#انت_قلبي٣
__________
الحلقة ٩٣
في شقة شادي.
شادي : لوله.. ليلى يا حبيبتي أنتي جيتي امتى؟
ليلى بصوت ناعس : لسه داخله من شويه.
شادي : طيب يا حبيبتي هتردي على التليفون ولا اقفله وتنامي؟
ليلى : مين اللي بيتصل؟
شادي : عبد الرحمن اخوكي.
ليلى : هات التليفون اكلمه.
شادي : اتفضلي.
واخدت ليلى التليفون : الو.. ايوه يا عبد الرحمن
اه كويسه.
عبد الرحمن : ايه كنتي نايمه ولا ايه؟
ليلى : اه كنت نايمه.
عبد الرحمن : طيب أنا آسف إني صحيتك..
ليلى : لا أبدًا مفيش حاجة ما أنا هنام تاني عادي هو أنا ورايا حاجة.
عبد الرحمن : بابي قال لي إن جدك توفى وكنت عاوز انزل علشان ابقى جنبك في الظروف دي.
ليلى : لا يا حبيبي خليك عندك هتيجي تعمل ايه أنا رجعت البيت خلاص والعزا خلص.
عبد الرحمن : ما أنا هاجي عندك ايه اللي هيوديني هناك.
ليلى : اسمع بس نزولك مش هيعمل حاجة غير إنك هتعطل نفسك.
عبد الرحمن : لا ما هو أنا كنت نازل أصلا من قبلها هو اللي سمعته عن مراد ابن خالي دا حقيقي يا ليلى؟
ليلى : سمعت ايه؟
عبد الرحمن : أكيد عارفه أنا بسأل عن ايه.
ليلى : ايوه صحيح بس مراد ملوش علاقة بالشنطة اللي لقيوها في عربيته دي.
عبد الرحمن : امال شنطة مين دي؟
ليلى : معرفش.
عبد الرحمن : طب أنا نازل بعد بكرة.
ليلى : على طول كده؟!
عبد الرحمن : ايه مش عاوزه تشوفيني ولا ايه؟!
ليلى : لا يا حبيبي ازاي بس دا أنت واحشني قوي.
عبد الرحمن : وأنتم كمان وحشني قوي وخالو هشام وولاده وخالتو نور ويزيد هو عامل ايه؟
ليلى : يزيد كويس.. كلنا كويسين تيجي بالسلامة خلي بالك من نفسك.
عبد الرحمن : حاضر.. عاوزه ايه بقى اجييهولك معايا وأنا جاي؟
ليلى : عاوزه سلامتك أهم حاجة تخلي بالك من نفسك بابي جاي معاك؟
عبد الرحمن : لأ.
ليلى بحزن : ليه؟
عبد الرحمن : شويه كده يمكن على شهر اتنين ولا حاجة.
ليلى : بعيد قوي.. خلاص تيجو بالسلامة.
عبد الرحمن : قوليلي بقى عاوزه ايه اجييهولك وأنا جاي.
ليلى : حبيبي مش عاوزه غير إني اشوفك.
في التليفون 📞
شادي : لأ لسه جاي من برة.
أمل : كنت عاوزة اعدي على ليلى بكلمها تليفونها بيدي مشغول.
شادي : ليلى هنا.
أمل : بجد؟!
شادي : ايوه رجعت لاقيتها نايمه عبد الرحمن اللي بيكلمها لما تخلص هتكلم حضرتك.
أمل : لا خلاص بقى أنا كنت بتصل اتأكد إن كانت في شقة جدها ولا لأ علشان اروحلها على هناك بس طالما عندك بقى هجي اشوفها واعزيها.
شادي : لو تعبانة يا مامي بلاش يا حبيبتي احنا هنيجي لحضرتك.
أمل : لا يا حبيبي أنا كويسه حتى نزلت الصبح روحت الدار ولسه اهو خارجه من هناك هعدي عليكم بقى ادي ليلى خبر.
شادي : تشرفي وتنوري يا مامي طب اجي اخد حضرتك من هناك؟
أمل : لأ أنا خرجت يا حبيبي ربع ساعة واكون عندكم دا لو الطريق فضل كويس كده.
شادي : تيجي بالسلامة يا ست الكل.
أمل : ماشي يا حبيبي مع السلامة.
وقفلت أمل مع شادي.
هشام ابنها بيتصل.
أمل : ايوه يا هشام.
هشام : ايوه يا مامي اخبارك ايه؟
أمل : أنا تمام يا حبيبي وبعدين مش كنت عندي الصبح بتسأل عن اخباري ليه دلوقت؟
هشام نظر لياسمين اللي كانت قاعدة بتاكل قصاده : ما حضرتك عارفه بقى متصل ليه.
أمل بابتسامة : خلاص يا حبيبي الموضوع انتهى متقلقش واطمن وطمن ياسمين.
هشام بابتسامة لياسمين : ما هي قاعدة معايا اهيه.
أمل : يعني منزلتش روحت الشركة زي ما قولت!
هشام : لا روحت بس عديت على ياسمين في المطعم قولت نتغدا مع بعض يعني.
أمل : طيب يا حبيبي كويس ملكوش إلا بعض يا هشام خُد بالك منها يا حبيبي.
هشام بابتسامة لياسمين : حضرتك وصيها بقى عليه وقولي لها هي تخلي بالها مني.
أمل بابتسامة : طيب ادهالي اكلمها.
هشام : مع حضرتك اهه
ياسمين مامي عاوزه تكلمك.
ياسمين بتاخد التليفون : ايوه يا طنط ازي حضرتك صحتك أخبارها ايه دلوقت؟
أمل : أنا بخير يا ياسمين عاوزاكي يا حبيبتي تخلي بالك من هشام والولاد وتحافظي على بيتك وماتصدقيش حد عاوز يوقع بينكم فهماني يا ياسمين؟
ياسمين : حاضر يا طنط.
أمل : طيب يا حبيبتي اسمع عنكم كل خير دايماً مش محتاجه أي حاجة؟
ياسمين : لا يا طنط سلامة حضرتك أهم حاجة عندنا.
أمل : تسلمي يا حبيبتي اتغدوا مع بعض بقى وأنا هروح اشوف ليلى.
ياسمين : ليلى قالت لي امبارح إنها راجعه شقتها الصبح.
