أنت قلبي الجزء الثالث

الحلقة ١٥٧

#انت_قلبي٣
_________
الحلقة ١٥٧

في الكافية.
حمزة : تشربي ايه؟
نادين : مش عاوزه اشرب حاجه.
حمزة يشاور للويتر يطلب فنجان قهوة وواحد ليمون.
نادين : ها مسافر امتى؟
حمزة : مسافر!
نادين : سيف كان قال لنا إنك مسافر قريب.
حمزة : لسه بفكر مقررتش.
نادين : وايش معنى فكرت في السفر دلوقت مش كانت مامتك برضه مينفعش تسيبها لوحدها في البيت ولا علشان نادين هي اللي طلبت منك تعيش في بيت لوحدها لكن دلوقت تسيب مامتك عادي علشان السفر حلو مش كده؟!
حمزة : أنا حر اعمل اللي اعمله.
نادين : لأ أنت مش حر تعمل اللي تعمله علشان أنت متجوز وملزوم من بيت وزوجة وأولاد.
حمزة : عارفه حقوقك كويس قوي وبتتكلمي وتدافعي عنها بقلب جامد لكن حقوقي أنا كزوج ملهاش أي قيمه عندك لما يبقى ليكي مزاج بس لكن لو مزاج حضرتك مش تمام نبيع كل حاجه عادي وفي داهيه البيت والزوج والعيال انتي عايزة تعيشي على هواكي يا نادين أو بمعنى تاني إنك عاوزه تعيشيني أنا على مزاجك يمين يمين شمال شمال واللي تقولي عليه يتنفذ في التو واللحظة غير كده ابقي زوج أناني معرفش غير حقوقي وبس.. امال واجباتك انتي ايه يا مدام؟
نادين : ليه كنت طلبت منه حاجه صعبه عليك؟
كل ما فيها إني طلبت بيت لوحدي ايه اجرمت؟
حمزة : عندك شقة لوحدك ماما مش قاعدة في اوضة في شقتك علشان تقولي الكلام ده ماما ليها شقة وانتي شقة كل ما فيها إننا عايشين في بيت واحد بوابة واحدة بتتقفل علينا زي الوضع لو عايشه في شقة في عمارة كبيرة انتي متملكيش فيها غير الشقة بتاعتك وبس ولا في حد بيروح يتملك ولا يتأجر شقة بيقول لصاحب العمارة مشيلي كل الناس اللي ساكنه هنا علشان أنا عاوز اعيش في العمارة كلها لوحدي ولا مفكره إن أنا قاعد على بنك وهروح اشتريك بيت تعيشي فيه هي هتبقى شقة برضو يبقى شقة بشقة اعيش في بيت ابويا ولا اللي مضايقك إن ماما قاعدة في بيت ؟!
ايه تحبي اطردها من البيت وارميها في الشارع علشان حضرتك ترتاحي وتعيشي في بيت لوحدك؟!
نادين : مقولتش تطرد مامتك ولا ترميها في الشارع خليها عايشه في بيتها معززه مكرمه وشوفيلي أنا شقة في أي مكان.
حمزة : اشوفلك شقة ليه وأنا عندي هو أنا يا بنت الناس لما جيت اتجوزك كدبت عليكي غشيتك قولتلك مثلا هنعيش في مكان تاني غير اللي عايشين فيه ده أمي كانت ساكنه في حته تانية وأنا جيت جيبتها في مكانك ولا انتي داخله البيت على الوضع ده؟
ثم ايه اللي تاعبك من ماما عامله فيكي ايه علشان مش طايقه البيت أمي بتعذبك مثلا بتصحيكي من احلى نومه تقولك اعمليلي وسويلي انتي مبتمسكيش مقشه تكنسي بيها السلم اللي طالعه نازله عليه أنا بجيب واحده تكنس وتمسح علشان حضرتك تبقي مرتاحه
