أنت قلبي الجزء الثالث

الحلقة ١١٣

#انت_قلبي٣
__________
الحلقة ١١٣

في فيلا آسر.
علي بيخبط على باب غرفة مليكة.
علي : مليكة... مليكة انتي نمتي؟
مليكة بصوت مخنوق من البكاء : لا يا علي.
علي : طب كنت عاوز اتكلم معاكي.. ينفع؟
مليكة : ادخل يا علي.
يدخل علي بابتسامة : ايه ده هو يوسف نام؟
مليكة : اه.
علي يمسك ايدها : لا متشتغليش النور حلو كده.
مليكة : طب الابجورة حتى.
علي : ولا أي حاجة حلو الإضاءة كده هههههههه
عامله ايه دلوقت؟
مليكة : هعمل ايه يعني اديني قاعدة شويه كده وهنام.
علي : طيب قبل ما تنامي كنت عاوز اقولك كلمتين.
مليكة : اسمع يا علي لو كنت جاي تتكلم معايا على اللي حصل دا من شويه فأنا مش عاوزه اتكلم خالص لو سمحت.
علي : طب لو جه اعتذر هتقبلي اعتذاره؟
مليكة : هو الكل عاوز يغلط وأنا مفروض بقى اسامح وكده؟
لأ شكرًا خلاص مبقتش فارقه معايا اللي عاوزه يعمله وعلشان اريح الكل أنا قاعدة هنا لا رايحه ولا جايه.
علي : مش فاهم تقصدي ايه؟
مليكة : انفصل أنا وسيف وخلاص كل واحد يروح لحاله علشان اريح دماغي من كل ده.
علي : حبيبتي احنا مش عاوزين غير سعادتك وخايفين عليكي ودا اللي في نية مجدي بس اسلوبه زباله أنا عارف.
يدخل مجدي : ما تحترم نفسك بقى.
مليكة : أنت!
ايه اللي جايبك هنا لو سمحت اتفضل علشان عاوزه أنام.
مجدي بيقرب منها : يا سلام ما انا دخلت لاقيتك عماله ترغي مع علي ايش معنى لما دخلت؟
مليكة : اوعى بقى سيبني.
مجدي حاضن مليكة : خلاص حقك عليه وادي دماغك اهي كمان ابوسها.
مليكة : طب سيبني بقى.
مجدي : لأ مش قبل ما تقولي إنك سامحتيني.
مليكة : اسامحك ازاي وأنت خانقني كده؟!
مجدي : طب اهوه فكيت ايدي قولي بقى.
مليكة : بعد ايه أنا روحي كانت هتطلع يا أخي.
علي : سامحيه يا ملوكه علشان خاطري.
مليكة : يعني بابي ومامي يسافروا وأنا في الظروف اللي انتوا عارفينها دي وكمان اخواتي اللي مفروض يعني يكونوا جنبي يطلع الأستاذ ده يقول الكلام ده؟

تحت قدام الفيلا في حد عمال يتمشى حوالين فيلا وينظر لـ أعلى للمبنى ومفيش نور شغال.
في التليفون 📞
الرجل : كله تمام يا باشا.
مجهول : عارف هتعمل ايه؟
الرجل : عارف يا باشا اطمن المهمة هتم زي ما أنت عاوز بالظبط.

علي واقف في بلكونة غرفة مليكة : مجدي.. مجدي.
مجدي كان قاعد جنب مليكة بيصالحها : نعم عاوز ايه؟
علي : تعالي بس شوف.
مجدي : اشوف ايه أنت كمان.. خلاص يا مليكة صافي يا لبن؟
مليكة : خلاص يا مجدي.
علي : يا ابني تعالى بقولك.
يقوم مجدي : نعم عاوز ايه وموطي صوتك كده ليه؟
علي : بص هناك كده.
مجدي : استنى اشغل النور.
علي يمسك ايده : متشغلش حاجة هو ايه علاقة ده بده الشارع منور قدامك ولا هينور من هنا؟
مجدي : اشوف ايه يعني بقولك ايه يا علي أنا تعبان وعاوز اروح أنام.
علي : في حد بيحوم حوالين الفيلا.
مجدي : نعم!
أنت بتقول ايه؟
علي : بص كده على الراجل اللي رايح جاي ده وعمال يبص على الفيلا عاوز يتأكد إن مفيش حد هنا.
مجدي : يا سلام ودا مين اللي قال لك الكلام ده؟!
علي : يا ابني بص بقى.
مجدي : تصدق عندك حق دا لف ورجع تاني ياترى عاوز ايه ده؟
علي : أنت رايح فين؟
مجدي : هنزل اشوفه عاوز ايه خليه يغور من هنا.
علي : يا مجنون بقى عاوز تنزله كده بطولك؟!
مجدي : خلاص خليك راجل وانزل معايا.
علي : احترم نفسك أنا راجل غصب عنك.
مجدي : خلاص تعالى معايا.
مليكة : ممكن تدخلوا وتقفلوا الباب ده
الجو برد ويوسف تعبان لوحده مش ناقص يعني.
يدخل علي ومجدي ويقفلوا باب البلكونة.
علي : تصبحي على خير يا مليكة.
مليكة : وأنت من أهل الخير.
مجدي : اقفلي الباب على نفسك كويس.
مليكة : اقفل الباب ليه؟
مجدي : اقفلي وخلاص يا مليكة.
مليكة : خلاص اقفل من عندك.