أمل : ايوه ما هي هناك دلوقت وأنا رايحه ليها.
ياسمين : كده يعني حضرتك عندنا؟
لا بقى يبقى أقوم اجي لحضرتك.
أمل : خليكي قاعدة مع جوزك متجيش أنا هقعد مع ليلى خمسة كده واروح البيت علشان استريح شويه.
ياسمين : سلامة حضرتك يا طنط.
أمل : تسلمي يا حبيبتي متنسيش اللي قولتهولك خلي بالك من بيتك يا ياسمين وملكيش غير هشام يا حبيبتي هو بيحبك وبيخاف عليكي.
ياسمين نظرت لهشام بابتسامة : عارفه يا طنط وانا كمان بحبه وبخاف عليه.
أمل بمزح : كده وبتقولهالي مش خايفه اغير على ابني؟
ياسمين : لا مش خايفة علشان عارفه إن حضرتك بتحبي هشام وتحبي اللي يحبه.
أمل : طبعاً يا ياسمين وأنتي حبيبتي ومعزتك في قلبي زي زينة بنتي بالظبط.
ياسمين : عارفه يا طنط ومن غير ما حضرتك تقولي.
أمل : طب اديني هشام بقى.
ياسمين : اتفضلي هشام مع حضرتك.
هشام : ايوه يا مامي حضرتك محتاجة مني حاجة؟
______________
في قسم الشرطة.
مراد خارج من مكتب الضابط هشام يتجه ناحيته يطمن عليه.
هشام : ها يا مراد عملوا ايه معاك جوه؟
مراد : أنا اديتهم عنوان هيثم اللي ظهر في الفيديو.
هشام : ايوه ما أنا عرفت الأستاذ مجدي قال لي
بس أنا كنت اقصد يعني الظابط قال لك ايه جوه
دا دليل قوي يعني في القضية ولا ايه طمني؟
مراد : أنا نفسي مش فاهم حاجه يا بابي ولا اعرف هو هيثم علاقته ايه بالبنت دي معقول يكون شريكها ولا كل دا كان صدفه ولا متفق معاها تورطني الورطة دي وليه اصلا معقول الحقد والكره يوصل بيه للدرجة دي
وهيثم اصلا هيجيب تمن الحاجات اللي لقيوها في الشنطة دي منين؟!
هشام : كل حاجة هتبان يا ابني أنت بس اجمد كده وهدي أعصابك طالما واثق إنك مظلوم ومعملتش حاجة والحق معاك يبقى متخافش من مخلوق.
مراد : أنا مش خايف على نفسي يا بابي أنا قلقان على سمعة حضرتك واخواتي ومش عاوز ابقى أنا السبب في أي حاجة تحصلكم أنا ندمان ولو مكتوبلي أخرج من المكان ده وابقى حر أنا هتغير خالص وعمري ما هزعل حضرتك وهسمع كلامك في كل حاجة تقول لي عليها لـ إن محدش هيحبني أكتر من حضرتك ومامي اللي صعبانه عليه قوي.
هشام بيمسح دموع مراد وبياخده في حضنه : متخافش يا ابني هتخرج من هنا بالسلامة أنا بدعيلك وماما واخواتك وأي حد يعرف المحنه اللي أنت فيها بيدعيلك تخرج بالسلامة.
مراد : بابي أنا كنت محتاج حضنك قوي.
هشام بيطبطب عليه و بيقعدوا ينتظروا برة أمام مكتب الضابط.
____________
في شقة حازم.
ندى قاعدة ايدها على خدها ودموعها نازله بتفتكر ذكرياتها مع حازم
اللي مش عارفه تحبه ولا تكرهه تحن لـ أيامهم مع بعض ولا تنسى كل اللي فات وتحافظ على كرامتها وجوده معاها في بيت واحد زود جرحها وزعلانه من باباها إنه حطها في الموقف ده ووقعها في الحيره دي.
التليفون يرن.. تمسح دموعها وتنظر لشاشة الموبايل تلاقي المتصل فريدة.
ندى بصوت مخنوق بالبكاء بتحاول متبينش حاجة.
ندى : الو.
فريدة وهي فرحانه : باركيلي يا ندى أنا وكريم اتصالحنا.
ندى : مبروك يا فريدة.
فريدة : ايه يا ندى مالك؟
ندى : مفيش.
فريدة : لأ فيه هو أنا مش عرفاكي ولا ايه؟!
ندى : مفيش يا فريدة المهم قوليلي اتصالحتوا يعني خلاص؟
فريدة : ايوه اتصالحنا بس أنا مش فرحانه.
ندى : ليه؟
فريدة : صوتك قلقني انتي كنتي بتعيطي صح؟
ندى وهي بتبكي وبتحاول تكتم الصوت : لأ.
فريدة : بتعيطي يا ندى وصوتك باين قوي متكدبيش ردي عليه بقى انتي ساكته ليه؟
ندى اجيلك؟ يا بنتي ردي بقى.
ندى : معلش يا فريدة اقفلي دلوقت علشان تعبانه شويه ومش قادرة اتكلم.
فريدة : طب اقفلي أنا جايه اطمن عليكي.
ندى : لأ متجيش.
فريدة : ليه؟
ندى : علشان هنام شويه بقولك تعبانه.
فريدة : طيب لما تقومي من النوم كلميني
وطمنيني عليكي.
ندى : حاضر.. مع السلامة.
وقفلت ندى التليفون وانهارت وبتبكي.
تالا جايه من برة : فيه ايه يا ماما؟
ندى تقوم : مفيش حاجة.
ودخلت اوضتها وقفلت على نفسها.
تالا : هو فيه ايه ماما بتعيط ليه؟
تحبط تالا على الباب.
ندى : أنا هنام مش عاوزه حد يقلقني.
تالا : طب افتحي بس يا ماما طمنيني عليكي هو حصل حاجة وأنا برة؟
ندى : محصلش حاجة وادخلي اوضتك ولا شوفي عاوزه تعملي ايه.
تالا : كده... طيب.
وقعدت تالا وهي ناظرة ناحية باب غرفة ندى وقلقانه وبتفكر يا ترى حصل ايه مزعل ماما ومخليها تعيط بالشكل ده؟
_________
في التليفون 📞
مازن : بصراحة يعني ومن غير كدب أنا اخدت الرقم من مريم.
