دا خالص وتتفضل بقى تروح تنام.. تصبح على خير.
وتركه علاء وطلع فوق.
__________
في التليفون... 📞
سهر : وسهرانه لوحدك؟
مليكة : ودا اسمه كلام برضو يا مامي حلا مأنساني هههههههه
سهر : معلش يا حبيبتي فترة وتعدي بكرة تروح المدرسة زي يوسف وتستريحي من السهر.
مليكة : أنا استغليت الفرصة وحطيتها في الكرسي بتاعها وبمرجحها برجلي.
سهر : وبتمرجحيها برجلك ليه أمال ايدك بتعمل ايه؟
مليكة : قاعدة بذاكر قولت سهر بسهر بقى.
سهر : شاطرة المهم تكوني مبسوطه.
مليكة : اهو بحاول أصبر نفسي بابي لسه مرجعش من بره؟
سهر : لا بابي رجع من شويه وقاعد اهو في المكتب بيكمل شغل.. سيف جه؟
مليكة : من زمان ودخل نام.
سهر : طيب شوفي حلا كده يمكن نامت من الهز ده.
مليكة : تصدقي صحيح نامت هههههه
سهر : طيب يا حبيبتي خُديها وادخلي نامي انتي كمان.
مليكة : تصبحي على خير.
سهر : وانتي من أهله.
__________
في فيلا كريم.
فريدة قاعدة في بلكونة الغرفة منتظرة كريم وبعدها تلمح كريم وهو داخل بيركن العربية في الجنينه.
دخل كريم جوه شغل نور المكتب ونام على الكنبه.
______
في فيلا آسر.
سهر بتخلع نظارة آسر.
آسر : ايه في ايه؟
سهر : مش كفاية شغل بقى وتلم الورق ده.
آسر : خمسه بس وهقوم أنام.
سهر : لا خمسه ولا ثانية واحدة اتفضل يلا.
آسر : حاضر يا سهر بس حاسبي.
سهر : ايه رجلك اتعورت؟
آسر : اتخبطت في رجل الكرسي.
سهر : ألف سلامة يا حبيبي وريني كده.
آسر : خلاص مش مستاهله.
سهر : دي شكلها ورمت يا آسر.
آسر : مش للدرجة دي
وبعدين ايه القوة دي كلها؟
سهر : أنت هتحسدني ولا ايه هههههههه
آسر : لا يا حبيبتي احسدك ايه بس بقولك ايه.
سهر : نعم.
آسر : أنا حاسس إني جعان.
سهر بابتسامة : بس كده من عنيه الاتنين اطلع فوق غير هدومك واقعد كده واستني خمس دقايق هكون طالعه ليك بـ احلى عشا.
آسر : متنسيش فنجان القهوة ومتبصليش كده فوتي عليه القهوة اللي كنت هشربها وأنا بشتغل يبقى تعوضيني بغيره.
سهر : حاضر واهو كذلك.
آسر : متتأخريش ماشي؟
سهر بابتسامة : ماشي.
___________
في فيلا كريم.
فريدة نازله من فوق على مهلها وبتتسند لحد ما وصلت للمكتب.
فريدة : كنت عارفه إني هلاقيك هنا.
قام كريم بسرعة : فريدة!
فريدة : ايه مالك بتبصلي كده ليه؟
قرب منها وسندها علشان تقعد.
كريم : انتي ايه اللي منزلك مش قولنا متدسيش على رجلك عقبال ما نفُك الجبس ده؟!
فريدة : ما أنت اتأخرت نزلت اشوفك روحت فين
ركنت العربية ومطلعتش ليه؟
كريم : قولت اريح هنا على الكنبه شويه.
فريدة : ايه الأخبار؟
كريم : أخبار ايه؟
فريدة : مش أنت كنت رايح علشان في مشكلة ما بين علاء وشهد.. عملت ايه هناك؟
كريم : ولا حاجه.
فريدة : ازاي يعني ولا حاجه؟
كريم : علاء طلق شهد.
فريدة : ايه!
أنت بتقول ايه يا كريم؟
كريم : اللي سمعتيه يا فريدة.
فريدة : ليه؟
أقصد يعني الموضوع كان ممكن يتحل ايه اللي يوصل الأمور للطلاق؟
كريم : شدوا قصاد بعض كلمة منها على كلمة منه راح مطلقها.
فريدة : وهي فين دلوقت؟
كريم : معتز أخوها اخدها عند مامتها.
