أنت قلبي الجزء الثالث

الحلقة ١١٤

#انت_قلبي٣
__________
الحلقة ١١٤

شادي : اه وبعدين؟
ليلى : لاقيتها داخله وعماله تحضن فيه و يا حبيبتي ويا ريحة الغالي وابنها كمان.
شادي بغضب : ابنها مين؟!
ليلى : اهدا يا شادي في ايه؟ ابنها اللي هو اخويا.
شادي : والأستاذ قعد يحضن هو كمان؟!
ليلى : مش اخويا يا حبيبي.
شادي : وانتي ايه اللي أكدلك إنه اخوكي أو الست دي اصلا كانت متجوزه باباكي ثم كل السنين دي متعرفكيش ولا مرة حاولت تخليكي تتقابلي بـ اخوكي ده وجايه النهاردا علشان توصل ما بينكم؟؟!
ليلى : ليك حق تقول كده أنا استغربت بس اتأكدت إنه اخويا فعلاً كان معاه البطاقة وشهادة الميلاد.
شادي : طيب وبعدين؟
ليلى : هو شكله عاوز الشقة بتاعة جدو ادهاله يتجوز فيها وخلاص أنا ميلزمنيش حاجة منها هو أولى صح كده؟
شادي : براحتك.
ليلى : كمان كانت طالبه اشغل عادل.
شادي : عادل مين؟
ليلى : اخويا يا شادي هو أنا هفضل كل شويه افكرك.
شادي : معلش أصل لسه ماأخدتش على الوضع الجديد ده.
ليلى : مش عارفه حاسه كده بإحساس غريب فرحانه وفي نفس الوقت خايفه.
شادي : بصراحه أنا كمان قلقان.. كملي.
ليلى : بس كده.
شادي : وعاوزك بقى تشوفي له شغل فين في المدرسة؟
ليلى : هو مؤهل متوسط.
شادي : تمام.. ايه المطلوب؟
ليلى : تشغله عندك في الشركة.
شادي : هشغله ايه؟
ليلى : شوفله حاجة مناسبة.
شادي : معرفش يا ليلى لما بابي يرجع بالسلامة بقى.
ليلى : هو خالو جاي امتى؟
شادي : كلم مامي النهاردا واحتمال كده ينزل الاسبوع ده.
ليلى : بجد وحشني قوي.
شادي : دا أنا اللي لايص ومستني رجوع بابي بفروغ الصبر.
ليلى : هو انكل آسر خف خلاص؟
شادي : اللي عرفته إنه خرج من المستشفى ولسه بقى فترة المتابعة اللي بعد العملية دي علشان يطمنوا يعني إن كل حاجة تمام وقتها يقدر ينزل مصر لكن بابي بقى هيقعد معاه هينزل لسه مش متأكد اقفلي النور ده عاوز أنااااام.
ليلى : حاضر يا حبيبي تصبح على خير.
___________
في شقة طارق.
مريم : أنا مش فاهمه حاجة ازاي بعد ما حضرتك قولتيله الكلام ده
لسه مصمم يتمم الخطوبة؟! ثواني كده هي طنط أمل عارفه الموضوع إياه ده؟!
هنادي : حبيبتي أنا كنت قولتلها بحيث يعني تنصحني اعمل ايه هي كبيرة عني وعندها خبرة أكتر مني وياما مر عليها حاجات كتير فقولت استشيرها واخد رأيها.
قعدت مريم بحزن.
هنادي : اطمني يا مريم طنط أمل دماغها كبيرة وفاهمه الموضوع اللي زي ده ازاي بيتم استدراج البنات بـ اسم الحب الوهمي ده وأنا من كتر خوفي عليكي كنت هتصرف غلط وبما إن مليش اخوات بنات فأنا بـ اعتبرها أختي الكبيرة وباخد رأيها وهي حاولت تنقذ الموقف.
مريم : قصد حضرتك كدبت على ابنها وماقالتش إن دا كان برضى مني.
هنادي : حبيبتي كلنا بنغلط وكويس جدًا إننا نندم ونتوب ومنرجعش للغلط دا مرة تانية.