سهر : مفيش مشكلة كنت عاوز حاجة؟
مازن بارتباك : هاه؟
سهر : بسألك كنت عاوز تقول لي حاجة يعني؟
مازن بتردد : اه طبعا امال هكلمك ليه
بطمن بس عليكي انتي كويسه؟
سهر : ايوه تمام أنا كويسه.
مازن : طيب عاوزه حاجة؟
سهر : نعم!
مازن : لأ ثواني عاوز اقولك حاجة.
سهر : اتفضل.
مازن : هو صحيح ليه باباكي أجل الخطوبة أربع شهور أنا شايف إنهم كتير ولا ايه رأيك؟
سهر : معرفش اللي يشوفه بابي أنا موافقة عليه أكيد هو ادرى بمصلحتي وعارف هو بيعمل ايه.
مازن : هو معلش بس هي ايه المصلحة في كده ولا عاوزين وقت علشان يعني تسألوا عننا وكده؟ عادي دا حقكم على فكرة.
سهر : هو أنا معرفش السبب الحقيقي بس بابي اللي قرر كده واظن الموضوع يعني مش محتاج سؤال ولا حاجة شهادة طنط سهر في حقكم كفاية.
مازن : متشكر بس حتى لو دا السبب حاجة متزعلش خالص بس ابقى عارف السبب يعني.
سهر : صدقني أنا معرفش.
مازن : تمام خلاص ولا يهمك انتي كويسه يعني؟
سهر : ايوه كويسه.
مازن : طيب محتاجة مني حاجة؟
سهر : لأ.
مازن : طيب سلام.
سهر : مع السلامة.
يقفل مازن مع سهر.
مريم : يا خيبتك.
اتفزع مازن لإنه ميعرفش إن في حد واقف وراه.
مازن : ايه ده فيه ايه انتي ايه اللي موقفك هنا؟!
مريم : محتاجة مني حاجة!
دا كان ناقص تقولها اقفلي بقى وبطلي رغي.
مازن : لا طبعًا مش دا اللي اقصده بس أنا مش لاقي كلام أقوله ومعطلها على الفاضي.
مريم : وليه يا حبيبي مش لاقي كلام تقوله؟
مازن : انتي بقى عارفه المخطوبين بيقولوا ايه لبعض في التليفون؟
مريم : لأ بس بسمع.
مازن : بتسمعي فين بقى؟
مريم : يعني بسمع من صحابي وكده.
مازن : اممم ماشي هعمل نفسي مصدق.
مريم : ولا متصدقش عادي.
مازن : بقى كده!
مريم : خلاص خلاص سيب ايدي أنا مبكدبش على فكرة أنا بسمع بس.
هنادي خارجه من جوه : فيه ايه مالكم؟
مازن : مفيش يا ماما.
هنادي : امال واقفين ليه كده؟
مريم : عادي يا ماما واقفين ندردش مع بعض.
هنادي : طيب تعالي عاوزاكي في كلمتين.
مريم : مين أنا؟
مازن بيلتفت حواليه : أظن ماما قالت بصيغة المؤنث ومفيش مؤنث غيرك ولا تقصدي ايه؟!
مريم : هههههههههههه خلاص يا عم متزعلش نعم يا ماما.
هنادي : تعالي جوه.
نظرت مريم لمازن.
مازن : ايه واقفه ليه ما تروحي تشوفي ماما عاوزاكي في ايه.
مريم : حاضر.. يا ماما جايه اهوه.
مازن : بعد ما تخلصي تيجي تقوليلي ماشي.
مريم : وأنت يعني بتقولي حاجة علشان اقولك خليك في حالك يا مازن بدل ما انت مش عارف تقول كلمتين على بعض لخطيبتك وزمان البنت يا عيني بتقول دا ايه الراجل اللي وقعت فيه ده.
مازن : اخلصي روحي ماما بتنادي عليكي.
مريم : حاضر يا ماما جايه.
مازن : اه يا ودني.. وطي صوتك شويه.
مريم بابتسامة : حاضر جايه يا ماما اهوه.
____________
في شقة شادي.
شادي : رايحه فين بس يا مامي اقعدي معانا شويه هتروحي تعملي ايه بس؟
أمل : زينة لوحدها في البيت هروح اقعد معاها ولا أنام شويه علشان دماغي تستريح.
شادي : طب ما احنا بنقولك تقعدي معانا اهو تنسي شويه.
أمل : انسى ايه يا شادي؟!
شادي : مراد هيخرج بالسلامة في اخبار بتقول كده.
أمل : ملقيوش الولد لسه وشكله كده هربان وأنا خلاص اعصابي تعبت وعاوزه أنام يجي اسبوع محدش يصحيني يمكن لما أفوق تكون الغمه دي اتزاحت.
ليلى : طب خلاص اقعدي نتعشا مع بعض وشادي هيبقى يوصل حضرتك.
أمل : لا عشا ايه مش عاوزه اتأخر أكتر من كده
سلام عليكم.
وبتفتح أمل باب الشقة.
هشام بابتسامة : وعليكم السلام.
أمل : أنت جيت يا هشام؟!
هشام : مقدرتش بقى تكوني عندنا ومجيش اقعد معاكي ايه حضرتك ماشيه ولا ايه؟
شادي : عمال أقول لمامي اقعدي وأنا هبقى اوصلك مصممه تروح دلوقت.
أمل : أنا معايا عربيتي هروح لوحدي وسعوا بقى.
هشام : لا يمكن أبدًا لازم تقعدي عندي زي ما قعدتي مع شادي.
أمل : بقولكم ايه انتو الاتنين أنا كده مش هخلص الليله وهروح الفجر سيبوني اخرج وابقوا تعالوا بكرة اقعدوا معايا.
ياسمين : ماشي هتيجي بكرة وحضرتك تنزلي تقعدي معانا برضه.
أمل : انتوا عاوزين ايه بالظبط؟
هشام : عاوزين نقعد معاكي يا ست الكل.
أمل : طب تعالوا اقعدوا معايا في البيت اختكم لوحدها هناك وباباكم زي ما انتو عارفين مبيجيش دلوقت.
هشام : ايه رأيك يا شادي؟
شادي نظر لـ ليلى.