فريدة : ليه هو علاء مش ناوي يردها؟
كريم : معرفش يا فريدة هو بيقول لأ هيعمل ايه بقى معرفش.
فريدة : طب خلاص بس اهدا.
كريم : أنا طالع استريح فوق مش هتنامي؟
فريدة : هقعد شوية كده وبعدين هطلع أنام.
كريم : اقعدي فوق يلا هاتي ايدك علشان اسندك.
كريم ياخد بـ ايدها ويطلعوا فوق.
كريم لسه هينام.
فريدة : كريم.
كريم : نعم يا حبيبتي.
فريدة : متنساش بكرة هنروح للدكتور علشان يفُك الجبس.
كريم : حاضر يا حبيبتي أنا فاكر مش ناسي تصبحي على خير.
_____________
في الصباح.. في شقة حازم.
حازم قاعد على السفرة ينادي على تالا.
حازم : تعالي يا حبيبتي.
تالا : نعم يا بابا.
حازم : اقعدي افطري.
تالا : مش هينفع علشان عندي محاضرة.
حازم : الساعة تسعه والساعة لسه سبعه ونص اقعدي عاوزك في كلمتين.
ندى جايه بالشاي : كام معلقة سكر؟
حازم : ما انتي عارفه يا ندى باخد معلقة واحدة بس أنا لسه مفطرتش.
ندى : طيب.
حازم : رايحه فين؟
ندى : هدخل ألبس عندي الحصة التالتة.
حازم : ما هو لسه بدري اقعدي افطري الأول.
بتقعد ندى.
حازم : مش هنا اقعدي هنا.
نظرت ندى لتالا كان حازم بيشاور على المكان اللي جنبها.
ندى : بس أنا مش حابه اقعد غير هنا.
حازم : اسمعي الكلام يا ندى وروحي اقعدي هناك.
تقوم تقعد جنب تالا وبتنهيدة : خير يا حازم عاوز تقول ايه؟
حازم : عاوز أقول لتالا إن مفيش حد هيحبها قدك.
ندى : لا دا كان زمان.
حازم : زمان ودلوقت هي غلطت بس مكانتش تستحقك القلم ده كنتي تنصحيها بهدوء وتعرفيها إن الوضع دا غلط وتسلم المفتاح لخطيبها ولما تحب تشوف حاجه تقولك وتاخديها من ايدك وتروحوا هناك لكن لوحدها لأ صح يا تالا؟
تالا : بابا أنا اتصرفت عادي يعني طالما كريم مش معايا ايه المشكلة؟
ندى وبدأت تتعصب : سامع بنتك بتقول ايه؟!
دي لحد دلوقت مش شايفه إنها غلطانه.
تالا : أنا مقولتش كده أنا بتكلم عن وقت ما كنت بروح هناك شايفه إن الموضوع عادي طالما بكون لوحدي لكن حقيقي وجود المفتاح دا معايا عملي مشاكل ومكونتش أعرف إنه خطر بالشكل ده.
ندى : عارفه لو كنتي جيتي قولتيلي كنت هصدق إنك متعرفيش إن الموضوع في مشكلة لكن لما تخبي وتروحي من ورايا يبقى متكدبيش وتقولي مكونتش أعرف.
حازم : ماما عندها حق يا تالا بس مكانش عندها حق إنها تمد ايدها عليكي علشان كده انتي تعتذري لماما وهي تعتذر لك.
ندى : نعم يا حبيبي اعتذرلها على ايه دي لو مكانتش خفيت من قدامي وقتها كنت قطمت رقبتها.
تالا تقوم : أنا ماشيه.
حازم : استني يا بنتي
ندى خُديها في حضنك وصالحيها.
ندى : أنا...
يقاطعها حازم : يلا من غير رغي كتير.
ندى تشدها وتحضنها وتخبطها على كتفها : متعمليش كده تاني أنا خايفه عليكي يا هبله.
تالا بتبكي.
ندى : بخاف عليكي معنديش أغلى منك ولا أتحمل حد يقولك كلمة مش تيجي شهد ترمي الكلام دا عليكي وعاوزاني ابقى هادية.
تالا : أنا آسفة يا ماما اللي حصل دا مش هيتكرر تاني.
ندى : طب ردي على التليفون.
تالا تنظر لشاشة التليفون.
