أنت قلبي الجزء الثالث

الحلقة ٤٠

#انت_قلبي٣
___________
الحلقة ٤٠

في فيلا مراد.
شادي : اتفضل انزل.
مراد : باباك جوه.
شادي : عارف.
مراد : راجع النهاردا بدري يعني.
شادي : معلش خليها عليك شويه مش فكيت الجبس اتفضل انزل لوحدك بقى.
مراد : حاضر.
ينزل مراد من العربية.

هشام : نور ما قالتش رايحه فين؟
أمل : لأ... بصراحة كمان قومت متأخر كنت تعبانه قوي دوق الصنف دا وقولي رأيك.
هشام : طول عمر أكلك لذيذ تسلم إيدك يا حبيبتي.
أمل : آه لما بتكون رايق.
هشام : شادي ومراد جم.
أمل : آه ما أنا شايفه.
تقوم أمل وهي فرحانه إنها شايفه ابنها ماشي على رجله.
مراد : هو أنا راجع من السفر يا مامي؟
هشام : غلطانه مكانتش حضنتك ولا قامت من على الأكل.
شادي : بصراحة أنا جعان وهروح جري أغسل ايدي.
أمل : ليلى رباب طلعتلها الأكل فوق.
شادي : أطلع أكل فوق يعني؟
هشام بابتسامة : مامي مش قصدها هي بتقولك يعني متقلقش ليلى أكلت.
شادي : ما أنا عارف بس بتلكك.
أمل : خلاص اطلع كُل فوق.
شادي : اوك واللي يرجع في كلامه؟
أمل : يبقى عيل علشان رباب نزلت الأكل بعد ما ليلى أكلت.
شادي : ايه دا بقى؟
هشام : اغسل ايدك وتعالى كُل وأنت يا مراد ايه مش ناوي تيجي تاكل؟
زينة نازله من فوق : وأنا محدش هيقولي تاكلي يا زنزونة؟!
هشام : هاتي واحدة هنا الأول.
تُقبل خد والدها.
هشام بابتسامة : اقعدي.
زينة بابتسامة : حاضر.
هشام : وأنت يا أستاذ مش جاي ولا ايه؟
مراد : هاجي حاضر.
أمل : ايه يا شادي رايح فين؟
شادي : هغير هدومي.
أمل : اوك يا حبيبي فكرتك نسيت الأكل.
شادي : ودي حاجه تتنسي.
أمل : شوفت يا هشام لما بترجع بدري من الشغل بنتجمع كلنا ازاي على سفرة واحدة.
هشام : سفرة واحدة ازاي وحضرته لسه بيشاور عقله هياكل ولا لأ.
مراد : حاضر هغسل ايدي وجاي.
أمل : بالراحة عليه يا هشام.
هشام : شايفني بعذبه؟!
أمل : لأ بس أنت حتى مقولتلوش كلمة حلوة من ساعة ما جه.
هشام : هقوله كلام حلو لما حاله يتعدل.
أمل : طيب براحتك تعالى يا شادي هنا.
هشام : رايحه فين؟
أمل : هقعد هنا علشان شادي يقعد جنبك.
هشام : بس أنا عاوزك تفضلي قاعدة هنا.
أمل بابتسامة : طيب.
شادي : وأنا مكونتش هقوم مامي من مكانها.
أمل : طب كُل يا حبيبي تعالى يا مراد هنا اقعد جنب أختك.
مراد : حاضر.
أمل تقرب منه الطبق بتاعه وتزود كمان.
مراد : مش هاكل كل ده.
أمل : كُل يا ابني علشان تتغذا شايف بقيت عامل ازاي.
مراد : دا من قعدة البيت.
هشام : صحتك بتيجي على الشقاوة مش كده؟
مراد : بابي أكل ولا أقوم أطلع أوضتي؟
أمل : لا يا حبيبي كُل بابي خايف عليك.
تغمز أمل لهشام.
هشام : طب كُلي أنتي كمان طبقك زي ما هو.
أمل بابتسامة : حاضر.
________
في فيلا ماهر.
سامية : طب عاوزاني أعملك ايه لا عايزة تاكلي ولا عاوزه تتكلمي معايا خالص وحتى فتحتي الباب بالعافية ايه يا بنتي عاوزه تموتي نفسك ولا ايه؟
