أنت قلبي الجزء الثالث

الحلقة ١٤٦

#انت_قلبي٣
__________
الحلقة ١٤٦

بعد مرور يومان من الأحداث.
في الصباح في فيلا آسر.
سهر تخبط وتدخل الغرفة : آسر أنا...

وبعدها تنظر لـ آسر اللي كان واقف أمام المرايا.
آسر بينظر من المرايا ويكلمها : ايه يا سهر في حاجه؟
سهر : كنت جايه اصحيك وأقولك الفطار جهز معرفش إنك قومت من النوم ولبست كمان.
آسر : طب وفيها ايه؟
ظبط المنبه على تمانيه وقومت أخدت شاور ولبست.
سهر : هو أنت نازل الشركة دلوقت؟
آسر : لأ.
سهر : أنا بقول كده برضه مش باين إن دا مشوار خاص بالشغل.
آسر بابتسامة : ليه هو أنا بنزل الشركة ازاي يعني؟
سهر : يعني دا احساس جوايا.
آسر : سليم عامل ايه؟
سهر : كويس فضلت أنا وملك طول الليل نبدل مع بعض نمت شويه وبعدين قومت اخدته منها وهي نامت شويه فضلنا كده للصبح.
آسر : هو عمار جاي امتى؟
سهر : ملك بتقول بعد بكرة.
آسر : خلاص يبقى مجدي ياخده للدكتور ولا كلمي علي يجي يشوفه.
سهر : حاضر... هات الدوا معاك بقى وأنت نازل تفطر.
________
في فيلا كريم.
كريم : لو تعبانه بلاش يا فريدة.
فريدة : لا أنا كويسه وبعدين هو أنا هعمل ايه هناك يعني شوية تعديلات كده في الفرش.
كريم : عقبال ولادنا يا حبيبتي.
فريدة : عزمت مروة على الغدا بكرة بس نسيت خالص إن الولاد مسافرين الساحل.
كريم :"مروة مين؟
فريدة : جارنا الجداد يا كريم.
كريم : اه.. وايه علاقة الولاد بالزيارة دي؟
فريدة : كنت قولت لها يعني تجيبهم معاها وهي جايه اهو يتعرفوا على الولاد.
كريم : فريدة ازاي يعني يتعرفوا على الولاد هي عندها بنت ودول شباب يتعرفوا على بعض ازاي؟!
فريدة : يا حبيبي البنت الكبيرة هتقعد معانا وهي عندها ولدين كانوا هيعقدوا مع الولاد.
كريم : ولادنا مش في سن ولادها يا فريدة مفيش لزوم للحاجات دي انتي عاوزه تصاحبيها براحتك.
فريدة : هو أنت ليه مضايق من إني اصاحب الجيران يا كريم؟
كريم : مش مضايق يا فريدة لكن ولادك كبار وهي عندها بنت الاختلاط اللي بالشكل ده مش كويس ولو في حاجه في دماغك متكونش بالطريقة دي.
فريدة : خلاص اللي تشوفه.
كريم : أنا خارج عاوزه حاجه؟
فريدة : لأ سلامتك.
كريم : حاولي تخلصي مع ندى بسرعة علشان ترجعي بدري.
فريدة : حاضر.
________
في فيلا مراد.
نورهان : عد الجمايل بقى.
مراد ساكت مبيتكلمش.
نورهان : بقولك عد الجمايل.. يلا عد.
مراد : هههههههههههه عدتهم يا عمتو ومتشكر قوي للي قولتيه هناك.
نورهان بابتسامة : مامتك قالت لك؟
مراد : طبعاً.
نورهان : عارف لو مامتك راحت لوحدها كانت هتيجي ايد ورا وايد قدام.
أمل جايه بالشاي والكيك : لا يا شيخه!
نورهان : هههههههههههه تنكري إن أنا اللي اقنعت العروسة وأمها؟
أمل : بصراحة مقدرش انكر.
هشام نازل من فوق : يلا يا مراد.
مراد : طب ما اروح معاهم يا بابي اوصلهم لحد هناك.
أمل : ليه يا حبيبي ما أنا معايا العربية وعمتك كمان.
نورهان : هههههههههههه عاوز يزوغ من الشغل النهاردا علشان يشوف عروسته.
مراد ونظر لوالدة بارتباك : أنا؟
لا لا أنا كنت هوصلكم بس وارجع الشركة على طول.
هشام : يلا يا مراد علشان تشوف شغلك.
نورهان : واحنا بنفرجها على الشقة هنوصلها السلام متقلقش.
أمل : هههههههههههه
مع السلامة يا هشام.
هشام : متتأخروش.
أمل : ماشي يلا يا مراد.
زينة نازله من فوق لابسه وجاهزة علشان تخرج معاهم.