أمي بتشتري طلبات البيت لينا أنا مبنزلكيش سوق ولا بقولك اشتري زي الستات بنتنا بتروح المدرسة في باص لا بتروحي ولا بتيجي بجيب لها مدرسين لحد البيت
لو عاوزه تروحي أي مكان باخدك اوديكي واسيبك هناك براحتك وارجع اخدك شغلك اللي مخليكي اوقات تقصري فيه وفي بيتك وكلمتك قبل كده وقولتلك سيبيه وأنا هديلك مصروف شهري قد اللي بتاخديه من الشغل تصرفيه مواصلات في اوقات بكون في الشغل ومزنوق مش عارف استأذن وأخرج اجيبك
وقتها قولتي لأ كله إلا شغلي وانتي متجوزني وأنا بشتغل قولت ماشي مش مهم أمي لما
بتتأخري بره ومتلحقيش تعملي أكل بتعمل عندها وتطلعلك الأكل أو تنادي عليه نقعد ناكل معاها ايه مستكتره على أم تحس بلمة ابنها وعياله حواليها ولا خلاص طالما كبرت بقى في السن نسيبها لوحدها كده لحد ما نفتح عليها الباب نلاقيها ميته من الوحده واهمالنا ليها انتي عاوزه ايه بالظبط يا نادين؟
الويتر بيحط الحاجه ويمشي.
نادين : أنت بتقولني كلام أنا مقولتوش.
حمزة : صحيح مقولتيش نرمي مامتك ولا نسيبها تموت لوحدها لكن هو دا اللي هيحصل لما اسيبها واروح اسكن في حته تانية لما يبقى ليه أخ تاني كان ممكن نتناقش في الكلام ده وكمان وقتها مش هيكون احسن مني يراعي أمي وأنا اسيبها علشان ارضيكي لو كان دا اتفاقنا من الأول كان ممكن اقولك ماشي وأنا ملتزم بالكلمة اللي قولتها لوالدك لكن دا محصلش ولا كان ممكن يحصل لإني عارف ظروفي كويس ووضع أمي ولما كنت مسافر كان علشان أكون مستقبلي واعمل حاجه وارجع اتجوز واستقر واعيش في بيت ابويا اخدم أمي لكن مش بعد تسع سنين يا نادين هفكر اسيب أمي لوحدها.
نادين : معنى كده ان مفيش سفر ولا حاجه؟
حمزة : لأ مفيش سفر لكن كمان مش هنفذ اللي انتي عايزاه أنا قولت كل اللي عندي عاجبك ترجعي وتعيشي بالوضع ده تمام مش عجبك برضو تمام قوي ونخلص في الحوار ده علشان أنا تعبت.
نادين : عاوز تطلقني يا حمزة؟!
حمزة : انتي اللي هتوصلينا للنتيجة دي لو فضلتي معانده ومصممه
على طلبك ده أنا عن نفسي مش عاوز علشان خاطر الولاد.
نادين : الولاد بس!
يعني مش علشاني؟
حمزة : هكدب عليكي واقولك حاجه مش حاسسها انتي نفسك لو عايزة تعيشي وخايفه على بيتك وتحبيني مكنتيش تطلبي حاجه انتي عارفه ومتأكده إن صعب انفذها.
نادين بتاخد الشنطة وقايمه.
حمزة : استني هوصلك.
نادين : لا متشكره أنا عارفه طريقي كويس.
وخرجت من الكافيه بعدها حمزة يدفع الحساب ويخرج بسرعة ميلقهاش فيركب العربية ويروح.
_________
في السويس.
والد العروسة : اتفضلوا معانا الشقة واسعة تاخد من الحبايب كتير.
حازم : متشكرين بس احنا هنروح بقى ونبقى نيجي نبارك للعرسان بعد يومين كده ولا حاجه.
والدة العروسة لندى : مش هينفع كده يا أم أنس أنتو هتروحو ازاي في الوقت ده؟
ندى : لا عادي عملناها كتير اطلعوا أنتو استريحوا.. سلام عليكم.