#انت_قلبي٣
__________
الحلقة ٦٣
في فيلا كريم.
راجع من بره وداخل اوضته يستريح وعينه بتدور على فريدة.
فتدخل فريدة.
كريم بابتسامة : كنتي فين؟
فريدة : كنت بنيم جميلة.
كريم : لسه برضه مش عاوزه تنام لوحدها؟
فريدة : اعمل ايه ما أنت اللي مدلعها.
كريم : أنا!!
هو أنا بلحق اقعد معاها اصلا علشان ادلعها يا فريدة ايه ده احنا جايلنا نونو قريب ولا ايه؟
ههههههههههههه
فريدة : بقولك ايه بلاش تليمحاتك دي شطبنا سامع شطبنا.
كريم : هههههههههههه
طب بس اهدي وفهميني
البتاعه الكبيرة دي لمين شكلها حلو قوي وايه اللي فيها دي؟
فريدة : شيكولاته وملبس
حاجات من بتاعت السبوع.
كريم : اممم بس شيك قوي لمين بقى؟
فريدة : ايه دا هو مفيش حد عزمك ولا ايه؟
كريم : ااه تقصدي ابن شادي ابن دكتور هشام؟
تلف فريدة الهدية : لو كنت لفتها كده كنت قريت الاسم اللي مكتوب هنا.
كريم : يزيد شادي هشام
ليه كاتبة الاسم بالكامل؟
فريدة بابتسامة : الراجل سألني تحبي تكتبي الاسم قولت ايوه فقالي اكتبيه هنا لقيته شوية وعامل كارت بالاسم قولت خلاص مفيش مشكلة وعجبني الكارت بصراحه.
كريم : جميلة لو شافته هتقطعه خبيه بقى لحد ما تسلميه لصحابه.
فريدة : هههههههههههه هعملها زيه.
كريم : طب ما تصبري شويه تسع شهور ولا حاجه اهو يبقى بحق وحقيقي.
فريدة : أنت عاوز ايه يا كريم شايف سني قوي يسمع للي في دماغك ده؟
كريم : بهزر معاكي يا فراولة وبعدين سن ايه يا حبيبتي ما انتي لسه صغيرة اهو.
فريدة : بس مش ضعيرة للحمل والولادة وتربية البيبهات يا حبيبي هات واحدة تقوم بالدور ده.
كريم : انتي اللي هتزعلي.
فريدة : لا هات بجد..
كريم : هههههههههههه
شكلك فعلا بتتكلمي جد.
فريدة : اه هاتها علشان تصحى الصبح متلقهاش ولا تلاقي نفسك اصلا.
كريم : هههههههههههه
ويحدف نفسه على السرير.
كريم : عاوز اناااااام.
فريدة : ايوااا ياريت تعقل كده وتعرف إن اخرة الهزار دا وحش.
كريم : تعرفي إن الواحد لو قادر يختار دلوقت
ممكن يختار ايه؟
فريدة وتنام جنبه : هتختار ايه؟
كريم وهو ناظر للسقف وسرحان بخياله لبعيد : هختار اعيش على جزيرة أنا وانتي بعيد عن الدوشة والزحمة والناس وأهم حاجه نبقى مع بعض.
فريدة بابتسامة : ياريت دا حلمي طول عمري.
كريم : بس مش كل اللي بنحلم بيه ممكن يتحقق أو يكون عندنا مقدره إننا نحققه اصلا هو مجرد خيال لحظات جميلة بنعيشها وبنتخيل نفسنا جواها.
فريدة : اه أنا دلوقت شايفه نفسي وأنا لابسه ورق شجر الموز ورابطه منه كمان على دماغي.
كريم : هههههههههههه
فريدة : وجايه بجردل في سمك وراشقة الصناره جواه وأنت بتخبط الصخور ببعض علشان تولد نار.
كريم : بس أنا تخصص عيال مش نار هههههههه
ركزي يا فريدة.
فريدة : بس بقى متخرجنيش من الجزيرة
وبعدها النار اشتعلت وجيبت بتاع كده عصيان من هنا وهنا وعلقت حاجه في النص وربطت السمك علشان يتشوي وانت بتشوي أنا كنت بعمل الدقه بتاعة السمك.
كريم : انتي جعانه؟!
ههههههههههههه
فريدة : بس بقى يا كريم خليني اتخيل وبعدها قعدنا ناكل والدنيا ضلمت.
كريم : ايوااا حلو إننا وصلنا لحد هنا ههههههه
فريدة : متبس بقى.