ليلى : اوك مفيش مشكلة هدخل اغير هدومي.
أمل : طيب انزل أنا اشغل العربية تكونوا جهزتوا.
هشام : هاتي المفتاح.
أمل : ليه؟
هشام : هشغل العربية.
أمل : اتفضل.
هشام : خليكي بقى يا ياسمين كده زي ما انتي.
ياسمين : ماشي بس هنعدي ناخد الولاد من عند ماما وفاء.
أمل : كنت لسه هسألك الولاد فين.
ياسمين : منى أختي شبطت فيهم قولتلها خليهم عندك بس مروحش الاقيها بتجري في الشارع وبتشد في شعرها منهم.
ليلى : هههههههههههه.
____________
في شقة طارق.
مريم : عريس!
هنادي : ايوه.. ايه المشكلة؟
مريم : بس أنا معرفش وسيم ده.
هنادي : هما جيرانا في العمارة اللي قصادنا ومامته شافتك وسألت وعرفت إننا ساكنين هنا وجات كلمت طنط صفيه جارتنا وهي اللي قالت لي.
مريم : وهي مكلمتش حضرتك على طول ليه؟
هنادي : هي متعرفنيش بس تعرف طنط صفيه وبعدين ايه المشكلة يعني ما هما في النهاية هيجوا هنا دا لو وافقتي يعني.
مريم : وشغال ايه ده ولا معاه شهادة ايه؟
هنادي : بكالوريوس تجارة وشغال في شركة مقاولات عمره سته وعشرين سنة خطب قبل كده مرتين ومحصلش نصيب.
مريم : خطب مرتين وعمره ستة وعشرين سنة يا ماما؟!
هنادي : كل شيء نصيب يا بنتي.
مريم : هو أنا ليه حاسه إن حضرتك موافقة؟
هنادي : بصراحة يعني هو واخد شقة في العمارة اللي جنبنا هنا.
مريم : اممم فهمت
حضرتك موافقة علشان لو اتجوزت هبقى جنبك هنا مش كده؟
مريم : نشوفه الأول مش هنخسر حاجة.
مريم : وهو يعني شافني ولا جاي على كلام مامته؟
هنادي : شافك حوالي تلات أربع مرات كده مامته اللي بتقول لطنط صفيه.
مريم : شافني فين وأنا عمري ما شوفته.
هنادي : ممكن تكوني شوفتيه بس ما أخدتيش بالك منه لإنك متعرفهوش.
مريم : ماشي يجي ونشوف.
هنادي بابتسامة : اقولها يعني ايه؟
مريم : قوللها يجو يا ماما
بس دي قعدت تعارف يعني أنا أصلا معرفوش.
هنادي : ايوه ما أنا فاهمه
حاضر هقولها.
مريم : طيب حضرتك عاوزه مني حاجة تانية؟
هنادي : لأ يا مريم روحي شوفي عاوزه تعملي ايه.
مريم : هعمل ايه يعني اديني هخرج اشغل التليفزيون.
هنادي : طب ما تنزلي انتي ومازن اشتروا حاجة حلوة واتمشوا شوية.
مريم : وحضرتك؟
هنادي : لا مليش مزاج أنا هفضل صاحيه لحد ما تيجوا.
مريم : كده طيب.
وتجري مريم تنادي على مازن.
مازن : ايه فيه ايه مالك صوتك عالي ليه؟
مريم : يلا غير هدومك علشان خارجين.
مازن : خارجين رايحين فين؟
مريم : ماما قالتلي خُدي اخوكي وانزلوا اتمشوا تحت شوية تعالى بقى معايا واشتريلي حاجة حلوة وخليني اشم شوية هوا بدل حبسة البيت دي.
مازن : ماما اللي قالت لك كده؟
مريم : ايوه حتى ادخل اسألها.
مازن : ماشي هشوف.
مريم : هدخل اغير هدومي ماشي؟
مازن : مش لما اتأكد الأول.
مريم : يا عم قولتلك ماما اللي قالتلي كده.
مازن : ماشي هدخل اسألها بس عارفه لو كنتي بتكدبي.
مريم : هتعمل ايه يعني يا عم روح بقى.
مازن بابتسامة : طيب.
___________
في شقة علي.
سهر بتاخد فنجان القهوة من آسر.
آسر : ايه يا سهر فيه ايه؟
سهر : مش هتشربه يا آسر دا تاني فنجان تشربه هنا غير اللي شربته طول اليوم.
آسر : فنجان واحد مش هيعمل حاجة هاتي بقى.
سهر : لأ هشربه أنا.
آسر : ما انتي قدامك كوباية العصير بتاعتك.
سهر : هشرب الاتنين ايه المشكلة.
علي بابتسامة : رُقية هتعمل فنجان تاني لحضرتك يا بابي.
رُقية تقوم بابتسامة : حاضر.
سهر : استني يا رُقية متعمليش حاجة بابي مش هيشرب قهوة الليله خلاص.
آسر : وبعدين بقى يا سهر؟!
سهر : وبعدين معاك أنت
عارف إن ممنوع وبرضه بتشرب عادي.
علي : خلاص اشرب حضرتك كوباية العصير دي.
آسر : بس أنا عاوز أشرب قهوة.
سهر : قولت مفيش.
نظرت رُقية لعلي.
سهر : متحاولش أنت ومراتك.
علي : خلاص يا بابي اقبل بقى بالأمر الواقع.
سكت آسر بتنهيدة.
سهر : اشرب كوباية العصير بتاعتي وأنا هشرب القهوة.
آسر : بقى كده.
سهر بابتسامة : ايوة كده واسمع الكلام بقى.
آسر باستسلام : حاضر.
علي : هو مجدي مجاش معاكم ليه؟
آسر : مجدي راح لخطيبته.
علي : صحيح مفيش اخبار جديدة بخصوص مراد؟
آسر : لسه محجوز هناك وبيحققوا معاه بس سمعت إن في أمور جدت في القضية في صالح مراد يمكن تكون سبب إنه يخرج من الازمة دي.
علي : حاجة مكانتش متوقعه بصراحة مراد ابن انكل هشام هيتاجر في المخدرات طب ازاي؟!
سهر : مستحيل طبعا وبكرة الحقيقة تبان.
