أنت قلبي الجزء الثالث

الجزء الرابع /الحلقة ٥

#أنت_قلبي٤
__________
الحلقة ٥

في فيلا كريم.
كريم : في ايه يا فريدة انتي عاوزاني اروح أقول لمحمد الكلام ده علشان تحصل مشكلة بينه وبين مراته؟!
فريدة : وهو اللي حصل دا يصح يعني يا كريم تتخانق معاه وتعلي صوتها عليه وعلشان ايه كمان سبب زي ده طب محمد ماله ومال قرار اخوه في إنه يفركش مع خطيبته هي اصلا مالها ومال الحوار ده؟
كريم : ملناش دعوة يحل مشاكله مع مراته بالطريقة اللي يشوفها صح بلاش توجهيه غلط يا فريدة احنا عاوزين نصلح مش نزود المشاكل أكتر.
فريدة : قول كلمة حق بقى يعني هي مغلطتش في اللي عملته تسيب بيتها ليه هو محمد كان عملها حاجه؟
كريم : يا ستي ملناش دعوة انتي عاوزه تولعي فيها نار يا فريدة؟!
فريدة : بصراحه أنت تفكيرك غريب بقى أنا اللي عاوزه اولعها نار ولا بقول الصح اللي كان مفروض يتعمل.
كريم : أول سنة جواز يا ما بيحصل وانتي عارفه حصل ايه في أول جوازنا مش عاوزين دا يتكرر تاني لإن كان السبب برضو تدخل أهلنا اللي زود المشكلة محلهاش.
فريدة : خلاص خليه ياخد على دماغه منها واقف اتفرج.
كريم : ياخد على دماغه ايه دي مناقشة عادية بينهم انتهت إنهم شدوا مع بعض قالتله عاوزه اريح اعصابي شويه اخدها وصلها بيت أهلها ويومين وهيروح يجيبها ويتصالحوا متكبريش الموضوع بقى.
فريدة : بقى كده أنا اللي مكبره الموضوع؟
ماشي خليك كده انصحه يستحمل لحد ما تلاقي ابنك تحت طوعها تقوله يمين يمين شمال شمال وميعرفش يمشي كلمة عليها.
كريم : لااا دا انتي حقيقي عاوزه تولعيها نار مالك يا فريدة انتي عمرك ما كنتي كده؟!
فريدة : علشان متغاظه من رد فعلها يا كريم محمد ايه علاقته بالموضوع ثم خطيبة ابنك كمان رافضة هي كمان تكمل يا ترى زعلت منها زي ما زعلت من محمد ولا ولادي بس اللي زعلانه منهم؟
كريم بتنهيدة : اطفي النور دا علشان ننام.
بتقفل فريدة نور الغرفة وهي مضايقه : نام لوحدك أنا مش نايمه.
وخرجت وقفلت الباب.
________
في الكافية.
إياد : مليون ايه؟!
أكيد بتهرج.
فارس : أظن مش هضيع وقتي واهزر وأعمل مقالب يا أستاذ إياد.
إياد بيضحك : هههههههههههه تضيع وقتك ايه يا حبيبي أنت صايع يالا.. فاهم يعني ايه صايع ملكش لا شغله ولا مشغله الحاجه اللي بتعرف تعملها هي إنك ترازي في الناس وبس تشوف أي ست تعيش من عرقها بس المرة دي مش ظابطه معاك زي ما ظبطت زمان مع خالتي فأنا المرة دي هسقيك المر كاسات يا فارس.
فارس : هههههههههههه ولا تقدر تعمل حاجه أول حاجه هتحصل إن جوز بنت خالتك هيعرف إنها صدرتك في الحوار ده وركنت جوزها على جنب علشان إياد دا ايه الفارس المغوار اللي بيجيها على الحصان بتاعه يقولها طلباتك يا أميرة عاوزه ايه وأنا انفذه في الحال حبيب القلب بتاع زمان
ههههههههههههه
إياد : أنت مفكر كلامك ده هيأثر فيه بقى واوطي ابوس على ايدك إنك متعرفش آسر حاجه هههههههه أنت يالا أهبل ولا شايفني لامؤاخذة برياله دا أنا اوديك البحر وارجعك عطشان واللي في دماغك مش هيحصل لو عاوز آسر يعرف من الأول كنت روحت ليه وطلبت منه المبلغ ده بس أنت عارف إنه هيديك بالجزمه فقولت تلف وتدور وتجيبها من ناحية بنت خالتي بس دا بعدك لو طولت جنيه مني أو منها.