حازم : ما تردي يا بنتي
ايه حد من صحابك مكسوفه تكلميها قدامنا؟
ندى : لا دا كريم خطيبها.
حازم : طب ما تردي وفيها ايه دي؟
تالا : أرد عادي يعني؟
حازم : اه ردي.
تالا : الو.
كريم : سلام عليكم.. صباح الخير يا تالا.
تالا ونظرت لوالدها ووالدتها : وعليكم السلام.. صباح النور.
كريم : انتي في البيت؟
تالا : اه.
كريم : طيب كنت عاوز اقعد أتكلم معاكي ينفع بعد ما ترجعي من الجامعة نتكلم؟
تالا : هنتكلم في ايه يا كريم وبعدين أنا برجع من الجامعة تعبانه.
ياخد حازم منها التليفون : لو عاوز تيجي الليله نتكلم مفيش مشكلة.
كريم : عمي!
حازم : لو فاضي الليله تعالى أنا هكون موجود من خمسه لتمانيه.
كريم : صباح الخير.
حازم : هههههههههههه
صباح النور ايه مالك مسمعتنيش ولا ايه؟
كريم بارتباك : لا سمعت حضرتك طبعا يعني من خمسه لتمانية اجي عادي؟
حازم : أنا كنت بقول ايه دلوقت؟
كريم : حاضر يا عمي على سته كده هكون عند حضرتك.
حازم : حدد علشان متجيش متلاقنيش.
كريم : لا سته بالظبط هكون عند حضرتك.
حازم : وأنا مستني اتفضل تالا معاك بس كلمتين في السريع علشان عاوزه تفطر وتنزل تشوف محاضراتها.
كريم : تمام يا عمي وأنا مش هعطلها.
تالا : ها يا كريم عاوز حاجه؟
كريم : اتفقت مع باباكي إني جاي الساعة سته مجيش تكوني نايمه بقى.
تالا : حاضر.
كريم : هقفل علشان معطلكيش.. سلام.
تالا : مع السلامة.
_________
في المستشفى.
المحامي : احنا لا طالبنا تعويض ولا حد من طرفنا جه قعد معاكم يا دكاترة وقال لكم إننا بنتفاوض على تعويض.
هشام : وايه المشكلة يا متر لو حتى الأستاذ ياسر طلب تعويض احنا موافقين.
ياسر : بس أنا مطلبتش تعويض يا دكتور أنا عاوز حقي.
هشام : حقك دا هتاخدوا بشكل قانوني؟
سكت ياسر.
هشام : القانون مش هيعملك حاجه لإن موقفنا سليم ميه في الميه ولا ايه يا دكتور كريم؟
كريم : موقفنا قوي ومفيش أي خطأ طبي يا أستاذ ياسر زي ما حضرتك كمان متأكد وإلا وقتها كان يبقى ليك نفس الموقف ده لكن اللي مش قادر أفهمه ليه اخدت الموقف دا دلوقت؟!
هشام : قولت ايه يا أستاذ ياسر هتقبل تعويض مادي ولا هتجري على المحاكم وفي الاخر مش هتاخد حاجه.
ياسر : طب لما حضراتكم واثقين كده ليه طالبين تتفاوضوا معايا؟
هشام : احنا منحبش الشوشرة وعايزين نلم الموضوع ده لو الحكاية
فارقه معاك ممكن نتكلم ونوصل لحل يرضي جميع الأطراف.
ياسر : هفكر وأرد عليكم يلا يا متر.
يقوم المحامي مع ياسر ويخرجوا من مكتب كريم.
هشام : ايه مالك؟
كريم : بصراحه أنا مش مع إننا نتفاوض معاه التعويض المادي ده دليل إن في مشكلة عندنا وحتى لو كان الهدف إن الموضوع دا ميشوشرش
على المستشفى ويضر بيها هو كده وصل للهدف اللي هو عاوزه.
هشام : السؤال هنا هل الراجل ده بيدور على حق مراته فعلاً ولا حد زاقه علينا؟
كريم : معنديش إجابة لإني زيك بالظبط محتار في الموضوع ده.
_________
في فيلا مراد.
مراد بيفتح الباب وداخل جوه.
مراد : امممم دا ايه الروايح اللي تجوع دي.
التفتت أمل بابتسامة : تعالى حماتك شكلها بتحبك.
مراد : لأ أنا مش عاوز حماتي هي اللي تحبني أنا عاوز بنتها.