علي : أنا بدعيله يخرج من المحنه دي على خير الواحد بقى خايف يساعد أي حد يلبس جريمة.
سهر : معاك حق بس الواحد ميساعدش أي حد وياخد باله كويس قوي هو بيساعد مين.
آسر : وهو كان هيعرف منين إن البنت دي وراها مصيبة بالشكل ده؟!
علي : ممكن تكون نسيت الشنطة ونزلت وبعدها افتكرت بس طبعاً هتلحقه فين وهو كان في كمين مستنيه.
رُقية : ودا أكبر دليل إن الحوار دا حد قاصد يوقعه فيه ما هو مش كل دا هيحصل صدفه يعني.
سهر : صح يا روكه أنا بقول كده.
آسر بيقوم : طب يلا بينا احنا بقى يا سهر.
علي : حضرتك رايح فين بس يا بابي اقعدوا معانا شويه.
آسر : لا كفاية عليكم كده الليله مش عاوزين نسهركم أكتر من كده وأنا كمان صاحي بدري وعاوز اروح أنام.
علي : كده طيب هوصل حضرتك ومامي لحد تحت.
سهر : ملوش لزوم يا حبيبي خليك مستريح يلا يا آسر.
تاخد سهر بـ ايد آسر ويخرحوا من الشقة.
___________
في شقة رُفيدة.
في التليفون 📞
سمر : الكلام دا ليه أنا؟
زين : هو أنا بكلم حد غيرك دلوقت؟
سمر : لأ بس يعني حبيتني امتى وبعدين مش شايف إننا لسه صغيرين على الكلام ده.
زين : الحب ميعرفش كبير وصغير وبعدين أنا مش صغير زي ما انتي فاهمه أنا دماغي كبيرة وعارف الصح من الغلط.
سمر : طيب واخرت دا ايه بقى؟
زين : هتقدم اخطبك.
سمر : وباباك ومامتك هيوافقوا؟
زين : متشتغليش بالك بالموضوع ده أنا هعرف اقنعهم.
سمر : هو باباك في البيت؟
زين : لأ بابي لسه مجاش من برة.
سمر : ياااه لحد دلوقت بيتعب قوي بصراحة.
زين : اه بس هو مبسوط كده.
سمر : أكيد وإلا كان زمانه ساب الشغلانه دي من زمان يا بختك بيه.
زين : مش فاهم.
سمر : يعني أكيد بتفتخر إن عندك أب فيه كل المواصفات اللي يتمناها أي ابن محروم من باباه.
زين : اه.
سمر : هو بيرجع امتى؟
زين : يعني اتناشر واحدة كده.
سمر : ومامتك بتفضل صاحيه كل ده؟
زين : اه عادي.
سمر : معاها حق طبعاً تنام ازاي وجوزها مش موجود في البيت.
زين : سمر هو احنا هنفضل كتير كده نتكلم عن بابي ومامي؟
سمر : عاوزني اتكلم معاك في ايه؟
زين : نتكلم عن حياتنا شويه كلميني عن نفسك بتحبي ايه بتكرهي ايه بتقضي يومك ازاي عاوز اعرف كل حاجه عنك.
________
فريدة واقفة عند باب المكتب وبابتسامة : جيت امتى؟
كريم يرفع رأسه ويترك الورق اللي في ايده : لسه داخل اهوه أكيد شوفتيني من فوق.
فريدة : الصراحة اه شوفتك.
كريم بابتسامة : امال بتسألي ليه؟
فريدة : مش لاقيه كلام اقولهولك.
كريم يهمس في ودنها : امال فين الريش بتاع امبارح؟
فريدة : هههههههههههه
ليه؟
كريم : يعني فكرتك هتلبسيه الليله كمان.
فريدة : لا خلاص بقى طالما مش عاجبك.
كريم : لأ مين قال كده؟
فريدة : أنت.
كريم : لا دا بس علشان مكونتش طايقك.
فريدة نظرت له بدهشه.
كريم : هههههههههههه اكدب يعني؟
بس بصراحة دا كان وقتها بس.
فريدة : ودلوقت؟
كريم : لا دلوقت حاجة تانية.
فريدة : ماشي يا كريم هعديهالك.
كريم : طول عمرك قلبك كبير يا فراولة.
فريدة : هههههههههههه
كريم : طب أنا بقول نقفل النور ده ونطلع ننام.
فريدة وهي ايدها في ايده : ماشي يلا بينا.
كريم طالع معاها على السلم وعينيه متشالتش من عليها.
فريدة بخجل : ايه يا كريم مالك بتبصلي كده ليه؟
كريم : أصلك جميلة قوي الليله.
فريدة : الليله بس؟!
كريم : كل يوم يا حبيبتي.
فريدة : اه طيب ماشي.
كريم : فريدة.
فريدة : نعم!
كريم : ما تعمليلي فنجان قهوة.
فريدة ونظرت بغضب : كريم!
كريم : خلاص خلاص بلاش هههههههههه
ايه انتي بتتحولي ولا ايه؟
فريدة : ما هو كنت قولت لي واحنا تحت لسه هنزل تاني؟!
كريم بابتسامة : لا خلاص بلاش قهوة دا حتى بتسهر.. هاتي ايدك.
فريدة بابتسامة : اتفضل.
___________
في قسم الشرطة.
هيثم : لا يا باشا معرفش مين دي؟
الضابط : مش أنت برضه اللي ظاهر في الفيديو ده ولا دا شبيهك يا هيثم؟
هيثم : ايوه أنا يا باشا بس أنا معرفش البنت دي يعني معرفة شخصية دي واحدة كده قابلتها.
الضابط : يعني ايه واحدة كده قابلتها؟!
ما هو لأ تعرفها لا متعرفهاش والفيديو مبين اهوه إنك تعرفها ووقفت اتكلمت معاها ودخلتو محل الملابس دا مع بعض.
هيثم : ايوه افتكرت
دي كانت بتسألني عن عنوان مكان عاوزه تروحه.
الضابط : بس أنت دخلت معاها المحل ده.
هيثم : ايوه وايه المشكلة ما أنا كنت داخل اصلا اشتري حاجات ليه فالكاميرا مبينه إننا داخلين مع بعض لكن دي جات بالصدفه.