فارس : لا ناصح بقى مش خايف آسر يعرف إنها راحتلك تطلب المساعدة علشان عارفه إنك مش هترفض لها طلب وإنها بتلعب اللعبة دي عليك من زمان كل ما تتزنق مفيش غير إياد علشان عارفه قلبه واقع في حبها مستعد يترمي تحت رجلها بس ينول الرضا.
مسك إياد فارس من لياقة القميص بقوة وجذبه ناحيته : علشان دماغك شمال عمرك ما هتفهم يعني إنك تبقى راجل مع ست لجأت ليك ايًا كانت هي مين بس عقلك مستحيل يستوعب ده لإن كل حاجه ولها تمن عندك.
فارس : بقولك ايه احنا رجاله زي بعض فبلاش تضحك عليه بكلمتين أنت عارف وأنا عارف مفيش راجل بيساعد ست بدون مقابل حتى لو كان المقابل ابتسامة حلوة في وشه ترضيه وتحسسه برجولته.
إياد : أنا راجل غصب عنك ومعنديش عقدة النقص اللي عندك علشان احتاج ست تبتسم في وشي علشان تعوضني اللي ناقصني أنت اللي محتاج تحس برجولتك اللي مش موجودة غير في دقنك وشنبك.
فارس : ماشي خلص الكلام على كده.
إياد : لا يا روح ماما لسه مخلصش ومش أنت اللي تقول علشان أنا لسه هقولك لو اتعرضت لسهر ولا حد من ولادها يا فارس يبقى أنت الجاني على نفسك هتشرف في السجن باقي عمرك دا لو ما موتش قبل ما توصل هناك.
فارس : مستني اشوف هتعمل ايه؟
إياد بيقوم : خليك مستني أنا عن نفسي مش فاضيلك بس مستعد وقتها اسيب كل اللي ورايا وافضالك.. سلام.
ويرجع إياد مرة تانية.
إياد : نسيت دي.. وتاني مرة متحاولش تفكر في حركة واطيه زي دي.
بياخد فارس المحفظه من إياد ويحدفها على الطاولة.
_________
في الكافية المقابل.
ممدوح : ما تمضي يا بشمهندس بقى.
عُمر : حاضر.
بشرى(بنت أخو صاحب عُمر) : يلا بقى يا بشمهندس كلنا مضينا باقي امضتك.
ياسمينا نظرت لها من فوق لتحت ومش عاجبها أسلوبها ولا لبسها بس ساكته مش حابه تتكلم.
بيمضي عُمر.
ممدوح : مبروك يا بشرى مبروك يا بشمهندس.
عُمر : مبروك علينا كلنا.
بشرى : حقيقي مبروك علينا كلنا.
ياسمينا تهمس لعُمر : مش يلا بينا بقى.
عُمر : حاضر.
ممدوح : رايح فين استنى هنقطع التورته مع بعض.
نظر عُمر لياسمينا.
بشرى بتقطع التورته وبتقدم طبق لياسمينا.
بشرى : اتفضلي يا مدام ياسمين.
ياسمينا : متشكره.
بشرى : اتفضل يا بشمهندس عُمر.
عُمر لسه بيمد ايده وياخد الطبق كانت ياسمينا اخدته من بشرى.
ياسمينا : شكرًا تسلم ايدك.
وتقدم الطبق لعُمر : اتفضل كُل علشان نمشي.
عُمر بابتسامة ليهم ويكلم ياسمينا بهمس : حاضر.
__________
في المستشفى.
د. حمدي : يا دكتور وحيد هو نظامه كده متحاولش تطلع من وراه بمصلحه دا دماغه ناشفه قوي.
د. وحيد : لا وعايش دور المثالي قوي تقولش البيه مبيغلطش.
د. حمدي : دا يا ما خرب بيوت ناس كتير بس أسلوبه ده يا باي دا إنسان ميتعاشرش دا أنا مشفق على أهله منه بجد راجل معقد.
د. وحيد بيسخر من كريم ويقلده : البزنس دا تروح تعمله بره المستشفى هنا في سيستم ماشيين عليه وأنت وافقت عليه يا دكتور المستشفى شغاله للناس الغلابه مش هسمح إن حد يستغلهم.
