أنت قلبي الجزء الثالث

الحلقة ٦٠

#انت_قلبي٣
__________
الحلقة ٦٠

هنادي وصلت عند الأرض لاقت محمود قاعد هناك وعمال يشاور للانفار اللي شغاله إنها تشتغل بهمه.
هنادي : بتعمل ايه هنا يا محمود؟
محمود : اهلا يا مرات عمي ازيك انتو جيتوا امتى مش كنتي قولتي كنا قومنا بالواجب وجيبناكو من المحطة على الأقل.
هنادي : احنا جايين في عربية الدكتور مازن.
محمود : دكتور مازن!!
اممم وهو عامل ايه ومريم اخبارها ايه؟
هنادي : بقولك بتعمل ايه هنا؟
محمود : قاعد قصاد أرضنا زي ما انتي شايفه.
هنادي : ارضكو دا ايه تقصد الأرض التانية دي مش دي صح؟
محمود : الاتنين بتوعنا يا مرات عمي دي أرض جدي وابويا ورثها عنه واني ورثتها عن ابويا ودي أرض ستي وابويا وعمي وعماتي ورثوها عنها.
هنادي : ليه هو محدش قال لك إن الأرض دي كتبتها ستك لولاد عمك طارق قبل ما تتوفى؟
محمود : عمي طارق مات من زمان واللي اعرفه إن  ستي بقى ماتت بعديه يعني الأرض دي ميراث لولادها اللي عايشين عايزة تاخديها منهم ازاي بقى؟
هنادي : والعقد اللي معايا؟
محمود : لامؤاخذة تبليه وتشربي مياته يا مرات عمي.
هنادي : وعلى ايه مرات عمي بقى طالما قلة الأدب والتربية طبع فيك مش عاوز تغيره.
محمود : احترمي نفسك يا ست انتي واعرفي بتكلمي مين دا اني محمود ولد ابن العمدة واللي تطول لسانها عليه اقطعه.
هنادي : لا شاطر اهو وبتعرف ترد وريني شطارتك وطولة لسانك دي لما أبلغ المركز يجيوا يشلوك هيله بيله كده ويرموك في أي حته.
صباح جايه وابنها مسندها : ترمي مين يا هنادي ليه مفكره نفسك مين يا بنت كامل القوالب نامت والانصاص قامت صحيح انتي مش شايفه نفسك يا أختي ولا مفكره لسه صغيرة محدش هياخد لك على كلام.
هنادي : لأ اني اعرف إن الناس المحترمة بترتبط من لسانها وانتي وابن اخوكي لسانكم يعني مش عاوزه اتكلم نهايته تتفضل تلم انفارك وتخرجوا من الأرض.
صباح : أرض مين اللي يخرج منها دا إني كنت اكسر لك ايدك ورجلك لو هوبتي يمت أرض أمي
بقى البيت بيت ابونا والغرب يطردونا.
هنادي : محدش طردك من دارك ولا دار ابوكي يا صباح بس دي أرض ولادي وانتي عارفه الكلام ده كويس.
صباح : بقى بتقولي لي صباح حاف كده!!
معلش ما هو ارجع واقول طارق اخويا السبب جابلنا قلة القيمة وقلة الأصل لما دخل الأشكال اللي زيك دي بيتنا.
هنادي : عندك حق الأشكال اللي زيي مكانش لها تدخل بيتكم عشان مش هتعرف تتعامل مع الأشكال اللي زيكم واللي كان مصبرني عليكم هو اخوكي علشان معملش فيه حاجه وحشه لكن خلاص طارق راح ولو عايش بينا دلوقت مش هيرضى لمراته ولا لولاده الإهانة دي.
كوثر جايه : مرات مين يا بت يا هنادي انتي مفكره إننا مش عارفين إنك اتجوزتي بعد طارق يمكن بدل المرة اتنين وتلاته ومش عاوزه حد يعرف علشان تفضلي تمثلي علينا دور الست الوفيه اللي ضحت بشبابها يا عيني علشان خاطر ولادها متفوقي يا بنت كامل.
هنادي : لو اتجوزت صحيح يا كوثر هقول هخبي ليه يا حبيبتي هي اللي بتتجوز بتعمل حاجه غلط لكن اني متجوزتش حد بعد اخوكي.
صباح بسخريه : ولا في السر كده من غير ما حد يعرف؟
هنادي : لو عاوزه اتجوز مش هتجوز في السر يا صباح وهعرف الناس كلها اني لا خايفه منك ولا من أي مخلوق على وش الأرض وسبينا بقى من الكلام اللي لا هيودي ولا يجيب ده قولي لـ ابن اخوكي يخرج انفاره من الأرض ما هو مش هتأذي من ابوه وهو عايش وهو ميت كمان!
كوثر : انتي ست قليلة الأدب علشان لو بتعرفي في الأصول متتكلميش على واحد ميت كده.
هنادي : يا سلام على الإنسانية يا ست كوثر وطارق اخوكي اللي أكلتوا عرضه وهو عايش وهو ميت دا ايه وبعدين اني مقولتش حاجه من عندي أهل البلد كلهم شاهدين على اللي عمله فيه وانتم أولهم لكن للأسف جالكم عمى مش بصر لا بس قلوبهم دي مبتصدقش الحقيقة بتصدق الكدب بس اني همشي يا ولاد العمدة بس مش هرجع دار ابويا اعيط اني هروح أبلغ فيكم علشان حق ولادي ميتاكلش واني عايشه.
كوثر : غوري داهيه تاخدك لا ترجعك يا بعيدة من يوم ما شوفنا وشك ما شوفناش غير الهم والغم.
تركتهم هنادي ووقفت عند طريق البلد منتظره ميكروباص علشان تروح تبلغ في قسم المركز التابع له القرية.
__________
في شقة مجدي.
بعد ما اتأكدوا من وفاة انتصار وعدى حوالي خمس ساعات ومفروض هتتدفن الصبح.
قاعدة داليا وجنبها البنات.
داليا بتبكي : قالوا إنك كويسه وخرجتي من المستشفى وفرحنا قولنا هتيجي تقعدي في وسطنا اتاريكي كنتي جايه علشان تموتي على فرشتك.
قسمت تنظر لرُقية وهي بتبكي ومستمعه لكلام والدتها.
رُقية : مامي علشان خاطري حاولي تهدي أعصابك شويه علشان حتى بابي ميتعبش أكتر من كده.
داليا : أمي ماتت وأنا صغيرة قولت خلاص اهو اتعوضت بـ أم تانية تونسني وتشيل عني لما أكون تعبانه واوعو تفكروا اني ربيتكم لوحدي لأ تيته ربيتكم معايا ولما كانت بتنصحكو وانتو بتضايقوا كان غرضها مصلحتكم.
قسمت : مامي ادعيلها واذكريها بالطيب هي مش عاوزه عياطنا دلوقت ادعيلها علشان خاطري وحاولي تهدي أنا عارفه قد ايه كنتي بتحبي تيته ومرتبطه بيها من بعد ما رجعنا من الكويت يعني أكتر من عشرين سنة وانتو عايشين يوميًا مع بعض بس بابي تعبان علشان خاطري تجمدي علشانه لإن مهما كان الحزن اللي جوانا على فراق تيته مش هيجي حاجه ابدا من حزن بابي على والدته اللي عاشت عمرها كله ليه ومفكرتش تتجوز بعد جدو اللي مات وبابي لسه يدوب مكملش سنتين علشان خاطري يا مامي.