كريم : بيتنا عامل ازاي؟
فريدة : بيتنا من الخوص على الأرض كده لا لا فوق الشجرة.
كريم : القرود اللي بتعيش فوق الشجرة ههههههه
تخبطه في كتفه.
كريم : آي.. ايدك تقيله
وبالنسبة للسمك اللي متغسلش دا وأكلتيه كده عادي؟!
فريدة : لأ ما أنا غسلته.
كريم : طب اقوم اغير هدومي علشان انام.
مسكت ايده.
كريم : نعم!
فريدة : عاوزة بيت وسط المياه يا كريم.
كريم : حاضر.
فريدة : ايه دا بجد؟!
كريم : هتنامي وتحلمي دلوقت إن عندك بيت في وسط المياه واصحيكي الصبح بقى علشان تقومي تجهزي الفطار وتلبسي جميلة علشان تروح المدرسة.
فريدة : دا أنت فصيل يا أخي.
كريم : هههههههههههه نامي يا فراولة نامي يا حبيبتي.
تغمض عينها وهي مبتسمه وبتتخيل الحياه اللي ممكن تعيشها لو عندها بيت على جزيرة.
_________
تاني يوم الصبح.
سهر : رهام فنجان قهوة لو سمحتي.
رهام : حاضر يا مدام.
آسر : ايه يا سهر مالك؟
سهر : مش عارفه ايه سبب الصداع ده نايمه كويس ومفيش في دماغي أي حاجه وبرضه قومت على خلاط في دماغي مش عاوز يهدا.
ضغط بـ ايده على دماغها.
سهر :"ايوه كده حاسه إن الصداع بدأ يخف.
آسر : عاوزه تربطي على دماغك علشان الصداع دا يهدا بس أهم حاجه تفطري الأول قبل القهوة وتاخدي حاجه للصداع..
سهر : مليش نفس.
آسر : معلش لقمه صغيرة حتى امسكي.
كان عامل لها ساندوتش.
سهر : متشكره هما الولاد فين؟
آسر : علي في الجامعة زي ما انتي عارفه ومجدي نايم فوق.
سهر : هو ليه مبيروحش يباشر المشروع بتاعه؟
آسر : ايه دا هو أنا مقولتلكيش ولا ايه؟
سهر : قولت لي ايه؟
آسر : مش اتوقف.
سهر : تقصد المشروع اتوقف يعني.. طب ليه؟
آسر : شوية مشاكل وفيها تفاصيل كده مش عاوز أوجع دماغك بيهم نهايته جالي امبارح بيقول لي يا بابي أنا عاوز اكمل واعمل ماجستير واخد الدكتوراة وبعد كده افكر اعمل المركز ده.
سهر : طب ايه المشكلة لما يدرس وفي نفس الوقت مركز العلاج الطبيعي يتعمل ويشتغل؟
آسر : بيقول عاوز اكتسب خبرة علشان الناس تثق في المركز بتاعي.
سهر : يا حبيبي ما هو مش هو اللي هيشتغل هو هيدير وبس وهيجيب حد يشتغل ويكتسب خبرة منهم بجانب الدراسة طبعًا.
آسر : نسيبه يعمل اللي هو عاوزه يا سهر.
سهر : ياااه بقى امتى علي كمان يتخرج.
آسر : كنت بقول كده من سنة بس لكن دلوقت بعد ما بدأت اشوف الموضوع بشكل تاني لاقيت إن الدراسة اسهل من اللي جاي.
سهر : مفيش حاجه بالساهل يا حبيبي.
آسر : عندك حق.. افطري بقى وخُدي حاجه للصداع ولو عاوزه تريحي شويه مفيش مشكلة.
سهر ' لا اريح ايه أنا شبعانه نوم شويه كده
وهخرج اشتري هدية للبيبي.
آسر : بيبي!
هو احنا عندنا بيبي؟!
سهر : هههههههههههه
اه دماغي مش قادرة اضحك بتوجعني
البيبي دا ابن شادي يا حبيبي.
آسر : اه افتكرت احنا معزومين الليلة على سبوع ابن شادي.
سهر : ايوه ما أنا عارفه امال هخرج اشتري هدية لمين؟!
آسر : تمام اشتري حاجه على ذوقك بقى سلام.
سهر : مع السلامة يا حبيبي.
___________
في شقة مجدي.
مجدي : وايه المشكلة يا داليا ما تروحي.
داليا : لا طبعًا مينفعش.