د. حمدي : هههههههههههه تصدق إنك بتقلده بالظبط.
د. وحيد : دا حسسني إني مديت ايدي في جيب المريض وسرقته مش قدمتله خدمة واخدت أجري عليها.
د. حمدي : أنا بقالي فترة بفكر اسيب المستشفى لكن مش لاقي بديل.
د. وحيد : أنا عن نفسي مش مكمل هنا والحكاية مسألة وقت مش أكتر.
د. حمدي : يبقى تاخدني معاك علشان أنا اتخنقت من هنا خلاص.
د. وحيد : حاضر لما أخد القرار هتلاقيني بقولك
علشان تعمل زيي.
__________
في شقة أكرم.
ندى : اشتري ايه يا علي؟
علي : تشتري الشقة يا ندى.
ندى : ليه هو أنت هتبيعها ومامتك عايشه فيها؟
علي : هو أنا هبيعها لحد غريب يا ندى وبعدين ماما لها حق فيها وانتي كمان أنا هاخد نصيبي بس اللي هتشتريه والشقة تبقى ليكي.
ندى : بس أنا معييش اشتري.
علي : معقول يا ندى العمر دا كله محوشتيش حاجه من مرتبك؟!
ندى : لا معييش يا علي أنت ناسي إني جوزت تالا وأنس ولا ايه.
علي : جوزتيهم ازاي امال حازم عمل ايه؟!
ندى : ساعدته يا علي ما دول ولادي برضو ولا ايه.
علي : ولادك بس ملزمين من أبوهم يا ندى.
ندى : وفيها ايه لما أساعد جوزي طالما برضايا هو أنت متحبش مراتك تساعدك لو اتزنقت في قرشين ولا ايه؟
علي : لا عمري ما اعملها ولا أقبل بكده خالص.
ندى : وأنا قبلت يا أخويا كل واحد حر بقى وبعدين راجع بعد الغيبه الطويلة دي وفجأة كده من غير ما تقولنا علشان تفاتحني في الموضوع ده؟!
علي : عاوزه استقر يا ندى واعمل مشروع هنا علشان اقدر أفتح بيتي.
ندى : يا أخويا لو معايا مش هتأخر عنك.
علي : هو ازاي حازم يبدل شقته بالشقة اللي تحت؟!
ندى : دي حاجه تخصه هو مليش فيها.
علي : علاء ابن عمك هو اللي طلب منه كده صح؟
ندى : معتز هيتجوز في الشقة.
علي : شوفتي مش قولتلك.
ندى : بقولك ايه ما تسيبك من حازم وعلاء وكل اللي في البيت وطمني عليك عامل ايه؟
علي : تمام..
ندى : ابقى سلملي على شروق الصبح هبقى انزل اشوفها ولا لما ارجع من المدرسة.
علي : ماشي تصبحي على خير.
ندى : وأنت من أهله.
فتحت ندى باب الشقة وخرجت.
ميرفت خارجه من جوه يقوم علي يسندها ويقعدها.
ميرفت : أختك اللي فتحت الباب دي يا علي؟
علي : اه يا ماما طلعت شقتها علشان تنام.
ميرفت : يا حبيبيتي عندها شغل الصبح.
علي : وأنا مش حبيبك برضو يا ماما؟
ميرفت : أنتو الاتنين حبايبي وبعدين ايه السؤال ده من امتى يعني؟
علي : يعني لو طلبت منك حاجه هتوافقي عليها؟
ميرفت : لو الطلب دا كان في مقدرتي انفذهولك ليه لأ.
علي : عاوز ابيع نصيبي في الشقة تشتريه؟
ميرفت : تبيع ايه؟!
علي : ابيع نصيبي في الشقة في ايه يا ماما مالك؟
ميرفت : مستغربه طلبك شقة ايه اللي عاوز تبيعها يا ابني لما أموت ابقى خدها ولا لما أموت ليه تعالى اقعد فيها.
علي : ما أنا عندي شقتي بس محتاج فلوس علشان اكمل واعمل المشروع اللي في دماغي واستقر هنا بقى ولا مش عاوزاني ابقى هنا جنبك؟
ميرفت : أكيد عاوزه بس أنا معييش يا ابني فلوس اساعدك كل اللي حيلتني غوشتين باباك كان جايبهملي.
