أنت قلبي الجزء الثالث

الحلقة ١٠٩

#انت_قلبي٣
__________
الحلقة ١٠٩

في شقة شادي.
راجع من بره ودخل يصحي ليلى.
شادي : ليلى.. ليلى قومي شوفي مين عندنا.
ليلى بصوت ناعس : شادي أنا لسه يدوب منيمه يزيد وقولت أنام شويه.
شادي : معلش يا حبيبتي عارف إنك سهرانه طول الليل وقومتي الصبح روحتي المدرسة.
ليلى : وياريتني ما روحت
مشوار جه على الفاضي
اصلا احنا مش في اجازة عايزين مننا ايه طيب؟!
شادي بابتسامة : معلش قومي شوفي مين عندنا.
ليلى : مين؟
شادي : غيري هدومك واغسلي وشك واطلعي شوفي.
ليلى : تقصد ايه بـ اغسل وشي دي؟!
شادي بابتسامة : هههههههههههه أنتي طول عمرك قمر يا حبيبتي بس مش معقول هتطلعي وانتي نعسانه كده.
ليلى تدخل تغسل وشها وتغير هدومها وتخرج من الغرفة.
هاني أول ما يلمحها يقوم علشان يسلم عليها.
ليلى بفرحه : بابي!
هاني : وحشتيني يا لوله.
يحتضنها وهو بيطبطب عليها.
ليلى : وحضرتك كمان وحشتني قوي جيت امتى؟
عبد الرحمن مقاليش.
هاني : أنا قولت له يخليها مفاجأة.
ليلى : أحلى مفاجأة.
هاني : امال فين يزيد؟
ليلى : نايم.. شويه كده وهقومه يسلم عليك ويتشاقى كده وياك علشان تعرف اللي بيحصلي.
هاني : هههههههههههه
لا خليها مرة تانية بقى.
ليلى : مرة تانية ايه هو حضرتك هتمشي؟
هاني : أنا لسه جاي من ساعة بس اخوكي وصلني لحد هنا وراح يشوف شغله هروح أنا بقى اريح شويه واجيلكم كده بالليل.. حتى تكوني مصحصحه.
ليلى : لا أنا مصحصحه اهوه اقعد اتغدا معانا هصحيلك يزيد.
يمسك ايدها : لا متصحهوش سبيه نايم هاجي بالليل اشوفه.
شادي : اقعد اتغدا معانا يا عمي.
هاني : معلش بس محتاج استريح شويه أنا جاي من المطار على هنا واتغديت أنا وعبد الرحمن واحنا جايين في الطريق هو راح الشركة بعد ما نزلني تحت البيت.
شادي : اه ما أنا رايح تاني بس شويه كده.
هاني : أنا عارف إن باباك مسافر وأنت ومراد اللي متابعين الشغل شدوا حيلكم بقى وخليكم عند حسن ظن بابا.
شادي : ادعيلنا يا عمي الفترة دي تعدي على خير
لحد ما بابي يرجع بالسلامة.
هاني : كله بيعدي خلي بالكم من نفسكم أنا هاجي اقعد معاكي شويه بالليل يا ليلى أنا بس مقدرتش اروح البيت قبل ما اشوفك.
شادي : تشرف وتنور يا عمي.
ليلى : خلاص بقى مضطرة اسيبك تخرج طالما تعبان بس هتيجي بالليل.
هاني : طبعا يا حبيبتي دا أنتم وحشني قوي.
ليلى : جاي بقى تستقر هنا ولا ناوي تسافر تاني؟
هاني : هنتكلم في الموضوع ده بالليل علشان دا محتاج رغي كتير ومش عاوز أوجع دماغك دلوقت سلام.
يرددوا : مع السلامة.
شادي وليلى يوصلوا هاني لعند باب الشقة.
_________
في فيلا آسر.
البواب بيفتح البوابة لسيف اللي دخل وبيركن عربيته في الجنينة.
فجأة توقف زينة تدور على يوسف اللي كان بيلعب قصادها قبل ما تتلهي في المجلة اللي كانت قدامها على الطربيزة تحدفها على الكرسي وتقوم تدور على يوسف اللي اختفى فجأة.
زينة : يوسف.. يوسف.
ولسه بتتجه ناحية باب الفيلا علشان تدخل تطمن عليه جوه.
تلاقي سيف بينط في البسين ينقذ ابنه اللي كان بيغرق تجري زينة وهي بتصرخ فخرج كل اللي كانوا موجودين جوه.
ملك ومليكة وسهر ومنه وسلمى وأمل ورُقية ومجدي وعلي.
مليكة اخدت ابنها في حضنها بعد ما خرجه سيف من حمام السباحه واطمن إنه بيتنفس كويس.