مجدي : ليه مينفعش أنا قولت لهشام مش هقدر اجي بس داليا ورُقية هيجوا.
داليا : طب ليه تحرجني كده أنا قولت لـ أمل مش هعرف اجي.
مجدي : لأ روحي فُكي عن نفسك شويه.
داليا : ازاي بس يا مجدي.
مجدي : زي الناس يا داليا ايه هي الحياه هتوقف خلاص مش بناكل ونشرب وننام فرقت ايه بقى لما تخرجي تجاملي صاحبتك
انتي بقالك شهر مخرجتيش من البيت.
داليا : ومليش نفس اخرج.
وبتبكي داليا.
مجدي : وبعدين معاكي بقى.
داليا : البيت وحش قوي يا مجدي.
مجدي : طيب ما أنا بقول لك اخرجي.
داليا : مش عارفه هبقى اشوف واهو أنا أصلا قولت لـ أمل مش هاجي يعني مش هتستناني ولا حاجه.
رُقية خارجه من جوه : بس أنا نفسي احضر السبوع ده يا مامي.
داليا : خلاص مروان يبقى يوصلك ويستنى تحت اهو تسدي مكاني.
مروان خارج من جوه : طب وليه الشحططه دي واقف تحت وازهق بقى واتخنق لما ممكن حضرتك تروحي معاها.
داليا : انتو كلكم عليه ولا ايه؟!
رُقية : ايوه علشان تيجي معايا علشان خاطري يا مامي.
نظرت داليا لمجدي.
مجدي : روحي يا داليا.
داليا باستسلام : طيب بس هما ربع ساعة وننزل على طول.
رُقية : خلاص موافقة.
داليا : طيب ادخلي اختاري طقم كده يكون مناسب بس ابعدي عن الفواتح ماشي؟
رُقية : حاضر.
____________
في شقة سيف.
قاعد بيلبس يوسف ومليكة بتلبس وخلاص بتلف الطرحه نظر سيف في المرايا اللي كانت واقفه قصادها مليكة.
سيف : بلاش من الطقم ده وشوفي غيره.
التفتت مليكة لسيف : يعني مستني اما لبس وبعد كده تقول لي شوفي غيره!
سيف : ما هو أنا معرفش هيكون عليكي بالشكل ده.
مليكة : يعني ايه هيكون عليه بالشكل ده
ماله مش فاهمه؟!
سيف : بصي في المرايا وانتي تعرفي.
مليكة : بس أنا خلاص لبست.
سيف : وأنا لو مشيت معاكي باللبس ده ابقى مش راجل ياريت تشوفي حاجه تانية.
فتحت مليكة الدولاب وخرجت كل اللي عندها : اتفضل اختار أنت علشان مضطرش اغير تاني.
سيف : معرفش أكيد انتي عارفه ايه المناسب ليكي
أنا نازل اشغل العربية.
وتركها وخرج.
مليكة بتنهيده قويه : اختار ايه دلوقت ما كلهم مقاس واحد.
عماله تدور لحد ما لاقيت طقم إلى حد ما مناسب عن اللي كانت لابساه قبل كده.
خلصت واخدت ابنها وقفلت باب الشقة ونزلت.
بتفتح باب العربية : كده كويس؟
نظر لها سيف من فوق لتحت : كويس.
اتنهدت وركبت ابنها في الكرسي الخلفي وركبت قدام جنب سيف وطول الطريق مفيش كلام وحالة من الصمت التام بينهم لحد ما وصلوا أمام العمارة اللي ساكن فيها هشام وشادي.
اخدت الهدية ونزلت وسيف اخد يوسف وطالعين في الاسانسير.
سيف : هنقعد شويه ونمشي على طول علشان هنعدي نطمن على بابا.
مليكة : حاضر.
باب الاسانسير بيفتح فمسك سيف ايدها وهما خارجين.
نظرت ليه.
سيف : علشان خاطري حاولي تفُكي وتبتسمي واحنا داخلين مش لازم الناس تعرف إننا متخاصمين.
مليكة : هو احنا متخاصمين؟
سيف : معرفش اسألي نفسك.
مليكة سكتت ومردتش.
يرن جرس الباب.
شادي يفتح باب الشقة يستقبلهم بابتسامة.
كانت أمل وليلى وياسمين وسهر وزينة ونورهان جوه قعدوا مع مليكة.
وشادي وهشام الكبير والصغير وآسر وسيف قاعدين في الليفنج.
أنت تقرأ
أنت قلبي الجزء الثالث
Người sói(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