علي : لأ هبيعك الدهب بتاعك يا ماما لا مينفعش ولا اقولك هاتيهم.
ميرفت : بس اختك ليها فيهم.
علي : معلش أنا هستسمحها تديني نصيبها.
ميرفت : لا معلش دي ذكرى من ابوك مقدرش افرط فيهم..
علي : كده طيب.. هتفضلي صاحيه ولا هتنامي؟
ميرفت : لأ هنام.
علي : طب اتفضلي معايا علشان ادخلك اوضتك.
______
في منزل عُمر.
عُمر : هههههههههههه
ياسمينا : أنت بتضحك على ايه مش مصدق كلامي؟
عُمر : ياسمين احنا كبرنا على الحاجات دي يا حبيبتي.
ياسمينا : طب تقدر تقول لي ليه من الأول مقولتليش إن الست هانم هتبقى شريكه معاكم في الكافيه؟
عُمر : علشان أنا اتفاجئت زيي زيك.
ياسمينا : عاوز تفهمني إنك مكونتش تعرف يا عُمر؟
عُمر : صدقيني مكونتش أعرف.
ياسمينا : هي أرمله وعندها ولد صح؟
عُمر : هي مش قالت لك كده؟
ياسمينا : اه بس بتأكد.
عُمر : ما أنا معرفش هي قالت لك ايه بس طالما قالت كده يبقى صح هتكدب ليه.
ياسمينا : اممم.. وطبعا لازم تروح تباشر الشغل في الكافيه وتشوف ماشي ازاي.
عُمر : طبعاً مش دافع فيه دم قلبي.
ياسمينا : وهي بقى هتفضل رايحه جايه على هناك مش كده؟
عُمر : أنا ايه اللي عرفني يا ياسمين؟
ياسمين :  بصراحه أنا مش مرتاحه للحوار ده.
عُمر : عاوزه ايه من الأخر يا ياسمين علشان تعبت وعاوز أنام.
ياسمينا : لو هي موجودة يبقى اروح أنا خالها دا موجود يبقى تروح أنت.
عُمر : ازاي يعني أفرض انتي في المدرسة ساعتها بقى نعمل ايه؟
ياسمينا : خلاص هو يوقف ويشوف الشغل وخليك أنت هنا.
عُمر : نعم!
بقى بعد ما لاقيت حاجه اشغل نفسي بيها ارجع تاني اقعد في البيت يا ياسمين انتي بتقولي ايه؟!
ياسمينا : مش عاجبك كلامي مش جاي على هواك طبعا.
عُمر : يا مراتي يا حبيبتي يا أم العيال يا بنت خالي صحصحي معايا شويه دا شقا عمرنا اللي حطناه في المكان ده عاوزاني اسيب كل حاجه واقعد في البيت علشان معرفش الكافيه بيدخله ايه ولا ماشي ازاي بسبب غيرتك من واحدة من دور بناتي..
ياسمينا : اه ياريت تفضل فاكر إنها قد بنتك نادين.
عُمر : فاكر يا ياسمين في حاجه تانية؟
ياسمينا : لأ تصبح على خير.
__________
في شقة إياد.
منه : إياد أنت رجعت امتى؟
كان إياد قاعد قدام التليفزيون مش جاي له نوم ووقت ما رجع كانت منه نايمة قلقت فقامت تشوفه رجع ولا لأ.
إياد : لسه داخل من نص ساعة كده.
منه : ايه اللي أخرك كده أنا أخر ما زهقت دخلت نمت لما قولتلي لسه قدامي ساعة كمان.
إياد : كنت قاعد مع حد والكلام اخدنا.
قعدت منه جنبه : حد مين؟
نظر لها بدهشه.
منه : يعني يمكن حد اعرفه.
إياد : هو مفيش بن؟
منه : فيه ليه عاوز تشرب قهوة؟
إياد : ياريت.
منه : بس أنت كده مش هتعرف تنام.
إياد : لا بنام عادي ولا بيهمني.
منه : حاضر هقوم أعملك قهوة.
إياد : مظبوطه ها..
منه بابتسامة : حاضر.
______
في فيلا مراد.
مراد : ايه كل الدوا ده يا بابي؟
هشام : الدكتور اللي كاتبه.
مراد : بس كتير قوي.. بتاع ايه ده؟
بيقرأ مراد اللي مكتوب على العلبة : ياااه كل دا بيعالجه الدوا ده؟
هشام : سيب كل حاجه زي ما هي.