مريم : لكن هي عارفه الحقيقة يا ماما ومهما قالت لحضرتك إن الحوار ده مش فارق معاها مع احترامي ليها يبقى بتضحك على نفسها هتفضل شاكه فيه وفي تصرفاتي.
هنادي : لا يا مريم هي عارفه أنا مربياكم ازاي يا حبيبتي واللي حصل دا كان غلط وسهو مني أنا انشغلت عنك في الوقت ده.
مريم : مفيش مبرر أبدًا للي عملته دا يا ماما
حضرتك بتقولي الكلام ده علشان متزعلنيش وبعدين حضرتك انشغلتي في الدروس علشان توفري ليه مصاريفي واقدر اخد دروس واذاكر زي زمايلي
أنا ندمانه بجد ومش عارفه اعمل ايه أنا كده هكون ببدأ حياتي معاه بالغش ودا مش كويس.
هنادي : الغش ده لو في ضرر عليه فيما بعد لكن دي كانت غلطت وانتهت طالما انتي عزمتي وقررتي متعديش اللي حصل ده مرة تانية يبقى هو له اللي هيحصل منك بعدين مش قبل كده.
مريم : وطنط أمل؟!
هنادي : ما قولتلك هي عارفه كل حاجة وفاهمه الحوار تم ازاي وأنتهى على ايه ومعندهاش أي مشكلة انسي بقى وابدأي صفحة جديدة.
مريم : خايفه.
هنادي : لا متخافيش طول ما انتي مبتعمليش حاجة غلط.
مريم : هدخل أنام تصبحي على خير يا ماما.
___________
في العربية.
ندى : طب اهدي بس ايه اللي مزعلك دلوقت لو علشان يعني فريدة كلمتني وروحت عندها فأنا آسف.
ندى : لأ علشان كل حاجة.
حازم : خلاص اعتبري إني مقولتش حاجة.
ندى : يعني ايه؟
حازم : يعني لو مزعلك إني طلبت منك نرجع لبعض وتديني فرصة تانية اعتبري إن دا محصلش.
ندى : يعني دا أخر كلام عندك؟
حازم : ندى انتي عاوزه ايه أنا مبقتش فاهمك.
ندى : عاوزه الأمان عاوزه راجل بجد ياخد باله مني يحبني ويحترم مشاعري يقدرني زي ما قدرته يحافظ على بيتي زي ما حافظت على بيته.
حازم : أنا آسف يا ندى.
ندى : مش هتقدر تعمل ده صح؟
حازم : هو دا طلبك ليه ولا ايه مش فاهم؟!
ندى : يعني بعد كل اللي قولته دا مش فاهم أنا أقصد ايه؟
حازم : طب وعدي ليكي مش كفاية؟
ندى : وعدت قبل كده وخلفت وعدك مش جديد يعني.
حازم : طب ايه الضمان
اللي تاخديه عليه علشان تبقى مطمنه إني هبقى ملتزم بتنفيذ اللي وعدتك بيه؟
ندى : ضميرك.. وللأسف مبثقش فيه.
حازم : يبقى ملوش لازمه الكلام ونقفل على كده بقى.
ندى : ايه ده زعلت ولا ايه
على العموم أنت حر.
حازم : أنا مش فاهمك يا ندى عاوزه نرجع ولا لأ؟
ندى : لأ.
كانوا وصلوا فوقف حازم بالعربية ونزلت ندى وطلعت فوق.
قعد حازم في العربية ورجع دماغه على الكرسي وغمض عينه.
يخبط علاء على الزجاج.
حازم يفتح الزجاج.
علاء بابتسامة : ايه أنت نمت ولا ايه؟
حازم : لا كنت بريح دماغي شويه.
علاء : طب انزل عاوزك.
حازم بينزل حازم ويقفل باب العربية : خير.
علاء : ما تيجي نقعد جوه واطلبك حاجة تشربها.
حازم : لأ قول عاوز ايه علشان اطلع أنام.
علاء : مستعجل على ايه لسه بدري.