مراد : يعني زينة تروح معاكم وأنا لأ!
زينة : معلش بكرة تسكن فيها يا اخويا مستعجل على ايه؟!
مراد : كده طيب سلام علشان بابي بينادي.
أمل : يلا يا نور.
نورهان : يلا يا أمل.
زينة : طب وأنا؟
نورهان تمسك ايدها : هههههههههههه تعالي معايا.
_________
في شقة مرسى مطروح.
سيف : هههههههههههه ايه مالك نايمه كده ليه؟
كانت مليكة نايمة في نص الريسبشن.
مليكة : السفر بالباص دا متعب قوي أنا ضهري وجعني.
سيف : معلش يا حبيبتي ألف سلامة عليكي نامي وبعدين بالليل نبقى ننزل نتمشى على البحر شويه.
مليكة : لأ ننزل دلوقت.
سيف : مش بتقولي ضهرك واجعك؟
مليكة : ما هو أنا مش هعمل حاجه هاخد يوسف بس في أيدي وأنت بقى تاخد حلا.
سيف : حاضر.
مليكة : ايه مالك؟
سيف : مش كانت الرحلة دي تبقى ليه أنا وانتي وكنا نسيب الولاد مع مامتك ولا حتى مع ياسمين اختي اهي في اجازة دلوقت وفاضيه.
مليكة : أنت متخيل إني ممكن أنام ولا يجيلي نفس أكل وولادي بعيد عني؟!
سيف : لا طبعًا.. خلاص يا مليكة نحاول نستمتع بوقتنا بالوضع ده هنعمل ايه.
مليكة : هتشوف هنعمل ايه.. يلا علشان يوسف عاوز ينزل المياه.
سيف : دلوقت؟
مليكة : اه وفيها ايه دا أنت هتلاقيه دلوقت بيغير هدومه ولبس المايوه.
سيف : هههههههههههه
مليكة : بتضحك على ايه؟
سيف : لفي كده وشوفي.
قامت مليكة واستدارت الناحية التانية لاقت يوسف غير هدومه ولبس المايوه.
مليكة : هههههههههههه مش قولتلك.
سيف : دا يا حبيبي هنلبسه هناك مش هنا
غيريله يا مليكة وهاتي المايوه في الشنطة.
مليكة قامت : حاضر تعالى معايا يا سوفه.
سيف لحلا : بتعيطي ليه عاوزه تلبسي زي يوسف.
وبيشيلها علشان تبطل عياط : حاضر هلتبسي المايوه وانزلك البحر بالعوامه بتاعتك
مليكة معلش لما تغيري ليوسف اعملي لينا حاجه سريعه كده ناكلها علشان جوعت.
مليكة من جوه : حاضر.. هات ايدك يا يوسف بقى
زعلان ليه ما احنا هننزل اهو بس لما ناكل.. مجوعتش؟
يوسف : لأ عاوز انزل.
مليكة : حاضر.
وخرجت بره : ثواني هعمل ساندوتشات.
سيف : ماشي.
__________
في المحكمة.
آسر : آسر علي إبراهيم الحسيني سته وخمسين سنة.
محامي وليد أمام القاضي : ليه يا أستاذ آسر والدة حضرتك كتبت ليك الفيلا بـ إسمك رغم إنك مفترض يعني هتكون الوريث الشرعي الوحيد ليها؟
آسر : معنديش إجابة على السؤال ده.
محامي وليد : والدتك تزوجت قبل كده بعقد غير رسمي؟
التفت آسر ونظر لوليد نظرة عتاب وإنه مكانش حابب يتفتح الموضوع ده.
المحامي : مجاوبتش يعني.
محامي آسر : حضرتك ايه أهمية سؤال زي ده في القضية؟
محامي وليد : اعتبره يا متر مجرد سؤال ملوش أي أهمية ومش لازم موكلك يجاوب عليه.
آسر : دا فعلا حصل لكن الزواج ده تم بطلانه لإنه متوافرتش فيه كافة الشروط دا اللي قالته المحكمة وقتها بالإضافة إن مكانش فيه أي علاقة زوجية مجرد ورقة اتكتبت.
محامي وليد : ايه السبب؟
آسر نظر للقاضي اللي لاقى مفيش أي داعي من الأسئلة دي خصوصا إنها بعيده عن القضية اللي بيتم النظر فيها.
محامي وليد للقاضي : تمام سعادة المستشار.
محامي آسر بيقدم العقود اللي تثبت ملكية ملك للفيلا عن طريق عقد بيع وشراء من طليقها والد ابنها وعقد تاني بـ انتقال ملكية الفيلا من ملك لـ ابنها الوحيد بموجب عقد بيع وشراء منها له.
ورجع آسر قعد مرة تانية ووليد بيحاول يتجاهل النظر له.