تخبطه أمل بمزح : اتلم أحسنلك.
مراد : هههههههههههه
دي كبده؟
أمل : أنت شايف ايه؟
مراد : شايف إني أخد العيش ده أفتحه كده وبعدين أخد المعلقة دي
ممكن؟
أمل : اتفضل.
مراد : وبعدين أحط الكبده هنا ورشة لمون وبقدونس
ونقفله كده وبعدين ندوق الجمال ده.
أمل : هههههههههههه
أنت بتستهبل صح؟
مراد : جعان.
زينة : وأنا كمان جعانه.
مراد التفت ليها : بيطلعوا امتى؟
زينة تنظر في الساعة : الساعة اتنين الضهر وسع كده.
أمل تمسك ايدها : بتعملي ايه؟
زينة : هاكل.
أمل : لأ اتفضلوا اطلعوا غيروا هدومكم وبعدين انزلوا علشان تاكلوا.
زينة : ايش معنى مراد يعني أكل قبل ما يغير هدومه؟
أمل : علشان استهبل لحد ما اخد اللي هو عاوزه.
مراد : هههههههههههه
مامي أنا عرفت إن مريم شاطرة في الطبخ وكل يوم بقى تعملي من الحاجات الحلوة اللي بتعمليها دي
ودي بقى ميزة الجواز من واحدة بتعرف تطبخ.
زينة : وبتبصلي أنا ليه مفروض بتكلم مامي.
مراد : عاوزك تتعلمي علشان متكسفناش مع مجدي ههههههه
زينة : خليك في نفسك ملكش دعوة.
أمل : وبعدين؟!
مراد : هههههههههههه
زينة : أنا طالعه أغير هدومي.
أمل : بطل تعمل مشاكل مع أختك كل واحد حر في حياته هي بكرة تتعلم.
مراد : تسلم ايدك يا ست الكل الكبده دي جامده.
أمل : بألف هنا وشفا.
-_________
في فيلا كريم.
ندى : مبروك يا فريدة.
فريدة : هههههههههههه
ياااه الواحد مكانش حاسس بقيمة النعمه اللي هو فيها.
ندى : علشان كده رايحه جايه على المطبخ.
فريدة : هههههههههههه
كُلي يا ندى.
ندى : شبعت خلاص مفيش مكان.
فريدة : شوفتي علاء النهاردا؟
ندى : لأ مشوفتوش وهربانه من البيت علشان لا عاوزه اشوف حد ولا حد يشوفني.
فريدة : ليه بقى؟
ندى : كريم خطيب بنتي جاي الساعة سته وأنا بقى اتعمدت أكون مش في البيت في الوقت ده علشان معرفش هعمل ايه لو شوفته.
فريدة : ليه يا مجنونة؟
ندى : علشان هو سبب اللي احنا فيه دلوقت.
فريدة : عرفتي إن علاء طلق شهد؟
ندى : اه سمعت.
فريدة : مين قال لك؟
ندى : عرفت وخلاص.
فريدة : هو انتي مش طايقه نفسك ليه؟!
ندى : ضميري بيأنبني على ضربي لبنتي وفي نفس الوقت لو شوفت كريم همسك في خناقه.
__________
في منزل والدة معتز.
والدة معتز : بقى الراجل يوقف قصاد اخوه علشان يدافع عنك بدل ما كان ضربك على طولة لسانك دي تقومي كمان تشتميه!
شهد : مكونتش حاسه بنفسي وبعدين زعقلي يا ماما.
معتز : زعق ليه يا شهد مش من استفزازك لعلاء ووقوفك قصاده كنتي عاوزاه يعمل ايه دا بدل ما تشكريه بصراحه علاء وقتها لو كان ضربك محدش كان هيلومه
رايحه تشتمي خطيبة ابنك وتهنيها وهي مين بنتهم وهيوقفوا يسكتولك؟!
شهد : طب أنا راضيه ضميرك يا ماما اللي حصل دا كان يصح؟
والدة معتز : لأ مينفعش بس كمان كنتي تعتبريها بنتك ولما عرفتي خُديها على جنب كده وقولي لها يا بنتي أنا خايفه عليكي ودا ميصحش لا تدي أمان لـ ابني ولا لغيره كانت هتقولك حاضر يا طنط وتسلمك المفتاح بنفسها من غير ما كنتي تعملي اللي عملتيه ده كسبتي ايه دلوقت لما فضحتيها؟!