الضابط يشاور للعسكري اللي جه قرب منه.
الضابط طلب منه إنه يجي بمراد.
بعد شوية مراد بيدخل اللي أول ما يلمح هيثم يتجه ناحيته وهيثم كان بيحاول يتجاهله كأنه ميعرفوش.
مراد : ايه يا هيثم عامل نفسك متعرفنيش؟!
هيثم : أفتكر أخر مرة اتقابلنا فيها قولت لي ايه وأنت هتعرف إن ليه حق معرفكش.
مراد : مفيش مشكلة وانا مش عاوز اعرفك بس ليه يا أخي تحاول تأذيني ليه مش عاوز تخليك في حالك وتسبيني في حالي؟
هيثم : أنا مش فاهم أنت عاوز مني ايه بالظبط؟
الضابط : يعني تعرفوا بعض؟
مراد : عز المعرفه ولا ايه يا هيثم؟
هيثم : كنت اعرفك بس أنت اللي قررت تنهي الصحوبيه دي وأنا سمعت كلامك وبعدت عنك.
مراد : كداب لو بعدت عني فعلا مكونتش تشترك في اللعبة الحقيرة اللي لعبتوها عليه دي.
هيثم : أنا مش فاهم أنت بتقول ايه.
الضابط : البنت اللي ظهرت معاك في الفيديو ده هي نفسها البنت اللي ركبت مع صاحبك عربيته على اساس إنه يوصلها في طريقة وبعد ما نزلت اكتشف إنها سابت شنطة كانت معاها ومبينه اهيه في الفيديو اللي قبل ده تعرف الشنطة دي كانت فيها ايه؟
هيثم : وأنا ايه علاقتي بالحوار ده؟
الضابط : طب مش تعرف الأول الشنطة دي كان فيها ايه ولا مش مهم تعرف؟
هيثم : لا الموضوع مش مهم بالنسبة ليه.
الضابط : لكن مهم بالنسبة لينا ما هو لـ اما كلكم مع بعض لـ اما زي ما قال صاحبك في التحقيق إن دي لعبة لعبتها حضرتك مع البنت دي علشان توقعوه في المصيبة دي وفي حد وزكم عليه.
هيثم : لعبة ايه يا باشا أنا لا أعرف البنت دي ولا اعرف الشنطة اللي بتقول عليها دي.
الضابط : تمام احنا بقى هنعرف
إن كنت ليك علاقة بالحوار دا ولا لأ بس الحاجة اللي لازم تعرفها إنك كده ولا كده أنت متورط معاهم هتقولي معرفهاش هقولك في مليون طريقة نتأكد منها ووقتها هيبقى موقفك صعب قوي.
مراد : عملتلك ايه يا هيثم علشان تعمل معايا كده أنا عمري ما أذيتك بالعكس شوفت منك أذيه كتير وعمري ما ردتهالك والموقف اللي الأخير كان رد فعل على اللي عملته معايا ولا ماهر هو اللي زقه عليه؟
هيثم : ماهر مين؟!
مراد : ايه متعرفش ماهر دلوقت؟!
هيثم : ماهر مسجون.
مراد : يعني عندك كل اخباره اهوه.
نظر هيثم لمراد بارتباك والضابط متابع الحوار اللي ما بينهم.
هيثم : البلد كلها عارفه إن ماهر مسجون مش قضية يعني.
مراد : بس أنا لما سألتك رديت عليه بسرعة وفهمت أنا أقصد ماهر مين مش شايف إن كدبك واضح قوي ومكشوف دفعلك كام علشان تشترك في الحوار ده؟
هيثم : مدفعليش حاجة بقولك مسجون هتقابل بيه ازاي أصلا؟!
مراد : عادي ممكن يبعتلك حد يتفق معاك وطالما المقابل جاهز هتنفذ على طول هو أنا مش عارفك.
هيثم : أي كلام وخلاص فكر تخرج نفسك من المخدرات اللي اتمسكت بيها الأول.
مراد : عرفت منين إن الشنطة كان فيها مخدرات؟
هيثم : أنت اللي قولت.
مراد : لا أنا مقولتش حاجة.
هيثم : يبقى الباشا بقى اللى قال أصل مش مركز شوية.
الضابط : عرفت منين يا هيثم إن الشنطة فيها مخدرات رغم إن مفيش حد هنا قال لك؟
هيثم : يعني يا باشا مقبوض عليه بسبب شنطة هتكون فيها ايه يعني؟
الضابط : بس أنت مقولتش كده لما مراد صاحبك سألك وكمان الشنطة مش شرط يكون فيها مخدرات علشان بتقبض عليه مش يمكن يكون فيها قطع أثرية مثلا؟
هيثم : معرفش هو دا اللي جه في دماغي.
الضابط : لا دا اللي أنت تعرفه من قبل ما تيجي هنا أكتب يا ابني عندك
لقد أمرنا نحن.....(اسم الضابط)
بحبس المتهم هيثم (وبينظر الضابط في بطاقة هيثم لـ استكمال باقي البيانات) ثلاثة أيام للتأكد فيما تبين من اشتراك المتهم في الواقعة التي هي محل التحقيق المتهم فيها مراد هشام مراد والمتهمة الأخرى التي يتم البحث عنها صاحبة الشنطة (وبيانات عن نوع الشنطة والحرز اللي وجد فيها).
وبعدها طلب من العسكري ياخد مراد وهيثم الحجز.
________
في فيلا مراد.
أمل : ودا معناه ايه يا هشام؟
هشام : ظهور الولد اللي اسمه هيثم ده والشكوك حوالين إنه له يد في الحوار اللي حصل مع مراد دا بيقوي موقف مراد أكتر ومع الضغط على الولد ده احتمال كبير يعترف عن شركاؤه وبكده نقدر نثبت براءة مراد.
أمل : صحيح يا هشام؟
هشام : ايوه أنا هكدب عليكي ليه مجدي اللي قال لي الكلام ده وهو محامي وفاهم الأمور دي أكتر مننا.
أمل بتبكي : مراد هيخرج حقيقي ويرجع يعيش وسطنا.
هشام يحضنها : ايوه يا أمل متعيطيش بقى.
أمل : خايفه يا هشام.
هشام : متخافيش أنا متفائل.
أمل : وأنا كمان بس لسه خايفه برضه.