محامي وليد بيقدم عقود قديمة بملكية والده للفيلا.
اتأجلت القضية للشهر الجاي.
خرج آسر ووليد من قاعة المحكمة.
آسر : استريحت دلوقت يا وليد لما جيبت سيرة أمي في القضية؟!
وليد : أنا معرفش إن المحامي هيسأل سؤال زي ده وبعدين طالما مكانش في جواز والمحكمة حكمت ببطلانه ونفت إن في علاقة اصلا بين مامتك والمتهم اللي قتلها خلاص ايه اللي مضايقك دلوقت.
آسر : للأسف أنت حتى مش حاسس إنك غلطان
بس هكسب القضية يا وليد.
وليد : هنشوف.
آسر : حتى لو أنت كسبتها هتبقى خسران.
وتركه آسر واقف لوحده.
_______
في شقة مراد الجديدة.
أمل : ها ايه رأيك يا مريم؟
مريم : جميلة قوي يا طنط.
كانت ياسمين بتخبط على الباب.
أمل : اهي ياسمين جات تعالي يا ياسمين.
بتسلم ياسمين على كل اللي موجودين وبتعزم عليهم بالغدا تحت.
ياسمين : دي مش عزومه علشان صحاب المكان مبيتعزموش في بيتهم.
نورهان : سامعه يا مريم
ههههههههههههه
مريم : متشكره قوي يا ياسمين دا من ذوقك بس...
تقاطعها نورهان : بس ايه أنا هنزل اتغدا في شقة ابن اخويا من ايد مراته حد جاي معايا؟
أمل : هههههههههههه يلا يا هنادي يلا يا مريم.
هنادي : مكانش له لزوم التعب ده.
ياسمين : تعب ايه بس هو أنا عملت ايه يعني اتفضلوا معانا امال فين زينة؟
كانت زينة واقفه في البلكونة بتتكلم في التليفون
مع مجدي.
في التليفون... 📞
زينة : معرفش هنمشي امتى.
مجدي : عارفه أنا مشوفتكيش من امتى؟!
زينة : مش من بعيد يعني يا مجدي
مش عارفه كان يوم فرح عبدالرحمن ابن عمتي.
مجدي : هو أنا أصلا عرفت اقعد معاكي.
زينة : وبعدين بقى؟!
هقول كل لما نتكلم مع بعض لازم نتخانق.
مجدي : طب زي ما روحتي تشوفي شقة مراد اخوكي تعالي شوفي شقتك ومامتك معاكي اهو يعني ملكيش حجه.
زينة : حاضر يا مجدي هقول لمامي وابقى اكلمك
اقولك لو جايين علشان تعمل حسابك.
مجدي : اما اشوف.
زينة : طيب سلام بقى علشان مامي بتنادي.
_________
مليكة : يوسف اطلع بقى من المياه سيف روح هاته.
سيف : سبيني مريح هنا شويه يا مليكة تعبت من ساعة ما جينا وأنا عمال الاعب يوسف في المياه.
مليكة : يعني اروح أنا اجيبه؟
سيف مردش.
مليكة قامت تجيب يوسف من المياه.
مليكة : لأ يلا اطلع بابي مش هينزل تاني خلاص.
يوسف : شويه كمان.
مليكة : مينفعش اسيبك لوحدك.
يوسف : خلاص خليكي معايا.
مليكة : واسيب أختك لوحدها لا مينفعش تعالى يلا يمكن شويه كده بابي ينزل المياه تاني.
يوسف : لأ قولتي بابي مش هينزل.
مليكة : أنا قولت يمكن يلا بقى يا يوسف علشان أختك لوحدها.
كانت مليكة عينها من حلا لإن سيف تقريبا نام.
مليكة : يلا بقى.
يوسف وهو زعلان : طيب.
بتخرج مليكة يوسف من المياه ومقربه من الشط شاب معدي يخبط فيها.
الشاب : أنا آسف ماأخدتش بالي.
يوسف : ماأخدتش بالك يعني ايه مش هنا في عينين؟
مليكة : يوسف يلا.
الشاب : دا ايه اللماضه دي؟!
جري يوسف ناحية والدة ومليكة كانت جايه وراه.
سيف قام بسرعة : فين ده؟
مليكة : هو مين؟
سيف : الواد اللي كان بيتخانق معاكي.
مليكة : محدش اتخانق معايا.
يوسف : هناك اهو يا بابي.
مليكة مسكت ايد سيف : رايح فين محصلش حاجه.
سيف اسمعني.. سيف.
سيف كان سابها وراح لـ الشاب اللي شاور عليه يوسف.
مليكة : عاجبك كده جايين احنا هنا نعمل مشاكل صح.. طيب يا يوسف بس اما نروح.