#انت_قلبي٣
___________
الحلقة ٩٥
في فيلا كريم.
زين بيخبط على باب المكتب.
كريم : ادخل.
زين : بابي كنت عاوز اتكلم مع حضرتك في موضوع مهم يا ترى الوقت مناسب ولا اجي لحضرتك في وقت تاني؟
كريم : مفيش مشكلة اقعد اشوف ايه الموضوع المهم ده.
زين بتردد : كنت عاوز اقول لحضرتك إني فكرت كتير وقررت إني أحول من الكلية.
كريم : تحول ايه؟!
زين بيبتلع ريقه ويجاوب : أحول من الكلية أنا بصراحة مش شايف نفسي فيها ولا حاسسها.
كريم : هي ايه اللي مش حاسسها؟!
فريدة بتخبط.
كريم : استني دلوقت يا فريدة لما نشوف حضرته بيقول ايه.
فريدة : هو فيه ايه يا كريم فيه ايه يا زين ما تتكلم؟
كريم : ما تجاوب سكت ليه؟
زين : هحول من الكلية بس هو دا كل الموضوع.
فريدة : تحول من الكلية ليه حصل ايه هناك خلاك فجأة تقرر القرار المهبب ده؟!
زين : هو أنا يعني مش من حقي أحب الحاجة اللي بدرسها ولا لازم حضراتكم بس اللي مفروض تقرروا اعمل ايه في حياتي؟
فريدة نظرت لكريم اللي كان قايم خارج من المكتب.
فريدة : رايح فين يا كريم؟
كريم : طالع أنام.
فريدة : عاجبك كده؟
زين : وأنا عملت ايه يعني هو دا مش حقي؟
فريدة : وحضرتك عاوز تحول من الكلية تروح فين بقى؟
زين : تجارة أو حقوق أي حاجة يعني مش هتفرق.
فريدة : يعني ايه مش هتفرق أنت معندكش أي طموح ولا في أي هدف في حياتك عاوز تحققه؟!
زين : فيه طبعاً أنا هتقدم للبنت اللي بحبها.
فريدة : تتقدم لمين؟!
زين : أتقدم للبنت اللي بحبها يا مامي فيها ايه دي كمان؟!
فريدة : لااااا دا أنت دماغك خلاص مبقتش فيك حب ايه وارتباط ايه وكلية ايه اللي عاوز تحول منها أنت حصلك ايه يا ابني ماتنطق أنت هتسيبني كده أكلم نفسي؟
زين : مامي ممكن اسأل حضرتك سؤال؟
فريدة : اتفضل بس جاوب الأول على السؤال اللي سألتهولك عاوز تحول من الكلية اللي أنت فيها ليه وحشه؟
زين : مش حوار وحشة يا مامي بس أنا مش لاقي نفسي فيها وكمان دي اختيار بابي.
فريدة : يا حبيبي صدقني الكلية اللي أنت فيها أي طالب في ثانوية عامة بيتمنى يدخلها هي صحيح ممكن تكون صعبة شوية بس صدقني بعد ما تتخرج وتشتغل مع بابي في المستشفى هتعرف إن دا أفضل قرار اخدته في حياتك وبابي هيساعدك يعني متقلقش ركز بس في دراستك ومع الوقت هتحبها بابي عاوز مصلحتك متزعلوش يا زين علشان خاطري.
زين : يعني علشان ميزعلش ألبس أنا في أي حاجة بابي يحبها ومختارش أي حاجة أنا بحبها؟!
فريدة : ما هو أنت نفسك مش عارف عاوز ايه يعني هتحول من طب تدخل كلية تانية بتحبها؟
طبعاً لأ يبقى ليه ما تخليك في اللي عرفته ليه تضيع سنه من عمرك ليه؟
زين : طب وبالنسبة لموضوع الارتباط دا بقى ايه رأيك لو ساعديني فيه أنا مستعد أصرف نظر عن موضوع التحويل ده.
فريدة : أنت بتساومني؟!
زين : مش مساومه يا مامي بس نفسي تحققوا ليه أي طلب وأنا مستعد أذاكر واجتهد وافرحكم بس فرحوني كتير عليه؟
فريدة : حاضر يا زين
هقول لبابي بس مش شايف إن لسه بدري على الخطوة دي تتخرج الأول يا حبيبي حتى تكون دماغك كبرت شوية وتعرف تختار صح.
زين : بس أنا حاسس إن اختياري صح.
فريدة : طيب مين البنت بقى اللى عاوز تتقدملها اعرفها أنا؟
زين : ايوه يا مامي.
فريدة : اوعي تقولي إنها سمر اخت أمجد صاحبك؟
زين : حضرتك عرفتي منين؟
فريدة : أنت بتتكلم جد ولا بتلعب بـ اعصابي هي ولا مش هي؟
زين : هي يا مامي.
فريدة : وملقتش غيرها تحبها ايه الدنيا ضاقت بيك للدرجة دي؟!