هشام : لا متخافيش واتفائلي خير يا أمل.
_______
في الصباح.. في فيلا كريم.
فريدة : كريم.. كريم.
كريم بصوت ناعس : صباح الخير يا فريدة.
فريدة : صباح النور يا حبيبي ايه مالك؟
كريم : معرفش مصدع وعيني مزغلله.
فريدة : طيب اكشف واطمن على نفسك أنا حاسه إنها من النضارة دي.
كريم : انتي لابسه كده ورايحة فين؟
فريدة : هو أنا مش قولتلك بالليل إني رايحه لـ أمل؟
كريم : اه.. طيب روحي
هي الساعة كام؟
فريدة : عشرة ونص.
كريم يقوم بسرعة : يا خبر وسيباني نايم لحد دلوقت يا فريدة؟!
فريدة : أنا صحيتك من شوية على فكرة وأنت قولتلي هنام شويه.
كريم : ما أنتي عارفه يا فريدة إني بنام مبحسش بنفسي يعني متمشيش إلا لما اقوم.
فريدة : نزلت احضر فطار ليك وللولاد علشان ألحقهم قبل ما يروحوا من غيري.
كريم : طب طلعيلي لبس معلش عقبال ما اخد شاور.
فريدة بتنهيدة : حاضر.
كريم : خلاص يا فريدة بلاش.
فريدة بابتسامة : ايه شغل العيال ده ما قولنا حاضر يا كيمو بقى هخرج لك لبس وانزل على طول ماشي؟
كريم بابتسامة : ماشي.
فريدة : الفطار على السفرة.
كريم : فنجان قهوة بقى ويبقى كتر ألف خيرك.
فريدة : ما أنا عارفه إنك لازم تأخرني.
كريم بابتسامة : معلش خليها عليكي شويه.
فريدة : من عينيه الاتنين.
كريم : تسلم عيونك وايدك يا حبيبتي.
تنزل فريدة جري تعمل القهوة تفتكر إنها مخرجتش لبس لكريم تطلع مرة تانية وبعدها تنزل تعمل القهوة.
فريدة من عند الباب وكريم بيلبس : كريم أنا خارجة يا حبيبي محتاج مني حاجة؟
كريم : استني.
فريدة : فيه ايه تاني؟
كريم بابتسامة : استني ننزل مع بعض.
مسك كريم ايدها : تفطري معايا بقى.
فريدة : فطرت وسربت الولاد على النادي وجميلة كانت معصلجه مش عايزة تخرج بس خليت محمد يقولها إنه هيشتريلها لعب فوافقت بعد ما طلعت روحي.
كريم : هفطر لوحدي يعني؟!
فريدة بتقعد : خلاص هقعد معاك خمس دقايق.
كريم ينظر في الساعة : يدوب أفطر فيهم امسكي بقى.
فريدة : شبعانه مش قادرة.
كريم : افتحي نفسي بقى وكُلي.
فريدة : طب بس متشربش القهوة قبل ما تحط حاجة في بؤك شايف بسمع كلامك ازاي.
كريم بابتسامة : حاضر يا فراولة.
________
في التليفون.
هنادي : لأ مازن هيوصلني يا داليا.
داليا : ليه ما سهر هتعدي علينا ونروح مع بعض.
هنادي : لأ قوللها متجيش هتخبط المشوار دا كله ليه يعني وبعدين عربية مازن موجودة وهو كده كده خارج اصلا.
داليا : خلاص هقولها لما تجيني.
هنادي : ماشي سلام.
داليا : مع السلامة.
هنادي : يلا يا مازن.
مازن : حاضر يا ماما اهوه جاي.
مريم : وأنا بقى هقعد لوحدي؟!
هنادي : اقولك ألبسي وتعالي معايا يلا.
مريم بفرحة تجري على جوه : حاضر.
مازن : هنتعطل كده.
مريم من جوه : دقيقة واحدة اهوه عقبال بس متشغل العربية.
مازن : شغلتها اخلصي بقى.
مريم : حاضر.
هنادي : على مهلك يا بنتي ايه مستعجل على ايه؟
مازن : العيال مستنيني من ساعة هيزهقوا ويمشوا.
بتخرج مريم وهي بتلف الطرحة : عيال مين دي؟
مازن : لازم تعرفي يعني؟!
العيال صحابي.
مريم : هما معاك في الكلية؟
مازن : ايوه.
مريم : في دكاترة يتقالها عيال برضو هههههههه.
مازن : طب يلا يا ظريفة.
مريم : تنكر إن دمي خفيف؟
مازن : قوي.
هنادي : وبعدين؟! .. يلا بينا.
___________
في فيلا مراد.
ياسمينا : طب ما دي اخبار تفرح يا أمل قلقانه ليه بقى؟
أمل : مش هرتاح ولا اطمن غير لما يفرجوا عنه يا ياسمين.
داليا : مجدي طمني الولد اللي بيحققوا معاه ده طلع صاحب مراد واحتمال كبير إنه شريك مع البنت دي.
سهر : بس ليه صاحبة يعمل كده؟
هنادي : الحقد والغل يعملوا أكتر من كده يا سهر اسأليني أنا.
فريدة : صحيح في أصحاب لما بيتكشفوا على حقيقتهم بيبقوا أكتر من الاعداء.
ياسمينا : مش احنا طبعاً.
سهر : أكيد طبعا وبعدين احنا مش صحاب احنا أخوات.
هنادي : وأنا كمان بشوفكم اخواتي وبحس إن من غيركم في حاجة نقصاني.
ياسمينا : مبروك يا نوده.
هنادي : مبروك على ايه؟
ياسمينا : يا بت علينا برضو ما سهر قالت لي كل حاجة.
تغمز لها سهر.
ياسمينا : ايه يا أختي هو سر ولا ايه؟!
ايوه سهر قالت لي إن مازن خطب سهر بنت اخت جوزها.
داليا : ألف مبروك يا هنادي.
أمل : مبروك يا هنادي.
هنادي : مش عارفه اقولكم ايه اكمن الظروف يعني مش مناسبة فمش عارفه اتكلم واحكي في الموضوع ده.
فريدة : مبروك يا هنادي عقبال الفرحة الكبيرة.
