أنت قلبي الجزء الثالث

الحلقة ١٦٥

#انت_قلبي٣
__________
الحلقة ١٦٥

في فيلا كريم.
فريدة قاعدة منتظرة رجوع كريم من بره تسمع صوت العربية وهو بيركنها في الجراج تنزل جري تطمن عليه.
كريم : انتي لسه صاحيه يا فريدة؟
فريدة : ايه اللي أخرك كده وايه الدم اللي على القميص ده؟
كريم : مش أنا اللي كنت بسعف هشام.
فريدة : اه صح طيب عملتوا ايه؟
كريم : روحنا المستشفى عملنا تقرير طبي وبعدها روحنا القسم عملنا محضر والولاد كانوا متحفظين على الست وسلموها للقسم وهناك اعترفت بكل حاجه.
فريدة : ايوه
اللي هو ايه بقى اللى اعترفت بيه؟
كريم : مطلعتش على المحضر يا فريدة ومعرفش ايه قالته اللي عرفته إنها اعترفت بالجريمة اللي كانت ناويه تعملها.
فريدة : أنا لو كنت مسكتها كنت قتلتها.
كريم : اه وهي ماسكه السكينه صح؟!
فريدة : ضيعت عليهم فرحتهم كانوا يا حبايبي خارجين فرحانين والفرح اصلا كان جميل قوي.
كريم : كويس إنها جات على قد كده ولو على اللي حصل يعني بكرة ينسوا.
فريدة : مفيش حاجه بتتنسي يا كريم وخصوصا في الليلة دي.
كريم : عندك حق علشان كده ضيعتيها عليه وقضناها في المستشفى.
فريدة : انت مش عاوز تنسى؟!
كريم : هههههههههههه مش انتي اللي لسه قايله مفيش حاجه بتتنسي في الليلة دي اهو أنا بقى مش ناسي حاجه.
فريدة : خلاص بقى يا كيمو ما احنا عيدناها كلها من أول وجديد ههههههه
كريم : بس مش زي أول مرة برضو دي بيبقى ليها طعم تاني.
فريدة : هههههههههههه خلاص بقى يا حبيبي روق كده واطلع خُد شاور علشان تنام.
كريم : دا أنا عاوز اتقتل نوم.
فريدة : طب يلا بينا.
كريم : الولاد ناموا؟
فريدة : اه بعد ما جينا كده فضلوا صاحيين قولتلهم ناموا ولما بابي يجي هصحيكم.
كريم : لا يصحو ايه خليهم نايمين وجميلة عامله ايه؟
فريدة : قعدت تعيط اتخضت من اللي شافته.
كريم : يا حبيبتي.. وفضلتي معاها لحد ما نامت؟
فريدة : اه ما سيبتهاش لحد ما راحت في النوم.
__________
في فيلا مراد.
هشام الابن بيفتح باب الغرفة وداخل علشان ينام.
ياسمين تقوم وبصوت ناعس : هشام أنت جيت يا حبيبي ؟
هشام : هما الولاد نايمين جنبك؟
ياسمين : اه ثواني هدخل انيمهم في اوضة تانية.
هشام : لا خليهم نايمين أنا هنام في اوضة زينة ولا جدو تصبحي على خير.
ياسمين : وأنت من أهل الخير يا حبيبي هو عمي جه معاك؟
هشام : اه كلنا رجعنا بالسلامة ارجعي نامي بقى
هقفل الباب.
________
في فيلا آسر.
سهر : يا بنتي باتي هنا هتروحي ازاي دلوقت؟!
مليكة : سيف مش هيعرف ينام أنا عارفه و مينفعش اقوله روح لوحدك.
سهر : طيب يا حبيبتي خلي بالك من نفسك.

آسر : كنت بت معانا هنا يا ابني أنت مش اجازة بكرة من الشغل برضو؟
سيف : ايوه
يا عمي بس معلش مش هينفع.
مليكة نازله من فوق ومعاها حلا ياخدها منها سيف ويخرج وهي تسلم على باباها واخواتها وتخرج.
آسر : عمار خُد مراتك واطلعوا ناموا.
نظر عمار لملك.
آسر : أنت مكسوف ولا ايه يا ابني البيت بيتك ولا أنت مش حاسس بده ولا ايه؟
عمار : لا يا خالو طبعا بيت خالي زي بيتي بس معرفش بقى هعرف أنام ولا ايه.
سهر بابتسامة : هتعمل زي مليكة ولا ايه بقولها خلي جوزك يبات هنا تقول مش هيعرف ينام.
ملك : أنا لما اتجوزت فضلت أكتر من شهر عقبال ما نومي اتظبط كنت بتحايل عليه يجي ودا أبدًا هههههه بعد ما جه سليم بقى بقيت بتمنى أعرف أنام ساعة على بعضها.
سهر : اهو سليم كبر نامي براحتك.
آسر : اطلع نام يا علي.
علي بيقوم : طيب تصبحو على خير.
_________
في الصباح في فيلا مراد.
شادي بيشيل المخده اللي على دماغ مراد اللي نايم على الكنبه في الريسبشن..
مراد بصوت ناعس : ما بتبطل رخامه بقى يا شادي.
شادي : أنت نايم كده ليه؟
مراد : معلش امال أنام ازاي يعني؟!
أمل من على السفرة : مراد شادي تعالوا علشان تفطروا.
شادي : حاضر يا مامي.
مراد : أنا مش هفطر محدش يعمل حسابي.
شادي : ليه يا حبيبي ملكش نفس؟
مراد : معرفتش أنام طول الليل صاحي.
شادي : هههههههههههه معلش مفيش حاجه بتيجي بالساهل.
أمل : مراد مريم هتنزل تفطر؟
مراد : لأ مريم نامت ما صدقنا الصغيرة نامت.
أمل : يا حبيبي طب محبتهاش ليه أنا صاحيه من بعد الفجر.
مراد : اجيبها فين بس يا مامي حضرتك عاوزه بابي يطردنا من البيت.
شادي : هههههههههههه