زين : مالها سمر بس يا مامي؟
فريدة : مالها!
اقول ايه.. أنا مش قادرة اتكلم بص ابقى اتكلم مع باباك في موضوعك ده وشوف رده ايه واللي هيقول عليه أنا موافقة عليه.
زين : علشان حضرتك عارف إن بابي هيرفض.
فريدة : مليش فيه كلمه وانتو أحرار مع بعض.
زين : كده يعني حضرتك مش عاوزه تساعديني
طب خلاص هحول من الكلية.
فريدة : اعمل اللي تعمله أنت هتهددني؟!
وقامت فريدة طلعت فوق وتركت زين قاعد لوحده.
______
في شقة كمال ونادين.
سيف : مليكة ويوسف نايمين يا بابا؟
كمال : ليه نايمين دلوقت دا أنا جايب ليوسف الشيكولاته اللي بيحبها قولت هاجي افرحه وألعب معاه شويه وجيبت اللي اسمها قنبله دي اللي مليكة بتحبها.
سيف : يوسف طول اليوم يتشاقى فمليكة اخدته تنيمه راحت نايمه جنبه.
كمال : هههههههههههه مامتك عملتها كتير وحضرتك السبب ذاك الشبل من ذاك الأسد.
سيف : أسد ايه بس يا بابا.
كمال : ايه مالك؟
سيف : مفيش أنا كويس.
كمال : سيف يا ابني متبقاش تضغط على مراتك.
سيف : أنا يا بابا؟!
كمال : بسمعك بودني وأنت بتزعق وهي بتحاول تمتص غضبك على قد ما تقدر بس لازم تاخد بالك إن مش دايمًا هيكون دا رد فعلها وأكيد مع الوقت والضغط عليها هتنفجر فخُد بالك قبل ما يجي اليوم ده وتندم.
سيف : أنا اوقات بحس إن مليكة لا شيفاني ولا سمعاني ولا حاسه بيه عايشه في دنيا تانية لوحدها وأنا كمان في نفس الوقت مش عاوزها تشاركني أي حاجة من الضغوط اللي عليه سواء من الأقساط اللي بتتخصم فلوسها من مرتبي ولا من المعمل اللي شبه مبيشتغلش ولا إني بجري بـ أقصى سرعة علشان اخلص الرسالة بتاعتي ويكون معايا شهادة اقدر اسافر بيها واشتغل واحسن وضعي المادي ولا إني لازم اشتغل بدل الشغلانه اتنين علشان اوفي احتياجاتها مش عاوزها تحس إني مقصر معاها في حاجة ولا إني معيشها في وضع أقل من اللي كانت عايشه فيه وطول الوقت دماغي شغاله وبتفكر ازاي اوزن بين كل دول وحاسس إني مش ناجح أكون زوج ولا أب وبروح الشغل وأنا مش حابه لكن مضطر لكده نفسي تفهمني من غير ما اتكلم أو اشرح كل ده وفي نفس الوقت بعذرها وبقول احنا اتجوزنا صغيرين وكل اللي كنا بنخطط ليه مع بعض مقدرناش نعمله ضغوط ضغوط لما خلاص حاسس إن دماغي هتنفجر.
كمال : هون على نفسك يا ابني ليه كل ده مفيش حد بيعمل كل اللي بتقول عليه ده في وقت واحد مستعجل على ايه على مهلك شويه.
سيف : ظروفي كده اعمل ايه اتجوزت واحدة من مستوى غيري خالص ولو قصرت في حاجة هتندم إنها ارتبطت بيه.
كمال : هي طلبت منك حاجة فوق طاقتك؟
سيف : لأ.
كمال : طيب امال عامل في نفسك كده ليه؟
سيف : مش هستنى تطلب يا بابا وأنا مقدرش انفذ لازم أكون عامل حسابي دايمًا وبسيب معاها مصروف يكفيها صحيح مبتطلبش بس لازم اعمل كده.
كمال : طيب ما أنت بتضيع كل ده بعصبيتك يا سيف يكفي إنك تعيشها في المعقول وتعاملها كويس دا أولى من إنك تحمل نفسك فوق طاقتها وترجع تتخانق في البيت انهي أولى قولي؟
سيف : أنا مبكونش عاوز ازعق ولا اتخانق وبرجع اصالحها وهي بتسامح.
كمال : طب واخرتها؟
أنت مفكر إنها هتفضل تسامح كده على طول مش هيجي عليها وقت وتزهق؟!
أنا داخل انام يا ابني تصبح على خير.
سيف : وحضرتك من أهل الخير.
أنت تقرأ
أنت قلبي الجزء الثالث
Werewolf(زواج _ حب _ صداقة) جمعت بين أبطال قصتنا لكن حياتهم مش دايماً هادئة ما تيجو نشوف الجزء الثالث من أنت قلبي و اللي مش متابع معانا من الأول يقدر يدخل على الأجزاء السابقه أو يبدأ معانا هنا 👈 حلقتين في الاسبوع..