شهد : الكلام كان بيني وبين أمها هي اللي راحت قالت لجوزها وهو جه قال لعلاء وحصل اللي حصل كمان علاء بقاله فترة اصلا متغير شكله شايف له شوفه.
معتز : يا شيخه متبطلي بقى انتي عاوزه يحصل ايه أكتر من اللي حصل ده استفزازك هو اللي وصل الأمور لكده مش علاء اللي شايف له شوفه وأنا لو متجوز واحدة زيك لازم هتجوز عليها.
شهد : سامعه يا ماما؟
معتز : شهد أنا أخوكي وميرضنيش اللي حصل ده حاولي تهدي أمورك مع علاء هو طيب ومحترم وابن ناس انتي اللي خسرتيه حاولي بقى تكسبيه وتغيري من نفسك.
شهد : أنا عملت ايه غلط عاوزه أفهم؟
معتز : ييييييه الظاهر مفيش فايدة أنا قايم ماشي.. سلام عليكم.
والدة معتز : وعليكم السلام
بس مش هتقعد تتغدا يا ابني؟
معتز : معلش يا ماما خليها مرة تانية علشان بس استأذنت من الشغل ساعة واحدة قولت أجي أطمن اتكلمي مع شهد وعقليها.
والدة معتز : دا أنا لساني وجعني يا ابني من ساعة ما جات وعرفت المشكلة وأنا قاعدة اتكلم معاها وأغلطها وافهمها كان لازم تعمل ايه بس أختك دماغها كده اعملها ايه مش عارفه.
معتز : هي بس لما تفوق من الصدمه دي وتعرف إنها خسرت جوزها يمكن وقتها تحس بغلطتها بجد وتراجع حساباتها وهي اللي تروح تعتذر.
والدة معتز : ياريت يا ابني.. خلاص روح بقى شوف شغلك مش عاوزه اعطلك.
يُقبل يد والدته ويخرج.
_________
في شقة إياد.
سهر : ما تخلصي بقى يا منه.
منه خارجة من المطبخ : حاضر يا سهر اصبري بقى
هي اتأخرت ليه؟
سهر : هي مين؟
منه : اقعدي بقى انتي وراكي ايه؟
سهر : رايحه اعمل شعري.
منه : يا ادي شعرك يا سهر اللي محتاره فيه مكنوش شوية شعر دول.
سهر : نعم يا أختي؟!
منه : هههههههههههه
اهي جات.
سهر : هي مين.. سهر بنتك؟
منه بتفتح باب الشقة : ادخلي اتأخرتي ليه؟
سلمى : الطريق كان زحمة
سهر!
سهر : ازيك يا سلمى؟
سلمى : تمام ازيك انتي عامله ايه؟
سهر : كويسه طيب يا منه أنا ماشيه بقى.
منه : اقعدي نتغدا مع بعض امال أنا عامله الأكل دا لمين؟!
سلمى : انتي جايباني علشان أكل من ايدك؟
منه : نعم يا ست سلمى!
سلمى : هههههههههههه يا ستي بهزر معاكي أنا جعانه وهقعد أكل.
منه : اقعدي بقى يا سهر الكوافير مش هيطير.
سلمى : كوافير ليه خير
عندكم فرح؟
منه : هههههههههههه وهي يعني متروحش الكوافير غير لو كان في فرح؟!
سهر : أنا بروح الكوافير أعمل شعري بعمل الميكب لنفسي في البيت.
سلمى : طول عمرك عايقه يا سهر.
سهر : دا كان زمان.
سلمى : ولا زمان ولا حاجه انتي لسه حلوة وصغيرة برضو.
منه : طيب ناكل وبعدين نكمل كلامنا بقى.
سهر : لا أنا هاكل واطير.
منه : خلاص ابقى خُدي سلمى معاكي يمكن تحتاج تعمل شعرها هي كمان هههههههه
سلمى :  طب بالعند فيكي بقى يا مرات اخويا أنا هروح أعمل شعري ايه رأيك بقى؟
منه : يا أختي متروحي وأنا كمان هروح معاكم.
سلمى : غياره.
منه : هههههههههههه
________
في البلد.
كوثر : وانتي تفتكري لو أهل البلد اتنازلوا هنادي هتتنازل دي غلاويه وحقوده ومصدقت واحد من بيت العمدة يتمسك علشان تفرح وتشمت فيه.

نكمل الحلقة الجايه.