أنت قلبي الجزء الثالث

الحلقة ٥٣

#انت_قلبي٣
___________
الحلقة ٥٣

في فيلا كريم.
فريدة : ايه دا يا حبيبتي
انتي ماأكلتيش ولا ملكيش في الحلو؟
رُفيدة : فعلا سمر ملهاش في الحلو قوي أنا بصراحه بحب أي حاجه مسكره بس انتي عارفه بقى نتايج أكل الحاجات دي هتودينا فين ههههههههه
فريدة : عندك حق أنا بحاول أقلل فعلا من الأكلات الدسمه وكمان الحلويات.
رُفيدة : مش باين يعني.
فريدة : لأ أنا كده بتخن من أقل حاجه مع إني مباكلش.
رُفيدة : ممكن علشان قاعدة في البيت جربي تلعبي رياضة هتفرق كتير في شكل جسمك والديفوهات دي هتختفي اظن الدكتور مشغول علشان كده مش واخد باله ههههههههههههه.
نظرت سمر لفريدة اللي ظهر على ملامح وجهها إنها اضايقت من كلام والدتها.
رُفيدة : هو انتي قاعدة لوحدك على طول كده في البيت؟
فريدة : معايا جميلة بس نايمه والولاد في النادي.
رُفيدة : وطبعا الدكتور في المستشفى هي بتاعتكم
ولا شريك فيها؟
فريدة : لأ شريك فيها.
رُفيدة : أظن العيادة لسه شغاله.
فريدة : لأ مش شغاله لإن مفيش وقت بس لما بتكون في حالة مستعجله وحد يتصل بيه بيفتح العيادة لإنها في المنطقة اللي كنا ساكنين فيها.
رُفيدة : بصراحه دكتور كريم خدوم جدا ومسبناش خالص من بعد وفاة دكتور حسن جوزي.
فريدة : لا كريم كده مع كل الناس.
رُفيدة : ودي حاجه مبتضايقكيش؟
فريدة : لأ وهتضايقني ليه؟ بالعكس.
رُفيدة : أصل بصراحة أنا كنت بغير على جوزي فعلا اعرف اللي بتحب جوزها لازم تغير عليه.
فريدة : طبعا بغير عليه بس دا لو في حاجه تستدعي الغيره لكن كريم حياته لشغله وبيته وبس وبعدين كل واحدة واثقه في جوزها هتقلق ولا تضايق من ايه.
رُفيدة : عندك حق جوزي برضه كان محترم جدا اظن الجيل دا ميتعوضش.
فريدة : جيل ايه؟
رُفيدة : جيل جوزي وجوزك شباب اليومين دول طايشين ومش قد المسؤلية بيكون هيموت علشان يتجوز وهوب أول ما يتجوز ويضمن إنها معاه يخونها.
فريدة : آه بس أكيد مش كلهم ساكته ليه يا حبيبتي؟
سمر بابتسامة : هقول ايه يا طنط؟
فريدة : عارفه إن مفيش حد من سنك تتكلمي معاه بس جميلة لو صاحيه كانت دوشتك.
رُفيدة : هههههههههههه تعرفي أنا استغربت جدا.
فريدة : من ايه؟
رُفيدة : من سن بنتك متوقعتش إن عندك بنت في السن دا خصوصا إن في فرق ما بينها وبين اخوتها كبير جدا.
فريدة : أصل كريم بيحب الأطفال.
رُفيدة : أكيد مش دكتور نسا هههههههههههه
بس دا مش كويس للبنت.
فريدة : مش فاهمه.
رُفيدة : قصدي فرق السن بينها وبين اخوتها بيخليها مش عارفه تلعب ولا تاخد حريتها في البيت علشان عندها اخوات أكبر منها مفروض نضجوا خلاص.
فريدة : آه بس عادي الموضوع دا مش عامل أزمة في حياتنا يعني وبعدين هي بتقضي وقت في المدرسة مع أطفال من نفس سنها يعني مش لازم تلاقي حد من سنها في البيت.
رُفيدة : اه.. انتي بقى اللى اخترتي ديكورات الفيلا
دي؟
فريدة : أنا وكريم بس الصراحة معظم الشغل دا كان اختياره هوه.
رُفيدة : أنا قولت كده برضه لإن واضح إن دا اختيار حد ذوقه عالي جدا.
فريدة : طبعا وأنا ليه الشرف إن دا ذوق جوزي.
رُفيدة : هههههههههههه أنتي زعلتي ولا ايه ما أكيد اخد رأيك في بعض الحاجات هو انتو فعلا ولاد عم؟
فريدة : ايوه.
رُفيدة : واتجوزتوا بقى علشان السبب ده؟
فريدة : لا أكيد علشان كنا بنحب بعض.
رُفيدة : الحقيقة إن معظم جوازات القرايب بتكون بسبب القرابه اللي بين الطرفين بس
يعني الحب دا مبيكونش موجود اصلا.
فريدة : معرفش علشان مجربتش دا الحقيقة.
رُفيدة : اممم طيب مش بينا يا سموره.
فريدة : ليه ما حضرتك منورانا.
رُفيدة : معلش علشان لسه
بس هنروح لدكتور الأسنان.
فريدة : لا الف سلامة هتخلعي ولا ايه؟
رُفيدة : لا مش أنا دي سمر بس عندها ضرس تاعبها شويه.
فريدة : ألف سلامة عليها
كده بقى مش هقدر امسك فيكم تقعدوا أكتر من كده علشان معطلكمش.
رُفيدة : اوك.. سلام.
فريدة : مع السلامة.
وصلتها لحد ما ركبت العربية وخرجت من البوابة.
فريدة بتنهيدة قوية : ياااه اخيرا هم واتزاح.
____________