رغد : لو مش حرام كنت عملتها.
سامية : ليه كده بس يا رغد عاوزه تحرقي قلبي عليكي.
رغد : وانتي قررتي ليه تحرقي قلبي وتعيشيني
مع أب غير ابويا وحرمتيني منه حتى مبقتش قادرة أعيش مع ده ولا ينفع ارجع للتاني دا كمان علشان مش حساه ومصدومه فيكم كلكم ليه عملتو فيه كده علشان الفلوس صح؟
سامية : غلطت وعارفه إن صعب تسامحيني بس افتكري إني مامتك كنت عاوزه ليكي حياة كويسه. رغد : وهي دي الحياة الكويسه من وجهة نظرك طب ازاي؟ مااستنتيش ليه لما أكبر ومتعجبنيش الحياة معاكم وتخيريني تقوليلي ها يا رغد عاوزه تعيشي مع بابي ده ولا اختارلك أب تاني عاوزه تسيبي الشقة الصغيرة دي وتروحي تعيشي في فيلا كبيرة ولا لأ ليه اخترتي أنتي كل حاجه ومفروض أنا أقبل بالأمر الواقع وأعيش في بيت كله كذب في كذب لا دا بابي ولا دا بيتنا ولا حتى أمي اللي بحبها أكتر حد في الدنيا وشايفاها ست عظيمة فضلت نظرتي ليها زي ما هي لأ كل شيء تغير أنا مش عاوزه حياتكم دي سيبوني أعيش حياتي بقى واختار لنفسي الحاجه اللي بحبها طالما كل واحد بيفكر في اللي يريحه وبس وميهموش حياة غيره.
سامية : مكانش قصدي أذيكي.
رغد : بس أنتي أذتيني ومستغربه دلوقت أنا مضايقه وزعلانه ليه بجد مش لاقيه كلام تاني اقوله سيبيني في حالي يا مامي ياريت لو تنسيني خالص لو سمحتي.
سامية : أنا هسيبك دلوقت علشان عارفه إن أعصابك تعبانه بعدين هنبقى نتكلم لما تروقي كده وترجعي لحالتك الطبيعية.
رغد : عمري ما هرجع زي ما كنت انسوا.
____________
في فيلا آسر.
سهر : مليكة.. مليكة حبيبتي اعدلي دراعك علشان أخوكي يركب الكانيولا.
مليكة بصوت ناعس : مين؟
سهر : علي عاوز يركب الكانيولا علشان مش كل شويه نشكشكك.. اللي ركبها الدكتور خلعتيها وأنتي نايمه.
مليكة : أوك بس خليه يعمل عصير فراولة بس ميحطش عليه لبن مش هشربه.
علي : هههههههه لا دا أنتي رايحه في النوم مش حاسه بـ أي حاجه.
ملك : أنا عارفه ايه اللي هيفوقها قومي يا مامي سيف جه تحت.
سهر : ولا هتسمعك دي شكلها واخده منوم.
علي : الدوا اللي أخدته تقيل شويه.
بيعدل دراعها ويركبلها الكانيلا.
علي لملك : ايه حاسبي.
مليكة : بتعملي ايه يا ملك؟
ملك : ميكب خفيف كده  وشك مجهد وعينك دبلانه
غمضي عينك؟
مليكة : بتعملي ايه أنتي؟ أنا تعبانه.
سهر تخرج من الغرفة.
ملك : معلش تعالي على نفسك شوية جوزك هيطلع يطمن عليكي مينفعش يشوفك كده.
علي : اللي بيحب حد بيستحمله في كل الأحوال.
ملك : دا كلام أفلام يا حبيبي ملناش دعوة بيه بكرة نشوفك هتعمل ايه.
علي : هعمل ايه يعني هو البني آدم دا ملوش حق يتعب ولا نغيره وقتها؟!
ملك : بقولك ايه بكرة نشوف وسع كده.
في ايدها فرشة الشعر وبتسرح لمليكة.
علي : أخرج أنا بقى طالما قلبتيها كوافير.
ملك : يكون احسن برضه.
علي : بس حاسبي علشان في ايدها كانيولا.
ملك : متخافش واخده بالي.