أنت قلبي الجزء الثالث

الحلقة ٨٥

#انت_قلبي٣
________
الحلقة ٨٥

سهر اخدت شنطتها وقايمه : طيب يا منه بعد إذنك.
سلمى نظرت لسهر بابتسامة وفرحه : ازيك يا سهر اخبارك ايه وحشاني؟
سهر مكمله وماشيه مسكت سلمى ايدها ووقفتها : أنا آسفة عارفه إنك زعلانه مني حقك عليه يا سهر وادي راسك اهيه ابوسها.
وبتبعد عنها سهر.
سلمى : مش عاوزه نتصالح ونرجع أخوات زي زمان؟
سهر : أخوات!
أنا مليش أخوات.. منه أنا ماشيه وابقي ردي عليه
في الموضوع اللي كلمتك فيه.
منه : اوك يا سهر مع السلامة.
بتفتح سهر باب الشقة وخرجت.
ندى نظرت لمنه وعينها مدمعه.
منه : ايه عاوزاني اعملك ايه أنا دلوقت؟!
___________
في شقة كمال ونادين.
مليكة : يا حبيبي اقرا كويس رَجُل.
يوسف : لجُل.
مليكة : رَ.. رَ.. رَ
شايف بنطقها ازاي؟
يوسف : لَ.. لَ.. لَ.
مليكة : لاااا أنت مفيش فايدة فيك.
سيف : مليكة وطي صوتك مش عارف اسمع الماتش.
مليكة وهي مضايقه : ماتش ايه؟!
هدى : كنت نزلت اتفرجت عليه على القهوة اللي تحت.
سيف : ياريتني عملت كده بس تلاقيها زحمة دلوقت كان مفروض حجزت من بدري.. يا أخي العب بقى أنت مستني الكرة تيجي في رجلك علشان تشوطها؟!
هدى نظرت لسيف بتنهيدة.
سيف : هدى معلش لو ممكن تعمليلي كوباية شاي.
هدى ونظرت لمليكة اللي كانت مشغوله مع ابنها
وبتنهيدة : حاضر.
لمحتها مليكة وهي قايمه بس متعرفش هي داخله تعمل ايه في المطبخ.
كمال خارج من جوه : هو البتاع ده لسه شغال؟
سيف وهو متوتر : لسه يا بابا ودخل فينا جون.
كمال : طب متحرقش دمك كده دي في النهاية لعبة يعني.
سيف : بس لو كسبنا هنفرح يا بابا.
كمال : ها يا مليكة يوسف عامل معاكي ايه؟
مليكة : حرف اللام مش عاوز يظبط معاه يا عمي.
يوسف يقوم وفي ايده الكراسة : بص يا جدو أنا بقول لمامي لَ.. وهي تقولي غلط.
كمال : طيب يا حبيبي
معلش يا بنتي بكره النطق بتاعه يتعدل.
سيف يزق يوسف : وسع كده أنت واقف مش مخليني عارف اشوف.
يوسف : بابي أنت وجعتني.
مهتمش سيف فقامت مليكة.
مليكة : ايه يا سيف أنت مش شايف الولد قدامك ولا ايه وبعدين ماتش ايه ده هو أهم من ابنك يعني؟!
سيف وهو متعصب ومتوتر من نتيجة الماتش : مليكة ممكن تسكتي دلوقت لحد ما الماتش يخلص؟
مليكة : تعالى يا يوسف هنا.
واخدته قعد جنبها.
هدى : الشاي.
سيف مردتش.. كان الماتش بينتهي.
سيف : اهو الماتش خلص ارتحت كده؟!
كان بيوجه كلامه ليوسف.
مليكة : وهو عمل ايه وبعدين احسن إنهم خسروا.
سيف قام وهو متنرفز ودخل جوه.
كمال : تعالى يا يوسف اما أقولك.
يوسف : نعم يا جدو.
كمال بيخرج شيكولاته من جيب القميص : امسك الشيكولاته دي مكافأة مني ليك علشان قرأت كويس مع ماما.
مليكة : قول لجدو شكرًا.
يوسف : شُكلًا.
مليكة : اسمها شُكرًا..
كمال : خلاص بقى بكره ينطقها صح.
كمال : هاتي يا هدى الشاي ده طالما اخوكي مش شاربه.
هدى : قالي اعمليلي شاي علشان ياعيني يستمتع بالماتش بس اهو اتغلبوا.
كمال : يابنتي اهي في الأخر لعبة أنا لا ليه في الكرة ولا بحبها أصلًا.
مليكة : أحسن يا عمي بابي كمان ملوش في الكرة
ولا بيحب يتفرج عليها.
هدى : طب ودا ماله ومال إنك تحترمي زوجك
وتتكلمي معاه كويس؟!
نظرت مليكة لكمال.
كمال : ايه اللي بتقوليه دا يا هدى؟
هدى : حضرتك يا بابا مش سمعتها وهي بمنتهى قلة الذوق بتقول لجوزها أحسن إنهم اتغلبوا الواحدة تراعي مشاعر جوزها في موقف زي ده.
مليكة : أنا قليلة الذوق يا طنط؟!
وبعدين هو سيف كان أشتكى لحضرتك؟!
هدى : سامع يا بابا؟
كمال : أنتي بتدخلي في اللي ملكيش فيه ليه من الأول؟!
قامت مليكة دخلت جوه.
هدى : يعني ايه مليش فيه هو الكلام دا مكانش قدامنا؟!