هنادي : عقبال ولادك يا فريدة الفرحة الكبيرة لما يتخرجوا.
داليا : امال فين مريم مش قولتي إنها جات معاكي؟
أمل : مريم فوق مع زينة.
ياسمينا : ثواني اشوف فريدة بنتي بتتصل يا ترى عاوزة ايه؟
داليا : شكلك على اخرك زيي طول اليوم قسمت ورُقية دوشني.
سهر : ما يدوشوكي انتي وراكي ايه يعني؟!
فريدة : شايفه اللي بتدافع عن مرات ابنها دي.
داليا : ايوه شايفه بس لو عرفت إن كل مكالماتها تسألني تطبخ دا ازاي وتعمل ايه مكانتش دافعت عنها.
سهر : ابقي قوللها تكلمني وأنا احولها على ريهام.
فريدة : هههههههههههه
سهر : حماتها خايبه عاوزاها يعني تعمل ايه خليها تتعلم منك امال هتسأل مين يعني.
هنادي : دا انتي حماه سكر يا سهر هههههههه.
نظرت هنادي لـ أمل وسكتت.
في التليفون📞
ياسمينا : وجوزها فين؟
فريدة : في الشغل يا ماما وحماتها مش في البيت.
ياسمينا : طيب أنا جايه انتي رايحه على هناك؟
فريدة : ايوه نشوف كده هتحتاج لدكتور ولا ايه حضرتك عارفه نادين بتتعب من أقل حاجة.
ياسمينا : طيب ابقي قيسيلها الحرارة ولو مشغله التكييف خليها تقفله وانا مسافة الطريق واكون عندكم.
فريدة : حاضر... مع السلامة.
تقفل ياسمينا مع فريدة.
داليا : ايه يا ياسمين مش خير ولا ايه؟
ياسمينا : فريدة بتقول إن نادين سخنه وجسمها كله بيترعش هروح اشوفها.
فريدة : استني يا ياسمين اجي معاكي.
ياسمينا : لا خليكي يا فريدة أنا هروح اشوفها وابقى اطمنكوا.
هنادي : طيب يا حبيبتي خير متقلقيش تلاقيها اخدت دور برد.
سهر : هوصلك يا ياسمين يلا.
ياسمينا : لا خليكي مع أمل أنا هاخد تاكسي من هنا.
أمل : خلي سهر توصلك يا ياسمين.
ياسمينا وهي خارجة : لا يا أمل ملوش لزوم سلام.
داليا : مع السلامة ابقي طمنينا.
تخرج ياسمينا تاخد تاكس من أمام الفيلا.
سهر : كان لازم اصمم اوصلها مينفعش نسيبها لوحدها.
فريدة : دماغها ناشفه.
هنادي : خير يا جماعة تلاقي بس شوية برد هي مفروض تاخد بالها من نفسها خصوصا في ظروفها دي.
فريدة : فكرتني بـ اللي حصل لي بعد ما ولدت جميلة تعبت قوي وقتها هي اصلا حملها وولادتها كانوا صعبين قوي.
________
في شقة حمزة.
فريدة : ما هو لازم تتعبي بـ اللي عملاه في نفسك ده
تاخدي شاور وتيجي تنامي قدام التكييف من غير حتى ما تنشفي جسمك يا نادين ومش عاوزه تتعبي.
نادين : الجو حر يا فريدة.. ااااه يا أني أنا هموت ولا ايه؟
فريدة : بعد الشر عليكي متقوليش كده افتحي الباب يا كوكي.
كنده : حاضر.
تجري كنده تفتح باب الشقة.
ياسمينا بابتسامة : ازيك يا كوكي ماما عامله ايه؟
كنده : ماما تعبانه.
ياسمينا ' يا حبيبتي تعبانه قوي؟
نادين : ايه اللي جابها بقى دلوقت أنا مش قولت لك متقوليش لحد؟
فريدة : وفيها ايه يا نادين ماما جايه تطمن عليكي.
نادين : مش عاوزه حد يطمن عليه أنا أصلا مكلمتهاش علشان تيجي.
كانت ياسمينا لسه داخله تطمن عليها بعد ما سمعت كلامها رجعت كام خطوة لورا.
فريدة : ايه اللي بتقوليه ده عيب قوي على فكرة دي مامتك.
نادين : مامتي!
وهو في أم بتكره بنتها بالشكل ده؟!
فريدة : ماما بتكرهك ازاي يعني وبعدين وطي صوتك ماما تسمعك.
نادين : طب ما تسمع أنا أصلا بعلي صوتي علشان تسمع.
فريدة : بس وطي صوتك أنا غلطانه إن كلمت ماما اصلا.
نادين : طبعاً غلطانه جايه ليه خليها قاعدة في بيتها ولا كفاية عليها أصحابها.
فريدة : بس بقى اسكتي.
نادين : أنا مش عايزة حد في بيتي زي ما طردتني من بيتها.
فريدة : عارفه لو مش تعبانه أنا كنت مشيت دلوقت.
نادين : لا اتفضلي امشي وقولي لماما كمان تنزل معاكي أنا مش عاوزه حد.
كنده : تيته انتي بتعيطي.
ياسمينا بتمسح دموعها وبتفتح باب الشقة.
كنده : تيته اقعدي معانا أنا هنزل اشتريلك حاجة حلوة من تحت.
ياسمينا : لا يا كوكي خليكي جنب ماما.
كنده : طب استني هقول لماما إنك هنا.
قفلت ياسمينا باب الشقة ونزلت بسرعة.
فريدة تخرج من جوه.
فريدة : كوكي تيته راحت فين؟
كنده : تيته مشيت.
فريدة بتفتح باب الشقة وتجري على تحت تلحق مامتها تلتفت يمين وشمال متلاقهاش.
ياسمينا بتعدي الطريق توقف تاكس وتركب.
السواق : على فين يا مدام؟
ياسمينا تقوله العنوان.. التليفون بيرن فريدة بنتها بتتصل متردش بعدها سهر تتصل متردش وهكذا داليا هنادي سهر فريدة وأمل مردتش برضه وقفلت التليفون.
السواق يلمحها في المرايا وهي دموعها على خدها.
_________.
نكمل الحلقة الجايه.
أنت تقرأ
أنت قلبي الجزء الثالث
Hombres Lobo(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