مراد : وايه دا كمان.. هو حضرتك عندك ايه؟
هشام : يا ابني سيب الدوا هيوقع منك يتكسر.
أمل : المياه يا هشام.. اسمع الكلام يا مراد وبطل شغل العيال ده..
هشام بياخد الدوا وبعدها يشرب المياه.
مراد : أهلا هو حضرتك لسه صاحي؟!
كانت مريم نازله ومعاها ابنها.
مريم : سلام عليكم.
يرددوا : وعليكم السلام.
مريم : ألف سلامة على حضرتك يا عمي.
هشام : تسلمي يا بنتي أنا بخير..
مراد : تعالى يا مغلبني.
هشام : ما أنت ياما غلبتني أنا ومامتك شيل علشان تعرف.
مراد : ما أنا شايل اهو أنت يالا مبتنامش ليه هو كل ليلة كده؟
مريم : هيعيط سيبه أنا مصدقت سكت.
مراد : هو كان بيعيط كمان؟!
مريم : يووووه دا قعد يجي ساعتين شيلاه على دراعي مش عاوز يسكت غير كده.
مراد : لا يا حبيبي أنا هنام مش هقعدلك أنا أربعة وعشرين ساعة صاحي كده.
أمل : هاته يا مراد.
مراد : لا خليكي بس مع دكتور هشام علشان شكله تعبان.
هشام : أول مرة تقول حاجه كويسه.
مراد : هههههههههههه أول مرة برضو دا أنا طول عمري بقول حكم.
أمل : هتاكل يا هشام؟
هشام : لا أنا تمام كده أكل ايه أنا ماصدقت معدتي ارتاحت شويه.
مراد : أنا عندي ليك حل لوجع معدتك والحرقان اللي بتحس بيه ده.
هشام : حل ايه ده؟
مراد : رياضة هتعملها وهتريحك خالص.
هشام : هي فعلا هتريحني خالص.. خلي النصايح دي لنفسك أنت شباب تستحمل.
مراد : دي رياضة سهلة قوي على فكرة مناسبة جدًا لسنك.
هشام نظر لـ أمل : سامعه ابنك؟
أمل : ما خلاص بقى يا مراد بابي تعبان وبعدين رياضة ايه دي اللي هتعالج تعب المعدة مكانش حد غُلب.
مراد : مريم... مريااااااام.
مريم : ها.. في حاجه يا مراد؟
مراد : انتي نمتي؟
مريم : معرفش حسيت إن دماغي تقلت كده مرة واحدة.
أمل : طب اطلعي يا بنتي نامي في اوضتك.
مريم : حاضر.. هات ريان يا مراد.
مراد : لا سيبيه أنا هاخده معايا وأنا طالع.
مريم : طيب تصبحو على خير.
يرددوا : وانتي من أهله.
هشام : وأنت كمان يلا خُد ابنك واطلع نام.
مراد : طب مش محتاج حاجه؟
هشام : لا متشكر.
مراد : متأكد؟
هشام : يا ابني قولتلك لأ خلاص بقى.
مراد : خلاص تصبحو على خير.
واخد مراد ابنه وطلع فوق.
هشام : ايه يا أمل مش هتنامي؟
أمل : اه هقوم اهو هات ايدك.
هشام : اتفضلي بس حاسبي توقعي.
أمل : ضهري واجعني قوي اليومين دول يا هشام.
هشام : عندي ليكي كريم من مجموعة أعشاب هيريح ضهرك دا خالص وأي حاجه بتشتكي منها في رجلك ايدك هيعالجها.
أمل : ياريت دا أنا امبارح معرفتش أنام وأنت ايه بقى روحت في النوم مدرتش بالدنيا.
هشام : ما صدقت معدتي ارتاحت شويه لاقتني غمضت عيني مصحتش غير الصبح.
أمل : عندك الكريم ده؟
هشام : لا هجيبه معايا وأنا جاي بكرة.
أمل : طيب هات الدوا اللي معاك ده.
هشام : هتعملي فيه ايه؟
أمل : هحطه في التلاجة.
هشام : طيب اتسندي عليه.
أمل : هههههههههههه أنا اللي أتسند عليك!
هشام : مش فاهم تقصدي ايه؟
أمل : لا ولا حاجه خلينا نتسند على بعض..
______________